Mateus
17 Onom ari dungkon i, ditogihon Jesus ma si Petrus, si Jakobus dohot si Johannes na marhaha maranggi nangkok tu dolok na timbo. Holan nasida do na laho tusi. 2 Dung i, muba ma rupa ni Jesus diida nasida, bohina marsinondang songon mata ni ari jala pangkeanna mansai bontar. 3 Tompu ma diida nasida si Musa dohot si Elia mangkata-hatai dohot Jesus. 4 Dung i, didok si Petrus ma tu Jesus, “Tuan, las do rohanami dison. Molo lomo do roham, hupajongjong ma dison tolu kemah. Sada di ho, sada di si Musa, jala sada di si Elia.” 5 Tingki mangkatai dope si Petrus, ro ma ombun marsinondang mangalinggomi nasida. Tarbege ma soara sian ombun i na mandok, “On do Anakku, haholonganki, halomoan ni rohangku do ibana. Tangihon ma ibana.” 6 Mambege i, mabiar situtu ma angka siseanna jala manungkap ma nasida. 7 Dung i, didapothon Jesus ma sisean i laos dijama ma nasida, ninna ma, “Hehe ma, unang mabiar.” 8 Dung i, dibereng nasida ma tu humaliang alai holan Jesus nama diida disi. 9 Di tingki turun nasida sian dolok i, diparentahon Jesus ma tu nasida, “Unang paboa-boa manang tu ise na niidamuna i sahat tu na hehe Anak ni jolma i sian hamatean.”
10 Alai, disungkun angka sisean i ma ibana, “Boasa didok angka siboto surat ingkon jumolo ro si Elia?” 11 Dialusi Jesus ma, “Sintong do i, na ro ma tutu si Elia padengganhon sasude. 12 Hudok ma tu hamu, nunga ro si Elia alai ndang ditanda nasida. Lomo-lomo ni nasida do tu ibana. Songon i do nang Anak ni jolma i, marsitaonon bahenon ni nasida.” 13 Dung i, diantusi angka sisean i ma si Johannes Pandidi do na nidokna disi.
14 Tingki didapothon nasida natorop i, ro ma sahalak baoa marsinggang tu jolo ni Jesus jala ninna ma, 15 “Tuan, asi ma roham tu anakku. Ai solpoton do ibana jala hansit do ditaon. Jotjot do ibana madabu tu api dohot tu aek. 16 Nunga huboan ibana tu angka siseanmi, alai ndang boi dipamalum.” 17 Didok Jesus ma mangalusi, “E hamu sundut na so porsea dohot na lilu, sadia leleng nai ingkon rap ahu dohot hamu? Sadia leleng nai ingkon sabar ahu maradophon hamu? Boan ma ibana tuson.” 18 Dung i, disonggak Jesus ma suru-suruan na jahat i jala kaluar ma sian anakna i. Laos satongkin i malum ma ibana. 19 Dung i, pulik ma didapothon angka siseanna Jesus jala ninna ma, “Boasa ndang tarpalao hami i?” 20 Ninna Jesus ma tu nasida, “Ai otik do haporseaonmuna. Tutu do na hudok on tu hamu, molo adong haporseaonmu nasa batu ni siarum, boi do dohononmu tu dolok on, ‘Pinda ma ho tusan,’ pinda do i. Jala ndang adong na so boi bahenonmu.” 21 *——
22 Tingki rap marpungu nasida di Galilea, didok Jesus ma tu nasida, “Pasahatonna* ma Anak ni jolma i tu angka musuna, 23 jala bunuon ni nasida ma ibana. Alai, hehe do ibana di ari patoluhon.” Gabe lungun ma roha ni nasida.
24 Dung sahat nasida di Kapernaum, didapothon sijalo pajak ma si Petrus, ninna ma, “Digarar gurumuna i do pajak na dua drakhma* i?” 25 Dialusi si Petrus ma, “Digarar.” Alai, dung masuk ibana tu sada jabu, jumolo ma disungkun Jesus ibana, “Boha do pandapotmu Simon? Sian ise do dijalo angka raja ni portibi on guguan manang pajak? Sian angka anakna do manang sian halak na asing?” 26 Dialusi ibana ma, “Sian halak na asing.” Dung i, ninna Jesus ma, “Tutu, alani i ndang ingkon manggarar pajak angka anakna i. 27 Alai, unang ma gabe partuktuhan hita di nasida. Laho ma ho mangkail tu laut. Buat ma dengke na parjolo dapotmu, bungka ma baba ni dengke i jala dapotmu ma sada logam perak.* Buat ma i jala garar ma tu nasida bahen pajak tu hita na dua.”