Harajaon I Pasauthon Sangkap ni Debata di Tano On

1, 2. (a) Boasa maol mamingkirhon taringot tu Paradeiso saonari on? (b) Aha do na boi patoguhon haporseaonta taringot tu janji ni Debata?

SAHAT ma sahalak donganta di parpunguan, loja dihilala ibana alani maborathu karejona. Marsak alani bosna, susa manggohi na porlu di keluarga, jala marsahit tungganeboruna. Dung dibahen musik, lumbang ma dihilala ibana. Las situtu rohana rap dohot angka dongan di Bale Harajaon. Ende dohot logu taringot tu hangoluan di Paradeiso mambahen ibana mangarimangi mangolu di Paradeiso. Lomo rohana mangendehon ende i. Huhut rap marende dohot keluargana, tarapul ma rohana alani pangkirimon i.

² Hea do dihilala hamu songon i? Olo do ra. Susa ni parngoluan saonari, mambahen maol mamingkirhon na tutu do Paradeiso i. On ma ”ari hasusaan”, jala portibi on imbar situtu sian Paradeiso. (2 Tim. 3:1) Aha do na paposhon rohanta na tutu do masa pangkirimon i? Sian dia do taboto na laho mamarenta Harajaon ni Debata tu tano on? Taparrohahon ma pigapiga surirang sian Jahowa naung digohi di tingki naung salpu, patar diida angka naposo ni Debata. Dung i, taulas ma muse songon dia surirang i dohot angka surirang na asing digohi di tingki on. Ujungna, marhite marhaporseaon na togu, taida ma songon dia i digohi di tingki na naeng ro.

 3. Aha do janji na mangapul roha ni halak Jahudi na tading di habuangan di Babel?

³ Rimangi ma parngoluon ni halak Jahudi di habuangan di Babel abad paonomhon SM. Godang do nasida tubu jala dipagodanggodang disi, songon natuatua ni nasida jala susa do parngoluon disi. Direhei halak Babel do nasida alani haporseaon ni nasida tu Jahowa. (Ps. 137:1-3) Saleleng marpulu taon, marpangkirimon do halak Jahudi tu janji ni Jahowa laho mamboan nasida mulak tu Juda. Didok Jahowa do sonang do hangoluan ni nasida bahenonNa. Dipatudos do tano Juda tu Eden manang paradeiso! (Jaha Jesaya 51:3.) Janji on mambahen pos roha ni naposo ni Debata. Songon dia carana? Taulas ma di pasal on.

 4. Songon dia do Jahowa paposhon roha ni halak Jahudi taringot tu huta sitopoton ni nasida?

⁴ Dame. Ndang na mulak tu paradeiso na sasintongna nasida, alai tu negeri naung tarulang saleleng 70 taon. Godang singa, serigala, gompul, dohot binatang na asing. Sungkunsungkun do ra roha ni sahalak ama, ’Songon dia do bahenonku asa aman keluargangku? Songon dia do manjaga birubiru dohot pinahan sian binatang buas?’ Ndang sala molo holsoan taringot on. Alai pingkirhon ma janji ni Debata di Jesaya 11:6-9 jala songon dia on boi mangapul rohana. (Jaha.) Denggan situtu do Jahowa paposhon roha ni halak buangan i, na paluaonNa do nasida dohot pinahan ni nasida. Manjampal ma singa, lapatanna ndang sarbuton ni singa be pinahan ni halak Jahudi. Ndang mabiar be halak tu binatang buas. Marjanji do Jahowa na boi dame hilalaon ni halak Jahudi di tano Juda dohot di halongonan nang di tombak.​—Hes. 34:25.

 5. Aha do surirang na paposhon roha ni halak Jahudi na patuduhon gohan ni Jahowa do haporluan ni nasida?

⁵ Gok situtu. Adong do na mangkolsohon, ’Boi do lehononku mangan keluargaku di negeri i? Didia ma hami maringanan? Aha ma karejongku disi? Dumenggan do parngoluon disi martimbangkon hasusaan di habuangan na diatur mandor na jungkat?’ Dipatudu Jahowa do na diantusi Ibana roha ni nasida. Disurirangkon Jahowa do na laho paroonNa udan asa ”godang” hasil ni ladangnasida. (Jes. 30:23, Bibel siganup ari) Taringot tu jabu dohot karejo ni nasida didok do, ”Paulionnasida ma angka bagas, laos inganannasida, suanonnasida ma hau anggur jala panganonnasida parbuena. Ndang tagamon nasida paulihon bagas, gabe halak na asing mangingani, ndang tagamon nasida manuan, gabe halak na asing manganhon.” (Jes. 65:21, 22) Gumodang do pasupasu na dapot ni nasida martimbangkon di Babel. Alai, songon dia do taringot tu parsoalan na mambahen nasida diboan tu habuangan?

 6. Aha do parsoalan na diadopi naposo ni Debata saleleng martaontaon jala aha do janji ni Jahowa tu halak na mulak sian habuangan?

⁶ Partondion na togu. Nunga sega paralealeon ni nasida tu Debata andorang so diboan tu habuangan. Didok Jahowa ma tu naposoNa marhite panurirang Jesaya, ”Nunga magurbak sude ulumuna jala nunga mangae roha.” (Jes. 1:5, Bibel siganup ari) Nasida ndang marbinege jala ndang marnida di partondion ala ndang ditangihon poda dohot tudutudu na sian Jahowa. (Jes. 6:10; Jer. 5:21; Hes. 12:2) Aha do na paposhon roha ni halak na mulak tu Juda molo masa muse parsoalan on? Pasombuon ni Jahowa do nasida muse ditaban? Janji ni Jahowa paposhon roha ni nasida, ”Dung i di nasadari i begeon ni angka na nengel ma angka hata ni buku na badia i jala marnida ma mata ni halak na mapitung sian haholomon.” (Jes. 29:18) Bahenon ni Jahowa do naposoNa na olo muba gabe ias di partondion. Saleleng dioloi nasida Jahowa, togutoguonNa jala urupanNa ma nasida mandapot hangoluan.

 7. Songon dia do janji ni Jahowa digohi taringot tu naposoNa, jala boasa i patoguhon haporseaonta?

⁷ Digohi Jahowa do janjiNa i? Taralusi ma sungkunsungkun on marhite na masa tu halak Jahudi na mulak tu Juda. Dapot nasida do pasupasu, hadameon, gok sipanganon jala togu di partondion. Umpamana, dilinggomi Jahowa do nasida sian bangso humaliang na gumogo jala gumodang rayatna. Binatang buas ndang mangganggu pinahan ni nasida. Otik do sian surirang taringot tu Paradeiso, na sinurat ni panurirang Jesaya, Jeremia, dohot Hesekiel na diida halak Jahudi. Alai, na diida nasida nunga mambahen longang roha jala i ma na dihaporluhon nasida. Molo tarimangi angka na binahen ni Jahowa tu naposoNa, on patoguhon haporseaonta. Otik dope surirang i digohi nunga mambahen longang roha, tarlumobi muse di Paradeiso na sasintongna. Taparrohahon ma na laho diulahon Jahowa tu hita saonari.

 8. Luat sisongon dia do na laho lehonon ni Jahowa tu hita?

⁸ Saonari, naposo ni Jahowa ndang marpungu asa gabe sada bangso, jala maringanan di sada luat. Alai, halak Kristen na miniahan digoari ”Israel ni Debata”. (Gal. 6:16) Nasida dohot ’birubiru na asing’ dipapungu di ”luat” partondion, lapatanna nasida dipasada laho mangulahon ulaon panombaon tu Debata Jahowa. I ma dalan ngolu na dumenggan di nasida. (Joh. 10:16; Jes. 66:8) Luat sisongon dia do na laho lehonon ni Jahowa tu hita? Paradeiso partondion. Disi, digohi Jahowa ma janjiNa taringot tu partondion na dipatudos songon di Eden. Taparrohahon ma angka tudosan on.

9, 10. (a) Songon dia do surirang di Jesaya 11:6-9 digohi saonari? (b) Aha do na patuduhon adong dame di naposo ni Debata?

⁹ Dame. Surirang di Jesaya 11:6-9 manggombarhon binatang mardame dohot binatang, songon i nang jolma ndang diganggu binatang. Masa do surirang on di tingkinta saonari? Masa, alai di partondion! Taboto do boasa ndang mangganggu be angka binatang buas i, di ayat 9 didok, ”Ai gok parbinotoan di Jahowa tano on sogot, songon aek ni laut mangalungkupi tondolanna.” Parbinotoan na sian Jahowa do na mambahen muba angka binatang? Ndang songon i. Jolma do na muba dung mananda Debata na Tumimbul, jala nasida tongtong marsiajar mangihuthon dalan ni Debata Sipardame. Alani i ma, boi tahilala paradeiso partondion saonari, las situtu do roha mangida surirang on digohi. Marhite pamarentaon ni Harajaon ni Debata, sude siihuthon Kristus marsitutu pasidingkon parange na so suman jala marsiajar marlambok ni roha, mardame, jala marsaor dohot angka dongan sahaporseaon.

¹⁰ Umpamana, diulas do di buku on prinsip ni Bibel dohot paraloan na dihilala naposo ni Debata ala ndang mamihak tu portibi on. Sada halongangan do ala adong saonari sada ”bangso” na torop sian pendudukna ndang parsidohot tu ulaon parporangan, nang pe nasida diuhum mate alani i. On patuduhon, molo rayat ni Raja Messias mangkilala hadameon, songon na digombarhon si Jesaya! Didok Jesus do, tandaon ni halak ma siseanna marhite holong. (Joh. 13:34, 35) Sabar do Kristus marhite ”naposo haposan jala na marroha” mangajari sude halak Kristen asa mardame, marholong ni roha, jala marlambok ni roha.​—Mat. 24:45-47.

11, 12. Aha do haraparon na masa saonari, alai songon dia do Jahowa mangalehon sipanganon tu angka naposoNa?

¹¹ Gok situtu. Masa do haraparon di partondion saonari on. Bibel mandok, ”Ida ma, ro do angka ari sogot, ninna Tuhan Jahowa, tongosonku ma haraparon tu tano on, ndada haraparon di sagusagu manang hauason di aek ingkon di angka hata ni Jahowa do.” (Am. 8:11) Dohot do rayat ni Harajaon ni Debata mangkilala haraparon? Disurirangkon Jahowa do imbar ni naposoNa sian angka musuNa, ”Ida ma, mangan do sogot anggo angka naposongku, alai anggo hamu anturaparon do: Ida ma, minum do sogot anggo angka naposongku, alai anggo hamu uasan do; ida ma, marlas ni roha do sogot anggo angka naposongku, alai anggo hamu ingkon [maila] do.” (Jes. 65:13) Diida hamu do masa surirang on?

¹² Dos songon sunge na doras do sipanganon partondion na diparade tu naposo ni Debata. Angka buku na marojahan tu Bibel, rekaman audio dohot video, parpunguan dohot kebaktian, angka hatorangan di situs web, dipatudos songon sunge na doras di portibi na rapar di partondion. (Hes. 47:1-12; Joel 4:18) Las do rohamu mangida janji ni Jahowa digohi saonari? Tongtong do hamu mangan sian meja ni Jahowa?

13. Songon dia do janji ni Jahowa taringot tu na so marnida dohot na so marbinege digohi?

¹³ Partondion na togu. Torop do halak na so marnida jala ndang marbinege di partondion saonari. (2 Kor. 4:4) Alai, pamalumon ni Kristus do tihas dohot sahit sian portibi on. Hea do diida hamu na so marnida gabe marnida, na so marbinege gabe marbinege? Molo taida adong na mananda hasintongan, jala ditadingkon nasida gabus ni agama na mambahen nasida ndang marnida dohot marbinege di hasintongan, i ma tanda nunga digohi surirang on, ”Di nasadari i begeon ni angka na nengel ma angka hata ni buku na badia i jala marnida ma mata ni halak na mapitung sian haholomon dohot sian hagolapon.” (Jes. 29:18) Ganup taon, marratus ribu halak di liat portibi on dipamalum di partondion. Sude halak na manadingkon Babel na balga jala manomba di bagasan hasintongan, on patuduhon naung digohi Jahowa janjiNa saonari!

14. Aha do na porlu tarimangi asa togu haporseaonta?

¹⁴ Ganup pasal sian buku on, mangulas tanda na patuduhon Kristus manogunogu siihuthon ibana tu paradeiso partondion saonari on. Tarimangi ma godang ni pasupasu na tajalo saonari di partondion. Molo taulahon i, lam togu ma haporseaonta tu angka janji ni Jahowa di ari na naeng ro.

15. Boasa boi pos rohanta na laho gabe paradeiso tano on?

¹⁵ Sian mulana, laho paradeiso do tano on bahenon ni Jahowa. Dibahen do si Adam dohot si Hawa di porlak Eden. Jala diparentahon do tu nasida asa manggohi tano on, mangarajai sude binatang dohot nasa isina. (1 Mus. 1:28) Ala mangihuthon Sibolis do si Adam dohot si Hawa, sude pinomparna mardosa jala mate. Alai, ndang muba sangkap ni Debata. Molo dung dijanjihon Jahowa, pasautonNa do i. (Jaha Jesaya 55:10, 11.) Alani i, pos do rohanta molo pinompar ni si Adam dohot si Hawa boi manggohi tano on, jala mangarajai tompaan ni Jahowa di paradeiso. Di tingki i, digohi ma sude surirang na dipaboa tu halak Jahudi taringot tu hangoluan di paradeiso! Parrohahon ma angka tudosan on.

16. Songon dia do Bibel manggombarhon Paradeiso na laho hilalaonta?

¹⁶ Dame. Ujungna, digohi ma sude na digombarhon di Jesaya 11:6-9. Mangkilala hadameon ma angka baoa, borua, dohot angka ianakhon di portibi on. Ndang adong be na manusai jolma manang binatang. Pingkirhon ma, sude liat portibi on inganan na dame, boi hita marlange di sunge, di tao, di laut; mardalani tu dolok, tombak longolongo jala ndang adong sihabiaran. Borngin ndang adong panangko. Digohi ma Hesekiel 34:25 na mandok, ”Dung i bahenonku ma tu nasida padan pardamean, jala pasadionku binatang na rahat sian tano i, asa halongonan, jala modom di angka tombak longolongo.”

17. Boasa boi pos rohanta na gok situtu patupaon ni Jahowa haporluonta?

¹⁷ Gok situtu. Rimangi ma tingki ndang adong be hapogoson, hahurangan gizi, haraparon, dohot uang pensiun. Gok situtu sipanganon partondion na diparade tu naposo ni Debata saonari. On patuduhon, gohan ni Raja Messias do sude na ringkot tu rayatna. Tingki di tano on, dipatudu Jesus do on marhite mangalehon marribu halak mangan holan sian pigapiga roti dohot dengke. (Mat. 14:17, 18; 15:34-36; Mrk. 8:19, 20) Dung mamarenta Harajaon ni Debata tu tano on, digohi ma surirang na mandok, ”Ibana ma mangalehon udan tu bonim naung sinaburhonmu tu haumam, dohot roti gogo ni hauma i, togong ma i huhut marmiak bahenonna, manjampal ma ia pinahanmu di ari na sasada i di panjampalan na bidang.”​—Jes. 30:23.

18, 19. (a) Aha do na boi tahilala tingki digohi surirang 65:20-22? (b) Aha do lapatan ni umurta dipatudos ”songon ariari ni hau”?

¹⁸ Saonari, ndang dapot roha ni godang halak marjabu sandiri, jala mandapot karejo na denggan. Di portibi na susa on, godang do na karejo ganup ari alai ndang boi dope manggohi na porlu di keluargana. Jala, halak na mora do lam mora. Boi do dapot rohamu tingki digohi surirang on, ”Jala paulionnasida ma angka bagas, laos inganannasida, suanonnasida ma hau anggur jala panganonnasida parbuena. Ndang tagamon nasida paulihon bagas, gabe halak na asing mangingani, ndang tagamon nasida manuan, gabe halak na asing manganhon; ai songon ariari ni hau, songon i do ariari ni bangsongku, jala jadijadian ni tangannasida ingkon halak na hupillit marsaulihonsa.”​—Jes. 65:20-22.

¹⁹ Aha do lapatan ni umurta ”songon ariari ni hau”? Tingki manisio hita di toru ni hau na balga, longang do rohanta mangida ganjang ni umur ni hau on, ra andorang so tubu ompungta nunga adong hau i. Olo do ra hita marpingkir, ’Nang pe nunga marujung ngolu ahu, ra adong dope hau on ala mardosa dope jolma saonari. Jala, nang pe ndang adong na marningot ahu, boi dope hau on mambahen sonang roha ni na asing.’ Mansai denggan do basa ni Jahowa ala dipapos rohanta laho mambahen ganjang umurta, jala gok hadameon di Paradeiso! (Ps. 37:11, 29) Disi, hau na ganjang umurna dipatudos songon duhut na hatop malos, tubu jala mate alai anggo hita, mangolu do salelengna!

20. Songon dia do rayat ni Harajaon na marsihohot boi mandapot hahipason na manongtong?

²⁰ Ndang adong be sahit. Saonari on, sahit dohot hamatean mambahen sude halak susa. Sasintongna, sude do hita marsahit, i ma sahit na posa na digoari dosa. Holan sada do ubatna, i ma tobusan ni Jesus. (Rom 3:23; 6:23) Di Pamarentaon Saribu Taon, Jesus dohot angka donganna raja manggohi pangkorhon ni tobusan on sian tingki tu tingki laho manesa dosa sian sude jolma na marsihohot. Gohanna ma sude surirang ni si Jesaya na mandok, ”Na so tupa be dohonon ni pangisina: Na gale do ahu, ai bangso na maringan disi nunga maruli hasesaan ni dosa.” (Jes. 33:24) Rimangi ma, ndang adong be na mapitung, na nengel dohot angka na martihas. (Jaha Jesaya 35:5, 6.) Ndang adong sahit na so boi dipamalum Jesus. Alani i, sude rayat ni Harajaon i mangkilala hahipason!

21. Aha do na laho masa tu halak naung mate jala boasa tarapul roha tu janji on?

²¹ Songon dia do taringot tu hamatean? On ma ”musu na parpudi” na so boi ditaluhon jolma na mardosa. (1 Kor. 15:26) Alai, mabiar do Jahowa tu hamatean? Parrohahon ma surirang ni si Jesaya on, ”Bondutonna ma hamatean salelenglelengna jala apusan ni Tuhan Jahowa ma iluilu sian nasa bohi.” (Jes. 25:8) Porsea do hamu na laho masa on? Ndang adong be jamita tu na marhabot ni roha, tanoman, dohot iluilu alani marhabot ni roha! Alai, manetek do ilu las ni roha ala digohi Jahowa janjiNa laho pahehehon halak na mate! (Jaha Jesaya 26:19.) Ujungna, dipamalum ma sude lungun ni roha alani hamatean.

22. Aha do na masa dung diulahon Harajaon ni Messias sangkap ni Debata tu tano on?

²² Di ujung ni Pamarentaon Saribu Taon, saut ma sude sangkap ni Debata tu tano on. Pasahaton ni Kristus ma Harajaon i tu Amana. (1 Kor. 15:25-28) Sude jolma ndang mardosa be, jala nasida rade mangadopi pangunjunan sian Sibolis na dipalua sian ”banua toru”. Dungkon i, lisathonon ni Kristus ma ulu ni ulok na robi i dohot sude na mangihuthon Sibolis. (1 Mus. 3:15; Pgk. 20:3, 7-10) Alai, sude na mangkaholongi jala marsihohot tu Jahowa mandapot hangoluan salelengna. Ndang tarhatahon las ni roha di tingki i. Disi, saut ma janji ni Debata tu angka na marsihohot, i ma ”haluaon hasangapon na di angka anak ni Debata”.​—Rom 8:21.

23, 24. (a) Boasa pos rohanta na saut sude janji ni Debata? (b) Aha do na laho taulahon?

²³ Ndang holan pangkirimon, lomo ni roha, manang nipi janji i. Situtu do masa janji ni Jahowa on! Boasa? Ingot ma hata ni Jesus di pasal sada di buku on. Diajarhon ibana do asa ditangiangkon siseanna tu Jahowa, ”Sai ro ma harajaonmu! Sai saut ma lomo ni roham di banua tonga on songon na di banua ginjang!” (Mat. 6:9, 10) Ndang holan anganangan Harajaon ni Debata. Tutu do on, jala nunga mamarenta saonari di surgo. Saleleng saratus taon on, nunga digohi Harajaon i janji ni Jahowa marhite huria. Alani i, pos ma rohanta gohan ni Jahowa do sude janjiNa, tingki ro Harajaon ni Debata jala mangarajai di liat portibi on!

²⁴ Tutu, taboto na laho ro Harajaon ni Debata. Taboto do na laho saut sude janji ni Jahowa. Boasa? Ala nunga MAMARENTA HARAJAON NI DEBATA! Tasungkun ma dirinta, ’Harajaon i do na marhuaso tu diringku?’ Marsitutu ma hita mangolu gabe rayat ni Harajaon na marsihohot saonari, asa boi tahilala laba ni pamarentaon na tigor jala daulat saleleng ni lelengna!