Mula ni Parsaripeon dohot na Tinujuna

1, 2. (a) Songon dia do mula ni parsaripeon? (b) Aha do na ingkon diingot na mardongan saripe taringot parsaripeon? (Ida gombar di mula ni parsiajaran.)

GODANG do halak na mardongan saripe. Alai, songon dia do mula ni parsaripeon jala aha do na tinujuna? Molo taboto alusna, tadapot ma pangantusion dohot pasupasu. Ditompa Jahowa ma si Adam, dung i disuru ma ibana mambahen goar ni binatang. Diida si Adam ma sude binatang i adong donganna, alai ”anggo di si Adam ndang adong jumpang pangurupi bahen donganna”. Dibahen Debata ma si Adam tarpodom, dibuat ma sada rusukna jala dibahen gabe borua. Dilehon Jahowa ma borua i tu si Adam gabe tungganeboruna. (Jaha 1 Musa 2:20-24.) Boi ma tadok, parsaripeon i silehonlehon sian Jahowa.

² Diulahi Jesus do muse na nidok ni Jahowa di porlak Eden, ”Dibahen i tadingkonon ni baoa do amana dohot inana, laho patophon dirina tu dongan saripena, gabe sada daging do nasida na dua.” (Mat. 19:4, 5) Ala sian rusuk ni si Adam borua i, ingkon ingoton ni na mardongan saripe do naung gabe sada nasida. Ndang dihalomohon Jahowa halak naung mardongan saripe marsirang manang marhasohotan tu lobi sian sada halak.

 3. Di mulana, aha do na tinuju ni parsaripeon?

³ Las do roha ni si Adam tu tungganeboruna jala dibahen ma goarna si Hawa. Ibana ma gabe dongan jala pangurupi di si Adam. Martua do parsaripeon ni nasida. (1 Mus. 2:18) Di mulana, na tinuju ni parsaripeon, i ma asa marpinompari laho manggohi tano on. (1 Mus. 1:28) Nang pe holong roha ni ianakhon tu natuatuana, ingkon tadingkononna do nasida molo dung marhasohotan asa digohi sude liat portibi on gabe paradeiso.

 4. Aha do na masa tu parsaripeon ni si Adam?

⁴ Alai, ala mangalo si Adam dohot si Hawa, sursar ma parsaripeonna. Sibolis, ”ulok na robi”, margabus tu si Hawa asa dipangan parbue ni hau ”parbinotoan ni na denggan dohot na roa”. Didok Sibolis, molo dipangan ibana parbue ni hau i, botoonna ma na denggan dohot na roa. Pintor dipangan si Hawa ma parbue ni hau i, ndang jolo disungkun si Adam. On patuduhon, ndang dipasangap ibana tungganedolina. Tingki dijalo jala dipangan si Adam parbue ni hau i, on patuduhon na dialo ibana do Debata.​—Pgk. 12:9; 1 Mus. 2:9, 16, 17; 3:1-6.

 5. Aha do parsiajaran na tadapot sian cara ni si Adam dohot si Hawa maradophon Jahowa?

⁵ Tingki disungkun Jahowa boasa dipangan nasida parbue ni hau i, disalahon si Adam do tungganeboruna, didok ma, ”Boruboru na nilehonmu bahen donganku, i do na mangalehon tu ahu sian hau i, gabe hupangan.” Songon i nang si Hawa, disalahon do ulok i. (1 Mus. 3:12, 13) Ndang martanggung jawab nasida di pangalaosionna, jala diuhum ma nasida. Sipaingot na denggan do on di hita! Asa martua parsaripeon, ingkon taoloi do Jahowa jala martanggung jawab di parniulaonta.

 6. Patorang ma aha do na didok di 1 Musa 3:15?

⁶ Nang pe songon i, dilehon Jahowa do pangkirimon tu ari na naeng ro. Pangkirimon on ma surirang na parjolo na disurat di Bibel. (Jaha 1 Musa 3:15.) Disurirangkon do, pinompar ni ”boruboru” i laho mangaripashon Sibolis. Boruboru na didok dison, i ma angka surusuruan na marsihohot tu Jahowa. Dipillit Jahowa ma sada sian nasida laho ”mangalisathon” Sibolis. Pinompar on ma na mamungka dalan asa tadapot muse hangoluan salelengna. Molo taoloi Debata, tadapot ma hangoluan salelengna di tano on, songon sangkap ni Jahowa na parjolo.​—Joh. 3:16.

 7. (a) Aha do na masa tu parsaripeon tingki mangalo si Adam dohot si Hawa? (b) Aha do na didok Bibel na ingkon ulahonon ni na mardongan saripe?

⁷ Ala mangalo si Adam dohot si Hawa tu Debata, sursar ma parsaripeon ni nasida dohot sude pinomparna. Umpamana, hansit ma taonon ni si Hawa dohot sude borua tingki manubuhon ianakhonna. Sai naeng ingkon rap ma ibana dohot tungganedolina, jala dirajai ma ibana. Saonari, godang do taida tungganedoli na so mangkaholongi dongan saripena. (1 Mus. 3:16) Alai, didok Jahowa do asa dihaholongi tungganedoli dongan saripena, jala tungganeboru ingkon pasangaphon tungganedolina. (Eps. 5:33) Molo diulahon i, marlas ni roha ma nasida.

 8. Aha do na masa di tingki ni si Adam sahat tu aek na sumar taringot parsaripeon?

⁸ Marpinompari do si Adam dohot si Hawa andorang so mate nasida. (1 Mus. 5:4) Si Kain mangoli tu sahalak sian pinompar ni si Adam. Pomparan ni si Kain, i ma si Lamek, mangoli tu dua borua. (1 Mus. 4:17, 19) Di tingki ni si Adam sahat tu tingki ni si Noak, holan si Abel, si Henok, si Noak dohot keluargana do na manomba Jahowa. Di tingki i, ”diririt angka anak ni Debata ma boru ni jolma, ala na uli do nasida”. Dung ”ditopot angka anak ni Debata angka boru ni jolma”, tubu ma ianakhonna, i ma raksasa na jahat na digoari Nepilim. Ndang patut bahenon ni nasida songon i. ”Lam deak [godang] hajahaton ni jolma di tano on jala sai na jat na ma sude tubutubu dohot pingkiran ni rohanasida gonop ari.”​—1 Mus. 6:1-5.

 9. Di tingki ni si Noak, aha do na dibahen Jahowa tu parjahat, jala aha do na taparsiajari sian i?

⁹ Didok Jahowa, paroonNa ma aek na sumar laho mangaripashon sude parjahat di tano on. ”Si Noak, parjamita hatigoran”, mamaritahon taringot on tu sude jolma. (2 Ptr. 2:5) Alai, ndang ditangihon nasida si Noak. Suda do tingki ni nasida mangulahon ulaon siganup ari, songon marhasohotan. Didok Jesus, harorona dos songon haroro ni Aek na Sumar. (Jaha Mateus 24:37-39.) Saonari, godang do halak na so olo manangihon barita na uli. Nang pe songon i, tabaritahon ma barita on andorang so ro dope ari i. Parsiajaran aha do na tadapot sian na masa di tingki Aek na Sumar? Unang ma gabe rumingkot di hita marhasohotan manang marianakhon, laos gabe lupa hita naung jonok ari rimas ni Jahowa.

10. (a) Di pigapiga inganan, aha do na somal diulahon angka jolma? (b) Songon dia do si Abraham dohot si Sarah gabe sitiruon na denggan di hita?

¹⁰ Holan sada do tungganeboru ni si Noak, songon i nang ianakhonna. Alai dung Aek na Sumar, godang do baoa mangoli tu lobi sian sada borua. Di pigapiga inganan, somal do halak mangalangkup nang pe maragama nasida. Tingki pinda si Abraham dohot si Sarah tu Kanaan, godang do halak na mangalangkup disi. Diripashon Jahowa ma kota Sodom dohot Gomorra, ala godang halak disi mangulahon angka na rorang. Alai, si Abraham ndang songon i. Ibana ma tungganedoli na burju jala si Sarah tungganeboru na unduk. Sitiruon na denggan do nasida di hita. (Jaha 1 Petrus 3:3-6.) Dilului si Abraham do borua na manomba Jahowa laho gabe parumaenna. Songon i nang si Isak, dihalomohon ibana do asa mangoli si Jakkob tu borua na manomba Jahowa.

11. Songon dia do Patik ni si Musa mangurupi halak Israel?

¹¹ Dung i, dibahen Jahowa ma parjanjian dohot bangso Israel. Laho mangurupi na mardongan saripe asa denggan manomba Jahowa, dilehon ma Patik ni si Musa. Adong do uhum taringot tu parsaripeon manang taringot tu na mangoli tu lobi sian sada borua. Diorai do nasida marhasohotan tu na so manomba Jahowa. (Jaha 5 Musa 7:3, 4.) Tingki adong parsoalan na borat di parsaripeon, rade do sintua mangurupi. Adong do patik asa unang mangalangkup, mangiburu, manang curiga tu dongan saripena. Alai, diloas do marsirang molo adong ”haroaon” ni sahalak borua. (5 Mus. 24:1) Ndang dipatorang di Bibel aha do ”haroaon” na didok dison. Alai, ndang boi baoa manirangkon tungganeboruna holan alani parsoalan na gelleng.​—3 Mus. 19:18.

12, 13. (a) Songon dia do baoa maradophon dongan saripena di tingki ni si Maleaki? (b) Saonari, aha do pangkorhonna molo sahalak naung tardidi mangalangkup?

¹² Di tingki ni si Maleaki, godang do baoa na manirangkon tungganeboruna holan alani parsoalan na gelleng, asa boi mangoli muse tu borua na umposo manang tu na so manomba Jahowa. Di tingki ni Jesus, godang do halak Jahudi manirangkon tungganeboruna ”hombar tu lomo ni roha” ni nasida. (Mat. 19:3, Bibel siganup ari) Alani i, sogo do roha ni Jahowa mangida nasida.​—Jaha Maleaki 2:13-16.

¹³ Saonari pe, diorai do naposo ni Jahowa mangalangkup. Molo adong na mangalangkup jala marsirang asa boi marhasohotan muse, ingkon dipabali do ibana sian huria asa badia huria i. (1 Kor. 5:11-13) Alai, boi do mulak muse halak na dipabali i, molo marsitutu ibana marhamubaon. (Luk. 3:8; 2 Kor. 2:5-10) Ndang ditontuhon ingkon sadia leleng ibana patuduhon hamubaonna, alai ingkon marsitutu do ibana patuduhon hamubaon jala ro tu parpunguan. Nang pe songon i, ingkon martanggung jawab do ibana haduan taringot tu aha na diulahonna.​—Rom 14:10-12; ida ma The Watchtower, 15 November 1979, halaman 31-32.

14. Aha do na tinuju ni Patik ni si Musa?

¹⁴ Saleleng 1.500 taon, halak Israel mangihuthon Patik ni si Musa. Diurupi do nasida pasaehon parsoalan di parsaripeon, jala diurupi do nasida mananda Messias. (Gal. 3:23, 24) Alai dung mate Jesus, ndang ingkon uhum i be ihuthonon ni naposo ni Jahowa. Dibahen Debata do parjanjian na imbaru. (Heb. 8:6) Jala, ndang sarupa be parjanjian on tu Patik ni si Musa.

15. (a) Aha do uhum na ingkon diihuthon halak Kristen taringot parsaripeon? (b) Aha do na ingkon manat dipingkiri halak Kristen tingki mamillit laho marsirang?

¹⁵ Disungkun halak Parise ma Jesus taringot parsirangan. Didok Jesus, sasintongna ndang dihalomohon Jahowa parsirangan, nang pe Patik ni si Musa paloashon halak Israel marsirang. (Mat. 19:6-8) On ma uhum na ingkon ihuthonon ni halak Kristen. (1 Tim. 3:2, 12) Songon ”sada daging”, na mardongan saripe ndang boi marsirang. Holong ni nasida tu Jahowa dohot tu dongan saripena, mambahen nasida tongtong marsada. Molo ndang ala na mangalangkup, halak na marsirang ndang boi marhasohotan muse. (Mat. 19:9) Olo do ra disalpuhon sasahalak hasalaan ni dongan saripena na mangalangkup. Songon si Hosea, disalpuhon do hasalaan ni tungganeboruna, i ma si Gomer, na mangalangkup. Suang songon i ma Jahowa, disalpuhon do hasalaan ni halak Israel na marhamubaon. (Hos. 3:1-5) Tingki diboto sasahalak na mangalangkup dongan saripena, alai tongtong dijangkon, on patuduhon disalpuhon ibana do hasalaan ni dongan saripena i, jala ndang ingkon marsirang nasida.

16. Aha do na didok Jesus taringot halak na so marhasohotan?

¹⁶ Jesus mandok, boi do halak Kristen marsirang molo mangalangkup dongan saripena. Didok ibana, adong do halak na so olo marhasohotan ala manjumolohon Harajaon ni Debata. ”Manang ise na tarbahen manjalo hata i, dijalo ma!” (Mat. 19:10-12) Godang do halak na so marhasohotan ala lomo roha ni nasida mangalehon gumodang tingki laho manomba Jahowa, jala sipujion do nasida!

17. Aha do na mangurupi sasahalak tingki mamillit laho marhasohotan manang ndang?

¹⁷ Aha do na mangurupi sasahalak tingki mamillit laho marhasohotan manang ndang? Denggan do molo boi ndang marhasohotan, songon na nidok ni si Paulus. Alai didok si Paulus, ”Laho pasidingkon parmainanon i, denggan ma ganup baoa mardongan saripe jala ganup boruboru marhamulian.” Didok muse, ”Molo so harajaan nasida dirina, mardongan saripe ma; ai dengganan do mardongan saripe sian na garang [marsigorgor napsuna].” Alani i, adong do halak na mamillit laho marhasohotan asa unang marsigorgor napsuna laho mangulahon parmainanon. Ingkon manat do angka dolidoli manang anak boru mamingkirhon molo naeng marhasohotan nasida. Didok si Paulus, ”Alai molo na hurang tama di rohana, pasombuonna songon i boruna na marbaju, anggo naung tangastangasan, ingkon tulus nama marhamulian, dipasaut ma lomo ni rohana, ndang mardosa ibana disi: Marbagas ma nasida.” (1 Kor. 7:2, 9, 36; 1 Tim. 4:1-3) Unang ma marhasohotan holan alani hisaphisap ni daging di tingki haposoon. Alana, molo ndang matoras dope ibana, ndang boi dope martanggung jawab di parsaripeonna.

18, 19. (a) Aha do na ingkon ulahonon ni halak na laho marhasohotan? (b) Aha do na laho taparsiajari di artikel na mangihut?

¹⁸ Halak Kristen na laho marhasohotan, ingkon tardidi jala mangkaholongi Jahowa sian nasa rohana. Nasida pe ingkon tongtong masihaholongan jala marjanji asa tongtong marsihohot saleleng ngolu ni nasida. Pasupasuon ni Jahowa do nasida molo diihuthon nasida uhum ni Jahowa taringot marhasohotan holan tu halak na manomba Jahowa. (1 Kor. 7:39) Martua ma parsaripeon molo tongtong diulahon nasida prinsip ni Bibel.

¹⁹ Saonari, hita mangolu di ”tingki parpudi”, jala godang do parange ni jolma na so denggan na mambahen ndang martua parsaripeonna. (2 Tim. 3:1-5) Di artikel na mangihut, taparsiajari ma prinsip ni Bibel na mangurupi halak Kristen tongtong martua di parsaripeon, nang pe mangolu di ari hasusaan. On mangurupi hita tongtong mardalan di dalan tu hangoluan salelenglelengna.​—Mat. 7:13, 14.