4 Musa
11 Mulai ma marungut-ungut halak Israel tu Jahowa, hira na susa hian ma ngolu ni nasida. Tikki dibege Jahowa na marungut-ungut nasida, muruk situtu ma Ibana. Diparo Jahowa ma api tu nasida, gabe mosok ma sude halak na di luar ni kemah. 2 Ro ma nasida mangandungi tu jolo ni si Musa. Alani i, martangiang ma si Musa mangelek Jahowa,+ gabe mate ma api i. 3 Dibahen ma goar ni inganan i Tabera.* Ai tusi do ro api ni Jahowa manutung nasida.+
4 Adong do halak sian bangso na asing*+ na rap tinggal dohot nasida na massai mokkus.+ Gabe dohot ma halak Israel sai tangis, huhut mandok, “Adong ma nian jagal allangonnami.+ 5 Tikki di Mesir, lomonami do mangallang dekke, so pola digarar. Songon i nang accimun, semangka, bawang pre, bawang merah, dohot bawang putih!+ 6 Alai saonari nungnga gale-gale be hami. Ai so adong sipanganon na asing. Holan manna i do.”+
7 Manna i,+ songon biji ketumbar+ jala songon gota ni hau damar.* 8 Biasana marserak do halak Israel lao papunguhon i. Digiling nasida ma i pakke gilingan tangan,* manang diduda nasida ma i di bagasan losung. Dirobus nasida ma i di hudon manang dibahen gabe roti na bulat.+ Daina songon kue na manis na dicampur dohot miak. 9 Molo turun nambur tu perkemahan i tikki borngin, dohot do manna i turun.+
10 Dibege si Musa ma na mangandungi halak Israel i. Mangandungi do ganup keluarga di jolo ni pintu kemahna be. Gabe muruk situtu ma Jahowa+ jala sogo hian ma roha ni si Musa tu nasida. 11 Dung i didok si Musa ma tu Jahowa, “Boasa gabe susa dibahen Ho naposomon? Aha huroha salakku umbahen na gabe sogo roham tu au? Boasa pola ikkon au na martanggung jawab tu bangso on?+ 12 Ai au huroha bapak ni bangso on? Ai au huroha na manubuhon nasida, umbahen na disuru Ho au marorot jala mangoppa nasida songon parorot ni poso-poso,* lao mamboan nasida tu luat na dijanjihonmi tu akka ompu ni nasida?+ 13 Sian dia ma buatokku jagal allangon ni bangso on? Ai sai mangandungi do nasida tu au. Didok nasida do, ‘Lehon jo jagal tu hami, naeng mangallang jagal hami!’ 14 Dang tolap au mamboan bangso on molo sahalakku. Paborattu do di au tanggung jawab on.+ 15 Molo torus do bahenonmu songon on tu au, tumagon ma pamate au saonari.+ Alai molo asi do roham tu au, unang be pasombu au susa.”
16 Didok Jahowa ma tu si Musa, “Pillit ma 70 bawa sian akka pangituai* ni halak Israel, na diboto ho sanggup gabe pengawas lao mangulahon akka ulaon on.+ Suru ma nasida ro tu kemah parpunguan jala jongjong rap dohot ho. 17 Ai turun nama Au+ lao makkatai rap dohot ho disi.+ Buatokku ma deba tondi parbadiakku+ na adong di ho, jala lehonokku ma i tu nasida. Urupan ni nasida ma ho mangatur bangso i, asa unang sahalakmu be na martanggung jawab tu nasida.+ 18 Dok ma tu bangso i, ‘Pabadia hamu ma dirimuna marsogot,+ ai mangallang jagal nama hamu. Nungnga dibege Jahowa be andung-andungmuna i.+ Ai didok hamu do, “Adong ma nian jagal allangonnami. Uttabo hian do ngolunami di Mesir.”+ Pasti lehonon ni Jahowa do jagal lao allangonmuna.+ 19 Jala dang holan allangon sadari manang 2 ari, manang 5 ari, manang 10 ari, manang 20 ari. 20 Alai allangonmuna ma i saleleng sabulan, sappe kaluar ma i sian igungmuna jala sappe muta-uta hamu.+ Ai nungnga disoadahon hamu Jahowa na sai mandongani hamu. Sai mangandungi do hamu di jolona, jala didok hamu do, “Boasa ma pola diboan hami kaluar sian Mesir?”’”+
21 Didok si Musa ma, “Adong 600.000 tentara+ di tonga-tonga ni bangso on. Hape didok Ho, naeng lehononmu nasida mangallang jagal. Jala sappe sabulan boi do allangon ni nasida i. 22 Tung diseat pe sude hambing, lombu, dohot biru-biru di nasida, dang cukkup i allangon ni nasida. Haru ditakkup pe sude dekke na di laut an, dang cukkup i allangon ni nasida.”
23 Didok Jahowa ma tu si Musa, “Ai na dirippu ho do na so sanggup Au Jahowa mangulahon i?+ Saonari idaonmu ma tutu do saut hatakki manang dang.”
24 Kaluar ma si Musa, jala dipaboa ibana ma hata ni Jahowa i tu halak Israel. Dipillit ibana ma 70 bawa sian akka pangituai ni halak Israel. Jala disuru ma nasida jongjong di sakaliling ni kemah parpunguan i.+ 25 Turun ma Jahowa di bagasan ombun+ jala makkatai ma tu si Musa.+ Dibuat Ibana ma deba tondi parbadia+ na adong di si Musa jala dilehon ma i tu pangituai na 70 halak i. Dung dilehon tondi parbadia i tu nasida, gabe songon panurirang*+ ma nasida. Alai dukkon i, dang hea be masa songon i.
26 Adong ma dua halak sian akka bawa i na tinggal di perkemahan, dang ro nasida tu kemah parpunguan.* Goarna si Eldad dohot si Medad. Ala dohot do goar ni nasida disurat songon akka bawa na asing i, dapotan tondi parbadia ma nasida. Alani i, gabe songon panurirang ma nasida di perkemahan. 27 Marlojong ma sahalak doli-doli mandapotton si Musa, ninna ma, “Nga songon panurirang be si Eldad dohot si Medad di perkemahan!” 28 Dung i, ro ma si Josua+ anak ni si Nun. Nungnga mulai sian na poso ibana mangurupi si Musa. Didok ma tu si Musa, “Ale tuan, paso ma nasida!”+ 29 Alai didok si Musa ma tu ibana, “Na mabiar do ho adong na manggattihon au? Unang ma songon i ho. Lomo do rohakku asa sude naposo ni Jahowa gabe panurirang, jala dilehon Jahowa tondi parbadiana tu nasida!” 30 Dung i mulak ma si Musa tu perkemahan rap dohot akka pangituai ni halak Israel.
31 Ro ma alogo na gogo sian Jahowa, diboan alogo i ma burung puyuh sian laut. Mardabuan ma akka pidong i dibahen alogo i di sakaliling ni perkemahan ni nasida,+ sappe tu inganan na daona sadari pardalanan sian parkemahan i. Hira-hira dua asta* ma timbo ni burung puyuh i martindi-tindi. 32 Di bagasan sadari, sahat tu borngin, songon i nang tu marsogotna i, torus ma dipapungu halak Israel burung puyuh i. Paling otik ma sappulu homer* dipapungu ganup halak. Dipaserak nasida ma burung puyuh i di sakaliling ni perkemahan ni nasida. 33 Alai dang habis dope diallang nasida jagal i, nungnga muruk situtu Jahowa tu nasida. Dihukum Jahowa ma nasida. Diparo ma sahit na posi tu bangso i.+
34 Dibahen nasida ma goar ni inganan i Kibrot-hataawa.*+ Ai disi do dikubur akka halak na mokkus i.+ 35 Borhat ma halak Israel sian Kibrot-hataawa tu Hazerot, jala di Hazerot ma nasida markemah.+