Boasa Ikkon Marhite Goar ni Jesus Hita Martangiang?

TIKKI di tano on, sering do diajarhon Jesus taringot tangiang tu akka halak. Tikki i sering do pamimpin agama ni halak Jahudi martangiang “di sirpang ni dalan”. Tujuanna? “Asa diida halak”. Lomo do roha ni nasida dipuji-puji halak alani na diulahon nasida i. Tikki martangiang godang halak na mangulang-ulangi hatana asa songon na ganjang tangiangna. Dirippu nasida “alani ganjang ni tangiangna gabe ditangihon Debata pangidoan ni nasida”. (Mateus 6:5-8) Alai takkas do dipaboa Jesus dang marlapatan i. Alani i, gabe diboto akka halak ma aha na so boi diulahon tikki martangiang. Alai dang holan i na diajarhon Jesus.

Didok Jesus, tikki martangiang ikkon tatangiangkon do asa dipabadia goar ni Debata, asa ro Harajaonna, jala asa saut lomo ni rohana. Jala didok ibana, boi do tong tatangiangkon akka na porlu di hita. (Mateus 6:9-13; Lukas 11:2-4) Marhite perumpamaan, dipatudu Jesus do aha na porlu taulahon asa dijalo Debata tangiangta. Ikkon serep do rohatta, ikkon pos rohatta tu Debata, jala unang ma hita marnaloja mangido. (Lukas 11:5-13; 18:1-14) Alai dang holan mangajarhon Jesus, dohot do tong ibana mangulahon i.​—Mateus 14:23; Markus 1:35.

Ala dilehon Jesus petunjuk i, gabe boi ma denggan cara ni siseanna martangiang. Alai adong dope na lebih penting na naeng dipaboa Jesus taringot martangiang. Dipaboa ibana do i di borngin sebelum mate ibana.

Di borngin sebelum mate Jesus, godang do dipaboa ibana nasehat tu akka siseanna. Jala di tikki i dipaboa ibana do petunjuk na baru taringot martangiang. Didok ibana, “Au do dalan dohot hasittongan dohot hangoluan. Dang adong na boi ro tu Damang i molo so marhite au.” Dung i marjanji ma Jesus, “Ulahonokku do manang aha na dipangido hamu marhite goarhu, asa gabe dipasangap Damang i marhite Anak i. Ulahonokku do manang aha na dipangido hamu marhite goarhu.” Jala na parpudi didok ibana do muse, “Sahat tu saonari, dang adong dope dipangido hamu manang aha di bagasan goarhu. Pangido hamu ma asa dapotmuna i, dung i gok ma las ni rohamuna.”​—Johannes 14:6, 13, 14; 16:24.

Massai rikkot do hata ni Jesus on. Sada referensi ni Bibel mandok “mulai sian i ma muba cara martangiang”. Dang na disuru Jesus akka halak asa unang tu Debata be martangiang, alai asa tu ibana. Justru na paboahon cara na baru do ibana songon dia asa dijalo Debata Jahowa tangiangta.

Sai ditangihon Debata do tangiang ni akka naposona na setia. (1 Samuel 1:9-19; Psalmen 65:2) Di jaman ni halak Israel, manang ise na naeng martangiang tu Debata, ikkon diakkui nasida do memang bangso Israel do bangso na dipillit Debata. Alana nungnga dibahen Debata perjanjian tu halak Israel. Di jaman ni Raja Salomo, ikkon diakkui nasida do holan di bagas joro do nasida boi mangalehon pelean. Ai i do inganan na dipillit Debata. (5 Musa 9:29; 2 Kronika 6:32, 33) Alai holan sementara do cara i. Songon na dipaboa apostel Paulus, Patik na dilehon tu halak Israel dohot pelean na dipelehon di bagas joro, “holan bayangan ni akka na denggan na masa di ari na naeng ro do i”. (Heber 10:1, 2) Jala ikkon gabe kenyataan do bayangan i. (Kolosse 2:17) Jadi mulai taon 33 M, dang mangihutton Patik ni si Musa be akka halak molo naeng jonok tu Debata. Alai paretta ni Jesus Kristus nama na ikkon diihutton nasida. Ai tu Kristus do hita ditogu-togu Patik i.​—Johannes 15:14-16; Galatia 3:24, 25.

Tikki dipaboa Jesus cara na dumenggan lao martangiang, on patuduhon dos do ibana songon dongan na hebat. Alana holan marhite ibana do boi dijalo tangiangta. Boasa boi songon i?

Sian mulai tubu, nungnga mardosa hita sude. Jadi sebenarna manang aha pe na taulahon jala manang aha pe na tapelehon, dang boi i menghapus dosatta manang mambahen jonok hubungatta tu Jahowa, Debata na badia i. (Rom 3:20, 24; Heber 1:3, 4) Alai olo do Jesus mangalehon ngoluna na sempurna asa boi dihapus Debata dosatta. (Rom 5:12, 18, 19) Jadi molo porsea hita tu tobusan ni Jesus jala martangiang hita marhite goarna, boi ma gabe denggan muse hubungatta tu Jahowa jala dang “mabiar” be hita naeng makkatai tu Ibana.​—Epesus 3:11, 12.

Molo martangiang hita di bagasan goar ni Jesus, on patuduhon na porsea do hita nungnga dilehon Debata tanggung jawab tu Jesus lao mangulahon lomo ni roha ni Debata. Adong tolu tanggung jawab na diulahon: (1) Ibana do “Anak ni biru-biru ni Debata” na dipelehon lao manesa dosatta. (2) Nungnga dipahehe Jahowa ibana. Jala saonari nungnga gabe “sintua ni malimta” ibana, na mangurupi hita asa boi jonok hubungatta tu Debata. (3) Holan ibana do “dalan” na mambahen boi sahat tangiangta tu Debata.​—Johannes 1:29; 14:6; Heber 4:14, 15.

Molo martangiang hita marhite goar ni Jesus, na pasangappon Jesus do hita. Jahowa pe lomo do rohana molo sude jolma “pasangappon goar ni Jesus. Jala sude ma nasida mangakkui Jesus Kristus do Tuan na parohon hasangapon tu Debata Amangta”. (Pilippi 2:10, 11) Jala na paling penting, pasangappon goar ni Jahowa do hita molo martangiang marhite goar ni Jesus. Alana Ibana do na mangalehon Anakna gabe tobusan.​—Johannes 3:16.

Asa boi taattusi sadia rikkot do tanggung jawab ni Jesus, disurat do di Bibel piga-piga gelar ni Jesus. Alani i gabe boi ma taboto aha do naung diulahon Jesus najolo, saonari, dohot di ari na naeng ro. Jala aha do manfaatna tu hita. (Ida kotak “Akka Tanggung jawab ni Jesus na Penting”.) Asing ni i, nungnga dilehon tu Jesus “goar na ussangap sian sude goar”.a Jala nungnga dilehon Debata tu ibana saluhut huaso na di banua ginjang dohot na di tano on.​—Pilippi 2:9; Mateus 28:18.

Asa dijalo Jahowa tangiangta, ikkon martangiang do hita di bagasan goar ni Jesus. (Johannes 14:13, 14) Alai unang ma taulang-ulangi di tangiangta mandok, “di bagasan goar ni Jesus” ala nungnga songon i kebiasaanta. Boasa?

Pikkirhon ma contoh on: Adong ma sahalak pengusaha na mangirim surat tu hamu. Di ujung ni suratna i, adong do dibahen ibana hata na mandok, “Dengan hormat”. Menurut hamu, toho do memang hormat ibana tu hamu sian ias ni rohana? Manang ala memang songon i do kebiasaan ni halak mambahen surat? Toho do porlu hita martangiang marhite goar ni Jesus. Alai unang ma tabahen i holan gabe kebiasaan songon hata “dengan hormat” di surat ni pengusaha nakkin. Nang pe porlu hita ‘torus martangiang’, alai ikkon ‘sian nasa roha’ do tangiangta i, unang ma holan gabe kebiasaan.​—1 Tessalonik 5:17; Psalmen 119:145.

Boha do carana asa unang taulang-ulangi mandok “di bagasan goar ni Jesus” tikki martangiang? Pikkirhon ma akka sifat ni Jesus. Pikkirhon ma muse sude naung diulahon ibana dohot na naeng diulahon ibana tu hamu. Tikki martangiang, mandok mauliate ma hamu tu Jahowa ala nungnga dilehon Anakna gabe dalan asa boi sahat tangiangta tu Ibana. Molo taulahon i, boi ma pos rohatta tu janji ni Jesus na mandok, “Molo dipangido hamu manang aha tu Damang i di bagasan goarhu, lehononna do i tu hamu.”​—Johannes 16:23.