Sukkun-Sukkun sian na Manjaha
Saleleng di padang belantara, holan manna dohot burung puyuh do siallangon ni halak Israel?
Saleleng 40 taon ma halak Israel mangallang manna. (2 Mus. 16:35) Hea do dua hali diparade Jahowa burung puyuh lao siallangon ni nasida. (2 Mus. 16:12, 13; 4 Mus. 11:31) Alai dang na gabe holan i siallangon ni halak Israel.
Contohna, hea do diboan Jahowa halak Israel tu “inganan lao maradi”. Disi boi ma dapot ni nasida sipanganon dohot siinumon. (4 Mus. 10:33) Sada sian inganan i, i ma mata mual Elim. Disi ‘adong 12 mata mual dohot 70 hau palem’ manang hau kurma. (2 Mus. 15:27) Bukku Plants of the Bible mandok, “Di daerah sisongon i do godangan tubu hau palem manang hau kurma. Jala sian hau palem on boi ma dapot ni nasida sipanganon dohot miak. Boi do muse hau on gabe inganan marlinggom ni godang halak.”
Ra hea do halak Israel maradi di mata mual na balga na goarna Feiran. Bagian sian Sunge Feiran do mata mual on.a Menurut bukku Discovering the World of the Bible, “ganjang ni sunge on 130 km. On ma sada sunge na paling ganjang, na paling bagak, jala terkenal di Sinai”. Didok muse di bukku i molo “sunge on 45 km ma daona sian mualna. Jala di sunge Feiran i godang tubu hau palem. Ganjang ni sunge on 4,8 km, jala 610 m ma sunge on di atas ni permukaan laut. Alani bagak ni mata mual on gabe hira Taman Eden ni Sinai ma sunge on. Saleleng martaon-taon sai ro do akka halak lao mangida marribu hau palem na tubu disi”.
Akka hau kurma di mata mual Feiran
Tikki ditinggalhon halak Israel tano Mesir, diboan halak Israel do adonan ni roti, baskom ni adonan i, akka biji-bijian, dohot miak. Tottu dang cukkup i lao siallangon ni nasida saleleng martaon-taon. Diboan nasida do tong “godang hambing, biru-biru, dohot lombu”. (2 Mus. 12:34-39) Alai ala harsang do padang belantara i, gabe mate ma piga-piga binatang ni nasida. Nang pe songon i adong dope na sisa, na gabe sipanganon ni nasida. Na deba nai dipelehon tu Jahowa, jala adong do na dipelehon tu akka debata na so sittong.b (Ul. 7:39-43) Jadi saleleng na di padang belantara i nasida, adong dope binatang peliharaan ni nasida. Buktina tikki dang dioloi nasida Debata Jahowa, didok Jahowa do tu nasida, “Gabe parmahan ma akka ianakkonmuna di gurun on saleleng 40 taon.” (4 Mus. 14:33) Jadi sian binatang peliharaan ni nasida i, gabe boi ma nasida minum susu jala mangallang jagal. Alai dang cukkup i lao sipanganon ni tolu juta halak saleleng 40 taon.c
Sian dia akka binatang i mandapot sipanganon dohot siinumon?d Najolo di padang belantara olo do ra jotjot ro udan na mambahen tubu akka duhut-duhut. Bukku Pemahaman Alkitab Jilid 1 mandok “unggodang do aek di Arab 3.500 taon naung salpu sian di tikkitta saonari. Tarbukti ma i godang do saonari akka sunge naung koring disi. Jadi on patuduhon na jotjot do disi ro udan”. Alai nang pe songon i, toktong do harsang padang belantara i jala mabiar do halak tinggal disi. (5 Mus. 8:14-16) Jadi molo dang diparade Jahowa hian aek tu halak Israel, boi do mate halak Israel dohot akka pinahan ni nasida.—2 Mus. 15:22-25; 17:1-6; 4 Mus. 20:2, 11.
Didok si Musa tu halak Israel, dilehon Jahowa do tu nasida manna ‘asa diattusi nasida na so holan sian roti jolma boi mangolu, alai sian ganup hata na kaluar sian pamangan ni Jahowa do’.—5 Mus. 8:3.
b Adong dua hali dipaboa di Bibel halak Israel mamelehon binatang tu Jahowa tikki di padang belantara. Na parjolo tikki mamillit malim; na paduahon tikki Paska. Di taon 1512 SM do masa dua situasi i, i ma taon paduahon dung kaluar bangso Israel sian Mesir.—3 Mus. 8:14–9:24; 4 Mus. 9:1-5.
c Dung naeng 40 taon halak Israel di padang belantara, adong do diboan nasida marratus ribu akka binatang sian bangso na ditaluhon nasida. (4 Mus. 31:32-34) Nang pe songon i, toktong do nasida mangallang manna sappe masuk nasida tu huta Kanaan.—Jos. 5:10-12.
d Dang diallang binatang manna. Alana didok, ganup halak papunguhon manna holan nasa na porlu di ibana.—2 Mus. 16:15, 16.