Jesaya
44 “Saonari, ale Jakkob naposokku, tangihon ma,
Jala ho ale Israel, na hupillit.+
2 Songon on ma hata ni Jahowa,
Na mambahen ho jala Debata na manoppa Ho,+
Na mangurupi ho mulai sian na tubu:*
Huusehon ma tondi parbadiakku tu akka pinopparmu,+
Jala huusehon ma pasu-pasu tu akka anakkonmu.
4 Jala martunas ma nasida di tonga-tonga ni duhut-duhut,+
Songon hau poplar na tubu di labbung ni sunge.
5 Adong ma na mandok, “Appuna ni Jahowa do au.”+
Na asing mambahen goarna sandiri si Jakkob,
Jala disurat na asing ma muse di tanganna, “Appuna ni Jahowa.”
Jala dibahen ibana ma gelarna Israel.’
6 Songon on ma hata ni Jahowa,
Raja ni Israel+ jala na manobus*+ ibana, Jahowa Pamimpin ni Akka Tentara,*
‘Au do na parjolo jala Au do na parpudi.+
Dang adong Debata asing ni Au.+
7 Ai adong huroa na songon Au?+
Lok ma makkatai ibana jala dipatudu tu Au!+
Lok ma dipaboa ibana aha na lao masa satokkin nai,
Jala aha na lao masa di ari na naeng ro,
Dos songon na huulahon mulai sian na hupillit bangso on najolo.
Ai nungnga hudok hian tu hamu, andorang so masa dope on.
Hamu do akka saksikku.+
Adong do Debata na sittong asing ni Au?
Dang adong, dang adong Dolok Batu+ na asing na hutanda asing ni Au.’”
9 Dang hasea sude halak na mambahen patung i,
Jala dang marlapatan+ akka barang na dihaholongi nasida.
Ai tung gabe saksi pe akka patung i, dang adong na diida nasida dohot na diboto nasida,+
Alani i gabe maila+ ma akka na mambahen i.
10 Tung ise ma na olo mambahen debata manang patung sian logam
Na so adong gunana?+
11 Ida ma! Pailaonna ma sude na marsada dohot akka na mambahen patung i!+
Ai jolma do na mambahen patung i.
Lok ma marpungu nasida sude jala jongjong di ingananna be.
Ai bahenonna ma nasida mabiar jala rap dipaila ma nasida sude.
12 Tukkang bosi manutung bosi mamakke alatna* di atas ni gara.
Ditopa do i mamakke tokkok,
Diattuk do i mamakke tanganna na gogo.+
Male ma ibana jala habis ma gogona,
Dang minum ibana jala gabe loja.
13 Ditarik tukkang hau ma tali pangukkurna, dibahen ma tandana pakke kapur na merah,
Dibentuk ma i mamakke pahat jala ditandai mamakke jangka.
14 Adong do halak na karejona manaba hau ares.
Dipillit ibana ma sada jenis ni hau, i ma hau ek,*
Dipasombu ibana ma i tubu sappe balga di tonga-tonga ni tombak.+
Disuan ibana ma hau salam, jala lam balga ma i alani udan.
15 Dung i dibahen ma hau i gabe soban lao pagalakkon api.
Na deba nai ditutung ibana ma lao palashon dagingna,
Ditutung ma muse i lao mamanggang roti.
Alai dibuat ibana do i muse lao mambahen debatana jala marsomba tusi.
Dipahat ibana ma i gabe patung, jala marsomba ma ibana tu jolo ni patung i.+
16 Satonga sian hau i ditutung ibana ma tu api,
Lao mamanggang jagal, diallang ibana ma jagal i sappe butong.
Ditutung ibana ma i muse lao palashon dagingna, jala ninna,
“Ah, tabo nai, nungnga las huhilala dibahen apina i.”
17 Alai na satonga nai dipahat ibana ma i gabe patung lao gabe debata.
Marsinggang ma ibana jala disomba ma patung i.
Martangiang ma ibana tusi jala ninna,
“Palua ma au, ai ho do debatakku.”+
18 Dang diboto nasida manang aha, dang diattusi nasida agia aha,+
Ai ditutup do mata ni nasida asa unang boi nasida marnida,
Jala asa unang mangattusi pikkiran ni nasida.
19 Dang adong na mangarimangi i di bagasan rohana
Dang adong na mamboto i manang na mangattusi i lao mandok,
“Ai hututung do satonga hau i tu api,
Tu ginjang ni garana i do hupanggang roti dohot jagal lao allangokku.
Tama do au mambahen na satonga nai tu ulaon na dihagigihon?+
Tama do au marsomba tu hau na koring?”
20 Songon halak na mangallang abu do ibana.
Lilu do ibana dibahen rohana.
Dang tolap ibana paluahon dirina, jala dang diboto ibana mandok,
“Dang adong guna ni sude na hutiop on.”
21 “Ingot hamu ma sudena on, ale Jakkob, dohot ho ale Israel,
Ai ho do naposokku.
Au do na mambahen hamu gabe sada bangso jala ho do naposokku.+
Ale Israel, dang lupahonokku ho.+
22 Sesaokku ma akka hasalaanmu songon na manabunihon i di balik ni ombun+
Sesaokku ma akka dosam, songon na manutup i mamakke ombun na tobal.
Mulak ma hamu tu Au, asa hutobus hamu.+
23 Marsurak ma ho ale langit jala marlas ni roha,
Ai nungnga diulahon Jahowa songon i!
Marsurak ma ho ale tano, paboa naung monang ho!
Marsurak ma ho jala marlas ni roha ale akka dolok,+
Songon i nang ho ale tombak dohot sude hau na disi!
Ai nungnga ditobus Jahowa pinoppar ni si Jakkob,
Jala nungnga dipatudu Ibana hamuliaonna marhite na binahenna tu Israel.”+
“Au do Jahowa na manoppa sudena.
Adong do di tikki i na mangurupi Au?
25 Hupatudu do na so sittong akka tanda na binahen ni panurirang na palsu,*
Hubahen do akka datu gabe songon halak na oto,+
Au do na mambahen halak na marbisuk gabe bingung
Jala Au do na mambahen parbinotoan ni nasida gabe haotoon,+
26 Au do na pasautton hata ni naposokku,
Au do na mambahen saut sude hata na pinaboa ni halak na husuru,+
Jala Au do na mandok songon on taringot tu Jerusalem, ‘Diingani nama kota i,’+
Taringot tu kota Juda hudok do, ‘Dibangun do kota i muse,+
Jala pajongjongokku do muse akka naung maruppak,’+
27 Au do na mandok tu aek na bagas, ‘Koring ma hamu,
Jala bahenokku ma koring sude sungemuna,’+
28 Au do na mandok taringot tu si Sirus,+ ‘Ibana do parmahan na hupillit,
Jala ibana ma na pasautton sude lomo ni rohakku,’+
Au do na mandok songon on taringot tu Jerusalem, ‘Dibangun do kota i muse,’
Jala taringot tu bagas joro hudok do, ‘Dipadenggan do muse fondasim.’”+