Mandapot Godang Manfaat Tikki Manjaha Bibel

 1. Aha do na patuduhon massai penting do Surat na Badia di Jesus?

BAYAKKON ma hamu mambege Jesus mangajari. Jotjot do ibana mangutip Surat na Badia jala diingot ibana do i sude! Dang holan tikki mangajari, tarida do dikutip Jesus do Surat na Badia sian hatana na parjolo dung tardidi dohot hatana na parpudi sebelum mate.b (5 Mus. 8:3; Ps. 31:5; Luk. 4:4; 23:46) Saleleng tolu satonga taon ibana melayani di tano on, jotjot do Jesus manjaha, mangutip Surat ni Debata, jala patorakkon i di jolo ni godang halak.​—Mat. 5:17, 18, 21, 22, 27, 28; Luk. 4:16-20.

 2. Mulai sian na gelleng, aha do na mangurupi Jesus asa takkas mangattusi Surat na Badia? (Ida gambar sampul.)

² Andorang so marbarita na uli dope Jesus, jotjot do ibana manjaha dohot manangihon Hata ni Debata. Pasti dibege ibana do si Maria dohot si Josep mangutip sian Surat na Badia tikki makkata-hatai nasida di jabu.c (5 Mus. 6:6, 7) Asing ni i, sai ro do Jesus tu sinagoga tiap ari Sabat rap dohot keluargana. (Luk. 4:16) Tikki di sinagoga manat do ditangihon ibana tikki dijahahon Surat na Badia. Belakangan, boi ma Jesus manjahahon Surat na Badia di sinagoga. Hasilna gabe takkas ma diattusi Jesus Surat na Badia. Massai holong do rohana tu Hata ni Debata jala diulahon ibana do i di ngoluna. Misalna, taingot dope tikki Jesus marumur 12 taon di bagas joro. Longang do akka guru agama na mamboto Patik ni si Musa mambege hatana i, “ai massai godang do na diboto ibana jala massai marbisuk do ibana mangalusi”.​—Luk. 2:46, 47, 52.

 3. Aha do na lao tabahas di artikel on?

³ Hita pe boi do mangattusi jala makkaholongi Hata ni Debata molo taratur hita manjaha i. Alai songon dia hita asa boi mandapot godang manfaat tikki manjaha? Marsiajar ma hita sian aha na didok Jesus tu siboto patik, halak Parise, dohot halak Saduse. Jotjot do akka pamimpin agama i manjaha Surat na Badia, alai dang dapot ni nasida manfaat sian na dijahana i. Dipaboa Jesus do tolu cara na seharusna diulahon nasida. Di artikel on, tabahas ma songon dia hata ni Jesus i mangurupi hita asa (1) mangattusi na tajaha, (2) mandapot arta na arga, dohot (3) paloasson Hata ni Debata membentuk cara marpikkirta.

 4. Aha do na boi taparsiajari sian Lukas 10:25-29 tikki manjaha Bibel?

⁴ Ikkon taattusi do aha na tajaha di Bibel asa botul-botul hita mandapot manfaat sian i. Taparrohahon ma tikki makkata-hatai Jesus dohot sahalak siboto patik. (Jaha Lukas 10:25-29.) Disukkun bawa i do Jesus aha na porlu diulahon ibana asa boi mandapot hangoluan na saleleng ni lelengna. Diarahon Jesus ma ibana tu Hata ni Debata. Disukkun ibana ma bawa i, “Aha do na tarsurat di Patik i? Dung dijaha ho i, aha do na boi diattusi ho?” Sittong do alus ni bawa i. Dikutip ibana do sian Surat na Badia, ikkon dihaholongi ibana do Debata dohot halak na asing. (3 Mus. 19:18; 5 Mus. 6:5) Alai dukkon i disukkun bawa i ma, “Ise do sasittongna halak na ikkon huhaholongi?” Sian on tarida ma dang botul-botul diattusi bawa i aha na dijahana i. Akibatna, gabe dang diboto ibana songon dia menerappon Hata ni Debata di ngoluna.

 5. Aha do manfaatna molo martangiang hita jala lambat tikki manjaha Bibel?

⁵ Boi do diattusi hamu Hata ni Debata molo denggan kebiasaanmuna manjaha. On ma piga-piga saran na boi mangurupi hamu. Martangiang ma hamu andorang so manjaha Bibel. Porlu do hita diurupi Jahowa asa boi mangattusi isi ni Bibel. Alani i, pangido ma tondi parbadiana asa diurupi hita fokus tikki manjaha. Dung i lambat ma hamu manjaha. Marsoara ma hamu tikki manjaha manang manjaha huhut manangihon rekaman audiona. Molo dibahen hamu songon i, boi do i mangurupi hamu asa mangattusi, mangingot, jala mandapot godang parsiajaran sian Bibel. (Jos. 1:8) Molo nungnga sae hamu manjaha, martangiang ma muse hamu mandok mauliate tu Jahowa alani silehon-lehonna. Jala pangido ma bantuanna asa boi menerappon na dijahamuna i.

 6. Aha do manfaatna molo tarimangi sukkun-sukkun dohot tabahen catatan singkat tikki manjaha Bibel? (Ida gambar.)

⁶ Adong muse dua saran na mangurupi hamu asa mangattusi isi ni Bibel. Pikkirhon ma sukkun-sukkun on: ‘Ise do tokoh utamana? Ise do na makkatai? Tu ise ibana makkatai, jala boasa? Didia jala andigan do i masa?’ Sukkun-sukkun sisongon i mangurupi hamu mamikkirhon gagasan utama sian ayat na dijaha hamu. Dung i bahen ma catatan singkat tikki hamu manjaha. Molo dibahen hamu songon i, gabe diurupi ma hamu mangattusi jala mangingot gagasan-gagasan utamana. Boi do disurat hamu sukkun-sukkun, hasil riset, poin utama, caramuna menerappon i, manang songon dia perasaanmuna. Molo dibahen hamu catatan, gabe diurupi ma hamu mangida Hata ni Debata songon pesan sian Jahowa tu hamu secara pribadi.

 7. Aha do cara na asing asa boi mangattusi isi ni Bibel? (Mateus 24:15)

⁷ Dipaboa Jesus do cara na asing asa boi hita mangattusi isi ni Bibel, i ma manat mamparrohahon na tajaha. (Jaha Mateus 24:15.) Boha do carana mangulahon i? Ikkon tapakke do kesanggupanta marpikkir asa boi mangattusi kaitan manang perbedaan ni sada gagasan tu gagasan na asing, nang pe dang langsung dipaboa di Bibel. Dipaboa Jesus do muse ikkon manat do hita mamparrohahon peristiwa na dia do na menggenapi surirang ni Bibel. Porlu do muse tapakke kesanggupan marpikkir tikki manjaha bagian ni Bibel na asing asa tadapot manfaat sian i.

 8. Songon dia do hita mamakke kesanggupan marpikkir tikki manjaha Bibel?

⁸ Dilehon Jahowa do kesanggupan marpikkir tu naposona. Alani i martangiang ma hamu tu Jahowa mangido bantuanna. (Poda 2:6) Alai dang sae holan i, adong dope na porlu diulahon hamu. Tikki manjaha Bibel, pareso hamu ma na dijahamuna i jala pikkirhon ma songon dia hatorangan i marhaitan tu hatorangan naung diboto hamu. Pakke ma alat bantu riset misalna Tudutudu na Dipangke Sitindangi Ni Jahowa Laho Marsiajar. Publikasi on boi mangurupi hamu mamboto lapatan ni sada ayat di Bibel jala mangida songon dia carana menerappon ayat i di ngolumuna. (Heb. 5:14) Molo dipakke hamu kesanggupan marpikkir tikki manjaha Bibel, gabe lam tamba ma pangattusionmuna taringot Hata ni Debata.

 9. Aha do ajaran ni Bibel na penting na so dihaporseai halak Saduse?

⁹ Takkas do diboto halak Saduse lima bukku na parjolo sian bukku Heber. Alai dang porsea nasida tu hasittongan na adong di bukku i. Uppamana parrohahon ma songon dia hata ni Jesus tikki makkatai tu halak Saduse taringot haheheon. Disukkun ibana do, “Na so hea do dijaha hamu di bukku ni si Musa taringot tu ramba na marsuga? . . . Ai didok [Debata] do, ‘Au do Debata ni si Abraham, Debata ni si Isak, dohot Debata ni si Jakkob.’” (Mrk. 12:18, 26) Sebenarna jotjot do dijaha halak Saduse ayat i. Alai sian sukkun-sukkun ni Jesus tarida ma dang porsea nasida tu ajaran ni Bibel na penting i ma taringot haheheon.​—Mrk. 12:27; Luk. 20:38.d

10. Aha do na porlu taparrohahon tikki manjaha Bibel?

¹⁰ Aha do parsiajaranna tu hita? Tikki manjaha Bibel, berupaya ma hita mangida parsiajaran sian ayat manang kisah na adong disi. Unang ma puas hita holan mamboto ajaran dasar, alai berupaya ma hita mangalului arta na arga dohot prinsip sian ayat i.

11. Sesuai tu 2 Timoteus 3:16, 17, songon dia do asa dapotmuna arta na arga tikki manjaha Bibel?

¹¹ Songon dia do asa dapotmuna arta na arga tikki manjaha Bibel? Parrohahon ma na didok di 2 Timoteus 3:16, 17. (Jaha.) Didok, “sude Surat na Badia i . . . marguna do i” (1) mangajari, (2) mamissang, (3) padenggatton pangalaho, jala (4) manogu-nogu lao mangulahon na sittong. Boi do dapotmuna opat manfaat on bahkan sian bukku ni Bibel na so jotjot dijaha hamu. Tikki dijaha hamu sada ayat, parrohahon ma songon dia i mangajari hamu taringot Jahowa, sakkapna, manang taringot prinsipna. Ida ma songon dia ayat i boi mamissang hamu. Parrohahon ma songon dia ayat i mangurupi hamu mamboto jala manolak sifat manang keinginan na sala jala songon dia carana asa toktong setia tu Jahowa. Parrohahon ma muse songon dia ayat i boi dipakke hamu lao padenggatton pangalaho dohot cara marpikkir na sala sian akka halak na bisa jadi dijuppangi hamu tikki marbarita. Asing ni i, ida ma songon dia ayat i manogu-nogu hamu lao mangulahon na sittong manang mangalatik hamu lao maniru cara marpikkir ni Jahowa. Molo diingot hamu opat manfaat on, boi ma dapotmuna godang arta na arga tikki manjaha Bibel.

12. Boasa disukkun Jesus tu halak Parise “Na so hea do dijaha hamu?”

¹² Disukkun Jesus do halak Parise “Na so hea do dijaha hamu?” lao patuduhon dang diattusi nasida Surat na Badia. (Mat. 12:1-7)e Di tikki i, halak Parise mandok molo sisean ni Jesus nungnga mangalanggar ari Sabat. Lao mangalusi nasida, dikutip Jesus ma dua contoh sian Surat na Badia dohot sada ayat sian bukku Hosea na patuduhon dang diattusi nasida lapatan ni ari Sabat jala dang dipatudu nasida asi ni roha. Nang pe jotjot dijaha nasida Hata ni Debata, alai boasa dang dipaloas nasida i membentuk cara marpikkirna? Ala ginjang do roha ni nasida jala dijaha nasida pe i holan lao mangalului kesalahan ni na asing. Alani i gabe dang boi diattusi nasida na dijahana i.​—Mat. 23:23; Joh. 5:39, 40.

13. Ikkon songon dia do cara marpikkirta tikki manjaha Bibel, jala boasa?

¹³ Sian hata ni Jesus marsiajar do hita, ikkon denggan do cara marpikkirta tikki manjaha Bibel. Unang ma songon halak Parise hita na ginjang rohana jala mangalului kesalahan ni na asing. Ikkon serep ma rohatta jala olo diajari. Bibel mandok, “Marhite serep ni roha, jalo hamu ma hata ni Debata na disuan Ibana tu bagasan rohamuna.” (Jak. 1:21) Molo serep rohatta, taloas do Bibel padenggatton cara marpikkirta. Hasilna gabe boi ma hita patuduhon haburjuon, asi ni roha, dohot holong.

14. Sian dia do taboto na tapaloas Hata ni Debata membentuk hita? (Ida gambar.)

¹⁴ Tarida do na dibentuk Hata ni Debata hita sian caratta berurusan tu na asing. Molo halak Parise dang diloas nasida Hata ni Debata membentuk cara marpikkir ni nasida, ‘ai dihukum nasida do halak na so marsala’. (Mat. 12:7) Sarupa songon i ma, cara pikkirta dohot caratta berurusan tu halak patuduhon na tapaloas do Hata ni Debata membentuk hita manang na dang. Misalna berfokus do hita mangida na denggan sian akka donganta, manang hatop do hita mangida hahurangan ni nasida? Tapatudu do asi ni roha jala rade do hita manalpuhon hasalaan, manang sai talului do kesalahan ni na asing jala mendendam? Alus ni sukkun-sukkun on boi patuduhon tapaloas do Hata ni Debata membentuk cara marpikkirta, perasaanta, dohot tindakanta manang na dang.​—1 Tim. 4:12, 15; Heb. 4:12.

15. Songon dia do perasaan ni Jesus tu Surat na Badia?

¹⁵ Holong do roha ni Jesus tu Hata ni Debata. Jala nungnga disurirangkon hian perasaanna i di Psalmen 40:8. Didok disi, “Ale Debatakku, lomo do rohakku mangulahon lomo ni roham. Husippan do patikmu di bagasan rohakku.” Hasilna gabe las ma rohana jala marhasil do ibana melayani Jahowa. Hita pe boi do makkilala sisongon i, gabe las ma rohatta jala marhasil melayani Jahowa molo tajaha Hata ni Debata jala tahaholongi Hatana i.​—Ps. 1:1-3.

16. Songon dia do carana asa lam godang manfaat na tadapot tikkki manjaha Bibel? (Ida kotak “Hata ni Jesus Boi Mangurupi Hita Mangattusi na Tajaha.”)

¹⁶ Sian teladan dohot hata ni Jesus, berupaya ma hita maningkatton keterampilanta tikki manjaha Bibel. Boi do tatingkatton pangattusionta taringot Bibel molo martangiang hita, lambat tikki manjaha, mangarimangi sukkun-sukkun, jala mambahen catatan singkat. Tapakke ma kesanggupan marpikkirta jala tamanfaatton ma akka publikasi tikki mangariset na tajaha di Bibel. Berupaya ma hita mangalului arta na arga sian sada ayat manang kisah di Bibel, nang pe kisah i dang pola jotjot tabege. Taloas ma muse Hata ni Debata membentuk cara marpikkirta. Molo taulahon i sude, gabe lam godang ma manfaat na tadapot sian Bibel jala lam jonok ma hita tu Jahowa.​—Ps. 119:17, 18; Jak. 4:8.