Torus ma Jaga Harapanmuna Toktong Togu

 1. Harapan aha do na dilehon Jahowa tu sude naposona?

DILEHON Jahowa do tu sude naposona harapan na luar biasa, i ma hangoluan na saleleng ni lelengna. Adong do na harapanna naeng mangolu salelengna di surgo. Dilehon ma tu nasida daging na so boi mate. (1 Kor. 15:50, 53) Alai godangan naposo ni Jahowa harapanna naeng mangolu saleleng ni lelengna di tano on. Sempurna ma nasida jala marlas ni roha. (Pgk. 21:3, 4) Dang soal tudia harapanta, naeng tu surgo manang di tano on, pasti berharga do harapan i di hita.

 2. Boasa pos rohatta pasti saut akka janji ni Jahowa?

² Tarpaima do hita asa saut akka janji ni Jahowa na disurat di Bibel. Pos do rohatta pasti saut akka janji i, ala Jahowa do na manjanjihon i. (Rom 15:13) Sian Bibel taboto do sai ditepati Jahowa do akka janjina. (4 Mus. 23:19) Pos do rohatta sanggup jala lomo do roha ni Jahowa pasautton i. Harapanta on dang holan angan-angan. Boi do tabuktihon harapan i jala pasti saut do i.

 3. Aha do na lao tabahas di artikel on? (Psalmen 27:14)

³ Holong hian roha ni Jahowa tu hita jala lomo rohana asa marpos ni roha hita tu Ibana. (Jaha Psalmen 27:14.) Molo pos rohatta tu Jahowa, gabe lam togu ma harapanta. Ujungna sanggup hita mangadopi masalah manang aha pe. Gabe barani jala marlas ni roha ma hita nang pe adong tantangan. Alani i di artikel on tabahas ma songon dia harapanta i boi melindungi hita. Alai na parjolo tabahas ma jo boasa disarupahon harapan i songon jangkar dohot takkuluk bosi. Dung i tabahas ma songon dia carana patoguhon harapanta.

 4. Boasa dipatudos harapanta songon jangkar? (Heber 6:19)

⁴ Di bukku Heber dipatudos si Paulus do harapan i songon jangkar. (Jaha Heber 6:19.) Sering do si Paulus markapal. Jadi diboto ibana do molo jangkar boi mambahen hot kapal di ingananna jala dang diboan arus. Hea do si Paulus hona badai tikki markapal. Diida ibana ma anak buah ni kapal i mandabuhon akka jangkar asa unang ditabrak kapal i batu karang. (Ul. 27:29, 39-41) Harapanta dipatudos do songon jangkar, na mangurupi hita asa unang mandao sian Jahowa tikki masa sitaonon na borat na songon badai. Harapan on mambahen dame rohatta nang pe borat situasitta, ala pos do rohatta adong hangoluan na dumenggan na tapaima-ima. Taingot ma nungnga didok Jesus na lao dianiaya akka siseanna. (Joh. 15:20) Alai molo tarimangi janji ni Jahowa di ari na naeng ro, gabe boi ma hita toktong semangat manomba Ibana nang pe dianiaya.

 5. Boasa boi Jesus toktong tenang nang pe naeng dihukum mate?

⁵ Harapan ni Jesus na togu mangurupi ibana toktong setia tu Jahowa tikki naeng dihukum mate. Di ari Pentakosta taon 33 M, dikutip Apostel Petrus do hata sian bukku Psalmen na mandok, “Marhaposan tu Debata ma au di ngolukku. Ai dang pasombuonmu au di Kuburan jala dang pasombuonmu busuk naposom na setia. . . . Dibahen Ho do au marlas ni roha situtu di jolom.” (Ul. 2:25-28; Ps. 16:8-11) Sian ayat on boi taida, massai togu do harapan ni Jesus. I do na mambahen ibana toktong tenang nang pe naeng mate ibana di tikki i. Boi do ibana toktong sabar jala togu, ala pos rohana sanggup do Jahowa pahehehon ibana jala na lao marsada do ibana muse dohot Bapakna di surgo.​—Heb. 12:2, 3.

 6. Aha do na boi taparsiajari sian donganta si Leonard?

⁶ Harapan mangurupi akka donganta asa toktong setia. Parrohahon ma pengalaman ni si Leonard Chinn, sahalak donganta na setia na tinggal di Inggris. Dipenjara ma ibana saleleng Perang Dunia I ala ditolak ibana dinas militer. Saleleng dua bulan, dipenjara ma ibana jala disuru kerja paksa. Belakangan disurat ibana ma, “Sian pengalamankon marsiajar do au massai arga do harapan i, boi do i mambahen hita toktong setia. Adong do teladan na boi tatiru, i ma Jesus, akka apostel, dohot akka panurirang. Adong do muse akka janji ni Jahowa na disurat di Bibel. Molo tarimangi on sude, gabe lam togu ma harapanta di ari na naeng ro jala diurupi ma hita asa toktong setia.” Songon jangkar do harapan i di si Leonard, pasti songon i do nang di hita.

 7. Aha do hasilna molo boi hita martahan mangadopi hasusaan? (Rom 5:3-5; Jakobus 1:12)

⁷ Molo boi hita martahan mangadopi hasusaanta jala taida songon dia Jahowa mangurupi hita, gabe taboto ma nungnga tabahen las rohana. On ma na mambahen lam togu harapanta. (Jaha Rom 5:3-5; Jakobus 1:12.) Pasti uttogu do harapanta saonari dibandingkon tikki parjolo sahali taboto akka janji ni Jahowa. Memang, sai berupaya do Sibolis memanfaatton akka sitaononta asa gale haporseaotta. Alai molo diurupi Jahowa hita, boi do taadopi hasusaan manang aha pe.

 8. Boasa dipatudos harapanta songon takkuluk bosi? (1 Tessalonik 5:8)

⁸ Dipatudos Bibel do muse harapanta songon takkuluk bosi. (Jaha 1 Tessalonik 5:8.) Asa terlindung ulu ni sahalak tentara sian serangan ni musu, ikkon dipakke ibana do takkuluk bosi. Dos songon i ma, harapan pe boi manjaga pikkiranta sian serangan ni Sibolis. Godang do cara na dipakke Sibolis lao manggoda jala manegai pikkiranta. Alani i, torus ma tapatogu harapanta. Alana boi do i melindungi cara marpikkirta asa tetap hita setia tu Jahowa.

 9. Aha do akibatna molo dang porsea hita tu janji ni Debata?

⁹ Janji ni Jahowa taringot hangoluan saleleng ni lelengna boi do mangurupi hita mambahen keputusan na denggan. Alai molo gabe fokus do hita mangalului keinginanta sandiri, gabe moru ma pos ni rohatta tu janji ni Jahowa taringot hangoluan saleleng ni lelengna. Songon i do na hea masa tu halak Kristen di Korint. Dang pos be roha ni nasida tu janji ni Jahowa taringot haheheon. (1 Kor. 15:12) Didok si Paulus akka halak na so porsea di haheheon holan mangalului kesenanganna sandiri. (1 Kor. 15:32) Godang do halak dang porsea tu janji ni Debata. Akibatna gabe fokus ma nasida mambahen sonang ngoluna saonari. Alai anggo hita dang songon i. Pos do rohatta tu janji ni Jahowa di ari na naeng ro. Harapanta on dos songon takkuluk bosi na boi melindungi cara marpikkirta asa unang berfokus tu keinginanta sandiri. Ala boi do i manegai hubunganta dohot Jahowa.​—1 Kor. 15:33, 34.

10. Songon dia do harapan boi melindungi hita sian gabus ni Sibolis?

¹⁰ Harapan pe boi do melindungi pikkiranta sian gabus na mandok dang mungkin boi tabahen las roha ni Jahowa. Contohna, adong do ra na merasa dang cocok ibana mandapot hangoluan na salelengna, ala didok rohana dang tarulahon ibana standar ni Jahowa. Songon i do cara marpikkir ni si Elipas. Didok ibana do tu si Job, “Adong do haroa jolma na badia di jolo ni Debata?” Didok ibana muse, “Ida ma! Dang porsea Ibana tu akka suru-suruanna, haru langit pe dang badia di Ibana.” (Job 15:14, 15) Gabus do i! Pikkiran ni Sibolis do i. Diboto Sibolis do molo porsea hita tu gabusna i, gabe mago ma harapanta. Alani i unang ma porsea hita tu gabusna i. Fokus ma hita tu akka janji ni Jahowa. Lomo do roha ni Jahowa asa dapotta hangoluan na salelengna, jala sai diurupi Ibana do hita lao mandapot i.​—1 Tim. 2:3, 4.

11. Boasa ikkon sabar hita paimahon Jahowa pasautton janjina?

¹¹ Memang dang sai mura manjaga harapan i asa toktong togu. Olo do gabe dang sabar hita paimahon Jahowa pasautton akka janjina. Alai taingot ma berbeda do cara marpikkirta dohot Jahowa, ai Debata na mangolu saleleng ni lelengna do Ibana. (2 Ptr. 3:8, 9) Pos ma rohatta bahenon ni Jahowa do na dumenggan lao pasautton janjina i, nang pe dang sai songon na taharappon. Attong songon dia do asa sabar hita paimahon Jahowa?​—Jak. 5:7, 8.

12. Sesuai tu Heber 11:1, 6, aha do hubungan ni harapan tu haporseaon?

¹² Asa boi togu harapanta, ikkon jonok do hita tu Jahowa. Alana Ibana do na lao pasautton harapanta i. Adong do hubungan ni harapan tu haporseaon. Asa adong harapanta, ikkon porsea do hita na adong Jahowa jala “na lehononna upa tu halak na marsitutu mangalului Ibana”. (Jaha Heber 11:1, 6.) Molo lam nyata Jahowa i di hita, lam balga ma pos ni rohatta na lao pasautonna sude janjina i. Saonari tabahas ma songon dia carana asa lam jonok hita tu Jahowa jala asa toktong togu harapanta i.

13. Songon dia do carana asa jonok hita tu Debata?

¹³ Martangiang tu Jahowa jala manjaha Bibel. Nang pe dang boi taida Jahowa, boi do hita jonok tu Ibana. Boi do hita makkatai tu Ibana marhite tangiang. Pos ma rohatta lomo do rohana manangihon tangiangta i. (Jer. 29:11, 12) Boi do muse hita manangihon Jahowa tikki tajaha Bibel jala tarimangi isina. Tikki taida songon dia Jahowa mangurupi akka naposona najolo, gabe lam togu ma haporseaotta tu Ibana. Taingot ma sude isi ni Bibel, disurat do i “asa pos rohatta tu janji ni Debata, asa margogo, jala togu manaon sitaonon”.​—Rom 15:4.

14. Boasa porlu tarimangi songon dia Jahowa mangurupi naposona najolo?

¹⁴ Rimangi ma songon dia Jahowa pasautton akka janjina najolo. Parrohahon ma aha na dibahen Jahowa tu si Abraham dohot si Sara. Sebenarna dang boi be nasida maranakkon ala nungnga matua. Alai didok Jahowa na lao maranakkon do nasida. (1 Mus. 18:10) Songon dia ma reaksi ni si Abraham? Didok di Bibel, “Porsea jala pos do roha ni si Abraham na boi ibana gabe ama ni godang bangso.” (Rom 4:18) Hira na so mungkin do i masa, alai pos do roha ni si Abraham na lao pasauton ni Jahowa do janjina. Jala memang i do na masa. (Rom 4:19-21) Sian on hita marsiajar, pasti pasauton ni Jahowa do sude janjina nang pe hira na so mungkin i masa.

15. Boasa ikkon tarimangi songon dia Jahowa mangurupi hita saleleng on?

¹⁵ Rimangi ma aha naung diulahon Jahowa tu hamu saleleng on. Pikkiri ma songon dia hamu sandiri mandapot manfaat ala nungnga digenapi Jahowa akka janjina na tarsurat di Bibel. Contohna nungnga didok Jesus hian pasti paradeon ni Jahowa do kebutuhanta. (Mat. 6:32, 33) Dipapos Jesus do muse rohatta lehonon ni Jahowa do tondi parbadiana molo tapangido i sian Ibana. (Luk. 11:13) Nungnga ditepati Jahowa akka janjina i. Ditepati Jahowa do muse akka janjina na asing. Contohna marjanji do Ibana na lao manesa dosamuna, patoguhon hamu, jala mangurupi hamu asa toktong jonok tu Ibana. (Mat. 6:14; 24:45; 2 Kor. 1:3) Molo dirimangi hamu sude naung diulahon Jahowa tu hamu saleleng on, gabe lam pos ma rohamuna pasauton ni Jahowa do tong sude janjina di ari na naeng ro.

16. Boasa tadok hadiah na massai arga do harapan i?

¹⁶ Hadiah na massai arga do harapan lao mangolu saleleng ni lelengna. Tarpaima do hita asa masa i di ari na naeng ro, jala pasti saut do i. Harapan i sarupa songon jangkar, na mambahen hita tenang tikki susa hita, tikki dianiaya, manang tikki tarancam ngolutta. Harapan i pe sarupa do songon takkuluk bosi na boi melindungi pikkiranta, asa sanggup hita mambolokkon akka pikkiran na sala jala mangulahon na sittong. Asing ni i, harapan on mangurupi hita lam jonok tu Debata jala mangurupi hita makkilala holong ni Jahowa na massai balga tu hita. Jadi godang do manfaatna molo toktong togu harapanta.

17. Boasa harapan i mambahen hita marlas ni roha?

¹⁷ Di suratna tu halak Kristen di Rom didok si Paulus do, “Marlas ni roha ma hamu alani akka na lao jaloonmuna di ari na naeng ro.” (Rom 12:12) Toktong do marlas ni roha si Paulus, ala pos rohana pasti dapotna do hangoluan salelengna di surgo molo toktong ibana setia. Jadi hita pe, boi do toktong marlas ni roha paimahon janji ni Jahowa. Alana pos do rohatta pasti pasauton ni Jahowa do i. Songon na didok panurat Psalmen, “Marlas ni roha ma halak . . . na porsea tu Jahowa Debatana . . . Ibana do na toktong boi dihaporseai.”​—Ps. 146:5, 6.