Boasa Penting Harajaon ni Debata di Jesus?

Songon na dipaboa di artikel sebelumna, fokus do Jesus “paboahon barita na uli taringot tu Harajaon ni Debata” saleleng ni ngoluna. (Lukas 8:1) Olo do ibana mardalan pat marratus kilometer mandalani sude huta ni halak Israel lao mangajari akka halak taringot Harajaon ni Debata. Sude na diulahon Jesus on disurat do di opat Injil. Adong do disi lobi sian 100 ayat na paboahon taringot Harajaon ni Debata. Hata ni Jesus do godangan na disurat di akka ayat i. Alai sebetulna godang nai dope na didok Jesus taringot Harajaon ni Debata na so disuratton di Injil i!​—Johannes 21:25.

Boasa sering dipaboa Jesus taringot Harajaon ni Debata tikki di tano on? Alasan na parjolo, ala diboto Jesus do nungnga dipillit Debata ibana gabe Rajana. (Jesaya 9:6; Lukas 22:28-​30) Alai dang na naeng pasangappon dirina Jesus makana sering dipaboa ibana taringot i. (Mateus 11:29; Markus 10:17, 18) Adong do alasan na paling penting. Diboto Jesus do, molo jongjong Harajaon ni Debataa boi ma i pasangappon goar ni Bapakna. Jala godang do manfaat ni i tu akka halak na mangihutton ibana.

Holong hian do roha ni Jesus tu Jahowa, Bapakna i. (Poda 8:​30; Johannes 14:31) Lomo hian do rohana mangida sifat ni Bapakna. Contohna holong ni rohana, asi ni rohana, dohot keadilanna. (5 Musa 32:4; Jesaya 49:15; 1 Johannes 4:8) Jadi pasti sogo do rohana mambege gabus na paroa-roahon Bapakna. Contohna godang do halak na mandok dang parduli Debata tu jolma. Jala adong do na mandok sengaja do Debata mambahen hita susa lao manguji haporseaotta. Alani on ma makana lomo hian roha ni Jesus paboahon “barita na uli taringot tu Harajaon”. Alana diboto ibana do molo nungnga jongjong Harajaon ni Debata, boi ma tarida dang toho gabus i jala boi ma i pasangappon goar ni Bapakna. (Mateus 4:​23; 6:​9, 10) Boha carana?

Marhite Harajaon ni Debata, bahenon ni Jahowa ma perubahan na balga na bermanfaat tu jolma. Contohna, “Apusan ni Debata ma nasa ilu-ilu sian mata ni” sude jolma. Jala sude na mambahen jolma tangis, dang adong be i bahenon ni Debata. Bibel mandok, “Dang adong be hamatean nang arsak ni roha, nang angguk-angguk, nang na haccit, dang disi be.” (Pangungkapon 21:​3, 4) Molo nungnga jongjong Harajaon ni Debata, dang adong be sitaonon ni jolma.b

Jadi pasti ma lomo roha ni Jesus paboahon taringot Harajaon ni Debata tu akka halak! Alana diboto ibana do molo nungnga jongjong Harajaon ni Debata, takkas ma tarida huaso ni Bapakna dohot asi ni rohana. (Jakobus 5:​11) Jala diboto Jesus do tong molo nungnga jongjong Harajaon i, godang do manfaat ni i tu akka halak na mangulahon lomo ni roha ni Debata.

Sebelum ro Jesus tu tano on, di surgo do ibana rap dohot Bapakna. Disuru Debata do ibana manoppa nasa na adong. Ditoppa ibana do langit, akka bintang, dohot akka galaksi. Jala ditoppa ibana do tano on dohot nasa na mangolu na adong di bagasanna. (Kolosse 1:​15, 16) Alai sian sude toppaan i, didok Jesus, “tu jolma do na unlomo rohakku”.​—Poda 8:​31.

Saleleng marbarita Jesus di tano on, tarida do na holong rohana tu jolma. Sian mulana nungnga dipaboa Jesus, ro pe ibana tu tano on “lao marbarita na uli” do tu akka halak na porlu diurupi. (Lukas 4:​18) Alai dang holan hata Jesus lao mangurupi akka halak. Dipatudu ibana do i sian pambahenanna. Contohna, tikki diida ibana godang halak marpungu lao manangihon ibana mangajari, “asi ma rohana mangida nasida jala dipamalum ma akka na marsahit”. (Mateus 14:14) Di sada tikki adong ma sahalak bawa na marsahit na posi mandapotton Jesus. Didok bawa i molo olo Jesus pamaluppon ibana, pasti boi do ibana malum. Ala asi roha ni Jesus tu bawa i, dipamalum ma ibana. Didok Jesus do, “Olo do au, malum ma ho.” (Lukas 5:​12, 13) Tikki diida Jesus tangis si Maria ala mate si Lasarus ibotona i, “massai lungun ma dihilala ibana”, jala “manetek ma ilu ni Jesus”. (Johannes 11:32-​36) Dung i dibahen Jesus ma mukjizat. Dipahehe ibana ma si Lasarus nang pe nungnga opat ari ibana mate!​—Johannes 11:38-​44.

Alai diboto Jesus do, holan sementara do manfaat mukjizat na dibahen ibana tikki i. Sude halak na dipamalum ibana, pasti marsahit do muse. Jala sude halak na dipahehe ibana, pasti mate do muse. Diboto ibana do, holan Harajaon ni Debata do na boi mambahen dang adong be sitaonon ni jolma saleleng ni lelengna. Alani i ma dang holan mambahen mukjizat Jesus tikki di tano on. Alai “dibaritahon ibana do barita na uli taringot tu Harajaon”. (Mateus 9:​35) Akka mukjizat na dibahen Jesus tikki i patuduhon, boi do haduan bahenon ni Harajaon ni Debata lobi sian i di tano on. Taida ma aha do na lao masa haduan didok Bibel.

• 

  Dang adong be na marsahit.

  “Di tikki i, marnida ma mata ni halak na mapitung, jala marbinege ma pinggol ni halak na nengel. Di tikki i, boi ma halak na pakpang mangakkati songon rusa, jala marsurak marlas ni roha ma dila ni halak na bisu.” Ujungna, “Dang adong nanggo sahalak pe na maringanan disi na mandok, ‘Marsahit do au.’”​—Jesaya 33:​24; 35:​5, 6.

• 

  Dang adong be hamatean.

  “Lehononna do tano on gabe parbagianan ni halak na tigor marroha, Jala mangolu ma nasida disi saleleng ni lelengna.”​—Psalmen 37:29.

  “Boddutonna ma hamatean saleleng ni lelengna, jala apusan ni Jahowa Tuan Natumimbul i ma ilu-ilu sian sude bohi.”​—Jesaya 25:8.

• Mangolu ma muse halak naung mate.

  “Begeon ni saluhut na di kuburan i ma soarana jala kaluar ma nasida.”​—Johannes 5:​28, 29.

  “Na lao dipahehe Debata do halak.”—Ulaon ni Apostel 24:15.

• 

  Dang adong be halak na so marjabu manang na pengangguran.

  “Dibangun nasida ma jabu jala nasida ma na mangingani, dibahen nasida ma ladang anggur jala nasida ma na mangallang parbuena. Dang dipajongjong nasida jabu asa halak na asing mangingani, jala dang halak na asing na lao mangallang na disuan nasida. . . . Marlas ni roha situtu ma akka halak na hupillit i alani hasil ni ulaon ni nasida.”​—Jesaya 65:21, 22.

• 

  Dang adong be porang.

  “Dipaujung Ibana do akka porang di saluhut tano on.”​—Psalmen 46:9.

  “Dang buaton ni akka bangso be podang lao mangalo bangso na asing, jala dang marsiajar marporang be nasida.”​—Jesaya 2:4.

• 

  Dang adong be na kelaparan.

  “Lehonon ni tano on ma hasilna, Ai pasu-pasuon ni Debata, Debatanta i ma hita.”​—Psalmen 67:6.

  “Godang ma tubu sipanganon di ladang, Haru di pussu ni dolok pe godang do tubu suan-suanan.”​—Psalmen 72:16.

• Dang adong be na pogos.

  “Alai dang lupahonon ni Debata halak na pogos.”​—Psalmen 9:​18.

  “Ai paluaonna do akka halak na pogos na jou-jou mangido asa diurupi, Jala paluaonna do akka na dangol dohot na so adong pangalu-aluanna. Asi do rohana tu halak na dangol dohot tu halak na pogos, Jala dijaga ibana do ngolu ni halak na pogos.”​—Psalmen 72:12, 13.

Molo diida hamu akka janji i, boi do diattusi hamu boasa massai penting Harajaon ni Debata i di Jesus? Tikki di tano on ibana, lomo do rohana paboahon taringot Harajaon ni Debata tu akka halak na olo manangihon. Ai diboto ibana do dang adong be sitaonon ni jolma molo nungnga mamaretta Harajaon ni Debata di tano on.

Lomo do rohamuna mamboto akka janji i? Olo do hamu mangalului gumodang hatorangan taringot Harajaon ni Debata? Jala aha ma na ikkon diulahon hamu asa boi dihilala hamu akka janji i di ari na naeng ro? Dialusi ma sukkun-sukkun i di artikel na parpudi di majalah on.