Ulaon ni Apostel

8 Las do roha ni si Saulus dipamate si Stepanus.+

Mulai sian i, lam haccit ma dibahen tu huria na di Jerusalem. Gabe marserak ma sude sisean i tu sude huta na di Judea dohot Samaria.+ Alai tinggal do akka apostel i di Jerusalem. 2 Dung i dikuburhon akka halak na badia ma si Stepanus. Massai lungun do roha ni nasida alani na masa i. 3 Alai mulai ma dibahen si Saulus akka na haccit tu huria i. Masuk ma ibana tu ganup jabu jala disarat ma akka bawa dohot borua, laos dipenjarahon ma nasida.+

4 Nang pe marserak akka sisean i di sude inganan, torus do dibaritahon nasida barita na uli taringot tu hata ni Debata.+ 5 Uppamana, lao do si Pilippus tu kota* Samaria,+ dibaritahon ibana ma disi taringot tu Kristus. 6 Sian nasa rohana do akka halak mamparrohahon barita na dipaboa si Pilippus i jala diida nasida do akka tanda halongangan* na binahenna. 7 Godang do halak na disonggopi suru-suruan na jahat disi jala gogo do marsurak akka suru-suruan na jahat i tikki kaluar sian halak na dipamalum i.+ Asing ni i, godang do dipamalum akka na lumpu dohot na pakpang. 8 Alani ni i, gabe marlas ni roha situtu ma akka halak na di kota i.

9 Adong ma sahalak bawa na margoar si Simon di kota i. Massai jago do dihilala ibana dirina. Datu hian do ibana jala longang do dibahen ibana halak Samaria. 10 Sude do halak manangihon ibana, mulai sian na mora sahat tu na pogos, mulai sian na poso sahat tu na matua. Jala didok nasida ma, “Adong do di ibana huaso na balga na sian Debata.” 11 Sai ditangihon akka jolma do ibana, ai nungnga godang dibahen ibana ulaon hadatuon na mambahen nasida longang. 12 Alai dung ditangihon nasida barita na uli na dipaboa si Pilippus taringot tu Harajaon ni Debata+ dohot taringot tu goar ni Jesus Kristus, gabe porsea ma nasida tu ibana. Tardidi ma nasida,+ bawa nang borua. 13 Dohot do si Simon gabe halak na porsea. Dung tardidi, torus ma diihutton ibana si Pilippus.+ Longang do rohana mangida akka tanda halongangan na dibahen si Pilippus.

14 Dung dibege akka apostel na di Jerusalem i naung dijalo halak na di Samaria hata ni Debata,+ disuru nasida ma si Petrus dohot si Johannes lao tusi. 15 Dung i lao ma si Petrus dohot si Johannes tu Samaria, ditangiakkon ma halak na disi asa dilehon tondi parbadia tu nasida.+ 16 Ai dang adong dope sian nasida naung mandapot tondi parbadia jala holan marhite goar ni Tuan Jesus dope nasida tardidi.+ 17 Dung i dibahen apostel na dua i ma tanganna tu ulu ni nasida,+ gabe dijalo nasida ma tondi parbadia.

18 Diida si Simon do dibahen akka apostel i tanganna tu akka halak. Diida ibana do gabe mandapot tondi parbadia akka jolma i. Alani i, dijanjihon ibana ma lao lehononna hepeng tu si Petrus dohot tu si Johannes. 19 Ninna ma, “Lehon ma tu au huaso sisongon i, asa molo hubahen tanganku tu manang ise pe, jaloon ni nasida ma tondi parbadia.” 20 Alai ninna si Petrus ma tu ibana, “Sai anggiat ma hancur ho rap dohot hepeng perakmi. Ai dirippu ho boi tuhoronmu silehon-lehon ni Debata marhite hepeng?+ 21 Dang parsidohot ho di ulaon on, ai dang tulus* roham di jolo ni Debata. 22 Alani i muba ma ho, tadikkon ma pikkiranmu na jahat i. Martangiang ma ho tu Jahowa* asa anggiat disesa dosam molo dung dipauba ho pikkiranmu na jahat i. 23 Ai huida late* do roham jala sai naeng diulahon ho do dosa.” 24 Dialusi si Simon ma, “Tangiakkon hamu ma au tu Jahowa,* asa unang masa tu au hatamuna i.”

25 Dung takkas dibaritahon jala dipaboa nasida hata ni Jahowa,* mulak ma nasida tu Jerusalem. Huhut do nasida marbarita na uli di akka huta ni halak Samaria.+

26 Alai didok suru-suruan ni Jahowa*+ ma tu si Pilippus, “Lao ma ho tu sabola selatan tu dalan turun-turunan na sian Jerusalem tu Gasa.” (Dalan na di padang gurun do dalan on.) 27 Lao ma si Pilippus tu inganan i. Diida ibana ma disi sahalak pejabat* na sian Etiopia. Timbo do pangkatna di pamarettaon ni Kandake, ratu ni halak Etiopia. Na lao do ibana tu Jerusalem manomba Debata.+ 28 Jala saonari naeng mulak ma ibana. Hundul do ibana di kareta hodana huhut marsuara manjaha bukku ni Panurirang* Jesaya. 29 Dung i marhite panogu-noguon ni tondi parbadia dipaboa ma tu si Pilippus, “Lao ma ho, dapotton ma kareta hoda i.” 30 Marlojong ma si Pilippus di labbung ni kareta hoda i, gabe dibege ma halak Etiopia i manjaha bukku ni Panurirang Jesaya. Disukkun si Pilippus ma ibana, “Diattusi ho do na dijahami?” 31 Dialusi ibana ma si Pilippus, “Sian dia ma boi huattusi i molo so adong na mangajari au?” Dung i, ditogihon ibana ma nakkok si Pilippus tu karetana i jala hundul di labbungna. 32 On do ayat na dijaha ibana, “Songon sada biru-biru na diboan tu inganan pamotongan do ibana, jala songon anak ni biru-biru na sai hohom di jolo ni na manggusting ibbuluna. Songon i do nang ibana, dang didok ibana manang aha pe.+ 33 Dileai do ibana jala dang hukum na sittong na dibahen tu ibana.+ Ala naeng dipamate do ibana sian tano on,+ dang adong na parduli lao mamboto sian pinoppar ni ise ibana.”

34 Didok halak Etiopia i ma tu si Pilippus, “Paboa ma jo, ise do na nidok ni panurirang i? Taringot tu dirina sandiri do manang taringot tu halak na asing?” 35 Dung i mulai ma makkatai si Pilippus. Sian ayat i ma mulai dipatorang ibana barita na uli taringot tu Jesus. 36 Tikki na mardalan i nasida, sahat ma nasida tu inganan na godang aekna. Didok pejabat Etiopia i ma, “Adong do nion aek! Dang boi dope au tardidi?” 37* —— 38 Diparettahon ibana ma asa dipaso kareta i, turun ma nasida na dua tu aek i. Dung i dididihon si Pilippus ma ibana. 39 Dung kaluar nasida sian aek i, hatop ma diboan tondi parbadia ni Jahowa* si Pilippus. Gabe dang diida pejabat Etiopia i be ibana. Alai ditorusson pejabat Etiopia i ma pardalananna jala marlas ni roha do ibana. 40 Alai anggo si Pilippus, lao do ibana tu Asdod. Didalani ibana ma sude luat na disi jala toktong ma dibaritahon barita na uli di sude kota, sahat tu na sahat ibana tu Kaesarea.+