Di Sude Inganan do Adong Debata?
Na didok Bibel
Sude do boi diida Debata jala sude do boi diulahon Ibana aha pe lomo ni rohana jala manang didia pe. (Poda 15:3; Heber 4:13) Dang adong didok di Bibel molo Debata adong manang didia pe ganup tikki. Alai didok di Bibel, adong do inganan ni Debata.
Wujud ni Debata: Tondi do Debata. (Johannes 4:24) Dang adong jolma na boi mangida Debata. (Johannes 1:18) Di Bibel, godang do akka parnidaan na paboahon taringot Debata. Di parnidaan i, dang hea didok molo Debata tinggal di sude inganan. Alai didok, di sada inganan do Debata tinggal.—Jesaya 6:1, 2; Pangungkapon 4:2, 3, 8.
Didia do Debata tinggal? Didok di Bibel, di surgo do inganan ni Debata tinggal. (1 Raja-Raja 8:30) On lapatanna, dang di tano on manang dang di portibi on Debata tinggal, alai di surgo do. Didok di Bibel, “ro akka anak ni Debata na sittong tu jolo ni Jahowa”.a Jadi boi didok, adong do inganan ni Debata.—Job 1:6.
Molo dang di sude inganan do Debata, boi do diida Ibana jala diurupi Ibana au?
Boi. Holong do roha ni Debata tu hita sude. Nang pe di surgo Ibana, alai diparrohahon Debata do akka jolma na olo gabe ale-alena jala diurupi Ibana do nasida. (1 Raja-Raja 8:39; 2 Kronika 16:9) Aha do buktina na diparrohahon Debata do akka naposona na setia?
Tikki martangiang hita: Tikki martangiang hita, pittor dibege Jahowa do tangiangta.—2 Kronika 18:31.
Tikki marsak hita: “Jonok do Jahowa tu halak na mandele. Dipalua Ibana do akka halak na marmetmet ni roha.”—Psalmen 34:18.
Tikki porlu hamu diurupi : Didok Jahowa, “Bahenonna ma hita marbisuk jala paboaonna ma tu hita na ikkon sidalananta” marhite Hatana Bibel.—Psalmen 32:8.
Pandapot na sala na mandok molo Debata adong manang didia pe
Pandapot na sala: Adong do Debata manang didia pe.
Na sasittongna: Dang di tano on Debata tinggal manang di inganan na asing di portibi on. (1 Raja-Raja 8:27) Tutu do, dipaboa akka bintang dohot tompaan ni Debata na asing do “hasangapon ni Debata”. (Psalmen 19:1) Dos songon pelukis, dang mungkin di bagasan lukisanna i ibana tinggal. Suang songon i ma Debata, dang di bagasan toppaanna i Ibana tinggal. Alai sian sada lukisan, gabe boi do godang taboto taringot pelukisna. Suang songon i ma “nang pe dang boi taida Debata, alai boi do taattusi akka pangalahona” songon huasona, bisukna, dohot holongna sian akka toppaanna.—Rom 1:20.
Pandapot na sala: Ikkon adong do Debata di sude inganan asa boi diboto Ibana sude jala asa boi diulahon Ibana manang aha pe.
Na sasittongna: Tondi parbadia, i ma gogo manang huaso na dilehon Debata. Dipakke Ibana do tondi parbadiana i lao mamboto jala mangulahon manang aha pe, didia pe, sadihari pe. Dang pola ikkon marpinda-pinda Ibana.—Psalmen 139:7.
Pandapot na sala: Psalmen 139:8 patuduhon molo Debata adong do manang didia pe. Didok di ayat i, “Tung lao pe au tu langit, disi do Ho Tung peak pe au di Kuburan, disi do Ho.”
Na sasittongna: Dang taringot inganan ni Debata na dipaboa di ayat i. Alai hata na disurat di ayat i lao paboahon tu hita, molo Debata boi do mangurupi hita manang didia pe hita.
a Jahowa i ma goar ni Debata na disurat di Bibel.