1 Raja-Raja
3 Dung i dibuat si Salomo ma boru ni si Firaun gabe istrina.+ Gabe martondong ma ibana dohot si Firaun raja ni Mesir. Diboan ibana ma istrina i tu Kota ni si Daud.+ Disi ma nasida tinggal sahat tu na sae dipajongjong istanana,+ bagas joro ni Jahowa,+ dohot tembok ni Jerusalem i.+ 2 Di tikki i, di akka inganan na timbo*+ dope bangso Israel mangalehon pelean. Ai dang dipajongjong dope sada jabu na parohon sangap tu goar ni Jahowa.+ 3 Sai dihaholongi si Salomo do Jahowa jala diihutton ibana do akka na nidok ni bapakna si Daud. Alai di akka inganan na timbo* dope ibana mangalehon pelean situtungon.+
4 Dung i lao ma Raja Salomo tu inganan na timbo*+ na di Gibeon lao mangalehon pelean. Ai disi do inganan pamelean na umbalga. Dipelehon ibana do 1.000 ekor binatang na gabe pelean situtungon di langgatan na disi.+ 5 Tikki di Gibeon dope si Salomo, dipataridahon Jahowa ma dirina tu si Salomo di bagasan nipi. Didok Debata ma tu ibana di borngin i, “Pangido ma sian Au manang aha lomo ni roham.”+ 6 Didok si Salomo ma, “Nungnga dipatuduhon Ho holong ni roham* na massai balga i tu bapakku si Daud naposomi. Ai toktong do ibana setia tu Ho, toktong do ibana mangulahon na sittong, jala tulus do rohana manomba Ho. Sahat tu saonari pe, toktong do dipatuduhon Ho holong ni roham* tu ibana. Ai dibahen Ho do anakna hundul di tahtana.+ 7 Saonari ale Jahowa Debatakku, nungnga dibahen Ho au gabe raja gatti ni bapakku si Daud. Hape poso* dope au jala dang huboto manang aha.*+ 8 Mamaretta do naposomon tu bangso na pinillitmu,+ bangso na bolon na so habilangan godangna. 9 Ise ma huroha na tolap mangadili bangso na so habilangan on?+ Alani i, urupi ma au naposomon asa boi toktong mangoloi Ho sian nasa roha, asa boi hutottuhon dia na sittong jala dia na sala+ tikki mangadili bangso on.”
10 Las do roha ni Jahowa mambege pangidoan ni si Salomo i.+ 11 Dung i didok Debata ma tu ibana, “Ala dang dipangido ho ganjang ni umur, hamoraon, jala dang dipangido ho asa dipamate akka musum, alai dipangido ho do asa marbisuk ho manottuhon dia na sittong jala dia na sala tikki mangadili bangso on,+ 12 lehonokku ma pangidoanmi.+ Lehonokku ma roha na marbisuk tu ho jala bahenokku ma ho malo manottuhon dia na denggan.+ Alani i, dang adong halak na songon ho andorang so tubu ho jala dung mate pe ho.+ 13 Nang pe dang dipangido ho hamoraon dohot hasangapon,+ lehonokku do i tu ho.+ Alani i, dang adong raja na songon ho saleleng mangolu ho.+ 14 Jala lehonokku do tu ho ganjang ni umur+ molo toktong diihutton ho dalanku, dioloi ho aturanku, dohot parettakku, songon na binahen ni si Daud bapakmu.”+
15 Dungo ma si Salomo, gabe diboto ma na marnipi do ibana. Dung i, lao ma ibana tu Jerusalem, jala jongjong ma ibana di jolo ni poti parpadanan ni Jahowa. Dipelehon ibana ma pelean situtungon dohot pelean pardamean.*+ Dibahen ibana ma muse pesta tu sude naposona.
16 Di sada tikki, ro ma dua halak boru-boru na so hasea tu jolo ni raja. 17 Didok borua na parjolo ma, “Ale tuannami, sajabu do au dohot borua on, jala di jabu do ibana tikki partus au. 18 Tolu ari dung partus au, partus ma ibana. Holan hami na dua do di jabu i, dang adong na asing. 19 Borngin i, modom ma ibana jala didondoni ibana ma anakna i. Gabe laos mate ma anakna i. 20 Dung tonga borngin, tikki renges au modom, dungo ma ibana. Dibuat ibana ma anakki jala dibahen ma i tu labbungna.* Dung i, dibahen ibana ma anakna na mate i tu labbungku. 21 Manogotna i, dungo ma au. Naeng hupasusu ma anakki, huida ma nungnga mate ibana. Alai dung hupatakkas, huboto ma dang i anakku na hutubuhon i.” 22 Didok borua na paduahon i ma, “Dang tutu i. Na mangolu i do anakku! Na mate i do anakmu!” Gabe didok borua na parjolo i ma, “Dang songon i. Na mate i do anakmu! Na mangolu i do anakku!” Songon i ma nasida sai marsoali di jolo ni raja i.
23 Ujungna didok raja i ma, “Ho mandok, ‘Na mangolu i do anakku, na mate i do anakmu!’ Alai ibana muse mandok, ‘Daong, na mate i do anakmu. Na mangolu i do anakku!’” 24 Didok raja i ma tu naposona, “Attong boan jo sada podang tuson.” Dilehon nasida ma sada podang tu raja i. 25 Didok raja i ma, “Bola dua hamu ma poso-poso na mangolu i. Lehon ma sambola tu na sada jala lehon ma sambola nai tu na sada nai.” 26 Alai asi ma roha ni omak ni poso-poso na mangolu i tu anakna i. Dielek ibana ma raja i, ninna ma, “Unang ma pamate ibana rajanami. Lehon ma poso-poso i tu borua i!” Alai didok borua na sada nai ma, “Tumagon ma dibola dua poso-poso i, asa unang di au manang di ho dakdanak i!” 27 Dung i didok raja ma, “Unang ma pamate hamu poso-poso i. Alai lehon ma ibana tu borua na parjolo i, ai ibana do omakna.”
28 Dung dibege sude halak Israel na binahen ni raja i, gabe las ma roha ni nasida* mangida raja i.+ Diboto nasida ma na dilehon Debata do bisuk tu ibana lao manottuhon dia na denggan tikki mangadili.+