Job
2 Dos do jolma i songon bunga na kabbang, dung i malos.*+
Hatop do i mago dos songon bayangan jala dang tarida be.+
4 Boi ma halak na mardosa manubuhon halak na so mardosa?*+
Dang boi!
5 Autsugari nungnga ditottuhon ari-ari ni jolma,
Jala nungnga diatur Ho piga leleng nasida mangolu.
Dibahen Ho do batas na so boi dilakkai nasida.+
6 Unang ma panotnoti ibana asa boi ibana maradi,
Songon sahalak parkarejo na sonang pakkilalaanna dung sae karejona di ari i.+
7 Haru hau pe boi do mangolu muse.
Molo ditaba hau i, boi do i tubu muse,
Jala mardakkai akka rattingna.
8 Nang pe nungnga matua uratna di bagasan tano
Jala nungnga mate pakkalna,
9 Tubu do i muse molo adong saotik aek,
Jala mardakkai do i songon suan-suanan na baru.
10 Alai mate do jolma jala suda do sude gogona.
Molo nungnga mate jolma, tudia do ibana lao?+
11 Mago do aek ni laut,
Surut jala koring do aek ni sunge.
12 Songon i ma nang jolma, molo dung mate dang na lao hehe be i.+
Sahat tu na mago pe langit, dang na lao dungo be i,
Jala dang na lao didungoi be nasida.+
13 Autsugari ma ditabunihon Ho au di Kuburan,*+
Autsugari ma ditabunihon Ho au sahat tu na salpu rimasmu,
Autsugari ma ditottuhon Ho tikki tu au jala diingot Ho au!+
14 Molo mate jolma, boi do ibana mangolu muse?+
15 Jouonmu ma au, jala alusakku ma Ho.+
Masihol do Ho tu na tinoppam.
16 Alai saonari, sai dietongi Ho do sude lakkakku.
Holan dosakku do na diida Ho.
17 Dipamasuk Ho do dosakku tu tas na marsegel,
Jala disippan Ho do* akka hasalaakku.
18 Songon dolok na masursur jala na hancur
Jala songon dolok batu na digulikkon sian ingananna,
19 Songon akka batu na dihois aek
Jala songon tano na maup alani aek na doras,
Songon i ma dibahen Ho asa unang saut na dipaima-ima ni jolma.
20 Ditaluhon Ho do ibana sahat tu na mate,+
Dipauba Ho do rupana, jala dipalao Ho do ibana tu kuburan.
21 Dipasangap pe akka anakna, dang diboto ibana i.
Marlea pe akka anakna i, tong do dang diboto ibana i.+
22 Holan tikki mangolu do ibana
Marlungun ni roha dohot manaon na haccit.”