5 Musa
19 “Molo dung dihancurhon Jahowa Debatamuna i sude bangso, jala dilehon Jahowa Debatamuna i luat ni nasida tu hamu, jala molo dung diusir hamu nasida, dung i tinggal hamu di akka kota dohot di akka jabu ni nasida,+ 2 ikkon papulikonmuna do tolu kota di luat na lao dilehon Jahowa Debatamuna i gabe appunamuna.+ 3 Ikkon dibagi hamu do luat na dilehon Jahowa Debatamuna i gabe tolu bagian. Bahen ma dalan tu akka kota i, asa boi lari akka halak na mambunu tusi.
4 “On ma na ikkon diulahon halak na mambunu asa toktong ibana mangolu tikki lari ibana tu kota i: Molo adong halak na so sengaja mambunu donganna jolma, jala dang ala na hea sogo rohana tu donganna i,+ 5 uppamana tikki lao ibana tu tombak rap dohot donganna papunguhon soban, dung i ditaba ibana ma hau mamakke kampak, malua ma kampakna i, hona ma kampak i tu donganna i jala gabe mate. Ikkon lari do na mambunu i tu sada sian akka kota i asa toktong ibana mangolu.+ 6 Ai muruk situtu do* keluarga ni na mate i jala naeng mambalos ibana.*+ Alani i, molo padaohu do pardalananna tu kota i, boi ma dilumba halak na naeng mambalos i ibana, ditakkup, jala dipamate ma ibana. Hape sasittongna, dang patut ibana dipamate. Ai dang hea sogo rohana tu donganna i.+ 7 Alani i do huparettahon tu hamu asa dipillit hamu tolu kota.
8 “Molo dung dibahen Jahowa Debatamuna i lam bidang luatmuna i, songon sumpana tu akka ompumuna,+ jala molo dung dilehon tu hamu sude luat na dijanjihon Ibana tu akka ompumuna,+ 9 ikkon tambaanmuna do tolu kota nai.+ (Ulahononna do sudena i, molo marsitutu hamu mangulahon sude paretta na hupaboa tu hamu sadari on, i ma makkaholongi Jahowa Debatamuna jala toktong mangihutton akka dalanna.)+ 10 Molo dibahen songon i, dang dipamate be halak na so marsala*+ di luat na dilehon Jahowa Debatamuna i tu hamu gabe appunamuna, jala dang didok be hamu pambunu.*+
11 “Alai molo sogo do roha ni sasahalak tu donganna,+ jala dipaima ibana do tikki na pas lao mangattuk donganna i, jala ujungna diattuk ibana do donganna i sappe mate, dung i lari ibana tu sada sian akka kota i, 12 ikkon dijou akka pangituai* ni kotana do ibana sian i, jala dipasahat ma ibana tu keluarga ni na mate i na naeng mambalos ibana.* Dung i, ikkon dipamate do ibana.+ 13 Dang boi asi rohamuna mangida ibana. Ai ikkon pasidingonmuna do sian Israel hasalaan ala mambunu halak na so marsala,*+ asa denggan ngolumuna.
14 “Molo dung dijalo hamu tano parbagiananmuna di luat na dilehon Jahowa Debatamuna i tu hamu, unang papinda hamu tanda ni parbatasan ni tano ni donganmuna+ sian naung binahen ni akka ompumuna.
15 “Hatorangan ni sada saksi dang boi patuduhon naung diulahon sasahalak hasalaan manang dosa.+ Alai molo adong do hatorangan sian dua manang tolu saksi, boi ma didok na tutu do hatorangan i.*+ 16 Molo dilehon sasahalak hatorangan lao mambahen na jahat tu donganna, jala ditudu ibana naung mangulahon na sala donganna i,+ 17 ikkon diboan do dua halak na marsoal i tu jolo ni Jahowa, tu jolo ni malim, dohot tu jolo ni hakim na martugas di tikki i.+ 18 Ikkon manat do hakim mamareso parsoalan i,+ jala molo dang tutu hatorangan na nidok ni saksi i, jala molo nungnga didok ibana tuduhan na so sittong tu donganna, 19 ikkon bahenonmuna do balik tu ibana ulaon na jahat na lao bahenonna i tu donganna.+ Ai ikkon dipasiding hamu do hajahaton sian tonga-tongamuna.+ 20 Begeon ni sude halak ma i jala mabiar ma nasida. Dang ulahonon ni nasida be ulaon na jahat sisongon i di tonga-tongamuna.+ 21 Dang boi asi rohamuna mangida ibana.+ Ai ikkon hosa do gatti ni hosa, mata gatti ni mata, ngingi gatti ni ngingi, tangan gatti ni tangan, pat gatti ni pat.+