”Nunga Jonok Haluaonmuna”!

 1. Aha do na masa di taon 66? (Ida gombar di mula ni parsiajaran.)

AUTSUGARI hamu sahalak Kristen na mangolu di Jerusalem taon 66, songon dia do pangkilalaanmuna? Godang na masa di tingki i. Sahalak na marhuaso di Rom na margoar si Florus manangko 17 talenta sian bagas joro. Pintor tarrimas ma halak Jahudi. Dibunu nasida ma tentara Rom jala mangalo ma nasida tu Rom. Alai hatop do halak Rom mangadopi on. Di bagasan tolu bulan, 30.000 tentara na diuluhon Cestius Gallus ro mangaroro humaliang Jerusalem. Angka halak Jahudi na mangalo martabuni di tembok ni bagas joro, alai diroro tentara Rom do sahat tusi laho mangarumpakkon tembok i. Gabe mabiar ma sude halak na di huta i. Songon dia do pangkilalaanmuna molo diida hamu sude na masa on?

 2. Aha do na porlu diulahon halak Kristen tingki ro tentara Rom mangaroro huta nasida, jala aha do na masa?

² Marpulu taon andorang so masa i, nunga dipasingot Jesus tu angka siseanna: ”Molo diida hamu huta Jerusalem i hinaliangan ni angka parangan, boto hamu ma, naung donok nama hasesegana. Maporus tu dolok i ma di tingki i angka na di Judea i; angka na di bagasan huta i haruar ma sian i, jala angka na di ladang i, unang ma bongot tu huta i.” (Lukas 21:20, 21) Songon dia do nasida mangihuthon tudutudu ni Jesus laho manadingkon Jerusalem tingki diroro tentara ni Rom huta i? Masa ma na so panagaman. Tompu ma ditadingkon tentara Rom Jerusalem! Songon na didok Jesus, ”diorui” nasida ma paraloanna (Mateus 24:22) Dung laho tentara i, on ma tingkina mangoloi hata ni Jesus, maporus tu dolok raphon sude halak Kristen na marsihohot.a (Ida surat na di toru.) Dung i, di taon 70 ro ma muse tentara Rom tu Jerusalem. Ditutung nasida ma huta i. Alai malua do sude na mangoloi na nidok ni Jesus.

 3. Situasi na sarupa aha do na laho adopan ni halak Kristen, jala aha do na laho taulas di parsiajaran on?

³ Marlapatan dope sipasingot ni Jesus i tu hita saonari. Satongkin nari, laho taadopi na ma situasi na sarupa. Dipangke Jesus do na masa di abad parjolo laho patorangkon taringot ’haporsuhon bolon’ na laho tompu ro. (Mateus 24:3, 21, 29) Adong do halak Kristen na malua tingki disiaphon huta Jerusalem. Suang songon i, adong do ”mansai torop” halak na malua tingki disiaphon portibi on haduan. (Jaha Pangungkapon 7:9, 13, 14.) Ringkot do taantusi na dipatorang Bibel taringot ari na naeng ro. Boasa? Alana on mangkorhon tu ngolunta. Taulas ma songon dia angka na masa on mangkorhon tu hita ganup marsadasada.

 4. Songon dia do mula ni hasusaan bolon?

⁴ Songon dia do mula ni hasusaan bolon i? Dung diripashon agama na so sintong, masa ma hasusaan bolon. Di Bibel, agama na so sintong digoari ”Babel na balga, ina ni angka parmainan.” (Pangungkapon 17:5-7) Boasa digoari nasida ina ni angka parmainanon? Ala ndang marsihohot na manguluhon angka agama i tu Debata, tu Jesus dohot tu Harajaon ni Debata. Gariada, diurupi nasida do pamarenta jala ditundalhon ajaran ni Bibel, asa boi nasida sipardohot laho manggomgomi. Panombaon ni nasida ndang ias songon panombaon ni angka na nimiahan ni tondi. (2 Korint 11:2; Jakobus 1:27; Pangungkapon 14:4) Alai ise do na mangaripashon Babel na balga i? Jahowa mambahen ”sampulu tanduk” sian ”binatang na rara” asa ”pasauthon tahina hian.” Na digombarhon ni ”binatang na rara” i ma PBB, jala ”sampulu tanduk” manggombarhon sude na parsidohot di politik na mangaripashon Babel na balga i.​—Jaha Pangungkapon 17:3, 16-18.

5, 6. Boasa tadok ndang na ripashononNa sude na parsidohot tu agama na so sintong tingki diripashon Babel na balga?

⁵ Sude do diripashon Debata halak na parsidohot tu agama na so sintong tingki diripashon Babel na balga? Daong. Dipaboa Jahowa do tu panurirang Sakaria aha na laho masa. Di tingki i, sahalak sian agama na so sintong i mandok: ”’Ndang panurirang ahu, jolma siula tano do ahu, ai nunga adong jolma na tumuhor ahu sian sietehetehonku dope.’ Tung sura adong na mandok tu ibana: ’Bugang dia do i na di tanganmu?’ Gabe dohonon ma: ’Na dibugangi isi ni bagas haholonganku do ahu.’” (Sakaria 13:4-6) Tingki i, didok nasida ma ndang maragama jala ndang bagian ni agama na so sintong nasida.

⁶ Aha do na laho masa tu naposo ni Debata tingki i? Jesus paboahon: ”Aut unang diorui angka ari i, ndang tagamon malua agia sada jolma; alai ala ni angka na pinillit i do umbahen na diorui.” (Mateus 24:22) Di abad na parjolo, ”diorui” do haporsuhon na masa di Jerusalem. On mambahen ”angka na pinillit,” i ma halak Kristen na nimiahan boi maporus. Suang songon i, bagian na parjolo sian hasusaan bolon pe ”diorui” alani ”angka na pinillit.” Ndang na boi ripashonon ni politik na digoari ”sampulu tanduk,” angka naposo ni Debata. Gariada, adong do masa hadameon sisatongkin andorang so dipungka paraloan tu nasida.

7, 8. Aha do na ingkon taulahon dung diripashon agama na so sintong, jala songon dia do naposo ni Debata marimbar sian sude halak di tingki i?

⁷ Aha do na laho masa dung diripashon agama na so sintong? On ma tingkina, laho patuduhon aha do na sasintongna adong di bagasan rohanta. Di tingki i, godangan halak mangalului parlinggoman sian organisasi ni jolma na digoari ”angka liang dohot batu na di dolok.” (Pangungkapon 6:15-17) Alai naposo ni Debata mangalului parlinggoman sian Jahowa. Tingki ”diorui” hasusaan bolon di abad parjolo, ndang adong be tingki tu halak Jahudi laho gabe halak Kristen. Alai, i do tingki di halak Kristen laho ruar sian Jerusalem songon na didok Jesus. Suang songon i ma haduan, tingki ”diorui” ari laho mangalo Babel na Balga, ndang hirim rohanta torop halak gabe halak Kristen na sintong. Alai, on do tingki na pas tu sude panomba ni Debata na sintong laho patuduhon holong tu Jahowa jala satolop tu angka na nimiahan.​—Mateus 25:34-40.

⁸ Ndang taboto songon dia tangkasna ari na susa i. Alai ingkon rade do hita mangadopi i. Di abad na parjolo, halak Kristen ingkon maninggalhon jabu nasida jala martahan mangadopi hasusaan asa boi malua. (Markus 13:15-18) Tasungkun ma dirinta: ’Rade do ahu maninggalhon sude artangku? Olo do ahu mangulahon sude na dihaporluhon asa sai marsihohot ahu tu Jahowa?’ Rimangi ma! Di tingki i, holan hita do na manomba Debata, songon na disurirangkon panurirang Daniel.​—Daniel 6:10, 11.

9, 10. (a) Barita aha do na laho dipaboa naposo ni Debata saleleng hasusaan bolon? (b) Songon dia do musu ni naposo ni Debata mangadopi i?

⁹ Ndang tingkina be laho marbarita na uli ”taringot tu Harajaon” di hasusaan bolon. Nunga salpu be tingkina laho marbarita na uli. Na laho ro nama ”ujungna”! (Mateus 24:14) Alai naposo ni Debata ingkon barani paboahon barita na tangkas taringot panguhuman na mangkorhon tu sude halak. Ra, barita i taringot na laho ripashonon ni Debata ma portibi na dirajai Sibolis. Bibel patudoshon barita on songon ambolas: ”Madabu ma ambolas na balga, na sahat i dokdokna, sian langit tu angka jolma; gabe diinsahi angka jolma i do Debata dibahen porsuk ni ambolas i, ai balga situtu do bernit ni haporsuhon i.”​—Pangungkapon 16:21.

¹⁰ Begeon ni angka musunta do barita panguhuman on. Dipatorang Jahowa do tu panurirang Hesekiel, songon dia PBB na digoari Gog sian Magog mambege barita i: ”Songon on do hata ni Tuhan Jahowa: ’Di ari na sasada i padeakdeahonmu do tubutubu ni roham, jala na roa do sangkap ni roham. Jala dohononmu ma: ”Borhat ma ahu nangkok sumola sada luat na manaletes mangarampok halak angka na nalom, jala na marsonangsonang maringan, saluhut nasida maringan di adaran, so marparik manang marransangransang, pintu harbangan pe ndang adong di nasida.” Laho martabuni dohot mamupusi, laho mambahen tanganmu tu turanggong angka naung niinganan muse dohot tu sada bangso naung pinapungu muse sian angka bangso parbegu, naung umpungka pinahan jala marpangomoan, angka na maringan di pogu ni tano.’” (Hesekiel 38:10-12) Marimbar do di tingki i naposo ni Debata na maringanan ”di pogu ni tano” sian sude halak. Ndang boi diorom angka bangso dirina, pintor diroro do halak na nimiahan ni Jahowa dohot na mangihuthon nasida.

11. (a) Angka aha do na masa saleleng hasusaan bolon? (b) Molo diida jolma angka na masa i, songon dia do nasida mangadopi i?

¹¹ Aha do na laho masa muse? Ndang tangkas dipaboa Bibel tu hita. Alai, adong pigapiga na rap masa. Songon surirang ni Jesus taringot ajal ni portibi on na mandok: ”Dung i masa ma angka tanda di mata ni ari, di bulan dohot di angka bintang pe; jala hapusohan ma angka bangso di tano on jala bobonosan, bahenon ni gasak ni laut i dohot galumbangna. Tarhatos ma jolma i dibahen hatahutonna dohot panagamon ni rohana di na naeng masa tu liat portibi on; ai humuntal ma angka hagogoon ni parlangitan. Dung i idaonnasida ma Anak ni jolma i ro marhitehon ombun mantat huaso dohot hasangapon godang.” (Lukas 21:25-27; jaha Markus 13:24-26.) Na dohot do angka tanda di langit manggohi surirang on? Tapaima ma asa taboto aha na laho masa. Alai taboto do molo diida musu ni Debata angka tanda i, gabe mabiar jala humitir ma nasida.

12, 13. (a) Aha do na masa molo ro Jesus mardongan ”huaso dohot hasangapon godang”? (b) Songon dia do naposo ni Debata mangadopi i?

¹² Aha do na masa tingki ro Jesus mardongan ”huaso dohot hasangapon godang”? Lehononna ma upa tu angka na marsihohot jala uhumonna ma na so marsihohot. (Mateus 24:46, 47, 50, 51; 25:19, 28-30) Jesus mamangke tudosan laho patorangkon on. Didok ibana, alai dung ro sogot Anak ni jolma i marhasangapon rap dohot saluhut surusuruanna, hundulanna ma disi habangsa hasangaponna i. Dung i marluhut ma tu jolona nasa bangso, jadi sirangonna ma nasida songon binahen ni parmahan na manirang birubiru sian hambing. Jadi pajongjongonna ma birubiru i tu siamunna, alai anggo hambing i tu hambirangna. (Mateus 25:31-33) Aha do na laho masa tu angka birubiru dohot tu hambing? Laho sirangonna ma nasida. Hambing, manang halak na so marsihohot, laho ripashononNa. Alai molo birubiru manang angka na marsihohot, mandapot hangoluan saleleng ni lelengna.​—Mateus 25:46.

¹³ Aha do na masa tu halak na so marsihohot, dung diboto nasida barita panguhuman i? ”Gabe mangangguhi ma” nasida. (Mateus 24:30) Songon dia do angka na nimiahan ni tondi dohot na mangurupi nasida mangadopi i? Songon na nidok ni Jesus: ”Molo mamungka masa angka i, dirgak ma hamu; pasindak hamu ma ulumuna, ai nunga jonok haluaonmuna.”​—Lukas 21:28.

14, 15. Ulaon papunguhon aha do dung ro paraloan sian Gog dohot Magog, jala songon dia do i masa?

¹⁴ Aha do na masa dung diroro Gog sian Magog naposo ni Debata? Bibel mandok ”Laos disi ma suruonna [Anak ni jolma] angka pardisurgo papunguhon angka na pinillitna i sian desa na ualu i, sian suhi ni tano sahat ro di suhi ni langit.” (Markus 13:27; Mateus 24:31) Ulaon papunguhon on ndang na tingki laho mamillit halak Kristen na nimiahan. Jala ndang tingki na parpudi laho manahapi (pemeteraian) halak Kristen na nimiahan ni tondi na adong dope di tano on. (Mateus 13:37, 38) Disi masa hasusaan bolon, dimulai ma ulaon on. (Pangungkapon 7:1-4) Alani i, ulaon papunguhon aha do on? On ma tingkina angka na nimiahan na adong di tano on mandapot upa nasida jala manaek tu surgo.(1 Tessalonik 4:15-17; Pangungkapon 14:1) Masa ma on ndang leleng dung ro paraloan sian Gog dohot Magog. (Ezekiel 38:11) Dung i, songon na didok Jesus, ”marsinondang angka partigor songon mata ni ari di harajaon ni Ama nasida.”​—Mateus 13:43.b (Ida surat na ditoru.)

¹⁵ Godang halak Kristen na so sintong mandok, nasida boi mangida Jesus. Alai tangkas do dipatorang Bibel, ndang boi taida Jesus tingki ro muse tu tano on. Ala Bibel mandok: ”Di tingki i ma binsar di langit i tanda ni Anak ni jolma i” jala ”ro di atas ombun ni langit.” (Mateus 24:30) Bibel pe mandok: ”Ndang tarbahen sibuk dohot mudar manean harajaon ni Debata.” Alani i, sude na laho manaek tu surgo parjolojolo ingkon paubaonna ”tompu di bagasan sangkidop mata, di pangkuling ni sarune na parpudi i.”c (Ida surat na di toru.) (Jaha 1 Korint 15:50-53.) Alani i, rampak jala tompu ma dipauba halak Kristen na nimiahan na adong dope di tano on.

16, 17. Aha do na masa andorang parunjuhan ni Anak ni birubiru i?

¹⁶ Dung pungu halak Kristen na nimiahan di surgo, ujungna diparade ma parunjuhan ni Anak ni birubiru i. (Pangungkapon 19:9) Alai andorang so masa i, adong dope na asing na laho masa. Ingot ma di tano on dope deba angka na nimiahan tingki Gog mamorangi naposo ni Debata. (Hesekiel 38:16) Songon dia do naposo ni Debata mangadopi i? Diihuthon nasida do tudutudu on: ”Sandok ndada hamu marporang sahalion, ingkon hohom be hamu jongjong disi, huhut paidaidahon tua sibahenon ni Jahowa tu hamu, . . . . Unang hamu mabiar, jala unang godoron hamu!” (2 Kronika 20:17) Dung mangaroro Gog, sude na nimiahan na adong dope di tano on manaek ma tu surgo. Dung i, songon na nidok ni Pangungkapon 17:14, ro ma paraloan sian surgo maralohon Gog. ”Marmusu ma nasida dompak Birubiru i, gabe taluhonon ni Birubiru i ma nasida, ala Ibana Tuhan ni angka tuan jala Raja ni angka raja; ia angka donganna, i ma angka na tarjou, angka na tarpillit jala haposan.” Alani i, paluaon ni Jesus rap dohot 144.000 na nimiahan naung gabe raja di surgo ma naposo ni Debata.

¹⁷ Pangurupion i mamungka porang Armagedon, na laho pabadiahon goar ni Jahowa. (Pangungkapon 16:16) Ripashononna ma sude angka parjahat. Ndang adong be hajahaton di tano on. Alai, malua do punguan bolon sian Armagedon. Ujungna, saut ma parunjuhan ni Anak ni birubiru i! (Pangungkapon 21:1-4)d (Ida surat na di toru.) Hilalaon ni sude na malua na adong di tano on ma habasaron dohot holong ni roha ni Debata. Sihol situtu rohanta mangida ari i!​—Jaha 2 Petrus 3:13.

18. Ala jonok na ma ari i, aha do na ringkot taulahon?

¹⁸ Satongkin nari, masa ma on sude. Alani i, aha do na ringkot taulahon saonari? Dipaboa Jahowa do tu apostel Petrus: ”Antong, anggo masarsar do hape saluhutna on, nda lam sumurung ma parange na badia dohot hadaulaton ni angka na paimaimahon jala mangkasiholi haroro ni ari ni Debata . . . Dibahen i, hamu angka haholongan, anggo i dipaimaima hamu, ringkoti hamu ma, asa didapot Ibana hamu so martihas, so hasurahan, di bagasan dame!” (2 Petrus 3:11, 12, 14) Tajaga ma asa sai ias panombaonta, unang ma marsaor hita tu agama na so sintong, jala taihuthon ma Raja ni hadameon, i ma Jesus Kristus.