Mangolu Muse Jesus

Dung mate Jesus, ro ma si Josep sahalak baoa na mora. Dipangido ibana ma tu si Latus asa boi dibuat mayat ni Jesus. Dung dibuat ibana mayat ni Jesus, dibungkus ma dohot kain linen na arga jala dibahen ma angka rempah-rempah. Dung i dikubur ma i tu kuburan na baru. Adong do batu na balga manutup kuburan i. Alai didok angka malim kepala ma tu si Latus, ‘Mabiar do hami dibuat angka murid ni Jesus mayatna i. Dung i, gabe didok nasida ma na mangolu muse ibana.’ Didok si Latus ma, ‘Laho ma hamu. Denggan ma jaga kuburan i.’

Dung tolu ari, ro ma angka borua tu kuburan ni Jesus. Diida nasida ma nunga bungka kuburan i. Jala adong suru-suruan manang malaikat di bagasan. Didok suru-suruan i ma, ‘Unang mabiar hamu. Nunga mangolu muse Jesus. Laho ma hamu, suru ma angka muridna manjumpangi ibana di Galilea.’

Laho ma si Maria Magdalena paboahon i tu si Petrus dohot tu si Johannes. Ninna ma, ‘Nunga dibuat halak mayat ni Jesus.’ Lari ma si Petrus dohot si Johannes tu kuburan i. Alai nunga kosong kuburan i. Alani i, mulak ma nasida.

Ro ma muse si Maria tu kuburan ni Jesus jala diida ma adong dua suru-suruan disi. Didok ibana ma tu suru-suruan i, ‘Nunga ditangko halak tuanki.’ Dung i, diida ibana ma sahalak baoa. Dirimpu ibana do panjaga ni ladang baoa i. Disungkun si Maria ma, ‘Amang, didia do dibahen ho mayat ni Jesus i?’ Didok baoa i ma, “Maria!” Gabe diboto si Maria ma, Jesus do hape baoa i. Didok ibana ma, “Guru!” Dihaol si Maria ma Jesus. Didok Jesus ma, ‘Laho ma ho jala paboa ma tu angka muridhu naung pajumpang hita.’ Hatop ma laho si Maria jala dipaboa ma i tu angka murid ni Jesus.

Tingki di pardalanan dua murid ni Jesus sian Jerusalem tu Emmaus, didapothon sahalak baoa ma nasida. Disungkun ma aha na dihatai nasida. Didok nasida ma, ‘Ndang diboto ho? Tolu ari naung salpu, dihukum mate do Jesus. Alai adong angka borua mandok, naung mangolu muse Jesus!’ Disungkun baoa i ma, ‘Na so porsea do hamu tu na didok angka panurirang? Didok, ingkon mate do Kristus jala mangolu muse.’ Dipatorang baoa i ma hata ni Debata tu nasida. Dung sahat di Emmaus, ditogihon nasida ma baoa i asa rap dohot nasida. Tingki mangan, dibuat baoa i ma roti jala ditangiangkon. Gabe diboto nasida ma na Jesus do i. Dung i, ndang diida nasida be Jesus.

Hatop ma nasida mulak tu Jerusalem. Dipaboa ma tu angka murid na asing sude na masa tu nasida. Laos di tingki i, ro ma Jesus. Mulana, ndang porsea nasida na Jesus do i. Alani i didok Jesus ma, ‘I da ma tangankon jala tiop hamu ma ahu. Adong do tarsurat, ingkon mate do Kristus i jala mangolu muse.’