1 Raja-Raja

8 Dipapungu si Salomo+ ma akka pangituai* ni halak Israel, i ma sude pamimpin ni ganup marga dohot pamimpin ni na sasaompu.+ Ro ma nasida mandapotton Raja Salomo tu Jerusalem. Diboan nasida do poti parpadanan ni Jahowa sian Kota ni si Daud,+ i ma kota Sion.+ 2 Marpungu ma sude halak Israel di jolo ni Raja Salomo di perayaan* bulan Etanim,* i ma bulan na papituhon.+ 3 Ro ma sude pangituai ni halak Israel jala diangkat akka malim ma poti parpadanan i.+ 4 Diboan akka malim dohot halak Lepi ma poti parpadanan ni Jahowa, kemah parpunguan,+ dohot sude barang na di bagasan ni kemah parpunguan i na dipakke lao manomba Debata. 5 Marpungu ma Raja Salomo dohot sude halak Israel na dijou i di jolo ni poti parpadanan. Massai godang do biru-biru dohot lombu na dipelehon+ nasida, dang taretong godangna.

6 Dung i diboan akka malim ma poti parpadanan ni Jahowa i tu inganan naung ditottuhon.+ Diboan ma i tu Inganan na Massai Badia na adong di jabu i. Dipeakkon ma i di toru ni habong ni akka kerubim.*+

7 Hembang do habong ni kerubim i tu atas ni poti parpadanan i. Gabe dilinggomi ma poti parpadanan i dohot hau pangusungna.+ 8 Ganjang do hau pangusungna i.+ Alani i, gabe tarida ma ujung ni hau pangusung i sian Inganan na Badia na di jolo ni Inganan na Massai Badia. Alai dang tarida i sian luar. Jala sahat tu sadari on disi dope i. 9 Holan batu panuratan na dua i+ do na adong di bagasan poti parpadanan i. Si Musa do na pamasukkon i+ tikki di Horeb. Disi do dibahen Jahowa parjanjian+ tu halak Israel dung kaluar nasida sian Mesir.+

10 Tikki kaluar akka malim sian jabu i, ro ma ombun+ jala ditutupi ma jabu ni Jahowa i.+ 11 Gabe dang boi be marhobas akka malim alani ombun i. Ai nungnga digohi hamuliaon ni Jahowa jabu ni Jahowa i.+ 12 Didok si Salomo ma, “Nungnga didok Jahowa na lao maringanan Ibana di inganan na massai holom.+ 13 Nungnga hupajongjong be sada jabu na balga di Ho lao gabe ingananmu saleleng ni lelengna.”+

14 Dung i, diida raja i ma doppak halak Israel na jongjong disi. Jala dipangido ma asa dipasu-pasu Debata nasida.+ 15 Didok ibana ma, “Pinuji ma Jahowa Debata ni Israel. Ai nungnga dipasaut Ibana janjina tu si Daud bapakku. Didok Ibana do, 16 ‘Mulai huboan bangso Israel kaluar sian Mesir, dang adong dope hupillit sada kota sian sude kota ni marga ni Israel, na gabe inganan lao pajongjokkon sada jabu na parohon sangap tu goarhu.+ Alai nungnga hupillit si Daud lao gabe raja ni bangsokku Israel.’ 17 Lomo do roha ni bapakku si Daud lao pajongjokkon sada jabu na parohon sangap tu goar ni Jahowa Debata ni Israel.+ 18 Alai didok Jahowa do tu si Daud bapakku, ‘Las do rohakku mamboto na lao pajongjongonmu sada jabu lao pasangappon goarhu. 19 Nang pe songon i, dang ho na lao pajongjokkon jabu i. Anakmu* do na lao pajongjokkon jabu na parohon sangap tu goarhu.’+ 20 Saonari, nungnga saut be janji ni Jahowa. Nungnga hugattihon be bapakku si Daud gabe raja ni Israel songon janji ni Jahowa. Nungnga hupajongjong be sada jabu na parohon sangap tu goar ni Jahowa Debata ni Israel.+ 21 Jala huparade do disi inganan ni poti parpadanan,+ i ma inganan ni batu panuratan na marisi parjanjian na binahen ni Jahowa dohot akka omputta, na binahenna tikki kaluar nasida sian Mesir.”

22 Jongjong ma sude halak* Israel di jolo ni langgatan ni Jahowa. Jala jongjong ma si Salomo di jolo ni langgatan i, huhut mangangkat tanganna doppak langit.+ 23 Didok ibana ma, “Ale Jahowa Debata ni Israel, dang adong Debata na songon Ho+ di surgo nang di tano on. Setia do Ho tu janjim jala dipatuduhon Ho do holong ni roham*+ tu akka na manomba Ho jala na mangihutton dalanmu sian nasa rohana.+ 24 Toktong do diingot Ho janji na binahenmu tu bapakku si Daud naposomi. Jala sadari on nungnga dipasaut Ho janjimi.+ 25 Saonari ale Jahowa Debata ni Israel, toktong ma ingot janji na binahenmu tu bapakku si Daud naposomi. Didok Ho do tu ibana, ‘Molo diparrohahon akka anakmu parange ni nasida, jala molo toktong nasida setia mangihutton akka dalanku songon na binahenmi, sian pinopparmu ma na toktong hundul di tahta ni harajaon ni Israel.’+ 26 Saonari, ale Debata ni Israel, sai pasaut ma janji na binahenmu tu bapakku si Daud naposomi.

27 “Alai tutu do Debata naeng maringanan di tano on?+ Haru sude pe langit i dang siat gabe ingananmu.+ Lam jabu na hupajongjong on ma!+ 28 Ale Jahowa Debatakku, tangihon ma tangiang ni naposomon. Asi ma roham jala urupi ma naposomon. Tangihon ma pangidoan ni naposom na martangiang di jolom sadari on. 29 Sai tatap ma jabu on arian nang borngin lao manangihon naposom na martangiang doppak jabu on.+ Ai didok Ho do taringot tu jabu i, ‘Disi do goarhu.’+ 30 Sai tangihon ma pangidoan ni naposomon dohot pangidoan ni bangsom Israel na martangiang doppak jabu on. Sai anggiat ma ditangihon Ho hami sian surgo ingananmi+ jala sai anggiat ma disesa Ho dosanami.+

31 “Molo adong halak na ditudu mangulahon na sala tu donganna jala disuru ibana marsumpa,* dung i ro ibana tu jolom tu langgatan na adong di jabu on,+ 32 tangihon ma ibana sian surgo jala adili ma naposomi. Patudu ma ise na mangulahon na sala* jala bahen ma hukuman na pas tu ibana. Patudu ma ise na sittong* jala lehon ma upa na pas tu ibana.+

33 “Molo tung ditaluhon musuna bangso Israel ala nungnga mardosa nasida tu Ho,+ jala molo mulak nasida tu Ho, gabe dipasangap muse goarmu,+ jala martangiang nasida mangido asi ni roham di jabu on,+ 34 sai tangihon ma nasida sian surgo. Jala sesa ma dosa ni Israel bangsomi. Boan ma nasida mulak tu tano naung nilehonmu tu ompu ni nasida.+

35 “Molo tung mardosa halak Israel tu Ho,+ gabe ditutup Ho langit, jala dang diparo Ho udan,+ jala dibahen Ho nasida susa,*+ alai dukkon i martangiang nasida doppak jabu on, dipasangap nasida goarmu, jala dang diulahon nasida be dosa, 36 sai tangihon ma nasida sian surgo. Sesa ma dosa ni bangso Israel naposomi. Paro ma udan tu tano+ na nilehonmu gabe parbagianan ni nasida. Jala ajari ma nasida+ mangihutton dalan na ikkon sidalanan ni nasida.

37 “Molo tung masa haraparon di tano on,+ manang sahit na masa di godang inganan, alogo na mohop na mambahen mosok suan-suanan, sahit ni* suan-suanan,+ manang molo ro akka sihapor* na mokkus, molo ro musu tu kota ni bangsomon* lao mangalo nasida, manang molo ro bala dohot sahit manang aha pe,+ 38 dung i diangkat nasida ma tangan ni nasida doppak jabu on jala martangiang, jala adong sasahalak manang sude bangso Israel i mangido asi ni roham+ (ai ganup nasida diboto be do hasusaanna),+ 39 sai tangihon ma nasida sian surgo ingananmi,+ sesa ma dosa ni nasida,+ jala urupi ma nasida. Lehon ma upa na pas tu nasida.+ Ai diboto Ho do rohana jala holan Ho do na takkas mamboto roha ni ganup jolma.+ 40 Alani i, dihabiari nasida ma Ho jala dipasangap nasida ma Ho saleleng mangolu nasida di tano na nilehonmu tu akka ompunami.

41 “Asing ni i, molo adong halak na sian bangso na asing, na so sian bangso Israel ro sian na dao alani goarmi,+ 42 ala dibege nasida taringot tu goarmu na massai sangap i+ dohot tanganmu na massai gogo i, molo ro ibana martangiang doppak jabu on, 43 sai tangihon ma ibana sian surgo ingananmi.+ Sai lehon ma sude pangidoan ni halak na sian bangso na asing i, asa sude halak na di tano on mamboto goarmu jala makkabiari Ho+ songon na binahen ni bangsom Israel. Jala sai anggiat ma diboto nasida, na parohon sangap tu goarmu do jabu na hupajongjong on.

44 “Molo disuru Ho bangsomon marporang mangalo musu ni nasida+ jala martangiang nasida+ tu Ho ale Jahowa, doppak kota na pinillitmu+ dohot doppak jabu na hupajongjong lao pasangappon goarmu,+ 45 tangihon ma tangiang ni nasida sian surgo. Asi ma roham tu nasida jala urupi ma nasida.

46 “Molo muruk Ho tu bangsomon ala mardosa nasida (ai dang adong jolma na so mardosa),+ jala dipasombu Ho nasida ditaluhon musu, jala gabe diboan musu nasida tu huta na dao manang na jonok,+ 47 jala di huta ni musu i+ gabe manolsoli nasida, mulak roha ni nasida tu Ho,+ dipangido nasida asa asi roham,+ jala didok nasida, ‘Nungnga mardosa hami, nungnga mangulahon na sala hami, jala nungnga mangulahon na jahat,’+ 48 molo mulak nasida tu Ho sian nasa roha ni nasida+ dohot sian nasa ngolu* ni nasida, di huta ni musu na mamboan nasida, jala molo martangiang nasida doppak tano na nilehonmu tu ompu ni nasida, doppak kota na pinillitmu, dohot doppak jabu na hupajongjong lao parohon sangap tu goarmu,+ 49 tangihon ma nasida sian surgo ingananmi.+ Tangihon ma tangiang ni nasida, asi ma roham, jala urupi ma nasida.* 50 Sesa ma dosa ni bangsom na mardosa tu Ho, salpuhon ma hasalaan ni nasida, jala bahen ma asi roha ni musu tu nasida.+ 51 (Nasida do bangsom,+ na binoanmu kaluar sian Mesir,+ sian inganan ni panutungan ni bosi.*)+ 52 Sai tatap ma naposomon na mangido asi ni roham,+ jala tangihon ma tangiang ni bangsom Israel manang andigan pe nasida martangiang tu Ho mangido asi ni roham.*+ 53 Ai nungnga dipillit Ho nasida ale Jahowa Tuan Natumimbul, sian sude bangso na di tano on gabe appunam,+ songon naung didokkon Ho tu si Musa naposomi tikki diboan Ho akka ompunami kaluar sian Mesir.”

54 Marsinggang do si Salomo huhut mangangkat tanganna doppak langit di jolo ni langgatan ni Jahowa. Dung sae ibana martangiang mangido asi ni roha ni Jahowa, jongjong ma ibana.+ 55 Dipangido ibana ma asa dipasu-pasu Debata bangso Israel. Gogo ma soarana mandok, 56 “Puji ma Jahowa naung mangalehon hadameon tu bangsona Israel songon janjina hian.+ Dang adong nanggo sada pe janji na pinasahatna marhite si Musa na so dipasaut.+ 57 Anggiat ma sai didongani Jahowa Debatanta i hita songon Ibana na mandongani akka omputta.+ Sai unang ma dipasombu jala ditinggalhon Ibana hita.+ 58 Sai anggiat ma diurupi Ibana hita asa mangihutton sude dalanna sian nasa rohatta.+ Jala asa taoloi sude parettana, patikna, dohot aturanna naung dipaboa Ibana hian tu akka omputta. 59 Sai anggiat ma diingot Jahowa Debatanta i sude pangidoan naung hudokkon tu Jahowa arian nang borngin. Sai anggiat ma diurupi Ibana naposona dohot bangsona Israel manang aha pe na diulahon nasida ganup ari. 60 Asa diboto sude halak na di tano on, Jahowa do Debata na sittong.+ Dang adong Debata na asing!+ 61 Alani i, sian nasa rohamuna+ ma hamu mangihutton sude aturan ni Jahowa Debatanta i, jala toktong ma oloi parettana songon naung diulahon hamu sadari on.”

62 Dung i dilehon raja i dohot sude halak Israel ma godang pelean tu Jahowa.+ 63 Dilehon si Salomo ma 22.000 lombu dohot 120.000 biru-biru lao gabe pelean pardamean*+ tu Jahowa. Songon i ma raja dohot bangso Israel mambahen pesta di jabu ni Jahowa paboa naung sae jabu i.+ 64 Di ari i, dipabadia Raja Salomo ma tonga-tonga ni alaman na di jolo ni jabu ni Jahowa. Ai disi do pelehononna pelean situtungon, pelean sipanganon,* dohot tabo-tabo na sian pelean pardamean. Alana langgatan na sian tombaga+ na di jolo ni Jahowa i, pagellengku do i lao gabe inganan ni pelean situtungon, pelean sipanganon, dohot tabo-tabo+ na sian pelean pardamean. 65 Marpesta+ ma si Salomo di jolo ni Jahowa rap dohot sude halak Israel na ro sian Lebo-hamat* sahat tu Sunge* Mesir.+ Dibahen nasida parjolo pesta i 7 ari, jala dibahen nasida ma muse 7 ari nai, gabe 14 ari ma lelengna nasida na marpesta i. 66 Marsogotna i* disuru si Salomo ma mulak akka jolma i tu jabuna be. Sude do nasida manangiakkon asa dipasu-pasu Debata raja i. Dung i, mulak ma nasida tu jabuna. Massai las do roha ni nasida alani sude na denggan+ na binahen ni Jahowa tu si Daud naposona dohot tu sude halak Israel.