Marratus Halak Mangida Jesus Andorang so Pentakosta

Dung dipahehe Jesus, didok ibana do asa dijumpangi 11 apostelna ibana di sada dolok di Galilea. Alai dohot do 500 sisean na asing ro tusi. Ndang porsea hian piga-piga sian nasida naung hehe Jesus. (Mateus 28:17; 1 Korint 15:6) Alai dipapos Jesus ma roha ni nasida na tutu ibana mulak mangolu.

Dipaboa Jesus ma naung dilehon Debata tu ibana sude huaso na di banua ginjang dohot na di tano on. Didok Jesus ma tu nasida, “Laho ma hamu, bahen ma saluhut halak sian nasa bangso gabe siseanku, didi hamu ma nasida di bagasan goar ni Ama, Anak, dohot tondi parbadia. Ajari hamu ma nasida mangulahon sude naung huparentahon tu hamu.” (Mateus 28:18-20) Nang pe nunga hehe Jesus, lomo dope rohana asa dipaboa barita na uli.

Sude na mangihuthon Jesus, baoa, borua, dohot dakdanak, ingkon mangurupi angka halak asa gabe sisean. Olo do ra adong halak na mangorai jala mangambati nasida marbarita. Alai didok Jesus do, “Nunga dipasahat tu ahu saluhut huaso na di banua ginjang dohot na di tano on.” Jala didok ma muse, “Ida ma, sai na dongananku do hamu sahat tu panutup ni jaman on.” Ndang didok Jesus boi sude na mangihuthon ibana mambahen tanda halongangan manang mukjizat. Alai sai diurupi tondi parbadia do nasida tingki marbarita.

Dung dipahehe Debata Jesus, dipataridahon ibana do dirina tu angka siseanna “saleleng 40 ari”. Nang pe ndang ditanda nasida ibana, “dipatuduhon ibana do tu nasida naung mulak mangolu ibana marhite godang tanda na papos roha”. Jala dipaboa ibana do tu nasida “taringot tu Harajaon ni Debata”.​—Ulaon ni Apostel 1:3; 1 Korint 15:7.

Tingki di Galilea dope angka apostel, disuru Jesus ma nasida mulak muse tu Jerusalem. Dung pajumpang nasida di Jerusalem, didok Jesus ma, “Unang tadingkon hamu Jerusalem, alai tongtong ma paima hamu janji ni Ama i, na binegemuna sian ahu. Aek do dibahen si Johannes mandidi hamu, alai ndang sadia leleng nai didihononna ma tondi parbadia tu hamu.”​—Ulaon ni Apostel 1:4, 5.

Dung i dijumpangi Jesus ma muse angka apostelna. Ditogihon ma nasida “kaluar sian kota i sahat tu Betania”, na di timur ni Dolok Jetun. (Lukas 24:50) Nang pe nunga dipaboa Jesus na ingkon laho ibana tu surgo, alai sai dirimpu angka apostel do di tano on pajongjongon ni Jesus Harajaonna.​—Lukas 22:16, 18, 30; Johannes 14:2, 3.

Didok angka apostel ma, “Ale Tuan na laho pajongjongonmu do muse saonari pamarentaon ni Debata di Israel?” Didok Jesus ma, “Ndang hakmuna mamboto taringot tu tingki manang masa naung ditontuhon Ama i marhite huasona.” Dung i dipaboa Jesus ma aha na ingkon diulahon nasida, “Jaloonmuna ma huaso tingki songgop tondi parbadia tu hamu, jala paboaonmuna ma taringot tu ahu di Jerusalem, di saluhut luat di Judea, di Samaria, sahat tu ujung ni tano on.”​—Ulaon ni Apostel 1:6-8.

Tingki rap dope Jesus dohot angka apostelna di Dolok Jetun, tarangkat ma ibana tu surgo. Dung i ndang tarida be ibana ala nunga ditutupi ombun. Dung dipahehe Jesus, boi do ibana diida nasida. Alai dung tarangkat ibana tu surgo, ndang boi be nasida mangida ibana. (1 Korint 15:44, 50; 1 Petrus 3:18) Sai diida angka apostel i ma tu ginjang. Dung i tompu ma jongjong “dua halak na marpangkean na bontar” di lambung ni nasida. Suru-suruan do i. Didok suru-suruan i ma, “Hamu halak Galilea, boasa jongjong hamu huhut mangida tu langit? Anggo Jesus i, na tarangkat sian lambungmuna tu langit, na laho ro do ibana muse dos songon na niidamuna ibana laho dompak langit.”​—Ulaon ni Apostel1:10, 11.

Holan angka siseanna do na mangida Jesus tingki tarangkat tu surgo. “Dos songon” i ma haduan harorona di Harajaonna. Holan angka na mangihuthon ibana do na mamboto.

Dung i mulak ma angka apostel tu Jerusalem. Saleleng piga-piga ari dungkon i, marpungu do nasida dohot angka sisean na asing, dohot ma i “si Maria ina ni Jesus dohot angka anggi ni Jesus”. (Ulaon ni Apostel 1:14) Tongtong do nasida martangiang. Tingki mamillit apostel na laho manggantihon si Judas Iskariot asa tongtong 12 godang ni apostel, martangiang do nasida. (Mateus 19:28) Ingkon sisean na mangida haheheon dohot ulaon ni Jesus do na dipillit. On ma na parpudi sahali naposo ni Debata mambahen undi laho mamboto lomo ni roha ni Debata. (Psalmen 109:8; Poda 16:33) Ujungna tarpillit ma si Matias gabe “dongan ni apostel na 11 i”. Olo do ra dohot ibana tingki disuru Jesus 70 halak marbarita.​—Ulaon ni Apostel 1:26.

Sampulu ari dung tarangkat Jesus tu surgo, mangarayahon perayaan Pentakosta ma halak Jahudi taon 33 M. Marpungu ma hira-hira 120 sisean ni Jesus di sada inganan di Jerusalem. Tompu ma tarbege soara songon soara ni alogo na gogo di bagasan inganan i. Diida nasida ma na songon dila ni api jala songgop ma i tu nasida sude. Gabe boi ma nasida mangkatai di marragam bahasa. Nunga dijalo nasida tondi parbadia songon na dijanjihon Jesus!​—Johannes 14:26.