Surat na Paduahon sian si Johannes

1 Sian sintua.* Mandapotton donganta borua* na tarpillit dohot akka anakkonna, akka na huhaholongi situtu. Alai dang holan au na makkaholongi hamu, dohot do sude na mananda hasittongan i. 2 Ai toktong do hasittongan i di bagasan hita jala dongananna do hita saleleng ni lelengna. 3 Na lao jalootta do sian Debata Ama i dohot sian Jesus Kristus Anakna i ajaran na sittong dohot holong. Na lao patuduon ni nasida do tu hita burju ni roha,* asi ni roha, dohot dame ni roha.

4 Massai las do rohakku ala adong do deba sian anakkonmu mangihutton dalan hasittongan+ i, na sesuai tu paretta na tajalo sian Ama i. 5 Saonari, hupangido ma tu ho inang asa marsihaholongan hita. Dang paretta na imbaru na husurat on tu ho, alai nungnga tajalo hian paretta on sian mulana i.+ 6 Jala on do lapatan ni na makkaholongi, ikkon torus do taihutton akka parettana.+ Songon naung dibege hamu sian mulana i, on do paretta i: Toktong ma tapatuduhon holong. 7 Nungnga godang akka panipu ro tu portibi on.+ Dang diakkui nasida Jesus Kristus ro tu tano on gabe jolma.+ Panipu do nasida jala antikristus.+

8 Manat ma hamu, unang ma mago bahen hamu hasil naung diulahon hami, asa boi dapotmuna sude pasu-pasu naung diparade Debata tu hamu.+ 9 Manang ise na so toktong mangihutton ajaran ni Kristus jala kaluar ibana sian ajaran i, dang ditanda ibana Debata.+ Alai manang ise na toktong mangihutton ajaran ni Kristus, ditanda ibana do Ama dohot Anak i.+ 10 Molo adong na ro tu hamu halak na so mamboan ajaran ni Kristus, unang ma jalo hamu ibana di jabumuna+ jala unang pakkulingi hamu ibana. 11 Ai manang ise na mamakkulingi ibana, parsidohot do ibana tu ulaonna na jahat i.

12 Godang do nian na naeng husurat tu hamu, alai dang bahenokku i marhite harotas dohot tinta. Lomo do rohakku naeng pajuppang jala makkatai dohot hamu, asa marlas ni roha situtu hamu.

13 Sahat ma tu ho tabe ni akka anak ni kakakmu, donganta borua na tarpillit i.