‘Marlojong Sahat tu Ujungna’

 1. Aha do na ikkon taulahon?

OLO do hamu dohot tu lomba lari molo marsahit manang loja hamu? Ra daong ate. Alai didok apostel Paulus, sude halak Kristen ikkon dohot do tu sada parlumbaan. (Heb. 12:1) Jadi sude hita, na matua nang na poso, na gogo nang na gale, ikkon toktong do marlojong sahat tu garis finis asa boi tadapot hadiah sian Jahowa.​—Mat. 24:13.

 2. Songon na didok di 2 Timoteus 4:7, 8, boasa dilehon si Paulus poda sisongon i?

² Dilehon si Paulus pe poda sisongon i, ala nungnga marhasil ibana ‘marlojong sahat tu ujungna’. (Jaha 2 Timoteus 4:7, 8.) Alai, parlumbaan aha do na ditaringoti si Paulus dison?

 3. Parlumbaan aha do na ditaringoti si Paulus?

³ Sipata, dibahen si Paulus do tudosan taringot akka parlumbaan na adong di Junani lao paboahon parsiajaran na rikkot. (1 Kor. 9:25-27; 2 Tim. 2:5) Adong do piga-piga hali ibana mamakke tudosan taringot lomba lari lao manggombarhon parngoluon ni halak Kristen. (1 Kor. 9:24; Gal. 2:2; Plp. 2:16) Tikki dilehon sasahalak dirina tu Jahowa jala tardidi, disi ma ibana mulai dohot tu “parlumbaan” i. (1 Ptr. 3:21) Jala sahat ma ibana di ujungna tikki dilehon Jahowa hadiah tu ibana, i ma hangoluan saleleng-lelengna.​—Mat. 25:31-34, 46; 2 Tim. 4:8.

 4. Aha do na lao taulas di parsiajaran on?

⁴ Aha do na sarupa sian lomba lari dohot parngoluon ni halak Kristen? Godang do na sarupa. Alai taulas ma tolu sian i. Na parjolo, ikkon marlojong do hita di dalan naung ditottuhon. Na paduahon, ikkon toktong do taida garis finis. Jala na patoluhon, ikkon toktong do hita marlojong nang pe adong tantangan.

 5. Dalan aha do na ikkon taihutton, jala boasa?

⁵ Molo di lomba lari, asa boi sasahalak mandapot hadiah, ikkon marlojong do ibana di dalan naung ditottuhon panitia lomba lari. Suang songon i ma, asa tadapot hangoluan saleleng-lelengna, ikkon marlojong do hita di dalan hangoluan ni halak Kristen. (Ul. 20:24; 1 Ptr. 2:21) Alai dang lomo roha ni Sibolis dohot akka siihutton ibana molo taihutton dalan i. Lomo do rohana asa ‘taihuthon parngoluon ni nasida’. (1 Ptr. 4:4) Direhei nasida do hita molo taihutton dalan ni halak Kristen. Didok nasida, undenggan do dalan ni nasida, alana i do na parohon haluaon. Alai gabus do i sude.​—2 Ptr. 2:19.

 6. Aha do na boi taparsiajari sian pengalaman ni si Brian?

⁶ Manang ise na mangihutton portibi ni Sibolis on, ujungna diboto nasida ma dang na tutu parohon haluaon dalan i. Gariada, dalan i mambahen nasida gabe diparhatoban do. (Rom 6:16) Parrohahon ma pengalaman ni si Brian. Najolo, dijujui natua-tuana do ibana asa mangihutton dalan ni halak Kristen. Alai tikki remaja, dilului ibana ma dalan na boi mambahen las rohana. Didongani ibana ma akka halak na mangihutton dalan ni Sibolis. Didok ibana, “Gabe huboto ma, dang na dapothu haluaon dison. Alai gabe mangulahon hasomalan na roa do au. Gabe marnarkoba do au, parmabuk, jala mangulahon na rorang. Saleleng piga-piga taon, gabe lam kecanduan ma au tu narkoba. Hira na diparhatoban do au. Mulai ma au manggadis narkoba asa boi torus mamakke narkoba.” Alai ujungna diputushon si Brian ma lao mandalanhon prinsip ni Jahowa di ngoluna. Ditinggalhon ibana ma dalanna najolo i, jala tardidi ma ibana taon 2001. Saonari, las situtu do rohana ala mangihutton dalan hangoluan ni halak Kristen.b

 7. Aha do dua dalan na ditaringoti di Mateus 7:13, 14?

⁷ Massai rikkot do lao mamillit jala mangihutton dalan na sittong. Lomo do roha ni Sibolis asa sude hita dang be mardalan di dalan na sompit na parohon “hangoluan”. Jala lomo do rohana asa taihutton dalan na bidang na diihutton godang halak di portibi on. Mura do mangihutton dalan i, alai “tu hamagoan” do ujungna. (Jaha Mateus 7:13, 14.) Asa toktong hita di dalan na sittong jala dang pinda tu dalan na sala, ikkon porsea do hita tu Jahowa jala tatangihon ma Ibana.

 8. Molo madabu sahalak pelari, aha do na diulahon ibana?

⁸ Sahalak pelari ikkon toktong do mangida dalan na di jolona asa unang tartuktuk. Alai sipata, olo do gabe madabu ibana alani pelari na asing. Manang madabu ala adong lubang. Alai molo madabu pe, pittor hehe do ibana, jala marlojong muse. Dang sai dipikkiri ibana aha na mambahen ibana madabu, alai toktong do ibana mamikkirhon garis finis, dohot hadiah na lao dapotna.

 9. Molo madabu hita, aha ma na ikkon taulahon?

⁹ Di parngoluon on, olo do piga-piga hali hita madabu alani pakkataion manang parniulaonta. Manang, adong do ra dongan sahaporseaonta na mambahen haccit rohatta. Dang pola songgot rohatta disi. Jolma na so sempurna do hita sude, jala rap do hita mardalan di dalan na sompit i. Jadi sipata olo do gabe “marsitomboman” hita di dalan i. Si Paulus pe mandok, olo do gabe haccit rohatta dibahen halak. Manang, hita pe olo do mambahen haccit roha ni halak. (Kol. 3:13) Jadi, daripada sai torus tapikkirhon aha na mambahen hita madabu, tumagon ma tapikkirhon hadiah na lao tadapot. Molo madabu pe, pittor hehe ma hita, jala toktong marlojong. Molo sai jut dope rohatta jala dang olo hehe, gabe dang sahat be hita tu garis finis jala dang dapotta be hadiah i. Asing ni i, unang ma gabe hita na mambahen akka dongan gabe madabu.

10. Boha carana asa unang gabe “tartuktuk” tabahen donganta?

¹⁰ Asa unang tabahen halak gabe “tartuktuk” manang madabu, unang ma tapaksahon nasida mangihutton lomo ni rohatta. Alai tapaloas ma nasida mambahen keputusan di nasida sandiri. (Rom 14:13, 19-21; 1 Kor. 8:9, 13) Molo di situasi on, dang sarupa hita songon akka pelari i. Alana molo di parlumbaan, na marsaing do sude pelari. Jala marsitutu do sahalak pelari asa holan ibana sandiri na mandapot hadiah. Sai dipikkirhon do boha carana asa boi monang. Olo do dionjarhon ibana akka pelari na asing, asa holan ibana na di jolo. Alai molo hita dang na lao marsaing dohot akka dongan. (Gal. 5:26; 6:4) Gariada tujuanta i ma mangurupi godang halak asa boi rap dohot hita di tano na imbaru, jala makkilala hangoluan salelengna. Jadi, marsitutu ma hita mangihutton poda ni si Paulus asa ‘unang holan mamparrohahon na rikkot di hita, alai mamparrohahon na rikkot di na asing’.​—Plp. 2:4.

11. Aha do na ikkon torus diida sahalak pelari, jala boasa?

¹¹ Asing ni i, asa toktong sahalak pelari mangida dalan na di jolona, ikkon sai diparrohahon ibana do garis finis. Jala nang pe dang tarida dope garis finis i, dibayakkon ibana do songon dia molo nungnga sahat ibana disi jala mandapot hadiah. Jadi toktong do semangat ibana marlojong ala mamikkirhon hadiah i.

12. Hadiah aha do na lao lehonon ni Jahowa tu hita?

¹² Marjanji do Jahowa lao mangalehon hadiah molo nungnga sahat hita di ujungna, i ma hangoluan salelengna di surgo manang di paradeso na ditano on. Dipaboa do di Bibel taringot hadiah on. Jadi, boi do tabayakkon songon dia ngolutta disi haduan. Molo sai toktong tapikkirhon jala sai tarimangi pakkirimon i, gabe toktong ma hita marlojong nang pe sipata olo dabu hita.

13. Aha do imbarna hita dohot akka pelari?

¹³ Akka pelari na di parlumbaan Junani pe adong do tantanganna. Olo do gabe loja nasida, jala gabe haccitan dagingna. Alani i, andorang so martanding, ikkon marlatik do nasida. Jala manjaga dirina asa toktong sehat. Songon pelari i, hita pe dilatik do asa boi torus marlojong di parlumbaan. Alai untabo do hita sian akka pelari i. Alana molo hita, adong do gogo sian Jahowa. Jala dang marnahabis gogo i. Jadi molo taasahon Jahowa, dang holan na dilatik hita alai dilehon do muse gogo tu hita!​—1 Ptr. 5:10.

14. Songon dia hata na disurat di 2 Korint 12:9, 10, mangurupi hita lao mangadopi akka tantangan?

¹⁴ Godang do tantangan na hea diadopi si Paulus. Hea do ibana direhei, dianiaya, jala sipata gale do ibana. Ikkon ditaon ibana do ‘suga na di bagasan dagingna’. (2 Kor. 12:7) Alai dang menyerah ibana alani i sude. Gariada, dihilala ibana marhite akka tantangan i ma boi diasahaon ibana Jahowa. (Jaha 2 Korint 12:9, 10.) Ala songon i do cara marpikkir ni si Paulus, diurupi Jahowa ma ibana asa boi mangadopi i.

15. Aha ma na tahilala molo tatiru si Paulus?

¹⁵ Olo do hita gabe direhei manang dianiaya alani haporseaonta. Adong do muse sian hita na marsahit manang na gale. Alai molo tatiru si Paulus, gabe boi ma tahilala holong dohot pangurupion ni Jahowa tikki mangadopi tantangan i.

16. Nang pe gale, aha do na boi diulahon hamu?

¹⁶ Adong do sian hamu na holan boi hundul di kursi roda manang holan peak di podoman? Adong do na susa mardalan manang dang denggan be marnida? Molo songon i do situasimuna, boi do hamu toktong marlojong rap dohot akka na poso jala na gogo dope! Godang do akka donganta na matua dohot na gale na toktong marlojong. Alai, dang boi diasahon nasida gogona sandiri. Ikkon diasahon nasida do gogo sian Jahowa, marhite manangihon akka parpunguan sian telepon, manang manonton parpunguan sian video. Marbarita do akka donganta on tu akka dokter, perawat, manang keluarga ni nasida.

17. Songon dia do pakkilalaan ni Jahowa mangida akka halak na marsahit jala gale?

¹⁷ Nang pe dang godang be na boi diulahon hamu tu Jahowa, unang ma gabe metmet rohamuna jala unang ma menyerah hamu. Ingot ma, dihaholongi Jahowa do hamu. Jala diingot Ibana do sude na diulahon hamu tu Ibana saleleng on. Toktong ma asahon pangurupion ni Jahowa. Dang na tadikkononna hamu. (Ps. 9:11) Gariada, gabe lam jonok ma Ibana tu hamu. Parrohahon ma pengalaman ni sahalak donganta borua na marsahit. Didok ibana, “Ala lam godang do sahithu, gabe lam maol ma au marbarita. Alai huboto do, nang pe otik na boi huulahon tu Jahowa, las hian do rohana. I do na mambahen las rohakku.” Tikki marsak hamu, ingot ma, dang sahalakmu mangadopi i. Jala rimangi ma hata ni si Paulus tikki didok ibana, “Las do rohangku tingki gale ahu . . . ai tingki gale ahu, gabe margogo do ahu.”​—2 Kor. 12:10.

18. Aha do tantangan na borat na diadopi piga-piga donganta?

¹⁸ Adong do muse akka donganta na mangadopi tantangan na asing. Tantangan i ro sian dirina sandiri, jala dang boi diida manang diattusi halak na asing. Misalna, adong do donganta na depresi manang holsoan. Boasa borat tantangan on di nasida? Alana molo adong halak na ponggol tanganna manang na holan boi hundul di kursi roda, pittor boi do taida aha masalahna, jala pittor rade do hita mangurupi. Alai molo adong halak na depresi manang marsahit pikkiranna, dang pittor boi taida na adong masalahna. Sasittongna, sarupa do borat ni tantangan ni nasida tu halak na ponggol patna manang tanganna. Alai, ala dang boi akka halak mamboto masalahna i, gabe dang adong na mamparrohahon jala mangurupi ibana.

19. Aha do na boi taparsiajari sian si Mepiboset?

¹⁹ Molo adong sahitta jala tahilala dang adong na boi mangattusi pakkilalaanta, ra boi do hita dipatogu marhite pengalaman ni si Mepiboset. (2 Sam. 4:4) Cacat do ibana jala hea do dang denggan pambahenan ni Raja Daud tu ibana. Hape dang alani salana sandiri umbahen na masa i. Alai dang gabe jut roha ni si Mepiboset. Diargai ibana do akka na denggan na boi dapotna. Las do rohana ala hea do burju Raja Daud tu ibana. (2 Sam. 9:6-10) Tikki dang denggan pe pambahenan ni Raja Daud, boi do diattusi ibana aha do na masa sasittongna. Dang gabe jut rohana tu si Daud, jala dang disalahon ibana Jahowa. Urrikkot do di ibana marsitutu lao mangurupi Raja na dipilit Jahowa i. (2 Sam. 16:1-4; 19:25-31) Jadi, dibahen Jahowa do asa disurat pengalaman ni si Mepiboset on di Bibel, asa marsiajar hita sian ibana.​—Rom 15:4.

20. Molo holsoan sasahalak, aha do pengaruhna tu ibana, alai aha do na boi mangurupi ibana?

²⁰ Alani holsoan, adong do akka donganta na gabe parila manang mabiar tikki pajuppang dohot akka halak. Dang mura di nasida lao marsaor tu godang halak, alai toktong do nasida ro tu parpunguan dohot kebaktian. Dang mura di nasida makkatai tu halak na so ditanda dope, alai olo do nasida manjuppangi akka halak tikki marbarita na uli. Molo songon i do na dihilala hamu, pos ma rohamuna dang holan hamu na songon i. Halak na asing pe godang do na songon i. Las do roha ni Jahowa ala nungnga marsitutu hamu. Dang menyerah hamu sahat tu saonari, i do buktina na dipasu-pasu Jahowa hamu jala dilehon Ibana gogo.c (Plp. 4:6, 7; 1 Ptr. 5:7) Molo toktong hamu manomba Jahowa nang pe marsahit manang holsoan, pos ma rohamuna las do roha ni Jahowa mangida hamu.

21. Ala diurupi Jahowa hita, aha ma na boi taulahon?

²¹ Las do rohatta ala taboto adong do na imbar sian parlumbaan ni halak Junani dohot parlumbaan na dipaboa si Paulus. Molo di parlumbaan ni Junani, holan sada do na monang jala mandapot hadiah. Alai di parlumbaanta on, sude do boi mandapot hadiah mangolu salelengna molo toktong marsihohot. (Joh. 3:16) Molo di parlumbaan ni halak Junani, sude pelari ikkon sehat pamatangna. Alana molo dang, dang boi monang. Molo di parlumbaanta, godang do sian hita na gale di pardagingon alai boi do toktong martahan. (2 Kor. 4:16) Ala diurupi Jahowa do hita, boi ma hita toktong marlojong sahat tu ujungna!