Mangasahon Ise do Hita?

1, 2. Aha do lapatan ni mangasahon Jahowa?

SAONARI hita mangolu “di ari parpudi” na mansai susa. (2 Tim. 3:1) Jala, ala ndang diripashon Jahowa dope angka parjahat, lam sursar do situasi di portibi on. Alani i, tarimangi ma, ‘Mangasahon ise do ahu?’ Tontu ‘Jahowa’ do na taasahon, jala ingkon songon i do hita.

² Jadi aha do lapatan ni mangasahon Jahowa? Jala aha do na ingkon taulahon asa tongtong mangasahon Ibana? Dipaboa sahalak panurat ni Bibel do ringkot ni mangasahon Jahowa tingki mangadopi parsoalan. (Jaha Psalmen 123:1-4.) Didok ibana, dipatudos do hita songon sahalak naposo na mangasahon tuanna. Alana, sahalak naposo ingkon mangasahon tuanna do ibana, asa boi dapotan sipanganon dohot parlinggoman. Alai, ingkon botoonna do laho pasonangkon roha ni tuanna, jala ingkon diulahon do i. Suang songon i ma hita. Ingkon taparsiajari do Hata ni Debata ganup ari, asa taboto laho pasonangkon roha ni Jahowa jala ingkon taulahon ma i. Jadi pos ma rohanta urupan ni Jahowa do hita tingki mangadopi hasusaan.​—Eps. 5:17.

 3. Aha do na mambahen hita gabe ndang mangasahon Jahowa?

³ Taboto do ringkot mangasahon Jahowa. Alai olo do sipata ndang taulahon i. On ma na masa tu si Marta, ale-ale ni Jesus. Didok di Bibel, “Ndang diparrohahon ibana [Jesus] alani godang ni ulaonna.” (Luk. 10:40-42) Songon si Marta boi ndang mamparrohahon, hape rap dohot Jesus do ibana tingki i. Tarlumobi ma hita. Jadi saonari taparsiajari ma songon dia carana asa boi hita tongtong mangasahon Jahowa.

 4. Boasa longang rohanta ala ndang masuk si Musa tu Tano na Dijanjihon?

⁴ Si Musa, i ma sahalak baoa na tongtong mangasahon Jahowa. Didok di Bibel, “Tongtong do ibana togu, ai songon na diida ibana do Debata na so boi idaon i.” (Jaha Heber 11:24-27.) Didok muse, “Ndang hea be adong di Israel panurirang na songon si Musa, na manghatai Jahowa tu ibana paadopadop bohi.” (5 Mus. 34:10, Bibel siganup ari) Alai, nang pe si Musa marale-ale tu Jahowa, ndang boi dohot ibana tu Tano na Dijanjihon. (4 Mus. 20:12) Boasa gabe songon i?

5-7. Aha do na masa dung kaluar halak Israel sian Misir, jala aha do na diulahon si Musa?

⁵ Hira-hira dua bulan dung kaluar halak Israel sian Misir, adong ma parsoalan andorang so sahat nasida tu Dolok Sinai. Marungut-ungut ma bangso i ala so adong aek. Gabe muruk ma si Musa ala marungut-ungut nasida tu ibana. Didok di Bibel, “mangangguhi ma si Musa tu Jahowa, ninna ma: Aha ma bahenonku tu bangso on? Otik nari dangguronnasida ma ahu dohot batu”. (2 Mus. 17:4) Disuru Jahowa ma si Musa mamungkul batu di Horeb mamangke tungkotna. Didok muse, “dibahen si Musa ma songon i di adopan ni angka sintua ni Israel”. Dung i, kaluar ma aek sian batu i jala boi ma nasida minum.​—2 Mus. 17:5, 6.

⁶ Didok di Bibel, digoari si Musa ma inganan i Massa, na lapatanna “Pangunjunan”, dohot Meriba, na lapatanna “Parbadaan”. Boasa songon i? “Ala ni bada ni halak Israel, jala ala ni niunjunannasida Jahowa, na nidokna i: Di tongatonganta ulaning do Jahowa manang ndang?”​—2 Mus. 17:7.

⁷ Jadi songon dia ma pangkilalaan ni Jahowa mangida i? Diboto Jahowa, ndang holan tu si Musa bangso i mangalo. Alai dohot do tu Ibana. (Jaha Psalmen 95:8, 9.) Tangkas ma, sala do halak Israel disi. Alai, si Musa mangulahon na sintong. Alana, mangasahon Jahowa do ibana jala mangihuthon tudu-tuduNa.

 8. Aha do na masa tingki naeng sahat halak Israel tu Tano na Dijanjihon i?

⁸ Hira-hira 40 taon dungkon i, masa ma situasi na sarupa. Tingki i, naeng sahat nama halak Israel tu Tano na Dijanjihon i. Sahat ma nasida di sada inganan jonok ni Kades, jala digoari do inganan i Meriba.a Alana marungut-ungut do muse halak Israel disi ala ndang adong aek. (4 Mus. 20:1-5) Alai tingki i, adong do na sala na dibahen si Musa.

 9. Aha do na disuru Jahowa asa diulahon si Musa? Alai, aha do na diulahon si Musa? (Ida gombar di mula ni parsiajaran.)

⁹ Aha do na diulahon si Musa tingki marungut-ungut halak Israel? Dipangido ibana do tudu-tudu sian Jahowa. Disuru Jahowa ma si Musa mambuat tungkotna, jala manogihon halak Israel tu jonok ni batu i, jala ingkon mangkatai ma ibana tu batu i. Alai ndang adong didok Jahowa asa dipungkul batu i. (4 Mus. 20:6-8) Alai alani murukna, didok si Musa ma tu halak Israel, “Bege hamu ma ale angka jolma na tangkang! Tung ingkon sian batu on ma paruaronnami aek di hamu?” Dung i, dipungkul si Musa ma batu i, ndang holan sahali, alai dua hali.​—4 Mus. 20:10, 11, Bibel siganup ari.

10. Songon dia do pangkilalaan ni Jahowa mangida si Musa?

¹⁰ Gabe tarrimas ma Jahowa tu si Musa. (5 Mus. 1:37; 3:26) Boasa? Ra, ala ndang dioloi si Musa tudu-tudu na baru dilehon Jahowa tu ibana.

11. Tingki dipungkul si Musa batu i aha do hira-hira na dipingkirhon halak Israel?

¹¹ Asing do batu na di Meriba na parjolo. Jadi, manang songon dia pe cara ni halak mamungkul batu i, ndang na boi kaluar aek sian i. Alai, imbar do batu di Meriba na paduahon. Alana, batu kapur do na godang disi. Jala adong do aek di bagasan ni batu i. Jadi, boi do angka halak mambuat aek sian i molo dibahen lubang di batu i. Alani i, tingki dipungkul si Musa batu di Meriba na paduahon, ra dirimpu halak Israel ma ndang Jahowa na mambahen aek i kaluar.b

12. Aha do muse na mambahen Jahowa tarrimas tu si Musa dohot tu si Aron?

¹² Aha do muse na mambahen Jahowa tarrimas tu si Musa dohot si Aron? Didok si Musa tu bangso i, “Tung ingkon sian batu on ma paruaronnami aek di hamu?” Tingki didok si Musa “nami” manang “hami”, ra hatana i patuduhon taringot dirina dohot si Aron. Jadi hata ni si Musa i patuduhon, ndang dipasangap ibana Jahowa na mambahen tanda halongangan i. Didok di Psalmen, “Dibahen bangsoNa do muruk Jahowa di matamual Meriba, gabe hona ma hasusaan tu si Musa ala ni pambahenannasida. Mansai paet do dibahen nasida tu si Musa, gabe didok hata na so sidohononna.”c (Ps. 106:32, 33, Bibel siganup ari, 4 Mus. 27:14) Ala ndang dipasangap si Musa Jahowa, didok Jahowa ma tu si Musa dohot si Aron, “Naung dialo hamu nadua parentangKu.” (4 Mus. 20:24, Bibel siganup ari) Jadi, dosa na mansai balga do i!

13. Boasa tadok sintong cara ni Jahowa manguhum si Musa?

¹³ Ala si Musa dohot si Aron do na manguluhon bangso Israel, martanggung jawab do nasida pasangaphon Jahowa. (Luk. 12:48) Najolo, hea do bangso Israel mangalo tu Jahowa. Gabe ndang diloas Jahowa nasida masuk tu Tano na Dijanjihon. (4 Mus. 14:26-30, 34) Sintong do cara ni Jahowa manguhum si Musa, ala mangalo do ibana. Dos songon bangso Israel tingki i, ndang diloas Jahowa ibana masuk tu Tano na Dijanjihon.

14, 15. Boasa mangalo si Musa tu Jahowa?

¹⁴ Boasa mangalo si Musa tu Jahowa? Taingot ma na didok di Psalmen 106:32, 33, Bibel siganup ari, “Dibahen bangsoNa do muruk Jahowa di matamual Meriba, gabe hona ma hasusaan tu si Musa ala ni pambahenannasida. Mansai paet do dibahen nasida tu si Musa, gabe didok hata na so sidohononna.” Sasintongna, nang pe halak Israel na mangalo tu Jahowa, alai si Musa do na gabe tarrimas. Ala ndang diorom ibana dirina, gabe didok ma hata na so sidohononna.

¹⁵ Hape, tingki parjolo sahali bangso i marungut-ungut ala ndang adong aek, denggan do na diulahon si Musa. Alai, gabe ndang mangasahon Jahowa be si Musa ala sai marungut-ungut bangso i. (2 Mus. 7:6) Ra, gabe loja jala marsak do si Musa mangida bangso i. Jadi, holan pangkilalaanna i do na dipingkirhon si Musa. Gabe lupa ma ibana pasangaphon Jahowa.

16. Boasa ingkon tarimangi taringot si Musa?

¹⁶ Jadi aha do na taparsiajari sian hasalaan ni si Musa? Gari si Musa sahalak panurirang, boi gabe ndang mangasahon Jahowa. Tarlumobi ma hita. Tingki i, naeng sahat ma si Musa tu Tano na Dijanjihon. Hita pe naeng sahat nama tu tano na imbaru. (2 Ptr. 3:13) Alai, asa boi masuk tu tano na imbaru, ingkon mangasahon Jahowa do hita jala tongtong mangoloi hataNa.​—1 Joh. 2:17.

17. Tingki jut rohanta, boasa ingkon taorom dirinta?

¹⁷ Tingki jut rohanta, ingkon taorom do dirinta. Sipata, adong do parsoalanta na so marnasae. Alai didok Bibel, “Unang ma hita marnaloja mangulahon angka na denggan. Ai molo ndang marnaloja hita mangulahon i, tapuonta do i haduan di tingkina.” (Gal. 6:9; 2 Tes. 3:13) Jadi molo adong halak na jotjot mambahen jut rohanta, taorom dirinta asa unang muruk? Tapingkirhon hian do na laho tadokkon? (Poda 10:19; 17:27; Mat. 5:22) Molo adong na mambahen jut rohanta, “pasombu ma Debata patuduhon rimasna”. (Jaha Rom 12:17-21.) Aha do lapatan ni hata i? Unang ma pintor muruk. Tapaima ma Jahowa mangurupi hita pasaehon parsoalanta di tingkina. Alana molo muruk hita jala ndang mangasahon Jahowa, na so pasangaphon Jahowa do hita disi.

18. Aha do na ingkon taingot tingki mangihuthon tudu-tudu?

¹⁸ Taihuthon ma tudu-tudu na baru. Unang ma caranta naung leleng na sai taihuthon, holan ala nunga somal i taulahon. Jadi, olo do hita mangihuthon tudu-tudu na baru sian organisasi? (Heb. 13:17) Alai ingkon manat do hita asa ‘unang taulahon lobi sian na tarsurat i’. (1 Kor. 4:6) Jadi, molo tongtong taihuthon tudu-tudu na dilehon Jahowa, na mangasahon Jahowa do hita disi.

19. Boha do carana asa unang sega parale-aleonta tu Jahowa?

¹⁹ Unang ma gabe sega parale-aleonta tu Jahowa alani hasalaan ni halak. Molo tongtong do hita mangasahon Jahowa, ndang taloas hasalaan ni halak mambahen muruk hita manang gabe sega parale-aleonta tu Ibana. Ringkot do on taboto, tarlumobi molo adong tanggung jawabta di organisasi, dos songon si Musa. Jadi ingkon marsitutu do hita mangasahon jala mangoloi Jahowa asa boi dipalua. (Plp. 2:12) Alai molo lam godang tanggung jawabta, lam godang do na dipangido Jahowa sian hita. (Luk. 12:48) Jadi, molo holong do rohanta tu Jahowa, ndang adong na boi mambahen hita dao sian holongNa.​—Ps. 119:165; Rom 8:37-39.

20. Aha do na ingkon taulahon?

²⁰ Mansai ringkot do mangasahon Jahowa na “marhabangsa di banua ginjang”. Boasa? Alana gok do hasusaan na taadopi. Jadi, ingkon mangasahon Jahowa do hita asa taboto na dihalomohon rohaNa laho taulahon. Unang ma gabe sega parale-aleonta tu Jahowa holan alani hasalaan ni halak. Taingot ma na masa tu si Musa. Unang ma pintor muruk molo adong mambahen na sala. Alai, tongtong ma “mangaranapi matanta tu Jahowa, Debatanta, paima asi rohana di hita”.​—Ps. 123:1, 2.