5 Musa

24 “Molo adong sahalak bawa na mambuat sahalak borua gabe istrina, jala di pudian ni ari dang lomo be rohana tu borua i, ala diida ibana adong pangalaho ni borua i na mambahen ibana maila, ikkon dibahen ibana do surat sirang.+ Ikkon dilehon bawa i ma surat i tu borua i. Dung i, disuru ma borua i lao sian jabuna.+ 2 Dung ditadikkon ibana jabu ni bawa i, boi ma ibana gabe istri ni bawa na asing.+ 3 Molo sogo do muse roha* ni bawa na paduahon i tu ibana, dibahen bawa i surat sirang, dilehon tu borua i, jala disuru borua i lao sian jabuna, manang molo mate bawa na paduahon i, 4 dang boi buaton ni suamina na parjolo i borua i muse gabe istrina. Ai nungnga disuru bawa i lao borua i, jala nungnga ramun* be borua i ala nungnga muli tu bawa na asing. Magigi do Jahowa molo diulahon bawa i songon i. Unang bahen hamu dosa di luat na nilehon ni Jahowa Debatamuna tu hamu gabe appunamuna.

5 “Molo adong sahalak bawa na baru mangoli, dang boi ibana dohot marporang jala unang ma dilehon tu ibana tugas na asing. Saleleng sataon dang boi dilehon tu ibana tugas manang aha pe. Di jabuna ma ibana toktong mambahen las roha ni istrina.+

6 “Unang buat hamu panggilingan manang batu gilingan* gabe jaminan+ ni pinjaman. Ai dos do i songon na mambuat hosa ni sasahalak lao gabe jaminan ni pinjamanna.

7 “Molo adong halak Israel na tardapot menculik donganna sabangso, jala nungnga disiksa ibana donganna i, dung i dijual,+ ikkon dipamate do halak na menculik i.+ Ikkon dipasiding hamu do hajahaton sian tonga-tongamuna.+

8 “Tikki masa sahit kusta,* ikkon marsitutu do hamu mangulahon sude tudu-tudu na dilehon akka malim halak Lepi i.+ Pastihon hamu ma na diulahon hamu sude na huparettahon tu nasida. 9 Ingot hamu ma aha na dibahen Jahowa Debatamuna tu si Miryam, tikki di pardalanan hamu kaluar sian Mesir.+

10 “Molo dilehon hamu manang aha pe lao dipinjam donganmuna,+ unang ma masuk hamu tu jabuna lao mambuat barang na lao bahenonna gabe jaminan. 11 Paima hamu ma ibana di luar. Ai halak na maminjam i do na ikkon mangalehon barang na lao gabe jaminan i tu hamu. 12 Molo pogos do ibana, unang tahan hamu baju na dilehon ibana gabe jaminan i sahat tu marsogot.+ 13 Ikkon paulakonmuna do baju i tu ibana andorang so bonom mataniari, asa adong pakkeonna lao modom.+ Pangidoonna ma tu Debata asa dipasu-pasu hamu. Jala molo dibahen hamu songon i, didok ma hamu mangulahon na sittong di jolo ni Jahowa Debatamuna.

14 “Unang dioto-otoi hamu parkarejo na pogos jala na susa, nang pe ibana donganmuna sabangso, manang halak na sian bangso na asing na tinggal di akka kota* di luatmuna.+ 15 Ikkon lehononmuna do gajina di ari i.+ Lehon ma i andorang so bonom mataniari. Ai susa do ngoluna jala sian gajina i do ibana mangolu. Molo dang dibahen hamu songon i, tangis ma ibana mangalu-alu tu Jahowa alani hamu, gabe mardosa ma hamu.+

16 “Dang boi sahalak ama dipamate alani pangalaho ni anakna. Jala dang boi sahalak anak dipamate alani pangalaho ni bapakna.+ Ganup halak dihukum mate alani dosana sandiri.+

17 “Unang papeol hamu hukum tikki mangadili halak na sian bangso na asing dohot dakdanak na so marama.*+ Jala unang paksa hamu sahalak ina na mabalu lao mangalehon bajuna gabe jaminan ni pinjamanna.+ 18 Ingot hamu ma, najolo hamu gabe hatoban do di Mesir jala Jahowa Debatamuna i do na manobus hamu sian i.+ Alani i ma huparettahon hamu mangulahon songon i.

19 “Molo tikki panen hamu di ladangmuna, jala diingot hamu adong na tinggal saikkat nai, unang mulak hamu tu ladangmuna lao mambuat i. Pasombu ma i tinggal disi, asa adong tu akka halak panoppang, tu halak na so marama, dohot tu ina na mabalu.+ Molo diulahon hamu songon i, pasu-pasuon ni Jahowa Debatamuna ma sude ulaonmuna.+

20 “Molo dung diattuk hamu ratting ni hau jetunmuna, unang be attuk hamu rattingna i muse. Pasombu ma na tinggal i lao tu akka halak panoppang, tu dakdanak na so marama, dohot tu ina na mabalu.+

21 “Molo dipapungu hamu hasil panen anggur sian ladangmuna, unang be mulak hamu muse paduahalihon lao papunguhon akka na tinggal. Pasombu ma na tinggal i lao di akka halak panoppang, dakdanak na so marama, dohot ina na mabalu. 22 Ingot hamu ma, najolo hatoban do hamu di Mesir. Alani i ma huparettahon hamu mangulahon i.