Pos ma Rohamuna “Sittong do Sude” Hata ni Debata

 1. Boasa godang halak saonari dang porsea be tu Bibel?

GODANG halak saonari dang mamboto ise do halak na boi dihaporseai nasida. Dang pos be roha ni nasida na botul-botul parduli akka pamimpin politik, akka ilmuwan, dohot parbisnis tu nasida. Asing ni i, kecewa do nasida tu akka pamimpin gareja na mangakku mangihutton Bibel. Alani i, dang heran be hita gabe godang halak saonari dang porsea be tu Bibel.

 2. Sesuai tu Psalmen 119:160, boasa boi pos rohatta tu na tajaha di Bibel?

² Sude do naposo ni Jahowa porsea molo Jahowa “Debata na makkatahon na sittong” jala lomo do rohana mangalehon na terbaik tu hita. (Ps. 31:5; Jes. 48:17) Boi do hita porsea tu na tajaha di Bibel ala “sittong do sude hata ni [Debata]”. (Jaha Psalmen 119:160.) Setuju do hita tu hata ni sahalak pakar ni Bibel na manurat, “Dang adong Hata ni Debata na sala, jala pasti saut do i. Ala porsea do naposona tu Debata, gabe porsea ma nasida tu hatana.”

 3. Aha do na lao tabahas di artikel on?

³ Songon dia ma caratta mangurupi na asing asa porsea tu Hata ni Debata? Saonari, tabahas ma tolu alasan boasa boi tahaporseai Bibel. Na parjolo, toktong do akurat isi ni Bibel. Na paduahon, digenapi do akka surirang ni Bibel. Na patoluhon, boi do Bibel mambahen denggan ngolutta.

 4. Aha do na mambahen piga-piga halak merasa dang akurat be Bibel i?

⁴ Dipakke Jahowa do 40 bawa na setia manurat akka bukku na adong di Bibel. Alai gulungan aslina dang adong be saonari, holan akka salinanna nama na adong. Alani i, adong do piga-piga halak na merasa dang akurat be Bibel saonari songon teks aslina. Alai boasa boi pos rohatta dang muba isi ni Bibel?

 5. Songon dia do Akka Bukku Heber disalin? (Ida gambar sampul.)

⁵ Asa toktong adong Hata ni Debata, disuru Jahowa do akka naposona manalin i muse. Misalna diparettahon Jahowa do akka raja ni Israel asa mambahen salinan ni Patik, jala dilantik Ibana do halak Lepi lao mangajarhon Patik tu bangsona. (5 Mus. 17:18; 31:24-26; Neh. 8:7) Dung mulak halak Jahudi sian Babel, adong do sakelompok panalin na mulai mambahen godang salinan ni Akka Bukku Heber. (Esr. 7:6) Manat do nasida makkarejoi on, bahkan dang holan jumlah ni hata na dihitung akka panalin i, dohot do tong jumlah ni hurufna lao mamastihon akurat do salinan ni nasida i. Ala dang sempurna nasida, adong do piga-piga kesalahan di salinan ni nasida. Alai ala godang do salinan na dibahen, gabe tarboto ma dia na sala. Boha ma cara ni nasida mamastihon i?

 6. Songon dia do akka pakar mamboto dia na sala sian akka salinan ni Bibel?

⁶ Dibahen akka pakar saonari ma cara lao mamboto kesalahan na dibahen akka panalin ni Bibel. Bayakkon ma jo contoh on, adong ma 100 halak na disuru manalin muse salembar teks. Sada sian akka halak i mambahen kesalahan kecil di salinanna. Asa boi taboto dia na sala, ikkon tabandingkon do salinanna i tu salinan na asing. Dos songon i ma, boi do diboto akka pakar dia salinan na sala ala dibandingkon nasida sada gulungan tu gulungan ni Bibel na asing.

 7. Aha do buktina na akurat dope isi ni Bibel nang pe naung jotjot disalin?

⁷ Manat do akka panalin ni Bibel manuratton muse isi ni Bibel asa toktong akurat. Parrohahon ma buktina. Gulungan ni Akka Bukku Heber na uttua nungnga sae dibahen sekitar taon 1008 manang 1009 M. Digoari ma gulungan i Kodeks Leningrad. Baru-baru on dapot ma muse godang gulungan ni Bibel na uttua 1.000 taon sian Kodeks Leningrad. Alani i, adong do piga-piga halak na marpikkir pasti nungnga beda hian isi ni Kodeks Leningrad i tu akka gulungan na baru dapot i, ala nungnga marulak-ulak i disalin saleleng 1.000 taon. Alai dang songon i. Dung dibandingkon akka pakar gulungan i, otik do hape perbedaanna. Nang pe adong na so sarupa akka hatana, alai sarupa dope maksudna.

 8. Aha do beda ni salinan ni Akka Bukku Junani Kristen tu salinan ni akka bukku na asing na disurat di tikki na sarupa?

⁸ Halak Kristen di abad na parjolo pe, tong do maniru akka panalin ni Bukku Heber i. Manat do nasida mambahen salinan ni 27 Bukku Junani jala dipakke nasida do i tikki marpungu dohot tikki marbarita. Adong ma sahalak pakar na mambandingkon gulungan ni Akka Bukku Junani i tu akka bukku na asing na disurat di tikki na sarupa. Didok ibana, “Unggodang jala unlengkap do gulungan ni Akka Bukku Junani i sian akka bukku na asing di tikki i.” Sada bukku mandok, “Pos do rohatta sarupa dope makna ni [Akka Bukku Junani] na tajaha di terjemahan ni Bibel saonari tu na disurat akka panurat Bukku Junani najolo.”​—Anatomy of the New Testament.

 9. Aha do na boi taparsiajari sian Jesaya 40:8?

⁹ Saleleng marratus taon, manat jala godang do upaya na dibahen akka panalin lao manuratton isi ni Bibel. Jadi pos do rohatta tikki tajaha jala taparsiajari Bibel, akurat dope i.b Takkas ma dipastihon Jahowa do asa toktong adong jala akurat Hatana i. (Jaha Jesaya 40:8.) Nang pe dang muba isi ni Bibel, adong do halak na mandok dang Hata ni Debata isi ni Bibel i. Jadi saonari tabahas ma piga-piga bukti na patuduhon Hata ni Debata do Bibel i.

Left: C. Sappa/​DeAgostini/​Getty Images; right: Image © Homo Cosmicos/​Shutterstock

10. Paboa ma sada contoh surirang naung digenapi na patuduhon tutu do na didokkon 2 Petrus 1:21. (Ida gambar.)

¹⁰ Godang do surirang ni Bibel naung digenapi, jala piga-piga sian akka surirang i digenapi dukkon disurat marratus taon. Sejarah patuduhon tutu do digenapi akka surirang i. Dang heran be hita disi ala takkas do taboto sian Jahowa do akka surirang i. (Jaha 2 Petrus 1:21.) Taparrohahon ma sada surirang taringot kehancuran ni kota Babel najolo. Di abad na paualuhon SM, nungnga dipaboa Panurirang Jesaya hian na lao dihancurhon nama kota Babel. Dipaboa do goar ni halak na manaluhon kota i, i ma si Sirus, jala dipaboa do songon dia ibana manaluhon kota i. (Jes. 44:27–45:2) Dipaboa si Jesaya do muse, na lao dihancurhon do kota Babel jala dang diingani be i sahat tu saleleng ni lelengna. (Jes. 13:19, 20) Tutu do i masa. Di taon 539 SM, ditaluhon halak Media dohot Persia do kota Babel, jala saonari holan akka tembok ni kota Babel na hancur nama disi.​—Ida ma video Nungnga Dipaboa Bibel Hian Lao Hancur Kota Babel di bukku Mangolu Saleleng ni Lelengna, versi elektronik pelajaran 03 nomor 5.

11. Songon dia do surirang Daniel 2:41-43 digenapi saonari?

¹¹ Dang holan najolo akka surirang ni Bibel digenapi, alai sahat tu sadari on pe adong do surirang ni Bibel na tong lagi digenapi. Contohna surirang ni si Daniel taringot kuasa dunia Anglo-Amerika. (Jaha Daniel 2:41-43.) Didok si Daniel “gogo do deba” harajaon i songon bosi alai “gale do na deba nai” songon tano liat. Tutu do songon i na masa taida saonari, songon bosi do gogo ni Inggris dohot Amerika. Buktina tikki masa dua Perang Dunia monang do nasida, jala torus do nasida memperkuat militer ni nasida. Alai nang pe songon i, gale do nasida alani akka pengaruh ni rakyatna na jotjot protes tu pamaretta dohot tu akka perusahaan na balga. Sahalak pengamat politik baru-baru on mandok, sian sude negara demokrasi di portibi on, Amerika Serikat ma na paling terbagi secara politik. Songon dia molo Inggris? Piga-piga taon na parpudi on, terbagi do rakyatna alani pandapot na berbeda taringot songon dia hubungan ni negara ni nasida tu negara na bergabung di Uni Eropa. Akibatna, gabe maol ma kuasa dunia Anglo-Amerika mencapai tujuan ni nasida.

12. Aha do pengaruh ni surirang ni Bibel tu hita?

¹² Akka surirang ni Bibel naung digenapi paposson rohatta na lao saut do janji ni Debata di ari na naeng ro. Sarupa do pakkilalaatta songon panurat Psalmen na mandok, “Hupaima-ima do haluaon na sian Ho, ai hatam do na hupaima-ima.” (Ps. 119:81) Akka janji ni Jahowa di Bibel mambahen pos rohatta ‘na lao denggan do ngolutta di ari na naeng ro’. (Jer. 29:11) Masa depanta dang bergantung tu upaya ni jolma, alai tu janji ni Jahowa do. Alani i ringgas ma hita mamparsiajari akka surirang ni Bibel asa lam pos rohatta tu Hata ni Debata.

13. Sesuai tu Psalmen 119:66, 138, aha do bukti na asing na mambahen pos rohatta tu Bibel?

¹³ Bukti na asing na mambahen pos rohatta tu Bibel, i ma ala nasehat ni Bibel boi mambahen lam denggan parngoluotta. (Jaha Psalmen 119:66, 138.) Misalna, sapasang suami istri na naeng marsirang hian ujungna boi marlas ni roha jala marsada muse. Jala marlas ni roha do gelleng ni nasida ala dipagodang-godang natua-tua Kristen na parduli jala parholong.​—Eps. 5:22-29.

14. Paboa ma sada pengalaman na patuduhon boi do Bibel mambahen lam denggan ngolutta.

¹⁴ Akka penjahat na berbahaya pe, boi do muba ngoluna ala menerappon nasehat ni Bibel. Taparrohahon ma songon dia nasehat ni Bibel boi mangurupi sahalak tahanan na margoar si Jack.c Kejam do ibana, jala ditanda do ibana penjahat na paling berbahaya sian sude tahanan na dijatuhi hukuman mate. Sada tikki dohot ma ibana manangihon parsiajaran Bibel na dibahen Saksi Jahowa di penjara. Hona do tu rohana mangida haburjuon na dipatudu akka dongan na memandu studi. Gabe dohot ma ibana marsiajar Bibel. Dung diterappon si Jack na diparsiajarina i di ngoluna, gabe lam denggan ma pangalahona. Jala gabe halak na burju ma ibana. Dung i, memenuhi syarat ma ibana gabe penyiar na so tardidi jala ujungna tardidi. Semangat do ibana mambaritahon taringot Harajaon ni Debata tu donganna na di penjara. Jala diurupi ibana ma opat donganna mananda hasittongan. Tikki naeng dieksekusi nama si Jack, dang songon najolo i be ibana. Sada sian pengacarana mandok, “Dang songon si Jack na hutanda 20 taon naung salpu i be ibana. Nga muba be ibana ala marsiajar dohot Saksi Jahowa.” Nang pe naung dihukum mate si Jack, alai sian pengalamanna i, pos do rohatta boi do Bibel mambahen lam denggan ngolu ni sasahalak.​—Jes. 11:6-9.

15. Ala diihutton Saksi Jahowa do prinsip na adong di Bibel, aha do hasilna? (Ida gambar.)

¹⁵ Ala diulahon akka naposo ni Jahowa do nasehat ni Bibel di ngolu nasida, gabe marsada ma nasida. (Joh. 13:35; 1 Kor. 1:10) Luar biasa do on. Alana godang halak saonari dang marsada alani politik, suku, dohot status sosial. Taida ma pengalaman ni sahalak bawa na poso na margoar si Jonni na mangida songon dia naposo ni Jahowa toktong marsada. Magodang di sada negara di Afrika do ibana. Tikki masa porang sipil di negara i, margabung ma ibana gabe tentara. Alai dukkon i melarikan diri ma ibana tu negara tetangga. Disi pajuppang ma ibana dohot Saksi Jahowa. Didok si Jonni, “Marsiajar do au molo pengikut ni agama na sittong i, dang parsidohot tu politik. Gariada marsada do nasida jala marsihaholongan.” Didok ibana muse, “Saleleng on tu negara do hubaktihon ngolukku, alai dung marsiajar Bibel au, huputusson ma mangalean ngolukku tu Jahowa.” Nungnga muba be si Jonni, dang songon najolo i be. Dang olo be ibana marbadai tu akka halak na berbeda latar belakangna sian ibana. Gariada dibagihon ibana do hasittongan ni Bibel tu manang ise pe na dijuppangi ibana. Takkas ma, boi do Bibel manguba sasahalak dang soal latar belakangna. On ma sada bukti na boi do Bibel i tahaporseai.

16. Boasa ikkon tapatogu haporseaotta tu Hata ni Debata?

¹⁶ Ala lam tu sursarna annon situasi ni portibi on, bisa jadi diuji do haporseaotta tu Hata ni Debata. Adong do ra akka halak na berupaya mambahen ragu hita tu isi ni Bibel, manang tu naposo haposan na dipillit Jahowa lao mangarahon naposona saonari. Alai molo porsea hita sittong do Hata ni Jahowa i, toktong do togu haporseaotta jala dang ragu hita disi. Marsitutu do hita ‘mangihutton akka aturan ni [Jahowa] ganup tikki sahat tu ujungna’. (Ps. 119:112) “Dang maila” hita paboahon hasittongan tu akka halak, jala taurupi do nasida mangihutton nasehat ni Bibel di ngolu ni nasida. (Ps. 119:46) Hasilna, boi ma hita martahan, “sabar, jala marlas ni roha” mangadopi hasusaan aha pe di ngolutta, termasuk penganiayaan.​—Kol. 1:11; Ps. 119:143, 157.

17. Aha do pengaruh ni ayat tahunan taon 2023 on tu hita?

¹⁷ Pasti mandok mauliate do hita ala boi taboto hasittongan sian Jahowa. Hasittongan i mangurupi hita asa toktong tenang jala mangajari hita songon dia carana mangolu di portibi na sursar on. Asing ni i, pos do rohatta lam tu dengganna do annon ngolutta tikki mamaretta Harajaon ni Debata. Anggiat ma ayat tahunan 2023 on mambahen lam pos rohatta sittong do sude Hata ni Jahowa.​—Ps. 119:160.