‘Massai Balga do Asi ni Roha’ ni Debata

 1. Songon dia do halak na marasi ni roha i, jala ilustrasi aha do na dipaboa Jesus taringot i?

MOLO didok na marasi ni roha, tabayakkon ma halakna i burju, lambok, jala parholong. Dung i, olo do ra langsung taingot ilustrasi ni Jesus taringot tu bawa Samaria. ‘Asi do roha’ ni halak Samaria i tu halak Jahudi na dirampok jala dipukkuli. Ala ‘asi ni rohana’ diobati ibana do lukka ni halak Jahudi i, jala dirawat sappe malum. (Luk. 10:29-37) Sian ilustrasi ni Jesus on, boi ma hita maniru asi ni roha ni Jahowa, sifatna na massai denggan. Dipatuduhon Ibana do asi ni rohana ganup ari ala holong rohana tu hita.

 2. Songon dia do muse halak na marasi ni roha i?

² Halak na marasi ni roha pe, dang olo hatop manghukum halak na marsala. Jala songon i ma Jahowa tu hita. Panurat psalmen mandok, “Dang hea dibalos Ibana hita hombar tu akka dosatta.” (Ps. 103:10) Alai molo adong halak na mangulahon dosa na serius, tegas do Jahowa. Didisiplin do halak na marsala i.

 3. Sukkun-sukkun aha do na lao taulas di parsiajaran on?

³ Di parsiajaran on tabahas ma tolu sukkun-sukkun on: Boasa olo Jahowa patuduhon asi ni rohana? Aha do hubungan ni disiplin dohot asi ni roha? Jala songon dia do hita maniru asi ni roha ni Jahowa i? Taida ma alus ni sukkun-sukkun i sian Bibel.

 4. Boasa olo Jahowa patuduhon asi ni rohana?

⁴ Lomo do roha ni Jahowa patuduhon asi ni roha. Didok si Paulus ‘massai balga do asi ni roha’ ni Jahowa. Memang hata ni si Paulus i, tu akka halak na mandapot harapan tu surgo do i. Alai sabotulna dang holan tu halak i dipatuduhon Jahowa asi ni rohana, tu sude jolma do. (Eps. 2:4-7) Si Daud mandok, “Burju do Jahowa tu sude, jala tarida do asi ni rohana di sude akka ulaonna.” (Ps. 145:9) Jadi ala holong roha ni Jahowa tu jolma, dang olo Ibana manahan asi ni rohana, selagi adong dope alasanna lao patuduhon i.

 5. Boasa boi takkas diboto Jesus na lomo do roha ni Jahowa patuduhon asi ni rohana?

⁵ Jesus do na paling mananda Jahowa. Takkas do diboto ibana na lomo do roha ni Jahowa patuduhon asi ni rohana. Boasa tadok songon i? Alana sebelum ro Jesus tu portibi on, nungnga tung massai leleng Jesus rappak dohot Jahowa. (Poda 8:30, 31) Jadi nga jotjot diida Jesus, Jahowa patuduhon asi ni rohana tu jolma pardosa. (Ps. 78:37-42) Jala saleleng di portibi on Jesus, jotjot do diajarhon ibana taringot asi ni roha ni Jahowa i.

 6. Songon dia do Jesus manggombarhon asi ni roha ni Jahowa?

⁶ Di artikel sebelumna nungnga dipaboa ilustrasi ni Jesus taringot anak na mago, na manggombarhon balga ni holong dohot asi ni roha ni Jahowa. Bawa na di ilustrasi ni Jesus i, lao do ibana tu luat na dao. “Marsonang-sonang ma ibana disi jala dipahabis ma sude artana.” (Luk. 15:13) Alai dukkon i, disadari ibana ma hasalaanna, dipatutoru dirina jala mulak ma ibana. Songon dia do reaksi ni bapakna? Didok Jesus, “Sian na dao dope nungnga diida bapakna i ibana. Gabe asi ma roha ni bapakna i, marlojong ma ibana, dihaol, jala diumma ma anakna i.” Dang ditolak bapakna i ibana, gariada dipatuduhon bapakna i do asi ni rohana. Las do rohana manjalo anakna i mulak tu jabu. Olo do bapakna i manalpuhon sude hasalaan ni anakna i ala diida ibana, muba do anakna i. Bapak na di ilustrasi ni Jesus on, manggombarhon Jahowa. Sian ilustrasi on, taboto ma rade do Jahowa manalpuhon hasalaan ni halak na botul-botul bertobat.​—Luk. 15:17-24.

 7. Aha do hubungan ni bisuk ni Jahowa dohot asi ni rohana?

⁷ Alani bisuk ni Jahowa, dipatudu Ibana ma asi ni rohana. Tikki mambahen keputusan, selalu do dipastihon Jahowa keputusanna i bermanfaat tu akka toppaanna. Bibel mandok, “Gok asi ni roha dohot akka ulaon na denggan” do “bisuk na sian [Debata]”. (Jak. 3:17) Songon natua-tua tu gellengna, diboto Jahowa porlu do Ibana patuduhon asi ni rohana tu jolma. (Ps. 103:13; Jes. 49:15) Alani asi ni rohana, dilehon do tu hita harapan nang pe dang sempurna hita. Alai alani bisuk ni Jahowa, seimbang do Ibana tikki patuduhon asi ni roha. Memang sai torus do dipatudu Ibana asi ni rohana, molo adong dope alasan lao patuduhon i. Alai diboto Jahowa do dang di sude situasi Ibana porlu patuduhon asi ni roha. Dang hea dipatudu Ibana asi ni rohana, lao mendukung tindakan ni halak na mangulahon dosa serius.

 8. Boasa porlu pemecatan i?

⁸ Songon dia do molo adong di huria na mangulahon dosa na serius? Aha na ikkon taulahon? Didok si Paulus, ‘Unang mardongan be hita tu ibana.’ (1 Kor. 5:11) Molo adong na mangulahon dosa na serius jala dang olo bertobat, ikkon dipecat do ibana sian huria. Tujuanna lao manjaga akka dongan di huria. Asing ni i porlu do pemecatan i, ala Debata na badia do Jahowa. Alai olo do adong na marpikkir, molo dipecat sasahalak berarti dang marasi ni roha Jahowa tu ibana. Toho do songon i? Taida ma alusna.

9-10. Songon na didok di Heber 12:5, 6, boasa boi didok pemecatan i bukti asi ni roha ni Jahowa? Paboa contohna.

⁹ Tikki tabege diumumhon sasahalak dipecat di huriatta, pasti lungun do rohatta. Apalagi molo na dipecat i keluargatta manang sahabatta. Molo dipecat sasahalak, na so marasi ni roha do Jahowa? Dang songon i. Molo didisiplin sasahalak, i sebenarna bukti ni holong do, bisuk, dohot asi ni roha. (Poda 13:24) Molo dipecat sasahalak, boi do i mangurupi nasida asa bertobat jala mulak muse tu Jahowa? Boi. Godang do akka donganta, dung dipecat gabe disadari nasida do nga parah be hasalaan ni nasida i. Alani i gabe bertobat ma nasida, dipauba ma pangalahona jala gabe mulak muse tu Jahowa.​—Jaha Heber 12:5, 6.

¹⁰ Taparrohahon ma jo contoh on. Molo dibereng sahalak parmahan adong biru-biruna na marsahit, porlu do dipapulik ibana biru-biru na marsahit i sian akka biru-biru na asing. Hape molo dipapulik biru-biru na marsahit i, boi do gabe lam gale-gale. Alana biru-biru biasana ikkon sai rap do dohot akka biru-biru na asing. Attong na so marasi ni roha do parmahan i? Dang songon i. Molo dang dipasirang ibana biru-biru i, gabe boi ma annon tertular biru-biru na asing. Jadi ikkon dipasirang do biru-biru na marsahit i lao manjaga akka biru-biru na asing.—Bandingkon tu 3 Musa 13:3, 4.

11. (a) Boasa dipatudos halak na dipecat songon biru-biru na marsahit? (b) Aha do na boi diulahon halak na dipecat lao padenggatton hubunganna tu Jahowa?

¹¹ Halak na dipecat i, nga sega be hubunganna tu Jahowa dos songon biru-biru na marsahit. (Jak. 5:14) Molo sahit na manular, boi do hona tu halak na asing. Halak na mangulahon dosa na serius pe boi do gabe ditiru akka dongan na asing pangalahona na sala i. I do alana porlu ibana dipecat sian huria. Jadi pemecatan i bukti holong ni Jahowa tu akka dongan di huria jala pemecatan i mangurupi na marsala menyadari kesalahanna asa bertobat. Halak na dipecat i boi dope padenggatton hubunganna tu Jahowa. Ro ma ibana torus marpungu, manjaha Bibel, manjaha akka publikasi, dohot manotton JW Broadcasting^®. Molo diida akka sintua ibana berupaya asa muba, dilehon nasida ma akka saran asa boi muse ibana mulak gabe Saksi Jahowa.b

12. Molo adong na mangulahon dosa na serius jala dang bertobat, aha do na diulahon akka sintua?

¹² Porlu do taingot, dipecat pe sasahalak ala na so olo do ibana bertobat. Jala sebelum mambahen keputusan i akka sintua, pasti do jolo dipikkiri nasida i. Asing ni i, Jahowa mendisiplin “marhite cara na sittong” do. (Jer. 30:11) Holong do roha ni nasida tu akka dongan, jala dang lomo roha nasida gabe sega hubungan ni akka dongan di huria tu Jahowa holan alani halak na mangulahon dosa na serius i. Jadi molo dipecat pe sasahalak sian huria, alani holong dohot asi ni roha ni Jahowa do i.

13. Boasa ikkon dipecat bawa na di huria Korint i?

¹³ Taparrohahon ma jo aha na didok si Paulus taringot tu sahalak bawa na mangulahon dosa na serius jala dang olo bertobat. Di huria Korint di abad na parjolo, adong bawa na mangulahon seks dohot istri ni bapakna. Pasti pailahon do i! Najolo didok Jahowa do tu halak Israel, “Molo adong sahalak bawa na mangulahon seks dohot istri ni bapakna, na pailahon bapakna do ibana disi. Ikkon dipamate do bawa nang borua i.” (3 Mus. 20:11) Memang dang disuru si Paulus ikkon dipamate bawa na di huria Korint i. Alai disuru ibana do asa dipecat bawa i sian huria. Pangalaho ni bawa i boi do mempengaruhi akka dongan di huria. Jadi molo dang hatop ditangani, gabe adong ma annon na marpikkir dang sala mangulahon sisongon i.​—1 Kor. 5:1, 2, 13.

14. Songon dia do si Paulus patuduhon asi ni roha tu bawa na di Korint i, jala boasa olo si Paulus patuduhon asi ni roha tu bawa i? (2 Korint 2:5-8, 11)

¹⁴ Dung dipecat bawa i, muba ma ibana jala botul-botul bertobat. Jadi didok si Paulus ma tu akka sintua di huria Korint i, dang olo be ibana ‘pagodangku makkatai taringot tu hasalaan’ ni bawa i. Gariada dijujui si Paulus do nasida asa ‘manalpuhon dosana jala patoguhon roha ni bawa i’. Boasa? “Asa unang mandele ibana alani arsak ni rohana.” Jadi olo do si Paulus manalpuhon hasalaan ni bawa naung bertobat i. Dang lomo roha ni si Paulus gabe mandele manang marsak bawa i alani hasalaanna najolo na so diulahon ibana be.​—Jaha 2 Korint 2:5-8, 11.

15. Songon dia do akka sintua tegas alai tong patuduhon asi ni roha?

¹⁵ Sai berupaya do akka sintua patuduhon asi ni roha songon Jahowa. Alai molo adong sasahalak na mangulahon dosa na serius na so olo bertobat, tegas do nasida mendisiplin. Alana, molo dang didisiplin nasida halak na mangulahon dosa na serius i, berarti dang marasi ni roha nasida tu ibana. Bahkan songon na setuju do nasida tu pangalahona na sala i. Alai holan akka sintua do na porlu patuduhon asi ni roha?

16. Sesuai tu Poda 21:13, aha do akibatna molo dang olo hita patuduhon asi ni roha?

¹⁶ Sude do hita porlu maniru asi ni roha ni Jahowa. Boasa? Alana dang olo Jahowa mambege tangiang ni halak na so olo patuduhon asi ni roha. (Jaha Poda 21:13.) Pasti dang olo hita molo dang ditangihon Jahowa tangiangta. Alani i ikkon tapatudu do asi ni roha. Parduli ma hita tu akka donganta, jala rade ma hita “mambege angguk-angguk ni [na susa]”. Sai taingot ma poda on, “Dang maralang-alang Debata manguhumi halak na so marasi ni roha.” (Jak. 2:13) Molo tasadari do porlu di hita asi ni roha, hita pe tapatudu ma asi ni roha. Khususna patuduhon asi ni roha tu akka halak naung bertobat jala nungnga dipulihkan.

17. Songon dia do Raja Daud patuduhon asi ni roha?

¹⁷ Boi do hita marsiajar taringot asi ni roha sian akka contoh na adong di Bibel. Akka contoh i boi mangurupi hita asa burju tu akka halak. Misalna Raja Daud. Nang pe ibana naeng dipamate si Saul alai ala asi rohana tu si Saul, dang olo ibana mambalos pambahenan ni si Saul i.​—1 Sam. 24:9-12, 18, 19.

18-19. Tikki andigan do si Daud dang patuduhon asi ni roha?

¹⁸ Alai hea do dang dipatudu si Daud asi ni roha. Misalna tikki si Nabal dang olo mangalehon sipanganon tu akka tentara ni si Daud jala kasar si Nabal makkatai tu nasida. Gabe muruk situtu ma si Daud jala naeng dipamate ibana ma si Nabal dohot sude bawa na di keluargana. Alai pittor ro ma istri ni si Nabal, i ma si Abigail lao mandapotton si Daud. Diabbati si Abigail ma rencana ni si Daud jala ujungna dang jadi si Daud pamatehon si Nabal dohot keluargana.​—1 Sam. 25:9-22, 32-35.

¹⁹ Di tikki na asing, hea ma panurirang Natan ro pasingotton si Daud. Dipaboa si Natan ma sada ilustrasi taringot bawa na mora mambuat sada biru-biru ni sahalak bawa na pogos. Dung dibege si Daud ilustrasi i, muruk ma ibana jala didokkon ibana, “Songon pastina Jahowa mangolu, ikkon pamateon do bawa na mambahen songon i!” (2 Sam. 12:1-6) Hape sasittongna, dang pola ikkon dipamate bawa na manakko biru-biru i. Diboto si Daud do molo di Patik ni si Musa, sasahalak na manakko biru-biru ni halak na asing, cukkup do holan mangalehon opat biru-biru lao manggatti i. (2 Mus. 22:1) Jadi pakejamhu do hukuman na didokkon si Daud i. Dicaritahon si Natan pe ilustrasi i tu si Daud, asa disadari ibana dao do umbalga hasalaanna sian hasalaan ni bawa i. Jadi takkas ma tarida umbalga do asi ni roha ni Jahowa tu si Daud, sian si Daud tu bawa na di ilustrasi ni si Natan i.​—2 Sam. 12:7-13.

20. Aha do na boi taparsiajari sian contoh ni si Daud?

²⁰ Tikki na muruk i si Daud tu si Nabal, pittor diputusson ibana do lao pamateonna si Nabal dohot sude bawa na di keluargana. Songon i do tong tikki dibege ibana ilustrasi ni si Natan. Didok ibana ikkon dipamate do bawa na mambuat biru-biru ni sahalak bawa na pogos i. Hape taboto, halak na burju do si Daud on. Alai boasa ma songon i kejamna cara ni ibana mangadili? Alana nungnga dang togu be hubungan ni si Daud tu Jahowa. Sian on taboto ma, molo jotjot sasahalak manghakimi na asing, i patuduhon dang togu hubunganna tu Jahowa. Alani i, dipaingot Jesus do hita asa unang manghakimi halak na asing. Didokkon ibana, “Unang be uhumi hamu halak na asing, asa unang diuhumi Debata hamu. Ai na lao diuhumi Ibana do hamu dos songon caramuna manguhumi halak na asing.” (Mat. 7:1, 2) Jadi torus ma taihutton hata ni Jesus i, jala tapatudu “asi ni roha” songon Debata.

21-22. Songon dia do hita patuduhon asi ni roha tu na asing?

²¹ “Tapatudu ma asi ni roha sian tindakanta” dang holan hata. Sai talului ma akka kesempatan lao patuduhon asi ni roha di keluarga, huria, jala tapatudu ma asi ni roha tu sude halak. Misalna adong do akka dongan na diboto hamu na porlu diurupi? Boi do ra diantarhon hamu sipanganon tu nasida, manang mangalehon bantuan na asing tu nasida. Molo adong dongan na baru dipulihkan, berupaya ma hamu gabe dongan ni nasida. Asing ni i, lao patuduhon asi ni roha marbarita na uli ma hita tu akka halak. I do sada cara lao patuduhon asi ni roha.​—Job 29:12, 13; Rom 10:14, 15; Jak. 1:27.

²² Parduli ma hita tu halak na asing, jala tapatudu ma asi ni roha tu nasida. Molo tapatudu asi ni roha las ma roha ni Jahowa, Debata parasi roha!