Ingkon Tardidi do Ahu laho Mangoloi Debata?

 1. Sungkunsungkun aha do na porlu tapingkiri?

NUNGA diboto hamu godang hasintongan sian Bibel saleleng marsiajar mamangke buku on, songon haheheon, hangoluan salelengna dohot na masa tu halak naung mate. (Parjamita 9:5; Lukas 23:43; Johannes 5:28, 29; Pangungkapon 21:3, 4) Ra, nunga ro hamu tu parpunguan ni Sitindangi Ni Jahowa jala nunga diida hamu nasida manomba Debata mangihuthon cara na sintong. (Johannes 13:35) Ra, nunga lam togu paralealeonmu tu Jahowa jala nunga dipillit hamu laho mangoloi Ibana. Alani i, olo do ra ninna rohamu, ’Aha dope na ingkon ulahononku?’

 2. Boasa taronjar roha ni halak Etiopia i tardidi?

² Songon i do na dihilala sahalak baoa sian Etiopia. Dung hehe Jesus tu surgo, marbarita na uli ma si Pilippus tu halak Etiopia i. Dipatorang si Pilippus tu ibana molo Jesus i, Messias. Alani pangajarion na binegena i, las situtu ma rohana jala didok ma, ”Adong do indion aek. Ndang boi dope ahu tardidi?”​—Ulaon ni Apostel 8:26-36, Bibel siganup ari.

 3. (a) Parenta aha do dilehon Jesus tu siseanna? (b) Songon dia do dibahen tu sasahalak tingki tardidi?

³ Tangkas do dipaboa di Bibel songon dia ringkot ni pandidion laho manomba Jahowa. Didok Jesus tu siseanna, ”Podai hamu ma saluhut bangso, didi hamu ma nasida.” (Mateus 28:19) Dibahen Jesus do sitiruon tingki dilehon dirina asa tardidi. Tingki tardidi Jesus, ndang holan dipispishon aek tu uluna, alai dibonomhon do ibana tu aek. (Mateus 3:16) Saonari pe, tingki tardidi sahalak Kristen, ingkon dibonomhon do tu aek.

 4. Aha do na tapatuduhon tingki hita tardidi?

⁴ Molo tardidi hita, on patuduhon tu na torop naung maraleale do hita tu Debata jala rade mangoloi Ibana. (Psalmen 40:8, 9) Alani i, olo do ra sungkunsungkun rohanta, aha dope na porlu ulahononku asa boi ahu tardidi?

 5. (a) Aha do parjolo na ingkon taulahon andorang so tardidi? (b) Boasa ingkon ringgas hita ro tu parpunguan?

⁵ Andorang so tardidi hita, parjolo ingkon tatanda do Jahowa dohot Jesus marhite marsiajar Bibel. (Jaha Johannes 17:3.) Alai ndang sae holan i. Bibel mandok, ”Asa digohi di hamu parbinotoan” taringot tu sangkap ni Jahowa. (Kolosse 1:9, Bibel siganup ari) Di parpunguan ni Sitindangi Ni Jahowa, diurupi do hita patoguhon paralealeonta tu Jahowa. I do alana, boasa ingkon ringgas hita ro tu parpunguan.​—Heber 10:24, 25.

 6. Ingkon sadia godang do taboto isi ni Bibel asa boi tardidi?

⁶ Ndang ingkon taboto sude isi ni Bibel asa boi hita tardidi. Ndang dipangido tu halak Etiopia i mangantusi sude hata ni Debata asa boi tardidi ibana. (Ulaon ni Apostel 8:30, 31) Jala, ingkon marsiajar dope hita tongtong taringot tu Jahowa salelengna. (Parjamita 3:11) Alai asa boi tardidi, ingkon taboto do ajaran dasar ni Bibel.​—Heber 5:12.

 7. Songon dia do parsiajaran Bibel mangurupi hita?

⁷ Bibel mandok, ”Alai ia so adong haporseaon ni sada halak, ndang boi lomo ni roha ni Debata di halak i.” (Heber 11:6, Bibel siganup ari) Alani i, ingkon marhaporseaon do hita tu Debata andorang so tardidi. Dipaboa di Bibel, adong sian huta Korint najolo manangihon na niajarhon sisean ni Jesus, ”gabe porsea jala tardidi”. (Ulaon ni Apostel 18:8) Dos songon i, marhite marsiajar Bibel, mambahen hita porsea tu bagabaga ni Debata. Jala, porsea tu tobusan ni Jesus na laho paluahon hita sian dosa dohot hamatean.​—Josua 23:14; Ulaon ni Apostel 4:12; 2 Timoteus 3:16, 17.

 8. Alani aha do taronjar rohanta paboahon naung taparsiajari tu dongan?

⁸ Lam togu ma haporseaonta tingki tahilala pangkorhon ni parsiajaran Bibel di ngolunta. Dung i, taronjar ma rohanta laho paboahon na taparsiajari tu na asing. (Jeremia 20:9; 2 Korint 4:13) Alai, tu ise do paboaonta?

9, 10. (a) Tu ise do parjolo paboaonmu angka naung pinarsiajaranmu? (b) Songon dia do asa boi hamu marbarita na uli dohot dongan di huria?

⁹ Las do ra rohanta laho paboahon na taparsiajari tu keluarga, aleale, hombar jabu manang tu dongan sakarejo. Denggan do i. Alai, ingkon lambok do hita laho paboahon na taparsiajari i. Di tingkina, boi ma hamu rap marbarita na uli dohot angka dongan di huria. Molo nunga rade hamu, paboa ma tu na mangurupi hamu marsiajar Bibel, na lomo do rohamu rap marbarita na uli dohot angka dongan di huria. Molo diida ibana naung diulahon hamu aturan ni Bibel, togihononna ma hamu mangkatai dohot sintua di huria.

¹⁰ Aha ma na laho dihatai angka sintua? Angka sintua naeng mamboto naung tangkas do diantusi jala dihaporseai hamu ajaran dasar ni Bibel. Ringkot muse botoon ni nasida naung diulahon hamu do i di parngoluonmuna siganup ari jala marsitutu do hamu gabe Sitindangi Ni Jahowa. Angka sintua do na manarihon sude halak na di huria, hamu pe disarihon do. Alani i, unang pola mabiar hamu mangkatai tu nasida. (Ulaon ni Apostel 20:28; 1 Petrus 5:2, 3) Dung sae hamu mangkatai dohot angka sintua, paboaon ni angka sintua i ma tu hamu boi do hamu manang na ndang marbarita na uli dohot dongan di huria.

11. Boasa ringkot mambahen hamubaon andorang so dohot marbarita na uli dohot dongan di huria?

¹¹ Olo do adong dipaboa angka sintua sipaubaonmu di parngoluonmuna andorang so dohot marbarita na uli dohot dongan di huria. Boasa ringkot mambahen hamubaon sisongon i? Alana, tingki marbarita na uli, goar ni Jahowa do na tapaboa. Alani i, ingkon tapahombar ma parngoluonta tu na taparsiajari asa parohon sangap tu goarNa.​—1 Korint 6:9, 10; Galatia 5:19-21.

12. Boasa hita sude ingkon marhamubaon?

¹² Adong dope na ingkon taulahon andorang so tardidi. Apostel Petrus mandok, ”Pauba hamu ma rohamuna, mulak ma hamu tu Debata, asa disesa angka dosamuna i.” (Ulaon ni Apostel 3:19, Bibel siganup ari) Aha do lapatan ni pauba diri? Lapatanna, panolsolion tu angka na sala na hea taulahon. Umpamana, molo diulahon hamu ulaon na so tama najolo songon parmainanon, ingkon marhamubaon do hamu. Alai, nang pe nunga marsitutu hita laho mangulahon na sintong, tongtong dope hita ingkon marhamubaon. Alana, sude hita jolma na mardosa jala ingkon tongtong mangido hasesaan ni dosa tu Debata.​—Rom 3:23; 5:12.

13. Aha do lapatan ni ”mulak tu Debata”?

¹³ Sae do holan panolsolion tu sude na sala na taulahon? Ndang. Apostel Petrus mandok, porlu hita ”mulak tu Debata”. Lapatanna, ingkon manadingkon ulaon na sala jala mangulahon na sintong. Umpamana, molo laho hita mardalani tu inganan na so hea dope tadalani. Alai dung di pardalanan, taboto ma naung sala dalan hita. Aha do ulahononta? Pintor so ma hita jala mamutar mangihuthon dalan na sintong. Dos songon i, saleleng marsiajar Bibel, olo do taida adong dope hasomalan manang angka na asing na sala na ingkon tapauba. Hatop ma hita ”mulak tu Debata” i ma mambahen hamubaon, dung i mangulahon lomo ni roha ni Debata.

14. Songon dia do mangalehon dirinta tu Jahowa?

¹⁴ Na ringkot muse andorang so tardidi, i ma mangalehon dirinta tu Jahowa. Tadok tu Ibana di tangiangta, manomba jala mangulahon sangkapNa ma na rumingkot di ngolunta.​—5 Musa 6:15.

15, 16. Aha do na mangonjar roha ni sasahalak laho mangalehon dirina tu Debata?

¹⁵ Marjanji laho mangoloi Jahowa, dos do i songon na marjanji tu sasahalak na tahaholongi. Umpamana, sahalak baoa na lomo rohana tu sahalak borua, lam ditanda ibana borua i, lam holong ma rohana. Nang pe adong tanggung jawab na balga molo marhasohotan nasida, alai alani holongna ndang mabiar ibana mangalap borua i gabe dongan saripena.

¹⁶ Lam tatanda Jahowa, lam tahaholongi ma Ibana jala lam marsitutu ma hita mangoloi Ibana. On ma na patoguhon rohanta laho marjanji mangoloi Ibana. Bibel mandok, ise pe na mangihuthon Jesus ingkon ”disoadahon ma dirina”. (Markus 8:34) Aha do lapatan ni on? Lapatanna, parjolo ma pangoloion tu Jahowa tabahen di ngolunta. Lomo ni roha ni Jahowa ma parjolo taulahon sian sude na rumingkot di ngolunta.​—Jaha 1 Petrus 4:2.

17. Boasa adong halak na marduadua rohana mangalehon diri tu Jahowa?

¹⁷ Adong halak na marduadua rohana mangalehon diri tu Jahowa, ala mabiar nasida ndang boi manggohi janjina tu Jahowa. Ndang olo nasida mambahen lungun roha ni Jahowa. Ninna roha ni nasida, molo ndang tardidi dope, ndang pangidoon ni Jahowa pertanggungjawaban tu sude na niulahonna.

18. Aha do na boi mangurupi hita asa unang mabiar mangalehon diri tu Jahowa?

¹⁸ Holongta tu Jahowa mangurupi hita asa unang mabiar mangalehon diri tu Jahowa. Ala tahaholongi Ibana, ulahononta do na dumenggan laho manggohi janjinta tu Ibana. (Parjamita 5:4; Kolosse 1:10) Ndang maol be di hita laho mangulahon lomo ni rohaNa. Apostel Johannes manurat, ”Ai on do holong ni roha di Debata; molo taradoti patikna. Ndada na dokdok patikna i.”​—1 Johannes 5:3.

19. Boasa ndang pola mabiar hita mangalehon diri tu Jahowa?

¹⁹ Ndang ingkon tipak hita asa boi mangalehon diri tu Jahowa. Ndang hea dipangido Jahowa aha na so boi taulahon. (Psalmen 103:14) UrupanNa do hita mangulahon na sintong. (Jesaya 41:10) Marpos ni roha ma tu Jahowa sian nasa roha asa Ibana patigor angka dalanta.​—Poda 3:5, 6.

20. Aha do na boi ulahononmu dungkon mangalehon diri tu Jahowa?

²⁰ Nunga rade hamu mangalehon diri tu Jahowa? Molo nunga dilehon hamu dirimuna tu Jahowa, boi ma lehononmu dirimu asa tardidi.

21, 22. Songon dia do hamu patuduhon naung ”mangkatindangkon” haporseaonmuna?

²¹ Paboa ma tu kordinator punguan ni sintua di huriamu naung dilehon hamu dirimu tu Jahowa jala na lomo rohamu laho tardidi. Dung i, tontuhononna ma tingki asa disungkun sintua naung mangantusi do hamu taringot ajaran dasar ni Bibel. Molo setuju do angka sintua hamu tardidi, paboaon ni nasida ma tu hamu asa boi hamu tardidi di kebaktian ni Sitindangi Ni Jahowa. Di kebaktian i, adong do jamita na patorangkon lapatan ni pandidion. Sungkunon ni parjamita i ma dua sungkunsungkun tu sude na laho tardidi. Alusmuna tu sungkunsungkun i, patuduhon naung rade hamu laho ”mangkatindangkon” haporseaonmuna.​—Rom 10:10.

²² Dung i, tardidi ma hamu dibonomhon tu aek. Pandidion i, patuduhon tu sude halak naung dilehon hamu dirimu tu Jahowa jala nunga gabe Sitindangi Ni Jahowa hamu.

23. Aha do lapatan ni tardidi di ”bagasan Goar ni Ama. Anak dohot Tondi Parbadia”?

²³ Dipaboa Jesus tu sude na mangihuthon ibana, ingkon tardidi di ”bagasan Goar ni Ama. Anak dohot Tondi Parbadia!” (Jaha Mateus 28:19.) Aha do lapatan ni on? Lapatanna, manjangkon Jahowa parhuaso di hita, manjangkon pamarentaon ni Jesus na laho pasauthon sangkap ni Debata jala manjangkon tondi parbadia na dipangke Jahowa laho pasauthon sangkapNa. —Psalmen 83:19; Mateus 28:18; Galatia 5:22, 23; 2 Petrus 1:21.

24, 25. (a) Aha do na pinatudu ni pandidion? (b) Aha do na laho taparsiajari di pasal na parpudi?

²⁴ Adong do muse na pinatudu ni pandidion i. Tingki dibonomhon hamu tu aek, lapatanna nunga mate manang nunga ditadingkon hamu angka hasomalanmuna najolo. Jala dung ruar sian aek, lapatanna nunga rade hamu mamangke ngolumuna laho mangoloi Debata. Ingot ma, tu Jahowa do talehon dirinta, ndang tu jolma manang tu sada organisasi.

²⁵ Pandidionta patoguhon paralealeonta tu Jahowa. (Psalmen 25:14) Alai, ndang na pintor malua hita ala nunga tardidi. Apostel Paulus mandok, ”Mardongan biar dohot lomos ni roha ulahon hamu ma haluaonmuna.” (Pilippi 2:12) Parmulaan dope pandidion i. Alai, songon dia do asa boi tongtong jonok tu Jahowa? Taida ma alusna di pasal na parpudi sian buku on.