Sada Parningotan sian Naung Salpu

Ndang pasombuon ni Jahowa angka parjahat i manegai Paradeiso. Holan angka alealena do na mangolu di Paradeiso. Aha do na masa tu angka parjahat? Asa taboto alusna, parrohahon ma di tingki ngolu ni si Noak. Si Noak mangolu marribu taon naung salpu. Ibana sahalak na bontor jala marsitutu mangulahon hombar tu lomo ni roha ni Debata. Alai, angka halak na asing mangulahon hajahaton. Dung i dipaboa Jahowa ma tu si Noak, naeng paroonna aek na sumar laho mangaripashon sude angka parjahat. Didok ma tu si Noak asa dipauli sada parau laho inganan ni si Noak dohot keluargana asa unang mate nasida di tingki ro aek na sumar.—1 Musa 6:9-18.

Si Noak dohot keluargana paulihon sada parau. Dipaingot si Noak do angka jolma na laho ro aek na sumar, alai ndang ditangihon nasida ibana. Nasida tongtong mangulahon angka na jahat. Dungkon sae dipauli parau i, dipamasuk si Noak ma angka binatang tusi, jala masuk ma ibana dohot keluargana. Dung i diparo Jahowa ma udan habahaba. Ro ma udan saleleng 40 ari 40 borngin. Sude tano on digohi aek.—1 Musa 7:7-12.

Ripas ma angka parjahat, alai si Noak dohot keluargana dipalua do. Dipalua Jahowa do nasida sian aek na sumar jala boi mangolu di tano naung ias sian hajahaton. (1 Musa 7:22, 23) Bibel mandok, sahali nai laho ripashonon ni Jahowa ma angka halak na so mangulahon aha na sintong di adopanNa. Halak na burju ndang ripashononNa. Mangolu ma nasida salelenglelengna di Paradeiso.—2 Petrus 2:5, 6, 9.

Saonari pe godang do halak mangulahon angka na jahat. Portibi on gok hasusaan. Disuru Jahowa do angka SitindangiNa marulakulak laho paingothon angka jolma, alai godang do na so olo manangihon hataNa. Ndang olo nasida muba. Ndang olo nasida manjalo aha na didok ni Debata taringot na denggan dohot na roa. Aha ma na naeng masa tu angka jolma sisongon i? Boi do muba nasida di sada tingki? Godang do halak na so olo muba. Na ro ma tingkina angka parjahat ripas jala ndang boi be mangolu nasida.—Psalmen 92:8.

Portibi on ndang ripashononNa; alai paulionNa gabe sada paradeiso. Angka halak naung aleale ni Jahowa naeng mangolu salelenglelengna di Paradeiso.—Psalmen 37:29.