Hasintongan taringot tu Harajaon Marsinondang

1, 2. Boasa boi tapatudos Jesus songon pemandu wisata na marbisuk?

PINGKIRHON ma hamu mardalani tu sada kota didongani pemandu na marpengalaman. Ala ndang hea dope hamu tusi, sungkunsungkun do rohamu taringot tu kota i. Alai, tingki disungkun hamu pemandu i, ndang olo ibana pintor paboahon alusna, dung pe jonok tu kota i asa dipaboa ibana godang hatorangan taringot tu sungkunsungkunmuna. Las ma rohamuna ala di paboa pemandu i do hatorangan na ringkot taringot tu kota i di tingkina.

² Boi ma halak Kristen na sintong dipatudos songon halak na mardalani i. Lomo rohanta mamboto taringot tu sada kota na balga, ”huta na marojahan na hot”, i ma Harajaon ni Debata. (Heb. 11:10) Boi do Jesus tapatudos tu pemandu i ala tingki di tano on ibana, diurupi do angka siseanna mananda Harajaon i. Pintor dialusi Jesus do sude di tingki i sungkunsungkun ni sisean taringot tu Harajaon ni Debata? Ndang dialusi. Didok Jesus, ”Godang dope nian sidohononku tu hamu; alai ndang tarboan hamu dope i nuaeng.” (Joh. 16:12) Songon pemandu na marbisuk, ndang pintor dipaboa Jesus hasintongan na so tarantusan ni siseanna i dope.

3, 4. (a) Songon dia do Jesus mangajari halak Kristen na serep marroha taringot tu Harajaon ni Debata? (b) Aha do na laho taparsiajari di pasal on?

³ Dipaboa Jesus do hata na disurat di Johannes 16:12 andorang so mate ibana. Alai dung mate, songon dia do ibana mangurupi siseanna mangantusi Harajaon ni Debata? Dipapos Jesus do roha ni angka siseanna. Ibana mandok, ”Tondi hasintongan . . . togihonon ni I do hamu tubagasan nasa hasintongan.”a (Joh. 16:13) Ditogutogu Jesus do angka siseanna marhite tondi parbadia laho mangantusi Harajaon ni Debata di tingkina.

⁴ Taida ma songon dia tondi parbadia manogunogu halak Kristen na serep marroha mangantusi taringot tu Harajaon ni Debata. Na parjolo, taida ma songon dia hita mandapot pangantusion taringot tu andigan Harajaon i mamarenta. Dung i, taparsiajari ma ise do angka panggomgomi dohot rayatna jala tudia pangkirimon ni nasida. Na parpudi, taida ma songon dia siihuthon Jesus lam tangkas mangantusi lapatan ni marsihohot tu Harajaon ni Debata.

5, 6. (a) Songon dia do pangantusion ni Parsiajar Bibel sala taringot tu Harajaon ni Debata dohot masa gotilon? (b) Boasa pangantusion na sala i, ndang patuduhon na so ditogutogu Jesus nasida?

⁵ Songon naung dipaboa di Pasal 2, nunga marpulu taon Parsiajar Bibel mandok, ringkot do taon 1914. Alai, didok nasida do haroro ni Kristus dipungka taon 1874, jala pamarentaonna sian surgo taon 1878. Dung i, dipahot ma Harajaon i bulan Oktober taon 1914. Didok nasida muse molo masa ni gotilon dipungka sian 1874 sahat tu taon 1914. Dung i, dipapungu ma halak Kristen na miniahan tu surgo. Alai, sala do pangantusion ni nasida i. Antong, na so diurupi Jesus do nasida di tingki i?

⁶ Ndang songon i! Ingot ma muse tudosan di mula ni parsiajaran on. Olo do pajolohu angka na mardalani i paboahon hatorangan taringot tu kota i, gabe hurang pas na nidok ni nasida. Antong, gabe tasalahon do pemandu i? Tontu ndang salahononta! Songon i ma, olo do sipata lomo hian roha ni naposo ni Debata naeng mangantusi hasintongan taringot tu sangkap ni Jahowa, alai boi do sala pangantusion ni nasida ala ndang tingkina dope diurupi nasida mangantusi i. Alai, serep do roha ni nasida, ala dipahombar nasida do pangantusionna tu na sintong.​—Jak. 4:6.

 7. Songon dia do naposo ni Debata marsinondang di partondion?

⁷ Dung taon 1919, lam marsinondang ma naposo ni Debata di partondion. (Jaha Psalmen 97:11.) Taon 1925, artikel na marjudul ”Jongjong Sada Bangso” (Birth of the Nation) dipabinsar di The Watch Tower. Artikel i patuduhon molo Pamarentaon ni Messias nunga jongjong taon 1914 na digombarhon songon boruboru na mangintubu na disurat di Pangungkapon bindu 12.b Dipaboa muse di artikel i sitaonon dohot hasusaan na dihilala naposo ni Debata tingki masa porang. On patuduhon molo Sibolis nunga didabu sian surgo, jala ”marrimas situtu; ai diboto, otik nama tingkina”!​—Pgk. 12:12.

8, 9. (a) Songon dia do ringkot ni Harajaon ni Debata dipapatar? (b) Aha do sungkunsungkun na laho taparsiajari?

⁸ Sadia ringkot do Harajaon ni Debata? Taon 1928, Dipapatar do di The Watch Tower molo Harajaon ni Debata rumingkot sian haluaon alani tobusan. Sasintongna, Pamarentaon ni Messias ma na dipangke Jahowa laho pabadiahon goarNa, patigorhon hakNa mamarenta, jala pasauthon sude sangkapNa tu jolma.

⁹ Ise do na laho mamarenta rap dohot Kristus di Harajaon ni Debata? Ise do na gabe rayat ni Harajaon i di tano on? Jala aha do na ringkot laho diulahon siihuthon Jesus?

10. Aha do naung diantusi naposo ni Debata taringot tu 144.000 halak na miniahan sian abad na parjolo?

¹⁰ Marpulu taon andorang so taon 1914, nunga diantusi halak Kristen na sintong holan 144.000 halak do bilangan ni halak na laho mamarenta rap dohot Kristus di surgo.c Dipaboa do muse molo bilangan i harfiah, jala nasida nunga dipillit sian abad na parjolo M.

11. Songon dia do halak na laho oroan ni Kristus lam tangkas mangantusi ulaon ni nasida di tano on?

¹¹ Aha do ulaon na dilehon tu oroan ni Kristus tingki di tano on nasida? Diboto nasida do molo Jesus patujolohon ulaon marbarita. Jala dipatudos do i tu masa ni gotilon. (Mat. 9:37; Joh. 4:35) Songon na taparsiajari di Pasal 2, hea do didok nasida masa ni gotilon i saleleng 40 taon, jala di ujung ni gotilon i do dipapungu halak na miniahan tu surgo. Alai, ndang marujung dope ulaon marbarita nang pe nunga salpu 40 taon. Alani i, porlu ma dipatangkas pangantusion on. Saonari, nunga taboto molo masa gotilon, i ma tingki disirang eme sian simaremeeme, halak Kristen na miniahan disirang sian halak Kristen palsu. Ulaon on dipungka sian taon 1914. Jala on ma tingkina laho papunguhon sude halak na marpangkirimon tu surgo!

12, 13. Songon dia do tudosan ni Jesus taringot tu sampulu anak boru dohot talenta digohi di tingki parpudi?

¹² Sian taon 1919 ditogutogu Kristus do naposo Haposan mangantusi na ringkot ulaon marbarita. Nunga dipaboa ibana hian taringot tu ulaon i di abad na parjolo. (Mat. 28:19, 20) Dipaboa do muse songon dia halak na miniahan i mangulahon ulaon on. Umpamana, sian tudosan taringot tu sampulu anak boru, dipatudu Jesus ma molo halak na miniahan ingkon tongtong mangarade jala dungo di partondion. On mambahen nasida boi parsidohot tu parunjuhan manang pesta parbogason di surgo, dung rap Kristus dohot oroanna, si 144.000 halak i. (Pgk. 21:2) Dung i, sian tudosan taringot tu talenta manang bagian, dipaboa Jesus do molo angka naposo na miniahan ingkon ringgas marbarita.​—Mat. 25:1-30.

¹³ Saleleng 100 taon, tangkas do tarida molo angka na miniahan rade jala ringgas di ulaon on. Dipasupasu do ulaon ni nasida! Alai, holan na 144.000 halak i do na dipapungu di masa gotilon?

14, 15. Ise do opat punguan na dipaboa di buku The Finished Mystery?

¹⁴ Nunga leleng naposo ni Debata naeng mamboto ise punguan na ”mansai torop” manang punguan na bolon na dipaboa di Pangungkapon 7:9-14. Ala ndang tingkina dope dipapatar Jesus taringot tu punguan i, ndang pola longang rohanta molo asing hatorangan ni nasida tu pangantusionta saonari.

¹⁵ Taon 1917, buku The Finished Mystery paboahon, ”Adong dua punguan ni halak na mandapot hangoluan di surgo, jala adong dua punguan na mandapot hangoluan di tano on.” Ise do opat punguan i? Punguan na parjolo, i ma 144.000 halak na rap mamarenta dohot Jesus di surgo. Punguan na paduahon, i ma punguan na bolon na dipaboa di buku Pangungkapon. Di tingki i, dirimpu nasida do molo punguan na bolon on, i ma halak Kristen na laho dope tu gareja, jala ndang marhaporseaon na togu. Nang pe pangkirimon ni nasida mangolu di surgo, alai tumimbo do hak na sumurung na dilehon tu 144.000. Punguan na patoluhon, i ma ”halak na marhaporseaon najolo” songon si Abraham, si Musa dohot na asing. Jala nasida ma na marhuaso tu punguan na paopathon, i ma sude jolma na di portibi on.

16. Aha do hasintongan na dipapatar taon 1923 dohot taon 1932?

¹⁶ Songon dia do tondi parbadia manogunogu siihuthon Jesus mangantusi hasintongan? Disondangi do nasida di partondion sian tingki tu tingki. Sian taon 1923, The Watch Tower paboahon adong punguan na so marpangkirimon tu surgo alai mangolu di Harajaon ni Kristus di tano on. Taon 1932, The Watchtower paboahon taringot tu si Jonadab (Yehonadab), na rap dohot si Jehu raja ni halak Israel mangalo panombaon na so sintong. (2 Raj. 10:15-17) Di artikel i dipaboa, adong punguan ni halak na mangolu saonari, na dipatudos tu si Jonadab na diurupi Jahowa malua sian ”hasusaan di Armagedon” asa mangolu di tano on.

17. (a) Songon dia do hasintongan marsinondang tu naposo ni Debata taon 1935? (b) Songon dia do pangkilalaan ni halak Kristen tu pangantusion na baru taringot tu punguan bolon? (Ida ma kotak ”Las do Roha ni na Ro”.)

¹⁷ Taon 1935, lam marsinondang ma hasintongan. Dipaboa di kebaktian di Washington, DC, punguan bolon, i ma halak na marpangkirimon di tano on. Nasida ma na didok birubiru songon na adong di tudosan na pinaboa ni Jesus taringot tu birubiru dohot hambing. (Mat. 25:33-40, Bibel siganup ari) Punguan bolon, i ma ’birubiru na asing’, jala didok Jesus do taringot tu nasida, ”Ingkon dohot do angka i togihononku.” (Joh. 10:16) Tingki didok si J. F. Rutherford, ”Na mangkirim laho mangolu saleleng ni lelengna di tano on, boi jongjong!” Lobi sian satonga na ro tu kebaktian i na jongjong! Didok ma muse, ”Ida ma! On ma punguan bolon i!” Balga do roha ni godang halak na ro tu kebaktian i ala nunga tangkas diboto pangkirimon ni nasida.

18. Ulaon na marsitutu aha do na diulahon siihuthon Jesus tingki marbarita jala aha do na dapot ni nasida?

¹⁸ Mulai sian i, ditogutogu Kristus do siihuthon ibana marsitutu papunguhon halak na parsidohot tu punguan bolon asa malua sian hasusaan bolon. Alai di mulana, ulaon papunguhon i ndang songon na hinirim ni nasida. Jala hea do didok si Rutherford, ”Huhilala, ndang sadia godang halak na dohot tu ’punguan bolon’ on.” Alai, songon naung taboto nunga godang saonari punguan on ala dipasupasu Jahowa ulaon i! Marhite panogunoguon ni Jesus dohot tondi parbadia, digohi ma surirang ni Jesus asa ”sada punguan” angka na miniahan dohot ’birubiru na asing’ jala ”sada ma parmahan” ni nasida.

19. Songon dia do hita boi parsidohot tu ulaon papunguhon halak tu punguan na bolon?

¹⁹ Torop sian halak na marsihohot tu Debata mangkirim mangolu di Paradeiso di Harajaon ni Kristus rap dohot 144.000 halak. Molo tarimangi songon dia Kristus manogunogu naposo ni Debata asa lam tangkas mangantusi pangkirimon ni nasida, songon dia do pangkilalaanta? Hak na sumurung do di hita paboahon pangkirimon i tingki marbarita. Alani i, marsitutu ma hita parsidohot tu ulaon papunguhon halak na dohot tu punguan bolon, asa parohon pujian tu Jahowa!​—Jaha Lukas 10:2.

20. Aha do na dohot tu organisasi ni Sibolis jala aha do lapatanna marsihohot tu Harajaon i?

²⁰ Nang pe lam tamba pangantusion ni naposo ni Debata, alai ringkot do botoon ni nasida lapatan ni marsihohot tu Harajaon i. Taon 1922, The Watch Tower paboahon adong dua organisasi na mangkorhon tu jolma saonari, i ma organisasi ni Debata dohot organisasi ni Sibolis. Na dohot tu organisasi ni Sibolis, i ma sistem perdagangan, politik dohot agama. Sude naposo ni Debata, ndang boi parsidohot tu organisasi ni Sibolis, ala on boi mambahen nasida ndang marsihohot tu Harajaon ni Debata. (2 Kor. 6:17) Aha do lapatan ni on?

21. (a) Songon dia do naposo haposan paingothon halak Kristen taringot tu sistem perdagangan? (b) Aha do na dipapatar taon 1963 di The Watchtower taringot tu ”Babel na balga”?

²¹ Jotjot do dipaboa naposo haposan na so sintong sistem perdagangan, jala dipaingot do naposo ni Debata asa pasidingkon parange na holongan di hepeng. (Mat. 6:24) Angka bukunta pe jotjot do papatarhon ulaon ni agama na mangihuthon organisasi ni Sibolis. Taon 1963, tangkas do dipatudu The Watchtower, na didok Babel na balga, ndang holan Kristen palsu alai dohot do sude agama palsu na di portibi on. Lam tangkas ma taida di Pasal 10, songon dia naposo ni Debata na marharoroan sian sude bangso, diurupi asa ”ruar” jala pasidingkon dirina sian sude ulaon ni agama palsu.​—Pgk. 18:2, 4.

22. Songon dia do pangantusion ni naposo ni Debata taringot tu Rom 13:1 tingki Porang Dunia I?

²² Songon dia do taringot tu politik? Boi do halak Kristen dohot marporang manang parsidohot tu parmusuon ni angka bangso? Saleleng Porang Dunia I, diantusi Parsiajar Bibel do na so boi angka siihuthon Kristus mambunu. (Mat. 26:52) Alai tingki i, sala do pangantusion ni nasida taringot tu ayat na disurat di Rom 13:1 na mandok, ingkon oloan do ”panggomgomi na marsahala”. Lapatan ni ayat i didok roha ni nasida i ma, ingkon olo gabe tentara, mamangke baju ni tentara, dohot mamboan sinjata. Alai tingki marporang, ndang olo nasida manembak jolma.

23, 24. Tingki masa Porang Dunia II, songon dia do pangantusion ni naposo ni Debata tu ayat na disurat di Rom 13:1, jala songon dia do pangantusion on lam dipatangkas?

²³ Taon 1939, tingki masa Porang Dunia II tangkas do dipaboa The Watchtower taringot tu kenetralan. Dipaboa do di artikel i, na so boi parsidohot halak Kristen tu sude porang dohot parmusuon ni angka bangso. Pangantusion on dilehon di tingki na dihaporluhon! Alani i, malua ma siihuthon Jesus sian utang mudar ala ndang dohot marporang songon angka bangso. Dung i, di mula ni taon 1929 dipaboa do di publikasinta, molo panggomgomi na disurat di Rom 13:1, ndang panggomgomi sian pamarentaon ni jolma, alai na nidokna disi, i ma Jahowa dohot Jesus. Alani i, dihaporluhon ma pangantusion na sintong.

²⁴ Taon 1962, diurupi tondi parbadia do siihuthon Jesus mangantusi taringot tu panggomgomi na disurat di Rom 13:1-7 na dipatorang di The Watchtower 15 November dohot 1 Desember. Diantusi naposo ni Debata ma prinsip laho mangoloi pamarentaon ni jolma sian hata ni Jesus na mandok, ”Lehon hamu ma tu Kesar na sian Kesar i, jala tu Debata na sian Debata!” (Luk. 20:25) Saonari, diantusi naposo ni Debata do molo ”panggomgomi na marsahala”, i ma pamarentaon ni jolma. Alani i, ingkon unduk do nasida tu pamarentaon i. Alai, molo maralo do na pinangido ni pamarenta tu patik ni Debata, tatiru ma angka apostel na mandok, ”Ingkon oloan do iba di Debata asa di jolma!” (Ul. 5:29) Di Pasal 13 dohot 14 dipatorang ma songon dia naposo ni Debata mamangke prinsip kenetralan i.

25. Boasa mandok mauliate hita tu Debata alani pangantusion on?

²⁵ Pingkirhon ma sude na diajarhon taringot tu Harajaon saleleng 100 taon on tu angka siihuthon Kristus. Nunga taboto andigan jongjong Harajaon i di surgo, jala sadia ringkot i di hita. Taboto do muse aha pangkirimon na dilehon tu halak na marsihohot tu Debata, i ma pangkirimon mangolu di surgo dohot di tano on. Jala nunga taboto songon dia patuduhon na marsihohot hita tu Harajaon ni Debata, huhut mangoloi pamarentaon ni jolma. Tasungkun ma dirinta, ’Boi do huantusi sude hasintongan on molo ndang diurupi Jesus naposo haposan laho mangajarhon i?’ Mandok mauliate ma hita ala ditogutogu Kristus dohot tondi parbadia hita mangantusi on!