Unang Ho Mabiar, UrupanKu do Ho

RIMANGI ma molo mardalan hamu tingki borngin. Diboto hamu ma adong na mangihutihuthon hamu. Molo so hamu, ibana pe so. Molo hatop hamu mardalan, ibana pe hatop. Ujungna, marlojong ma hamu tu jabu ni donganmu na jonok tusi. Tingki dibungka donganmu pintu ni jabuna jala disuru masuk, lumbang ma pangkilalaanmu ala ndang adong be sihabiaranmu.

Ra, ndang hea dihilala hamu songon i. Alai, adong do ra na mambahen hamu marsak. Umpamana, marsitutu do hamu pasidingkon hagaleon, alai ndang marnaboi? Maol do hamu mangalului karejo jala nunga leleng ndang karejo? Marsak do hamu ala lam matua jala nunga hurang sehat? Manang, adong do na asing na mambahen hamu marsak?

Ndang soal aha sitaononmuna, las do roha molo adong dongan na olo manangihon jala mangurupi. Adong do alealemuna? Tontu adong! Jahowa pe boi do gabe alealemu, songon na diulahon Ibana tu si Abraham na disurat di Jesaya 41:8-13. Di ayat 10 dohot 13, marjanji do Jahowa tu hita, ”Unang ho mabiar, ai ahu do donganmu! Unang biahaton ho, ai ahu do Debatam: Ahu margogoihon ho huhut mangurupi ho, huhut maniopi ho marhitehite siamun ni hatigoranku. Jala na mandok tu ho: Unang ho mabiar, ahu do mangurupi ho.”

Hata ni Jahowa mangapuli rohanta. Rimangi ma janji ni Jahowa tu hita. Ndang didok di ayat i, hita mardalan di siamun ni Jahowa. Molo mardalan hita di siamun ni Jahowa, tanganta hambirang ma na ditiop tangan siamun ni Jahowa. Hape, tangan siamun ni hatigoran ni Jahowa do na maniop tangan siamunta, songon na manogu hita tingki marsitaonon. Tingki ditiop Jahowa tangan siamunta, dipatogu ma hita jala didok, ”Unang ho mabiar, ahu do mangurupi ho.”

Dos songon Ama jala Aleale do Jahowa di hamu? Porsea do hamu na urupanNa hamu tingki marsitaonon? Diparrohahon Jahowa do hamu jala lomo rohaNa mangurupi hamu. Tingki marsitaonon, lomo roha ni Jahowa asa unang marsak hamu. Boasa? Ala mansai holong rohaNa tu hamu. Dilehon Ibana do ”pangurupion situtu di hagogotan”.​—Ps. 46:2.

Adong do na sai mangingot hasalaanna di tingki naung salpu, jala didok rohana ndang disesa Debata dope dosana i. Molo songon i pangkilalaanmu, ingot ma si Job. Diakkui do dosana di tingki haposoonna. (Job 13:26) Songon i nang si Daud, dipangido ibana tu Jahowa, ”Sai unang paingotingot angka dosa ni haposoonku dohot pangalaosingku.” (Ps. 25:7) Nunga ”mardosa jala ndang dapot pujion ni Debata” be hita.​—Rom 3:23.

Hata na patoguhon roha di Jesaya bindu 41 disurat tu halak Israel. Mansai balga do dosa ni nasida. Gabe dipasombu Jahowa ma nasida ditaban tu Babel. (Jes. 39:6, 7) Alai di tingki i, marjanji do Debata laho paluahon halak na marhamubaon! (Jes. 41:8, 9; 49:8) Saonari pe, dipatudu Jahowa do holong dohot asi ni rohaNa tu halak na marhamubaon jala na palashon rohaNa.​—Ps. 51:3.

Rimangi ma pengalaman ni si Takuya,a na marsitutu asa unang manonton pornografi dohot masturbasi. Jotjot do ibana mangulahon on. Songon dia do pangkilalaanna? ”Ndang mararga be diringku. Alai tingki martangiang asa disalpuhon Jahowa hasalaanku, diurupi do ahu asa togu muse.” Songon dia do Jahowa mangurupi ibana? Didok angka sintua ma tu si Takuya asa ditelepon nasida tingki tarelaela mangulahon i. Didok si Takuya, ”Mabiar do ahu manelepon, alai tingki hutelepon, dipatogu ma ahu.” Diatur angka sintua ma asa ro sintua kaliling manjumpangi ibana. Dipaboa sintua kaliling i ma, ”Ndang alani lomo ni rohangku sandiri ro ahu tuson, alani angka sintua do. Las roha ni angka sintua asa togu ho di partondion.” Didok si Takuya, ”Nang pe nunga mardosa ahu, dilehon Jahowa do pangurupion marhite angka sintua.” Saonari, ndang diulahon si Takuya be hasomalanna i, perintis biasa ma ibana, jala karejo di kantor cabang. Songon pangurupion ni Jahowa tu si Takuya, urupanNa do hamu pasidingkon hagaleon.

Adong do na marsak ala diPHK jala maol muse mangalului karejo. Rimangi ma, mansai susa do molo ndang dijalo karejo di sada perusahaan. Tingki sasahalak mangkilala sisongon i, ndang arga be dirina dihilala. Songon dia do Jahowa mangurupi hamu? Tutu do, ndang pintor dilehon Ibana karejo. Alai, diurupi do hamu mangingot hata ni si Daud, ”Nunga pola matua ahu, alai ndang hea dope huida sada halak na burju ditinggalhon Jahowa, manang na gabe mangidoido angka anakkonna.” (Ps. 37:25, Bibel siganup ari) Arga do hamu di Jahowa, jala dilehon do tangan siamunNa mangalehon na porlu asa boi hamu tongtong manomba Ibana.

Si Sara na tading di Kolombia, mangkilala pangurupion ni Jahowa. Godang do hepengna ala torus karejo di perusahaan na jago. Ala lomo rohana mangalehon gumodang tingki di ulaon marbarita, kaluar ma ibana sian karejona i jala merintis. Alai, maol do mangalului karejo na pas. Dung i, mambahen es krim ma ibana. Ala ndang adong be hepengna, tutup ma bisnisna i. Didok ibana, ”Nunga salpu tolu taon, alai mandok mauliate do ahu tu Jahowa ala boi ahu martahan.” Holan na porlu di ibana do na dipingkiri ibana, asa unang marsak taringot tu ari sogot. (Mat. 6:33, 34) Ujungna, dijou bosna ma ibana asa karejo muse di perusahaan i. Didok si Sara, olo do ibana manjalo karejo i molo dipaloas marpungu jala dohot tu kebaktian. Saonari, nang pe ndang godang hepeng ni si Sara, boi do ibana merintis. Tingki susa, dihilala si Sara do holong ni Jahowa.

Godang do na marsak ala lam matua jala ndang boi be karejo. Hirim do roha ni nasida asa adong hepeng jala tabo parngoluonna. Marsak do nasida ala lam hurang gogo ni nasida. Songon i ma pangkilalaan ni Raja Daud na mangido tu Jahowa, ”Sai unang bolongkon ahu di tingki haubanonku, molo maol suda gogongku unang tadingkon ahu.”​—Ps. 71:9, 18.

Songon dia do angka na matua marpos ni roha tu ari na naeng ro? Ingkon togu do haporseaon ni nasida tu Debata jala ingkon pos do roha ni nasida tu pangurupionNa. Alai, adong do na mangkilala las ni roha ala godang hepengna. Alani i, porlu do nasida marsiajar mangkasabamhon na adong di parngoluonna. Diboto nasida, tumagon do mangallang ”ingkau rata” sian ”lombu na pinamokmok” asa tongtong sehat! (Poda 15:17) Molo tongtong manomba Jahowa, lehononNa do na dihaporluhon hamu sahat tu na matua.

Rimangi ma taringot si José dohot si Rose, naung merintis lobi sian 65 taon. Nunga godang hasusaan na diadopi nasida. Nasida do manjaga bapak ni si Rose, na porlu diurupi arian dohot borngin. Si José pe ingkon operasi kanker dohot kemoterapi. Songon dia do Jahowa mangalehon pangurupion tu nasida? Marhite si Tony dohot si Wendy, dongan sahaporseaon ni nasida. Adong do apartemen ni nasida na laho dilehon tu perintis naung leleng. Diingot si Tony do, tingki singkola dope ibana, jotjot do diida ibana si José dohot si Rose marbarita na uli. Las hian roha ni si Tony mangida hiras ni roha ni nasida. Ala nunga godang tingki na dilehon si José dohot si Rose di ulaon marbarita, dilehon si Tony dohot si Wendy ma apartemen i tu nasida. Saleleng 15 taon on, nasida ma na mangurupi si José dohot si Rose, naung marumur hirahira 85 taon saonari. Didok roha ni si José dohot si Rose, silehonlehon sian Jahowa do si Tony dohot si Wendy.

Marjanji do Jahowa tu hamu, ”Unang ho mabiar, ahu do mangurupi ho.” Dilehon Ibana do tangan siamunNa tu hamu. Olo do hamu manjalo pangurupionNa?