Cara Mangurupi na Asing Mangulahon Paretta ni Kristus

 1. Paretta aha do na dilehon Jesus tu akka siseanna na disurat di Mateus 28:18-20?

DUNG hehe Jesus dipataridahon ibana ma dirina tu akka siseanna na marpungu di Galilea. Adong na ikkon paboaonna tu nasida. Aha ma i? Disurat ma i di Mateus 28:18-20.​—Jaha.

 2. Akka aha do sukkun-sukkun na lao taulas?

² Marlakku dope paretta ni Jesus lao mambahen sisean i tu akka naposo ni Jahowa saonari. Di artikel on taulas ma tolu sukkun-sukkun na adong hubunganna tu paretta ni Jesus i. Na parjolo, asing ni mangajarhon paretta ni Debata tu parsiajar Bibelta aha do muse na ikkon taulahon? Na paduahon, songon dia do sude na adong di huria boi mangurupi parsiajar Bibelta asa boi maju? Na patoluhon, songon dia do hita mangurupi dongan na so aktif asa marbarita na uli muse?

 3. Aha do paretta na dilehon Jesus tu hita?

³ Takkas do didok Jesus, ikkon taajarhon do parettana tu akka halak. Alai adong dope na upporlu na ikkon taulahon. Dang adong didok Jesus, ‘Ajarhon hamu ma tu nasida sude na huparettahon tu hamu.’ Alai na didok ibana, “Ajari hamu ma nasida mangulahon sude na huparettahon tu hamu.” Asa boi taulahon paretta ni Jesus on, ikkon tapaboa do tu parsiajar Bibelta na porlu diulahon ibana. Alai dang sae holan i, ikkon tapatudu do tu ibana cara mangulahon i. (Ul. 8:31) Boasa porlu i?

 4. Songon dia do carana mangurupi sasahalak mangulahon na diparsiajari ibana? Paboa ma contohna.

⁴ Songon dia do asa boi hita mangajari sasahalak carana “mangulahon” paretta ni Jesus? Taparrohahon ma contoh on. Songon dia do cara ni sahalak guru les mobil mangajari muridna mamboto peraturan lalu lintas? Na parjolo, dipaboa guruna i ma peraturan na ikkon diihutton muridna i tikki mamboan mobil. Alai asing ni i, adong dope na ikkon diulahon guruna i. Ikkon didongani ibana do muridna mamboan mobil i jala mangurupi muridna i mangulahon akka naung diparsiajari ibana. Aha do na boi taparsiajari sian contoh on?

 5. (a) Sesuai tu na tarsurat di Johannes 14:15 dohot 1 Johannes 2:3, aha do muse na porlu taajarhon tu parsiajar Bibelta? (b) Aha do na ikkon taulahon asa diihutton parsiajar Bibelta prinsip ni Bibel?

⁵ Tikki marsiajar Bibel hita dohot sasahalak, taajarhon do tu ibana akka paretta ni Debata. Alai dang cukkup holan i. Ikkon taajari do ibana carana mangulahon naung diparsiajari ibana. (Jaha Johannes 14:15; 1 Johannes 2:3.) Molo diida parsiajar Bibelta taulahon prinsip ni Bibel, boi ma ditiru ibana i di sikkola, di parkarejoan, manang tikki rekreasi. Tapaboa ma songon dia prinsip ni Bibel mangurupi hita mambahen keputusan na denggan jala manjaga hita sian bahaya. Rap martangiang ma hita dohot parsiajar Bibelta. Tapangido ma asa diurupi tondi parbadia ni Jahowa ibana.​—Joh. 16:13.

 6. Aha dope muse na ikkon taulahon asa boi mangurupi na asing mangulahon paretta ni Jesus?

⁶ Aha dope muse na ikkon taulahon asa boi mangurupi na asing mangulahon paretta ni Jesus? Porlu do taurupi parsiajar Bibelta asa olo ibana marbarita na uli. Olo do ra mabiar ibana marbarita. Jadi porlu do hita sabar mangurupi nasida mangattusi hasittongan ni Bibel asa togu haporseaonna. Dung i, boi ma i hona tu rohana jala gabe semangat ma ibana marbarita. Aha dope muse na boi taulahon lao mangurupi parsiajar Bibelta asa olo marbarita na uli?

 7. Songon dia do carana mangurupi parsiajar Bibelta asa olo marbarita na uli?

⁷ Tasukkun ma parsiajar Bibelta, “Dung diulahon hamu akka prinsip ni Bibel aha do labana dihilala hamu? Menurutmu porlu do begeon ni halak barita on? Aha do na boi diulahon hamu lao mangurupi nasida?” (Poda 3:27; Mat. 9:37, 38) Patudu ma tu ibana akka risalah na adong di Akka Alat Lao Mangajari. Jala suru ma ibana mamillit hira-hira topik dia do na cocok tu keluargana, tu akka donganna, manang tu akka donganna sakarejo. Lehon ma akka risalah i tu ibana. Dung i bahen hamu ma latihan, asa diboto ibana songon dia cara na denggan mangalehon risalah i. Tottu molo dung gabe penyiar na so tardidi ibana, porlu do tadongani ibana marbarita.​—Pjm. 4:9, 10; Luk. 6:40.

 8. Boasa porlu taurupi parsiajar Bibelta asa balga holongna tu Debata dohot tu akka dongan? (Ida muse kotak “Mangurupi Parsiajar Bibel Patoguhon Holongna tu Debata.”)

⁸ Ingot ma disuru Jesus do hita mangajari halak asa boi nasida “mangulahon sude” paretta ni Jesus. Termasuk ma i mangulahon dua paretta na umbalga, i ma makkaholongi Debata dohot akka dongan jolma. Jala adong do hubungan ni on tu ulaon marbarita na uli. (Mat. 22:37-39) Molo lam balga holongta tu Debata dohot tu jolma, gabe taronjar ma rohatta marbarita na uli. Alai olo do ra mabiar parsiajar Bibelta dohot marbarita. Alani i tapapos ma rohana urupan ni Jahowa do ibana mangatasi i. (Ps. 18:2-4; Poda 29:25) Di parsiajaran on adong do kotak na patuduhon songon dia carana mangurupi parsiajar Bibelta makkaholongi Jahowa. Alai songon dia do huria mangurupi sahalak parsiajar Bibel patuduhon holong?

 9. Songon dia do carana murid les mobil i mandapot parsiajaran na penting?

⁹ Pikkirhon ma muse murid les mobil nakkin. Tikki didongani guruna ibana mamboan mobil, songon dia do ibana marsiajar? Ikkon manat do ibana manangihon na didok guruna jala diparrohahon ma akka supir na asing. Misalna, dipatuduhon guruna ma supir na burju mangalehon dalan. Manang, dipatuduhon guruna i do ra supir na burju na mambahen lampu pendek asa unang silo diida supir na asing. Akka contoh i, mangurupi muridna i mandapot parsiajaran na penting tikki mamboan mobil.

10. Aha do na mangurupi parsiajar Bibel asa maju?

¹⁰ Suang songon i ma sahalak parsiajar Bibel na naeng manomba Jahowa. Dang holan sian guruna ibana marsiajar, alai dohot do sian pengalaman ni akka dongan na asing. Jadi aha do na mangurupi parsiajar Bibel asa maju? Ro tu parpunguan. Boasa? Alana molo ro ibana tu parpunguan, boi ma lam bagas parbinotoanna, lam togu haporseaonna, jala lam balga holongna tu Jahowa. (Ul. 15:30-32) Dung i di parpunguan muse, boi ma dipatandahon guruna tu ibana akka dongan na sarupa pengalamanna tu ibana. Boi ma diida parsiajar Bibel i, holong na dipatudu akka dongan di huria. Taparrohahon ma piga-piga contoh.

11. Aha do na diida akka parsiajar Bibel di parpunguan, jala aha do pengaruhna tu ibana?

¹¹ Sahalak parsiajar Bibel na orang tua tunggal mamparrohahon sahalak donganta borua na sarupa situasina songon ibana. Diida ibana ma upaya ni donganta i mamboan akka gellengna tu Bale Harajaon jala hona do i tu rohana. Sahalak parsiajar Bibel na berupaya asa so marisap marsitandaan dohot sahalak donganta naung marhasil asa unang marisap be. Dipaboa donganta i ma alani holongna tu Jahowa do umbahen na boi ibana mangulahon paretta ni Debata. (2 Kor. 7:1; Plp. 4:13) Dung dipaboa donganta i songon dia dibahen ibana asa unang marisap be, didok ibana ma tu parsiajar Bibel i, “Hamu pe boi do marhasil.” Contoh na asing, sahalak borua na poso na marsiajar Bibel mamparrohahon sahalak donganta borua na poso na marlas ni roha ala gabe Sitindangi. Tikki diida ibana las ni roha ni donganta i, gabe sukkun-sukkun ma rohana, aha do na mambahen donganta i marlas ni roha.

12. Boi do hita sude na di huria mangurupi parsiajar Bibel?

¹² Dung ditanda parsiajar Bibel akka donganta na setia di huria, boi ma diparsiajari nasida songon dia cara mangulahon paretta ni Jesus lao makkaholongi Debata dohot akka dongan jolma. (Joh. 13:35; 1 Tim. 4:12) Jala songon naung dipaboa nakkin, boi do diida parsiajar Bibel akka dongan na mangadopi situasi na sarupa dohot ibana. Alani i gabe pos ma rohana, ibana pe boi do muba asa boi gabe sisean ni Kristus. (5 Mus. 30:11) Sude akka dongan na di huria pe, boi do mangurupi parsiajar Bibel asa maju. (Mat. 5:16) Aha do upaya na diulahon hamu lao patoguhon parsiajar Bibel naung ro marpungu?

13-14. Songon dia do Jesus mangurupi akka siseanna na marmetmet ni roha?

¹³ Lomo do rohatta mangurupi akka dongan na so aktif asa dohot muse marbarita jala mambahen sisean. Boi do tatiru cara ni Jesus mangurupi akka apostelna na marmetmet ni roha.

¹⁴ Tikki naeng mate Jesus, “lari ma sude sisean i, ditinggalhon ma Jesus”. (Mrk. 14:50; Joh. 16:32) Aha do na diulahon Jesus tikki marmetmet ni roha akka apostelna? Dang dipasombu Jesus akka siseanna i. Dung hehe Jesus, didok ibana tu akka siseanna, “Unang hamu mabiar! Laho ma hamu.” (Mat. 28:10a) Nang pe hea ditinggalhon siseanna ibana, toktong do dijou ibana nasida “haha anggingku”. Songon Jahowa, parasi roha do Jesus jala olo manalpuhon hasalaan.​—2 Raj. 13:23.

15. Songon dia do pakkilalaatta tu akka dongan na so aktif be marbarita?

¹⁵ Parduli do hita tu akka dongan na so aktif be marbarita na uli. Holong do rohatta tu akka donganta on. Taingot dope songon dia upaya ni akka donganta on lao manomba Jahowa. Adong do sian nasida naung marpulu taon manomba Jahowa. (Heb. 6:10) Masihol do hita tu nasida! (Luk. 15:4-7) Jadi songon Jesus, songon dia do carana patuduhon na parduli hita tu nasida?

16. Songon dia do patuduhon na parduli do hita tu akka dongan na so aktif?

¹⁶ Taundang ma nasida tu parpunguan. Sada cara ni Jesus lao patoguhon akka siseanna na marmetmet ni roha, i ma mangundang nasida tu parpunguan. (Mat. 28:10b; 1 Kor. 15:6) Saonari pe boi do tapatogu akka donganta na so aktif asa ro muse tu parpunguan. Memang porlu do ra sappe piga-piga hali taundang nasida. Alai molo dung ro ibana tu parpunguan, massai las ma rohatta dos songon Jesus na marlas ni roha tikki ro akka siseanna tu undanganna i.​—Bandingkon Mateus 28:16 dohot Lukas 15:6.

17. Aha do na porlu taulahon tikki ro donganta na so aktif tu parpunguan?

¹⁷ Denggan ma tajakkon nasida. Dijakkon Jesus do akka siseanna. Dang dipaima ibana akka siseanna na parjolo makkatai tu ibana, alai ibana do na parjolo makkatai tu nasida. (Mat. 28:18) Aha do na porlu taulahon tikki ro donganta na so aktif tu Bale Harajaon? Ikkon parjolo do hita manjakkon nasida. Olo do ra dang taboto aha na lao sidohonotta. Alai unang ma tabahen nasida gabe maila. Tapaboa ma, las hian do rohatta pajuppang dohot nasida.

18. Songon dia do caratta paposson roha ni dongan na so aktif?

¹⁸ Papos ma roha ni nasida. Olo do ra didok roha ni akka apostel ni Jesus, dang tolap nasida marbarita na uli tu sude liat portibi on. Dipapos Jesus do roha ni akka siseanna, “Sai na dongananku do hamu sahat tu panutup ni jaman on.” (Mat. 28:20) Aha do pengaruhna tu nasida? Dang leleng dukkon i, toktong do nasida mangajari jala paboahon barita na uli. (Ul. 5:42) Akka donganta na so aktif pe porlu do dipatogu. Mabiar do ra nasida marbarita na uli muse. Tapapos ma rohana, dang sahalakna lao marbarita. Molo nungnga rade ibana, boi do tadongani ibana marbarita. Pasti diargai nasida do upayatta lao magurupi nasida. Molo tapatudu do na parduli hita tu akka donganta na so aktif, gabe dipatogu ma nasida jala marlas ni roha ma huria.

19. Aha do na porlu taulahon jala boasa ikkon taulahon i?

¹⁹ Sahat tu andigan do hita marbarita na uli jala mambahen sisean? Sahat tu panutup ni jaman on. (Mat. 28:20; ida Kamus, “Panutup ni jaman on.”) Boi do tapasae tugas na dilehon Jesus sahat tu panutup ni jaman on? Ikkon marsitutu do hita mangulahon i! Tapakke ma tikkitta, gogotta, dohot artatta lao mangalului “halak na marpangalaho na denggan na mambahen nasida tama mandapot hangoluan na saleleng ni lelengna”. (Ul. 13:48) Molo taulahon i, na maniru Jesus do hita. Didok ibana do, “Sipanganonku i ma mangulahon lomo ni roha ni na marsuru ahu jala pasaehon ulaonna.” (Joh. 4:34; 17:4) Hita pe, lomo do rohatta pasaehon tugas naung dilehon Jesus tu hita. (Joh. 20:21) Jala lomo do rohatta asa boi sude hita pasaehon tugas on, dohot ma i mangurupi akka dongan na so aktif.​—Mat. 24:13.

20. Songon na disurat di Pilippi 4:13, boasa boi hita marhasil mangulahon tugas na dilehon Jesus?

²⁰ Memang dang mura mangulahon paretta ni Jesus on. Alai dang sahalakta mangulahon i. Marjanji do Jesus na dongananna do hita. Jala “dongan saulaon ni Debata” do hita, alani i pasti urupanna do hita mangulahon on. (1 Kor. 3:9; 2 Kor. 2:17) Jadi pasti marhasil do hita mangulahon i. Sada hasangapon do di hita ala boi hita mangulahon tugas on jala mangurupi akka halak asa boi dohot mangulahon i!​—Jaha Pilippi 4:13.