Psalmen
Tu pamimpin ni akka parende: Na dibahen mangihutton ende “Bunga Lili”. Sian si Daud.
69 Ale Debata, palua ma au, bagas hian do aek on, nga naeng lonong au.+
2 Nungnga lonong au tu bagasan gambo, dang adong tano sidegeon.+
Nungnga lonong au tu aek na bagas,
Jala diauppon aek na doras do au.+
3 Nungnga loja au ala sai jou-jou,+
Sappe mahiang nama aru-arukku,
Jala nungnga loja matakku paima-imahon Debatakku.+
4 Godang do akka halak na marsogo ni roha tu au, hape so adong salakku+
Unggodang do nasida sian obukku
Lam godang do akka musukku na licik,*
Naeng dipamate nasida do au,
Dipaksa do au paulakkon akka na so hea hutakko.
5 Ale Debata, takkas do diboto Ho na oto do au,
Dang buni dosakku sian Ho.
6 Ale Jahowa Tuan Natumimbul, Pamimpin ni Akka Tentara,*
Unang ma loas alani au gabe maila akka halak na maima-ima tu Ho.
Ale Debata ni Israel,
Unang ma loas alani au gabe marlea akka halak na mangalului Ho.
8 Gabe hira na so ditanda haha anggikku ma au,
Gabe hira halak na asing ma au di akka anak ni omakku.+
9 Holong ni rohakku tu jabumi dos songon api na marsigorgor,+
Nungnga hutaon rehe-rehe ni halak na mangarehei Ho.+
10 Tikki marpuasa au lao patutoru dirikku,*
Gabe dileai do au.
11 Tikki hupakke abit goni,
Gabe direhe-rehei* nasida do au.
12 Dipahata-hata akka halak na hundul di gerbang ni kota do au,
Tikki marende akka parmabuk, au do na dileseng-lesengi.
13 Sai anggiat ma sahat tu Ho tangiakku,
Ale Jahowa, sai anggiat ma olo Ho manangihon i.+
14 Tarik ma au sian gambo,
Asa unang lonong au.
Palua ma au sian akka halak na marsogo ni roha tu au,
Jala tarik ma au sian aek na bagas.+
15 Unang ma pasombu au maup dibahen aek na doras,+
Unang pasombu au lonong tu aek na bagas,
Jala unang ma pasombu au madabu tu lubang.+
16 Ale Jahowa, alusi ma au, ai denggan do holong ni roha* na pinatudum.+
Hatop ma alusi au, ai nungnga mandele au.+
18 Ro ma Ho manjonok tu au, palua ma au.
Tobus ma au sian akka musukku.
19 Diida Ho do au direhei, dileai, jala dipaila,+
Diida Ho do sude musukku.
20 Haccit do rohakku ala dileai au, jala dang tarubatan be i.
Tarpaima do au adong na marasi ni roha tu au, hape dang adong.+
Tarpaima do au adong na mangapuli au, hape dang adong.+
22 Sai gabe jorat ma pesta* ni nasida i tu nasida,
Sai anggiat ma tarjorat nasida alani hamoraon ni nasida.+
23 Bahen ma golap mata ni nasida asa unang boi nasida marnida.
Sai anggiat ma gale-gale gotting ni nasida.
24 Usehon ma murukmi tu nasida,
Jala lok ma suda nasida alani rimasmu na marsigorgor.+
25 Lok ma tarulang perkemahan ni nasida,
Sai unang ma adong na mangingani kemah ni nasida.+
26 Ai dilele nasida do halak na niattukmu,
Jala dipahata-hata nasida do sitaonon ni halak na lukka dibahen Ho.
27 Sai unang ma dohot nasida makkilala akka pambahenanmu na sittong i,
Lok ma dihukum nasida alani dosa ni nasida.
28 Lok ma disesa goar ni nasida sian bukku hangoluan,+
Jala sai unang ma disurat goar ni nasida rap dohot goar ni halak na tigor marroha.+
29 Alai susa do au jala haccit do huhilala,+
Ale Debata, sai anggiat ma huasom na paluahon au jala na manjaga au.
30 Dung i marende ma au mamuji goar ni Debata,
Jala mandok mauliate ma au tu Ibana lao pasangappon Ibana.
31 Ai dumenggan do i di Jahowa sian lombu jantan,
Dumenggan do i sian lombu jantan na poso jala na mokmok.+
32 Idaon ni halak na lambok roha ma i jala marlas ni roha ma nasida,
Hamu akka halak na mangalului Debata, sai anggiat ma dipatogu rohamuna.
33 Ai tangihonon ni Jahowa do angguk-angguk ni halak na pogos,+
Jala dang leas rohana tu bangsona na ditawan.+
34 Sai pujion ni langit dohot tano on ma Ibana,+
Sai pujion ni laut dohot nasa isina ma Ibana.
35 Ai paluaon ni Debata ma Sion,+
Jala pajongjongonna ma muse akka kota na di Juda,
Asa tinggal nasida disi jala gabe appuna ni nasida ma luat i.