Serangan na Ro Sian Utara!

 1. Aha do cara na dipakke donganta si Russel dohot akka donganna lao mamboto hasittongan sian Bibel, jala boasa denggan carana i?

LOBI sian saratus taon naung salpu, hea do donganta si C. T. Russell dohot akka donganna mambahen sada punguan lao mamparsiajari Bibel. Naeng diboto nasida do aha na sasittongna diajarhon Bibel taringot Jahowa, Jesus Kristus, halak naung mate, dohot tobusan. Sederhana do cara ni nasida. Adong na mambahen sukkun-sukkun, dung i dipareso nasida ma sude ayat na adong haitanna tusi. Ujungna dung dapot kesimpulanna, disurat nasida ma i. Dipasu-pasu Jahowa do ulaon ni akka donganta on. Godang do hasittongan sian Bibel na didapot nasida, jala toktong do rikkot hasittongan i di tikkinta saonari.

 2. Aha do na boi mambahen gabe sala pangattusionta taringot sada surirang?

² Alai ujungna diboto akka parsiajar Bibel i ma, ummaol do hape mangattusi surirang ni Bibel sian mangattusi ajaran dasar ni Bibel. Boasa songon i? Alasan na parjolo, biasana baru pe taattusi lapatan ni surirang di Bibel molo nungnga masa na disurirangkon i. Adong muse alasan na asing. Asa takkas taattusi sada surirang, ikkon taparrohahon do sude bagian ni surirang i. Dang cukup holan mamareso sada bagian, hape di bagian na asing dang tapareso. Boi do annon gabe sala pangattusionta. Ra on ma na masa tu pangattusionta taringot sada surirang na disurat di bukku Joel. Saonari, taida ma muse surirang i, jala taulas ma boasa ikkon tasesuaihon pangattusionta taringot i.

3-4. Saleleng on, boha do pangattusionta taringot surirang na disurat di Joel 2:7-9?

³ Jaha Joel 2:7-9. Didok si Joel, adong sada punguan ni sihapor na naeng menyerang luat Israel. Dipatudos do iponna songon ipon ni singa, jala disegai nasida do sude suan-suanan na adong di Israel. (Joel 1:4, 6) Saleleng martaon-taon, taattusi do molo surirang taringot sihapor on manggombarhon akka naposo ni Jahowa na ringgas marbarita na uli. Ulaon nasida i mambahen sega “luat” i, na manggombarhon akka halak na mangihutton agama palsu.b

⁴ Molo holan Joel 2:7-9 na tajaha, hira na tutu do memang na songon i do lapatan ni surirang i. Alai, molo taparrohahon sude bagian ni surirang i, gabe taboto ma porlu do tasesuaihon pangattusionta. Taida ma opat alasanna.

5-6. Aha do sukkun-sukkun na ro tu pikkiranta molo tajaha (a) Joel 2:20? (b) Joel 2:25?

⁵ Na parjolo, parrohahon ma aha na didok Jahowa taringot sihapor i. Didok ibana, “PalaoonKu ma tentara sihapor na ro sian Utara.” (Joel 2:20, Bibel siganup ari) Molo sihapor i manggombarhon Sitindangi Ni Jahowa na mangoloi paretta ni Jesus lao marbarita na uli jala mambahen sisean, boasa ma gabe dipalao Jahowa nasida? (Hes. 33:7-9; Mat. 28:19, 20) Jadi, dang mungkin naposo ni Jahowa na naeng dipalao Ibana dison. Akka na jahat tu naposona i do.

⁶ Alasan na paduahon, taparrohahon ma na disurat di Joel 2:25 (Bibel siganup ari). Didok Jahowa do, “PaluaonKu ma tu hamu hasil ni suansuanan na suda di angka taon na salpu i, na pinasuda ni angka sihapor i. Ahu do marsuru tentara sihapor i mangalo hamu.” Molo taparrohahon di ayat i, marjanji do Jahowa lao mangganti rugi sude naung sega na dibahen akka sihapor i. Molo sihapor i manggombarhon akka parbarita Harajaon, boasa gabe mambahen sega barita na dipasahat nasida i? Hape taboto sada pasu-pasu do barita i tu akka halak na manangihon, ala boi mambahen halak na jahat gabe burju.​—Hes. 33:8, 19.

 7. Aha do na boi taboto sian hata ‘dung salpu’ na di surat di Joel 3:1, 2?

⁷ Jaha Joel 3:1, 2. Alasan na patoluhon, taparrohahon ma aha na didok Jahowa, ‘Dung salpu i, usehononku ma tondingku’. On masa, dung diulahon sihapor i tugasna. Molo sihapor i manggombarhon parbarita na uli, boasa ma dung salpu ulaon ni nasida marbarita, baru pe dilehon Jahowa tondi parbadiana? Hape taboto dang mungkin boi nasida mangulahon ulaon marbarita saleleng marpulu taon jala mangadopi akka paraloan, molo dang didongani tondi parbadia ni Debata.

 8. Manggombarhon ise do sihapor na disurat di Pangungkapon 9:1-11? (Ida gambar sampul.)

⁸ Jaha Pangungkapon 9:1-11. Saonari, taida ma alasan na paopatton. Najolo, taattusi do molo sihapor na disurat di bukku Joel i manggombarhon ulaon marbarita, ala tarippu sarupa do on tu surirang na disurat di bukku Pangungkapon. Di surirang i, dipaboa do adong akka sihapor na bohina songon jolma, jala ‘adong di ulu ni nasida mahkota na sian mas’. (Pgk. 9:7) Dibahen nasida ma na haccit tu akka ‘halak [i ma musu ni Debata] na so adong dibahen materai di pardompahanna’. Diulahon nasida ma i saleleng lima bulan, sarupa songon umur ni sihapor. (Pgk. 9:4, 5) Surirang on manggombarhon akka naposo ni Jahowa na miniahan. Barani do nasida paboahon barita panguhuman tu portibi on. Jala on mambahen akka halak na mangihutton portibi on gabe busisaon.

 9. Akka aha do na patuduhon dang sarupa sihapor na disurat di bukku Joel tu sihapor na disurat di bukku Pangungkapon?

⁹ Memang adong do na mirip sian surirang na dipaboa di bukku Pangungkapon dohot na dipaboa di bukku Joel. Alai dang sarupa i. Parrohahon ma: di bukku ni si Joel dipaboa do molo sihapor i manegai suan-suanan. (Joel 1:4, 6, 7) Alai, di parnidaan ni si Johannes ‘diorai do sihapor i manegai suan-suanan’. (Pgk. 9:4) Di surirang ni si Joel, ro sian utara do akka sihapor i. (Joel 2:20) Alai di parnidaan ni si Johannes, ro sian timus do akka sihapor i. (Pgk. 9:2, 3) Dipalao do akka sihapor na digombarhon si Joel. Alai di bukku Pangungkapon, dang dipalao akka sihapor i, gariada diloas do nasida mangulahon ulaonna sahat tu na sae. Dang adong disurat di Bibel na so lomo roha ni Jahowa mangida nasida.​—Ida ma kotak “Surirang Taringot Sihapor—​Mirip Alai Dang Sarupa.”

10. Paboa ma contoh ayat sian Bibel na patuduhon dang sarupa sihapor na digombarhon si Joel tu sihapor na disurat si Johannes.

¹⁰ Jadi boi tasimpulhon, dang adong haitan ni dua surirang i. Di Bibel, somal do dipakke sada tudosan alai boi do dang sarupa lapatanna. Misalna, di Pangungkapon 5:5 didok do Jesus i, “Singa na sian marga Juda”. Alai di 1 Petrus 5:8, digombarhon do Sibolis songon “singa na marauang.” Jadi asing do “sihapor” na digombarhon si Joel dohot “sihapor” na disurat di bukku Pangungkapon. Ala nga taboto dang sarupa dua surirang i jala dang adong haitanna, porlu do taboto manggombarhon aha do sasittongna surirang ni si Joel i.

11. Songon dia do Joel 1:6 dohot 2:1, 8, 11 mangurupi hita lao mamboto ise do sihapor i?

¹¹ Molo tapareksa muse akka ayat na asing taringot surirang ni si Joel i, gabe taboto ma molo surirang i manggombarhon serangan militer. (Joel 1:6; 2:1, 8, 11) Didok Jahowa, lao dipakke Ibana ma ‘paranganna na godang’ (tentara ni Babel) lao manguhum halak Israel na so unduk tu Ibana. (Joel 2:25) Didok do akka tentara i ro “sian utara”, alana sian utara do halak Babel ro menyerang Israel. (Joel 2:20) Dipatudos do nasida songon punguan ni sihapor. Didok si Joel do taringot nasida, “Marrombongan ma nasida manombus partahanan. . . . Masuk ma nasida tu kota i, manigor marlojongi ma tu atas ni tembok. Dijangkiti nasida ma angka jabu, masuk ma nasida sian janjela songon panangko.” (Joel 2:8, 9, Bibel siganup ari) Boi do dibayakkon hamu situasina? Gok situtu do akka tentara. Dang adong be na boi martabuni manang lari sian tentara ni Babel i.

12. Songon dia surirang ni si Joel taringot sihapor i gabe saut?

¹² Ro ma halak Babel (halak Kasdim) me-nyerang Jerusalem taon 607 SM. Dos do nasida songon sihapor. Didok di Bibel, “Raja ni halak Kasdim mandopang nasida, gabe dibunu angka dolidolinasida marhite sian podang . . . , jala ndang maralangalang rohana mida dolidoli manang namarbaju, nang mida halak na matua dohot na ubanon; tung luhutna do i dipasahat tu tanganna. Ia joro ni Debata disurbu nasida do, jala dilohai angka parik ni Jerusalem jala sude bagas bolon na disi suda disurbu nasida dohot api; jadi mago ma sandok ulaulanasida angka na arga i.” (2 Kron. 36:17, 19) Dung diserang halak Babel luat i, gabe didok halak ma, “Halongonan do on na so marisi jolma manang pinahan, naung sahat tu tangan ni halak Kasdim.”​—Jer. 32:43.

13. Aha do lapatan ni Jeremia 16:16, 18?

¹³ Hira-hira 200 taon dung dipaboa si Joel surirang i, dipakke Jahowa ma muse si Jeremia lao paboahon taringot serangan i. Didok ibana, ro ma akka tentara i mangalului manang ise halak Israel na mangulahon na jahat, dung i ditakkup ma nasida sude. Didok Jahowa, ‘Ida ma, suruonku ma torop angka panjala lao manjala nasida. Dung i suruhononku ma torop parburu, angka na mamburu nasida sian saluhut dolok dohot sian saluhut robean dohot sian saluhut barungbung ni angka dolok batu. . . . Jolo balosonku do silompit dua hajahatonnasida dohot dosanasida.’ Lapatanna, tu laut manang tu hutan pe halak Israel i lao, dang boi nasida malua sian serangan ni halak Babel i.​—Jer. 16:16, 18.

14. Andigan do surirang na disurat di Joel 3:1, 2 gabe saut?

¹⁴ Alai, adong do barita na denggan na dipasahat si Joel. Didok ibana, bahenon ni Jahowa ma muse asa maparbue tano i. (Joel 2:23-26) Jadi di ari na naeng ro, gabe boi ma nasida marale-ale muse tu Debata. Didok Jahowa, “Jadi dung songon i: Pangusehonongku ma Tondingku tu nasa sibuk, gabe manurirangi ma angka anakmuna dohot borumuna . . . Dohot do tu angka naposomuna baoa dohot boruboru pangusehononku di angka ari i Tondingku.” (Joel 3:1, 2) Alai tondi parbadia i dang pittor dilehon dung mulak halak Israel sian Babel tu huta ni nasida. Marratus taon dukkon i baru pe dilehon tondi i, i ma tikki Pentakosta taon 33 M. Sian dia taboto?

15. Songon na dipaboa di Ulaon ni Apostel 2:16, 17, hata aha do na disesuaihon si Petrus sian Joel 3:1, 2, jala aha do lapatan ni i?

¹⁵ Marhite tondi parbadia, dihaitton apostel Petrus ma Joel 3:1, 2 tu na masa di ari Pentakosta. Tikki i hira-hira jam sia pagi, masa ma tanda halongangan. Dilehon Debata ma tondi parbadiana, jala gabe boi ma akka halak na manjalo tondi i makkatai “taringot tu ulaon ni Debata na balga.” (Ul. 2:11) Marhite tondi parbadia, dienet si Petrus ma hata na adong di surirang ni si Joel. Alai adong saotik hata na disesuaihon ibana. Aha ma i? (Jaha Ulaon ni Apostel 2:16, 17.) Dang dipakke si Petrus be hata “dung i”, alai diganti gabe hata “di angka ari parpudi”. Lapatanna, i ma ari parpudi andorang so diripashon Jerusalem taon 70 M. Jadi di tikki i ma dilehon Debata tondi parbadia “tu ganup halak”. On patuduhon, ikkon jolo salpu do godang tikki asa gabe saut surirang i.

16. Aha do pengaruh ni tondi parbadia di abad na parjolo, jala aha do pengaruhna di tikkinta saonari?

¹⁶ Dung dilehon Debata tondi parbadiana tu akka halak Kristen di abad na parjolo, mulai ma diulahon ulaon marbarita i tu sude liat portibi on. Tikki dilehon si Paulus suratna tu halak Kolosse hira-hira taon 61 M, didok ibana do barita na uli i nungnga tarsar jala dibaritahon tu “sude tompaan na di tano on”. (Kol. 1:23) Di jaman ni si Paulus, “sude tompaan” manggombarhon sude luat ni portibi on na boi didalani si Paulus dohot akka dongan di tikki i. Marhite tondi parbadia sian Jahowa, gabe lam tarsar ma ulaon marbarita na uli sahat “tu ujung ni tano on”, i ma di tikkinta saonari.​—Ul. 13:47; ida ma kotak “Pangusehonongku ma Tondingku”.

17. Aha do na muba sian pangattusionta taringot sihapor na dipaboa di surirang ni si Joel?

¹⁷ Jadi aha do na muba? Saonari lam takkas ma pangattusionta taringot surirang na dipaboa di Joel 2:7-9. Na dipaboa di ayat i, dang na manggombarhon ulaonta marbarita na uli, alai manggombarhon tentara Babel na menyerang Jerusalem taon 607 SM.

18. Aha do na so muba taringot naposo ni Jahowa?

¹⁸ Aha do na so muba? Toktong do naposo ni Jahowa marbarita na uli manang didia pe, jala marragam do cara ni nasida lao mangulahon i. (Mat. 24:14) Dang adong pamarettaon di portibi on na boi mangambati hita lao mangulahon ulaon marbarita. Jala, ala dipasu-pasu Jahowa do hita, gabe lam ringgas jala lam barani ma hita paboahon barita taringot Harajaon i! Toktong do talului panogu-noguon sian Jahowa asa mangattusi surirang na dipaboa di Bibel. Jala pos do rohatta, haduan di tikki na pas diurupi Ibana ma hita “mangantusi [sude] hasintongan i”!​—Joh. 16:13.