Sabar do Jahowa tu Si Jona

Ninive i ma sada kota di Asiria. Mansai jahat do angka jolma na tading disi. Didok Jahowa ma tu panurirang Jona asa laho tu Ninive. Disuru ma ibana pasingothon angka halak disi asa unang jahat be nasida. Alai, ndang dioloi si Jona i. Laho do ibana markapal tu Tarsis.

Tingki di tonga laut, gogo hian ma alogo, gabe mabiar angka parkarejo ni kapal i. Martangiang ma nasida tu debata ni nasida. Didok ma, ‘Aha do na masa on?’ Ujungna didok si Jona ma tu nasida, ‘Ahu do na sala. Ndang huoloi Jahowa. Dabuhon hamu ma ahu tu laut on asa so alogo on.’ Ndang olo nasida mandabuhon ibana. Alai sai didok si Jona do asa didabuhon ibana. Dung didabuhon ibana tu laut i, so ma alogo i.

Didok roha ni si Jona, mate nama ibana. Lam dao ma ibana masuk tu bagas laut i. Martangiang ma ibana tu Jahowa. Disuru Jahowa ma sada dengke na mansai balga mambondut ibana. Alai ndang mate si Jona. Sian butuha ni dengke i, martangiang ma si Jona. Didok ma, ‘Marjanji ahu, ingkon sai oloanku do Ho.’ Dijaga Jahowa do si Jona saleleng tolu ari di butuha ni dengke i. Dung i diutahon dengke i ma ibana tu darat.

Dung malua si Jona, na so disuru Jahowa be ibana laho tu Ninive? Tongtong do disuru Jahowa ibana laho tusi. Alai mangoloi do si Jona. Laho ma ibana jala didok ma tu angka halak disi, ‘Opatpulu ari nai, laho ripashonon ni Jahowa ma kota on.’ Di na so panagamanna, ditangihon halak Ninive do na nidokna i, jala muba ma nasida. Didok raja Ninive ma tu bangsona, ‘Ganup halak martangiang ma tu Debata, jala tadingkon ma hajahatonmuna. Anggiat dipalua Jahowa hita.’ Tingki diida Jahowa i, ndang saut be dihancurhon kota Ninive.

Muruk ma si Jona ala ndang saut dihancurhon kota i. Hape sabar jala asi do roha ni Jahowa tu si Jona. Alai ndang marasi ni roha si Jona tu halak Ninive. Dung i, hundul ma ibana di sopo-sopo jala dibahen Jahowa ma tubu labu air. Alai gabe muruk do si Jona ala mate labu air i. Didok Jahowa ma tu ibana, ‘Boasa asi roham tu labu air on, hape tu halak Ninive ndang asi roham? Molo ahu asi do rohangku tu nasida, jala ndang lomo rohangku mate nasida.’ Aha do parsiajaranna? Ummarga do halak Ninive sian suan-suanan.