Cara ni Debata Mangapuli

Apostel Paulus patorangkon, Jahowaa do ”Debata, Sipangapul na sumurung”, na mangapuli di sude sitaononta. (2 Korint 1:3, 4) Dipaboa di Bibel, boi do Debata mangurupi jala mangapuli sude jolma tingki marsitaonon.

Jahowa, i ma goar ni Debata na disurat di Bibel.

Tontu, ingkon adong do na taulahon asa tadapot pangapulion sian Debata. Umpamana, songon dia ma dokter mangurupi hita molo ndang tajumpangi ibana? Panurirang Amos mandok, ”Tung udur ma tagamon mardalan dua halak, nda jolo sian dos ni rohanasida?” (Amos 3:3) Didok muse, ”Pajonok hamu ma tu Debata, dung i pajonohonna ma tu hamu!”—Jakobus 4:8.

Sian dia do taboto na olo Debata pajonokkon diriNa tu hita? Na parjolo, jotjot dipaboa di Bibel, lomo do roha ni Debata mangurupi hita. (Ida ma kotak.) Na paduahon, adong do pengalaman ni angka halak na mandapot pangapulion sian Debata.

Songon si Daud, godang do halak na mangido pangurupion tu Debata ala jotjot marsitaonon. Didok si Daud, ”Sai tangihon ma soara ni sombasombangku.” Ditangihon Debata do si Daud? I do. Didok ibana muse, ”Dapotan pangurupion ahu . . . marolopolop ma rohangku.”​—Psalmen 28:2, 7.

Disuru Debata do Jesus laho mangapuli jolma. Asing ni tugas i, Jesus pe ”pauliuli halak parroha na bojok [mandele]” jala ”mangapuli saluhut halak na marsak roha”. (Jesaya 61:1, 2) Songon na nidok ni ayat i, diparrohahon Jesus do halak na ”loja jala na sorat”.—Mateus 11:28-30.

Tingki Jesus mangapuli, lambok do ibana, dipodai do nasida, jala olo do ibana pamalumhon na marsahit. Hea do na marsahit kusta mandok tu Jesus, ”Molo na olo Ho, tarpamalum Ho do ahu!” Ala asi roha ni Jesus, didok ma, ”Na olo do Ahu; ias ma ho!” (Markus 1:40, 41) Gabe malum ma sahitna.

Saonari, ndang di portibi on be Jesus laho mangapuli hita. Alai Jahowa, ”Sipangapul na sumurung”, tongtong dope mangapuli halak na marsitaonon. (2 Korint 1:3) Parrohahon ma opat cara ni Jahowa mangapuli hita.

• Bibel. ”Nasa na tarsurat hian, bahen poda di hita do, umbahen na tarsurat; asa marpangkirimon hita binahen ni habengeton dohot pangapulon na di bagasan Surat i.”​—Rom 15:4.

• Tondi Parbadia. Dung mate Jesus, dame do huria Kristen di tingki i. Boasa? Ala nasida ”mamarangehon hatahuton mida Tuhan i, jala lam tu toropna nasida hinorhon ni pangapoion ni Tondi Parbadia”. (Ulaon ni Apostel 9:31) Tondi parbadia, i ma gogo ni Debata na sun hinagogo, jala dipangke do i mangapuli sude halak na marsitaonon.

• Tangiang. Dipaboa do di Bibel, ”Unang holsohon hamu agia aha”, alai ”pabotohon hamu ma tu Debata pangidoanmuna . . . Jala dame ni Debata na sumurung sian saluhut roha, i ma mangaramoti angka ateate dohot pingkiranmuna”.​—Pilippi 4:6, 7.

• Dongan Sahaporseaon boi gabe aleale na mangapuli hita tingki masa sitaonon. Apostel Paulus paboahon, dongan sahaporseaon i ”gabe apulapul” di tingki adong ”hagogotan dohot haporsuhon”.​—Kolosse 4:11; 1 Tessalonik 3:7.

Alai, tutu do i boi mangapuli hita? Taparrohahon ma pengalaman ni dongan na marsitaonon na dipaboa di artikel na parjolo. Songon nasida, hamu pe boi do mangkilala janji ni Jahowa na mandok, ”Songon baoa, na niapul ni inana, songon i do ahu mangapuli hamu.”​—Jesaya 66:13.