Debata do na Mambahen Hasusaan?

SI LUZIA, SAHALAK NA CACAT. Sian na gelleng, nunga marsahit polio si Luzia. Gabe ndang boi ibana mardalan. Tingki marumur 16 taon, didok bos ni si Luzia ma tu ibana, “Makana cacat ho, alani jugulmu ma i jala sai dialo ho do antong omakmu.” Sai diingot si Luzia do hata ni bosna i sampe martaon-taon, jala mansai lungun do rohana.

SI DAMARIS MARSAHIT KANKER OTAK. Disungkun bapakna ma ibana, “Amang tahe, ai boasa gabe songon on ho? Na adong do diulahon ho dosa na balga kan, makana diuhum Debata ho!” Mansai hansit do roha ni si Damaris mambege hata ni bapakna i.

Porsea do angka halak, Debata do na parohon sahit. Dipaboa do di buku Manners and Customs of Bible Lands, di zaman ni Jesus pe, porsea do angka halak, “jolma marsahit alani dosana sandiri manang dosa ni keluargana jala Debata do na parohon sahit i tu ibana”. Asing ni i, didok di buku Medieval Medicine and the Plague, dung zaman ni Jesus pe, “didok piga-piga halak do Debata na mambahen nasida marsahit ala diulahon nasida dosa”. Umpamana di abad 14, marjuta halak di Eropa mate ala marsahit. Antong molo songon i, Debata do na mambahen i? Manang alani virus do i? Gabe sungkun-sungkun do roha ni piga-piga halak, ‘Debata do na mambahen angka halak marsahit alani hasalaan ni nasida?’a

RIMANGI MA: Molo Debata do na mambahen hita marsahit jala susa, boasa ma dipamalum Jesus angka na marsahit? (Mateus 4:23, 24) Hape, sai sarupa do na tinuju ni ulaon ni Jesus dohot Jahowa. Ndang mungkin Jesus mangulahon sada ulaon molo so disuru Jahowa asa ulahononna. Alani i ma didok ibana, “Tongtong do huulahon lomo ni rohana,” jala “huulahon do songon na diparentahon ni Ama i tu ahu”.​—Johannes 8:29; 14:31.

Didok di Bibel, ‘na tigor do luhut dalan’ ni Jahowa. (5 Musa 32:4) Naposo ni Debata, i ma si Abraham mandok, ndang mungkin Debata ‘mangaripashon na tigor rap dohot parjahat’. Didok ibana muse, “dao ma i” sian Debata. (1 Musa 18:23, 25) Songon sada tudosan, molo adong sahalak parjahat di pesawat, ndang mungkin dibahen Debata madabu pesawat i holan laho manguhum sahalak parjahat i. Alana, adong do di pesawat i angka na burju. Jadi tutu do na didok di Bibel, “Tung na so tupa do Debata mambahen hajahaton.”​—Job 34:10-12.

Hea do hita sude mangulahon na sala manang mardosa. Alai susa pe hita, ndang Debata na mambahen i. Tangkas do dipaboa Jesus taringot on tu siseanna tingki diida nasida sahalak baoa na mapitung sian mulai tubu. “Disungkun angka siseanna ma Jesus, ‘Guru, alani dosa ni ise do umbahen na mapitung ibana sian mulai tubu? Alani dosana do manang dosa ni natua-tuana?’ Dialusi Jesus ma, ‘Ndang alani dosana manang dosa ni natua-tuana, alai asa tarida do ulaon ni Debata marhite ibana.’”​—Johannes 9:1-3.

Songgot do roha ni angka sisean ni Jesus mambege hata ni Jesus i. Alana godang do na mandok di tingki i, Debata na mambahen sasahalak gabe susa manang marsahit alani dosa na diulahon nasida. Jadi, ndang holan pamalumhon baoa na mapitung i Jesus. Alai ulaon ni Jesus i pe patuduhon, ndang tutu na didok angka halak taringot Debata na mambahen susa hita ala taulahon dosa. (Johannes 9:6, 7) Tontu boi do tarapul roha ni angka na marsahit ala mamboto, ndang Debata na mambahen susa nasida.

Angka Ayat na paposhon rohanta

• “Ndang boi unjunan Debata jala ndang diunjuni Ibana manang ise pe marhite na jahat.” (JAKOBUS 1:13) Jala laho salpuhonon ni Debata do angka “na jahat” na didok di ayat i. Lapatanna ndang adong be sahit, hasusaan, dohot hamatean.

• “Dipamalum [Jesus] do sude na marsitaonon.” (MATEUS 8:16) Jadi, dipamalum Jesus do sude halak na ro tu ibana. Laho bahenon ni Jesus do muse songon i di Harajaon ni Debata di tano on.

• “Apusan ni Debata ma nasa ilu-ilu sian mata ni nasida. Ndang adong be hamatean nang arsak ni roha, nang angguk-angguk, nang na hansit, ndang disi be. Ai nunga salpu na parjolo i.”​—PANGUNGKAPON 21:3-5.

Jadi, boasa ma gabe susa hita jala marsitaonon? Saleleng marratus taon, sai dilului angka halak do alus ni sungkun-sungkun on. Molo ndang Debata na mambahen hasusaan, boasa ma susa hita? Dialusi ma on di halaman na mangihut.