Sukkun-Sukkun sian na Manjaha

Boasa dikutip Jesus hata ni si Daud na disurat di Psalmen 22:1 sebelum mate ibana?

Sebelum mate Jesus, didok ibana ma hatana na tarsurat di Mateus 27:46 dohot di Markus 15:34, “Debatakku, Debatakku, boasa tadikkononmu au?” Tikki didok Jesus songon i gabe saut ma hata ni si Daud na tarsurat di Psalmen 22:1. Sala do molo adong halak marpikkir, ala na so porsea be Jesus tu Jahowa makana didok ibana hatana i. Alana takkas do diboto Jesus boasa ikkon mate ibana, jala rela do ibana dibahen songon i. (Mat. 16:21; 20:28) Jala diboto Jesus do, di tikki i dang dibahen Jahowa na songon “tembok di sakalilingna” lao manjaga ibana. (Job 1:10) Alani i, gabe boi ma dibuktihon Jesus kesetiaanna tu Jahowa sahat tu na mate, dang soal sadia borat ujianna.​—Mrk. 14:35, 36.

Attong boasa didok Jesus hatana i? Memang, dang boi tapastihon alasanna. Alai taida ma piga-piga kemungkinan alasanna.a

Tikki didok Jesus hatana i, bisa jadi ibana naeng patuduhon na ikkon mate do ibana lao manggarar tobusan tanpa bantuan ni Jahowa. Memang ikkon mate sebagai jolma do Jesus, asa boi hamateanna i “humokkop sude jolma”.​—Heb. 2:9.

Tikki didok Jesus hatana i, bisa jadi ibana naeng paingotton halak Jahudi tu isi ni Psalmen 22. Tikki i, biasa do halak Jahudi mangingot godang isi ni Psalmen. Jadi molo adong na mandok sada ayat, pittor boi do diingot nasida isi ni sada Psalmen i. Molo i do tujuan ni Jesus, gabe boi ma diingot halak Jahudi godang ni ayat na disurat di bukku Psalmen taringot hamateanna. (Ps. 22:7, 8, 15, 16, 18, 24) Gabe diingot halak i ma muse bagian parpudi sian Psalmen 22 i, Jahowa do Raja na lao mamaretta di saluhut tano on.​—Ps. 22:27-31.

Tikki didok Jesus hatana i, bisa jadi ibana naeng patuduhon dang marsala ibana. Sebelum dihukum mate Jesus, dibentuk Sanhedrin ma pengadilan na so sah tikki borngin lao manudu Jesus sebagai parjahat. (Mat. 26:65, 66) Hape dang sesuai i tu aturan na sah molo naeng mangadili sasahalak. (Mat. 26:59; Mrk. 14:56-59) Jadi tikki didok Jesus hatana i olo do ra ibana naeng patuduhon tu halak, dang adong hajahaton diulahon ibana na mambahen ibana ikkon dihukum mate.

Hata ni Jesus i bisa jadi naeng paingotton nasida, susa pe Jesus tikki i dang na berarti dang lomo be roha ni Jahowa tu ibana. Tikki didok si Daud hatana i dang na patuduhon na so porsea be ibana tu Debata. Alana dung didok si Daud songon i dipaboa ibana do na pos do rohana tu Jahowa. Jala dukkon i, sai dipasu-pasu Jahowa do ibana. (Ps. 22:23, 24, 27) Suang songon i ma tong Jesus “Anak ni si Daud” i, susa pe ibana di hau partinaonan, dang na so lomo be roha ni Jahowa tu ibana.​—Mat. 21:9.

Tikki didok Jesus hatana i, bisa jadi ibana naeng patuduhon, dipasombu Jahowa pe ibana susa, asa terbukti do na setia ibana. Sian mulana dang adong rencana ni Jahowa asa susa jala mate Anakna i. Mate pe Jesus asa malua do hita sian dosa dohot hamatean na tawarisi sian si Adam dohot si Hawa. Jala asa tarbukti gabus ni Sibolis. (Mrk. 8:31; 1 Ptr. 2:21-24) Memang ikkon dipasombu Jahowa do susa jala mate Anakna i asa boi saut i sude.

Didok Jesus pe hatana i, bisa jadi naeng patuduhon tu akka siseanna alasan na sasittongna dipaloas Jahowa ibana mate targattung di hau.b Diboto Jesus do, olo do gabe godang halak na so porsea be tu ibana ala songon i carana ibana dipamate. (1 Kor. 1:23) Jadi molo diattusi akka sisean do alasan na sasittongna boasa Jesus mate, gabe takkas ma diboto nasida, Sipalua do Jesus dang parjahat.​—Gal. 3:13, 14.

Dung didok Jesus hatana i, didok ibana ma muse, “Nungnga huulahon be sude na pinangidomi sian au!” (Joh. 19:30; Luk. 22:37) On patuduhon, tugas sian Jahowa do sude hasusaanna i. Jadi tikki dang dijaga Jahowa Jesus di hasusaanna i, gabe tercapai ma tujuan ni Jahowa mangutus Jesus tu tano on. Dung i gabe saut ma “sude na tarsurat taringot [Jesus] di Patik ni si Musa, na Sinurat ni Akka Panurirang, dohot na tarsurat di akka Psalmen”.​—Luk. 24:44.