Godang do halak na maol makkaholongi Debata. Nasida mandok dang tarpajonok Debata i, ai dao do Ibana sian hita. Dang mungkin boi tatanda Ibana. Jala adong muse do na mandok kejam do Debata i. On ma pandapot ni nasida:

• “Najolo jotjot do au martangiang tu Debata. Alai hira na dao hian do Debata i huhilala, jala dang mungkin dibege Ibana tangiangki. Hira na so adong Debata i jala dang adong perasaanna.”​—Marco, Italia.

• “Sebenarna lomo hian do rohakku lao manomba Debata. Alai songon na dao hian do Ibana huhilala jala kejam. Hurasa, sai holan na naeng manghukum hita do Ibana. Dang boi hubayangkon Debata i parlambok roha.”​—Rosa, Guatemala.

• “Tikki dakdanak au, porsea do au Debata i holan mangalului hasalaan ni jolma. Jala dihukum ma hita molo sala. Dung i, ninna rohakku dang parduli Debata tu jolma. Songon presiden do hurasa Debata i. Mamaretta akka halak alai dang holong rohana.”​—Raymonde, Kanada.

Boha do menurut hamu? Tutu do maol makkaholongi Debata? Saleleng marratus taon godang do halak Kristen na merasa songon i. Gariada najolo di akka inganan na godang halak Kristen, dang olo be nasida martangiang tu Debata. Boasa? Ala mabiar situtu nasida tu Debata. Songon na didok sahalak sejarawan na margoar si Will Durant, “Boha ma bahenon ni jolma pardosa martangiang tu Debata na kejam?”

Boasa gabe songon i pandapot ni nasida taringot tu Debata? Songon dia do alus ni Bibel? Jala songon dia do alus ni Bibel i boi mangurupi hamu makkaholongi Debata?

“Dang sada rohanami taringot adong manang na dang goar ni Debata. Molo pe adong, dang boi ditottuhon hami ise goarna.”​—Profesor David Cunningham, Theological Studies.

Debata mandok, “Au do Jahowa, i do goarhu.” (Jesaya 42:8) Lapatan ni Jahowa di bahasa Heber i ma, “Ibana na mambahen Ibana na Pasautton.”​—1 Musa 2:4, surat na di toru.

Lomo do roha ni Jahowa asa tadok goarna. Bibel mandok, “Jou ma goarna. Paboa ma akka ulaonna tu akka halak. Baritahon ma na mulia goarna i.”​—Jesaya 12:4.

Dipakke Jesus do goar ni Debata. Tikki martangiang didok Jesus do tu Jahowa, “Nungnga hupaboa goarmu tu nasida [akka murid ni Jesus] jala toktong dope paboaokku i.” Boasa dipaboa Jesus goar ni Debata tu akka muridna? Jesus mandok, “Asa adong holong ni roha di nasida songon holong ni rohami [Debata] tu au, jala asa marsada au dohot nasida.”​—Johannes 17:26.

Sahalak ahli teologia na margoar si Walter Lowrie mandok, “Molo dang diboto sasahalak goar ni Debata, dang boi ibana mananda Debata. Jadi songon dia ma ibana makkaholongi Debata, molo ibana menganggap Debata i holan sada huaso.”

Sahalak bawa na margoar si Victor ringgas do tu gareja tiap minggu. Alai didok rohana dang pola takkas ditanda ibana Debata. Ibana mandok, “Dung huboto goar ni Debata Jahowa, hira na marsitandaan ma au dohot Debata.” Didok ibana ma muse, “Hira na langsung do au pajuppang dohot Debata. Hira na boi ma huida Ibana jala gabe lam jonok ma au dohot Jahowa.”

Jonok do Jahowa tu akka halak na mamakke goarna. Tu “akka halak na mamikkiri goarna”, marjanji do Debata, “Patuduhonokku ma asi ni roha tu nasida, songon sahalak ama na patuduhon asi ni roha tu anakna na mangoloi hatana.” (Maleaki 3:16, 17) Dilehon Jahowa do upa tu akka halak na manjou goarna. Bibel mandok, “Malua do ganup halak na manjou goar ni Debata, i ma Jahowa.”​—Rom 10:13.

Akka agama Kristen “i ma tolu kelompok utama songon Katolik Roma, Ortodoks Timur, dohot Protestan porsea tu Debata sitolusada. Na nidokna i ma Debata Ama, Debata Anak, dohot Debata Tondi Parbadia. Teologia Kristen mandok, dang na gabe tolu Debata i, alai tolu pribadi di bagasan sada.”​—The New Encyclopædia Britannica.

Jesus, i ma anak ni Debata dang hea mandok na sarupa dirina tu Bapakna. Alai didok ibana do, “Lao do au tu Damang i, ai umbalga do Damang i sian au.” (Johannes 14:28) Jala didok ibana do tu muridna, “Na lao ma au tu Damang i dohot Amamuna jala tu Debatakku dohot Debatamuna.”​—Johannes 20:17.

Tondi parbadia dang sahalak pribadi. Alana halak Kristen najolo “digohi tondi parbadia” do, jala didok Jahowa, “Usehonokku ma deba tondi parbadiakku tu sude jolma.” (Ulaon ni Apostel 2:1-4, 17) Jadi tondi parbadia on huaso na sian Debata do, dang na sada bagian sian Debata sitolusada.

Pakar Katolik na margoar si Karl Rahner dohot si Herbert Vorgrimler mandok songon on, “Dang boi taattusi [taringot Debata sitolusada] molo dang adong parnidaan. Jala molo adong pe parnidaan i, tong do dang boi takkas taattusi sudena i.” Menurut hamu, boi do tahaholongi sasahalak molo dang takkas tatanda jala taattusi taringot ibana? Pasti daong ate. Sian on taboto ma ajaran na mandok molo Debata i sitolusada, mambahen akka halak gabe maol mananda jala makkaholongi Debata.

Si Marco na dipaboa di halaman sebelumna hea do merasa songon i. Ibana mandok, “Hurasa, na martabuni do Debata sian au, alani i do gabe dao Ibana sian au, maol attusan, jala dang boi nijonokan.” Alai sasittongna, dang lomo roha ni Jahowa gabe bingung akka halak. (1 Korint 14:33) Dang hea ditabunihon Debata dirina sian hita. Lomo do rohana asa tatanda Ibana. Jesus mandok, “Hutanda hami do na disomba hami.”​—Johannes 4:22.

Si Marco mandok, “Dung huboto na so Debata sitolusada do Debata i, gabe boi ma au lam jonok tu Ibana.” Molo porsea hita tutu do adong Debata i jala dang maol attusan, gabe mura ma hita makkaholongi Ibana. Bibel mandok, “Manang ise na so marholong ni roha, dang ditanda ibana Debata, ai holong do Debata.”​—1 Johannes 4:8.

“Dung mate halak na godang dosana, masuk ma tondina tu api narokko. Dihukum jala disiksa ma nasida disi, ‘di api na so olo mittop.’” (Katekismus Gereja Katolik) Adong do pemimpin agama na mandok molo api narokko i, i ma inganan na pulik sian Debata.

“Ise na mangulahon dosa, i do na ikkon mate.” (Hesekiel 18:4) “Anggo na mate, dang diboto agia aha.” (Parjamita 9:5) Molo mate do halak na mangulahon dosa, jala dang diboto agia aha, boi do ibana haccitan alani ‘api na so olo mittop’ manang ala pulik sian Debata?

Di Bibel, bahasa Heber dohot Junani na diterjemahon gabe “api narokko”, sebenarna lapatanna kuburan ni jolma do. Boasa? Tikki marsak si Job alani sahitna, martangiang do ibana mandok, “Autsugari ma ditabunihon Ho au di Kuburan [“di api narokko,” Douay-Rheims Version].” (Job 14:13) Molo api narokko i sada inganan lao menghukum halak, manang inganan na dao sian Debata, pasti dang olo si Job tusi.

Molo kejam do Debata, dang olo hita jonok tu Ibana. Si Ros na tinggal di Meksiko mandok, “Sian na gelleng, nungnga diajarhon tu au taringot api narokko. Jadi mabiar ma au. Ninna rohakku dang mungkin burju Debata. Parmuruk do Ibana jala kejam.”

Dung diboto si Ros boha do sasittongna didok Bibel taringot penghukuman ni Debata dohot na masa tu halak na mate, gabe muba ma pandanganna taringot Debata. Ibana mandok, “Gabe tenang ma perasaanku, jala dang adong be na sakkot di rohakku. Gabe pos ma rohakku tu Debata, lomo do rohana asa denggan ngolutta, jala holong do rohana tu hita. Gabe holong ma rohakku tu Ibana. Debata i songon sahalak ama na maniop tangan ni anakna jala na mangalehon na denggan tu gellengna.”​—Jesaya 41:13.

Godang do halak na berupaya mangulahon na denggan holan ala mabiar dipamasuk Debata tu api narokko. Alai sebenarna, dang lomo roha ni Debata tasomba Ibana ala mabiar tu Ibana. Jesus mandok, “Ikkon haholonganmu do Jahowa Debatamuna.” (Markus 12:29, 30) Jala molo sian saonari nungnga pos rohatta adil do Debata i, pasti haduan pe pos do rohatta adil do Ibana tikki manguhumi. Sarupa ma perasaatta songon perasaan ni dongan ni si Job na margoar si Elihu. Pos do rohana mandok, “Dang tarbahen ni Debata na sittong i mangulahon na jahat, jala dang ulahonon ni Pargogo na So Hatudosan i na sala!”​—Job 34:10.

Tikki mangajari Jesus di Jerusalem, dipaboa ibana do taringot Bapakna, i ma Jahowa. Jala dipatorang ibana do akka ajaran na sala na dipaboa akka pamimpin agama di tikki i. (Johannes 8:12-30) Sian hata ni Jesus i, boi ma taboto na sittong manang na daong akka na diajarhon halak saonari taringot Debata. Jesus mandok, “Molo diihutton hamu hatakku, tutu ma hamu akka siseanku. Botoonmuna ma hasittongan jala paluaon ni hasittongan i ma hamu.”​—Johannes 8:31, 32.

Tikki didok Jesus “molo diihutton hamu hatakku”, Jesus lao paboahon songon dia hita mamboto ajaran ni sada agama “hasittongan” manang na daong. Molo adong dibege hamu ajaran taringot Debata, sukkun ma di rohamuna, ‘Sadalan do ajaran i tu hata ni Jesus dohot Bibel?’ Tiru ma akka halak na manangihon apostel Paulus najolo. “Dipareso nasida Surat na Badia i lao mangida sittong manang dang na dibege nasida.”​—Ulaon ni Apostel 17:11.

Si Marco, si Rosa, dohot si Raymonde, na dipaboa di halaman sebelumna nungnga mamareso haporseaon ni nasida. Carana, marsiajar Bibel ma nasida dohot Saksi Jahowa. Taida ma aha komentar ni nasida.

Si Marco: “Dipakke Saksi Jahowa do Bibel lao mangalusi sukkun-sukkunku dohot istrikku. Gabe lam holong ma rohanami tu Jahowa. Jala hami na dua pe gabe lam kompak!”

Si Rosa: “Mulana, hurippu do Bibel i holan sada bukku na marisi akka pandapot ni jolma taringot Debata. Alai lam leleng huboto adong do sude alus ni sukkun-sukkunki di Bibel. Saonari lam jonok jala lam porsea ma au tu Jahowa.”

Si Raymonde: “Martangiang do au asa boi mananda Debata. Dang sadia leleng, marsiajar Bibel ma au dohot suamikku. Ujungna diboto hami ma hasittongan taringot Debata! Las hian do rohanami dung diboto hami akka parange ni Debata.”

Dang holan ajaran na sittong na dipaboa di Bibel. Alai dipaboa do tong disi taringot sifat ni Debata. Jala hata ni Debata i boi mangurupi hita “asa boi taattusi akka na dilehon Debata tu hita di bagasan holong”. (1 Korint 2:12) Buktihon hamu sandiri ma songon dia Bibel boi mangalusi sukkun-sukkunmuna taringot Debata, rencanana, dohot taringot ari na naeng ro. Jaha ma alusna di www.jw.org/bbc di bagian “Na Diajarhon Bibel > Alus ni Bibel.” Molo lomo rohamuna marsiajar Bibel, bahen ma pangidoanmuna di situs i, manang juppangi hamu ma Saksi Jahowa. Molo marsiajar Bibel hamu pasti lam jonok do hamu tu Debata jala lam holong ma rohamuna tu Ibana.