Si Mateus Gabe Siihuthon Jesus

Dung dipamalum Jesus na lumpu i, tongtong dope ibana di Kapernaum di bariba ni Laut Galilea. Sai ro do muse angka halak mandapothon ibana, jala diajari Jesus ma nasida. Tingki hundul si Mateus, na laos digoari si Lepi di kantor pajak, jumpang ni Jesus ma ibana. Didok Jesus ma tu ibana, “Ihuthon ma ahu.”​—Mateus 9:9.

Ra, nunga hea dibege si Mateus taringot tu Jesus dohot angka ulaonna. Jala nunga diboto ibana ra taringot tu si Petrus, si Andreas, si Jakobus, dohot si Johannes. Dos songon nasida, pintor olo do si Mateus mangihuthon Jesus. Ai songon na tarsurat i didok do, “Hehe ma ibana [si Mateus] jala diihuthon ma Jesus.” (Mateus 9:9) Ditadingkon si Mateus ma karejona, jala gabe siihuthon Jesus ma ibana.

Ndang sadia leleng, ditogihon si Mateus ma angka halak mangan di jabuna. Asing ni Jesus dohot angka siseanna, ditogihon do angka sijalo pajak, dongan sakarejona hian. Dijalo nasida do pajak ni angka kapal na masuk tu pelabuhan, dohot pajak ni angka barang na dituhor sian negara na asing. Dilehon nasida ma pajak i tu pamarenta ni Rom. Sogo do roha ni halak Jahudi mangida nasida. Ai dijalo nasida do pajak lobi sian na ditontuhon. Asing ni sijalo pajak, ditogihon si Mateus do muse halak “pardosa”, i ma angka na mangalanggar uhum ni Debata.​—Lukas 7:37-39.

Ala diida halak Parise do Jesus rap mangan dohot nasida, didok ma tu angka siseanna, “Boasa rap mangan gurumuna i rap dohot sijalo pajak dohot angka pardosa?” (Mateus 9:11) Mambege i, didok Jesus ma, “Ndang porlu pangubati tu halak na sehat, tu na marsahit do. Laho ma hamu, parsiajari ma lapatan ni hata on, ‘Asi ni roha do na huhalomohon ndang pelean.’ Ai ndang na laho manjou halak na mangulahon na sintong ahu umbahen na ro, alai manjou pardosa i do.” (Mateus 9:12, 13; Hosea 6:6) Nang pe didok halak Parise ‘guru’ tu Jesus, alai ndang porsea nasida molo Jesus i boi mangajari nasida mangulahon na sintong.

Ditogihon si Mateus do angka sijalo pajak dohot pardosa tu jabuna. Ra, asa dibege nasida ajaran ni Jesus. “Ai godang do sian nasida gabe mangihuthon Jesus.” (Markus 2:15) Ndang songon halak Parise, ndang olo Jesus pasidingkon halak pardosa. Ai asi do rohana mangida nasida. Alani i, diurupi Jesus do asa togu parale-aleon ni nasida tu Debata.

Alai nang pe songon i, ndang na gabe lomo roha ni Jesus tu dosa ni nasida. Asi do rohana tu nasida dos songon asi ni roha ni sahalak pangubati tu na marsahit. Ingot ma, alani asi ni rohana, hea do dijama Jesus halak na hona kusta jala ninna, “Olo do ahu, malum ma ho.” (Mateus 8:3) Tontu, asi do rohanta mangida halak. Alani i, lomo do rohanta mangurupi nasida marale-ale tu Debata.