Tutu do Hepeng Sumber ni Sude Kejahatan?

Na didok Bibel

Daong. Dang hea didok di Bibel na sala hepeng jala dang didok hepeng i sumber ni sude kejahatan. Godang do halak na gabe sala mangattusi ala adong didok di Bibel “hepeng do urat ni nasa hajahaton”. Alai sasittongna na didok di Bibel, “holong ni roha tu hepeng do urat ni nasa hajahaton”.a—1 Timoteus 6:10.

Aha do na didok Bibel taringot hepeng?

Didok Bibel do, molo malo hita mamakke hepeng, boi do i bermanfaat tu hita jala gabe “parlinggoman” do i di hita. (Parjamita 7:12) Asing ni i muse didok di Bibel, dipuji do halak na burju mangalehon, termasuk ma na mangalehon hepeng tu halak na asing.—Poda 11:25.

Nang pe songon i, dipaingot Bibel do hita asa unang mangalului hepeng na uppetting di ngolutta. Didok, “Unang ma holan hepeng na dipikkiri hamu di ngolumuna, alai las ma rohamuna tu akka na adong di hamu.” (Heber 13:5) Jadi parsiajaranna, denggan ma tapakke hepeng jala unang ma talului hepeng holan lao mamora. Alai las ma rohatta molo nungnga adong sude kebutuhanta, songon sipanganon, pakkean, dohot tempat tinggal.—1 Timoteus 6:8.

**Aha do na didok di Bibel molo holongan di hepeng hita?**

Halak na serakah, dang boi mandapot hangoluan na salelengna. (Epesus 5:5) Alana halak na serakah, dos do songon halak na manomba patung manang na mangulahon ibadat na so sittong. (Kolosse 3:5) Asing ni i muse, halak na serakah boi do gabe mangulahon na sala asal ma saut sude lomo ni rohana i. Poda 28:20 mandok, “Manang ise na naeng hatop mamora, pasti mangulahon na sala.” Alana olo do nasida gabe tergoda lao mangulahon akka na jahat, songon mangancam halak asa dilean hepeng, manipu, menculik, manang mambunu.

Nang pe halak na holongan di hepeng dang gabe mangulahon akka na jahat nakking, alai tetap do i boi mambahen pengaruh na so denggan tu nasida. Didok di Bibel, “Manang ise na marsakkap naeng mamora, tarjorat ma ibana jala ditarik akka sakkap haotoon dohot sakkap na parohon jea.”—1 Timoteus 6:9.

Aha do manfaatna tu hita molo taihutton nasehat ni Bibel taringot hepeng?

Alani hepeng, boi do sasahalak gabe mangulahon na sala, hape diboto do i sala, manang gabe mangulahon na so dihalomohon roha ni Debata. Alani i, ikkon manat do hita asa unang holongan di hepeng. Molo taulahon i, gabe adong ma harga diritta jala gabe las ma roha ni Debata tu hita. Marjanji do Debata tu halak na berupaya mambahen las rohana. Didok Ibana, “Dang tadikkonokku ho jala dang pasombuokku ho.” (Heber 13:5, 6) Jala didok Ibana do muse, “Manang ise na setia, dapotna ma godang pasu-pasu.”—Poda 28:20.

Akka Ayat ni Bibel taringot Hepeng

Parjamita 7:12: “Parlinggoman do . . . hepeng.”

Maksudna: Molo malo hita mamakke hepeng, boi do i gabe bermanfaat lao memenuhi kebutuhanta.

Lukas 12:15: “Nang pe godang arta ni sasahalak, dang sian artana i ngoluna.”

Maksudna: Dang hepeng na uppetting di ngolutta, jala dang boi i mambahen hita selamat.

1 Timoteus 6:10: “Ai holong ni roha tu hepeng do urat ni nasa hajahaton. Alani i do adong deba na lilu sian haporseaon jala parohon na haccit tu dirina alani godang ni hasusaan.”

Maksudna: Dang sala hepeng i. Alai halak na holongan di hepeng, i ma halak na mambahen hepeng na uppetting di ngoluna, boi do i gabe mambahen ro godang masalah tu dirina sandiri. Contohna, boi do gabe sursar keluargana, jala gabe marsahit ibana ala pagodangku tikkina holan lao mangalului hepeng.

Heber 13:5: “Unang ma holan hepeng na dipikkiri hamu di ngolumuna, alai las ma rohamuna tu akka na adong di hamu.”

Maksudna: Unang ma gabe tabahen segala cara asa boi mamora. Alai las ma rohatta tu kebutuhan naung adong di hita.

Mateus 19:24: “Ummura do unta masuk tu lubang ni jarum sian apala sahalak na mora masuk tu Harajaon ni Debata.”

Maksudna: Hea do ditogihon Jesus sahalak bawa na mora asa mangihutton ibana, alai dang olo bawa i. Alana, umholong do rohana tu artana i. I do alana didok Jesus, manang ise na umholong rohana tu artana daripada tu Debata, dang boi dapotna hangoluan na saleleng ni lelengna.

a Diterjemahan Bibel na asing mandok, “Ai holong ni roha di hepeng do haroro ni ragam ni sude hajahaton.”