Sahalak bawa mangalehon hadiah na dibukkus di kotak

Aha do na Didok Bibel taringot Mangalehon?

Na didok Bibel

Didok Bibel do tu hita asa las rohatta mangalehon tu na asing jala sian ias ni roha ma hita mangulahon i. Molo burju hita mangalehon, dang holan na manjalo i na marlas ni roha, alai dohot do na mangalehon i marlas ni roha. (Poda 11:25; Lukas 6:38) Didok Jesus, “Umlas do roha ni halak na mangalehon sian na manjalo.”—Ulaon ni Apostel 20:35.

Silehon-lehon na songon dia do na mambahen las roha ni Debata?

Las do roha ni Debata molo sian ias ni roha hita mangalehon. Didok di Bibel, “Lok ma sian na taronjar ni rohana sasahalak mangalehon silehononna, unang ma marungut-ungut manang ala na tarpaksa. Ai dihaholongi Debata do halak na mangalehon sian las ni rohana.”—2 Korint 9:7.

Jadi molo sian ias ni roha hita mangalehon, sada ibadat do i na mambahen las roha ni Debata. (Jakobus 1:27) Molo adong halak na burju mangurupi na asing, las do roha ni Debata mangida i. Alana molo burju ibana mangurupi, songon na mangalehon pinjaman do ibana tu Debata. (Poda 19:17) Didok di Bibel, baloson ni Debata do akka na denggan tu halak na burju mangalehon.—Lukas 14:12-14.

Silehon-lehon na songon dia do na mambahen dang lomo roha ni Debata?

Mangalehon, alai tujuanna salah. Contohna:

Mangalehon asa dipuji halak.—Mateus 6:2.
Mangalehon, alai asa adong muse balosna na dilehon tu ibana.—Lukas 14:12-14.
Mangalehon asa boi selamat manang mandapot pasu-pasu sian Debata.—Psalmen 49:6, 7.

Molo na talehon i dipakke tu akka ulaon na so dihalomohon Debata. Contohna, sala do molo talehon hepeng tu sasahalak hape dipakke i lao marjuji, manuhor narkoba, manang marmabuk-mabukan. (1 Korint 6:9, 10; 2 Korint 7:1) Asing ni i, sala do molo talehon hepeng tu halak na malas karejo hape sebenarna boi do ibana karejo.—2 Tessalonik 3:10.

Burju mangalehon tu na asing alai dang diparrohahon kebutuhan ni keluargana. Didok di Bibel, ikkon dipenuhi kepala keluarga do kebutuhan ni keluargana. (1 Timoteus 5:8) Jadi, sala do molo kepala keluarga burju mangalehon tu na asing, hape keluargana sandiri hahurangan. Di tikki ni Jesus, sogo do rohana mangida halak na so mangurus natua-tuana naung matua. Didok nasida do, molo sude akka arta ni nasida nungnga dibahen gabe “silehon-lehon tu Debata”.—Markus 7:9-13.

Akka ayat ni Bibel taringot mangalehon

Poda 11:25: “Mamora do halak na las rohana mangalehon na adong di ibana, jala manang ise na mangalehon minum na asing, lehonon ni halak do ibana minum.”

Maksudna: Dang holan halak na manjalo i na marlas ni roha, alai dohot do tong halak na mangalehon i na marlas ni roha.

Poda 19:17: “Halak na marasi ni roha tu na pogos dos songon na mangalehon pinjaman tu Jahowa, baloson ni Debata do pambahenanna i.”

Maksudna: Dos songon na marutang do Debata tu halak na burju mangalehon. Jala marjanji do Ibana mangalehon pasu-pasu tu halak na burju mangalehon.

Mateus 6:2: “Molo marsilehon-lehon ho tu na asing unang ma palu tarompet songon na binahen ni halak na munafik. Ai dibahen nasida do songon i . . . asa dipuji halak nasida.”

Maksudna: Unang ma hita mangalehon holan asa dipuji halak.

Ulaon ni Apostel 20:35: “Umlas do roha ni halak na mangalehon sian na manjalo.”

Maksudna: Molo sian ias ni roha do hita mangalehon, pasti las do rohatta.

2 Korint 9:7: “Lok ma sian na taronjar ni rohana sasahalak mangalehon silehononna, unang ma marungut-ungut manang ala na tarpaksa. Ai dihaholongi Debata do halak na mangalehon sian las ni rohana.”

Maksudna: Las do roha ni Debata molo sian ias ni roha hita mangalehon.