Jesus Ndang Dijalo di Nasaret

Godang do ulaon ni Jesus sadari i. Dung sian Dekapolis, dipamalum Jesus do sahalak borua na so hea so bulanna jala dipahehe do boru ni si Jairus. Dung sian jabu ni si Jairus, adong ma dua baoa na mapitung na mangihuthon Jesus. Didok nasida do gogo, “Anak ni si Daud, asi ma roham tu hami.”​—Mateus 9:27.

Dijou nasida do Jesus “Anak ni si Daud”. On patuduhon, porsea do nasida Jesus i Messias, jala laho hundul di habangsa ni si Daud. Dipasombu Jesus do nasida laho mangida sadia togu haporseaon ni nasida. Tingki masuk Jesus tu sada jabu, tongtong do dohot baoa na dua i. Disungkun Jesus ma nasida, “Porsea do hamu na boi ahu pamalumhon hamu?” Didok nasida ma, “Porsea do hami Tuan.” Dijama Jesus ma mata ni nasida jala ninna ma, “Alani haporseaonmuna i, saut ma i tu hamu.”​—Mateus 9:28, 29.

Laos satongkin i, boi ma nasida marnida! Songon na somal, diorai Jesus do nasida paboa-boahon i tu na asing. Alai, ala ni las ni roha ni nasida, dipaboa nasida do tu na asing.

Dung laho baoa na dua i, diboan ma tu Jesus sahalak baoa na bisu na sinonggopan ni suru-suruan na jahat. Dipalao Jesus ma suru-suruan na jahat i jala boi ma mangkatai baoa i. Longang ma roha ni angka jolma, didok ma, “Ndang hea dope masa na songon on di Israel.” Diida halak Parise do na masa i. Ndang boi dohonon ni nasida na so tutu Jesus mambahen mukjizat manang tanda halongangan. Alai, diparoa-roa nasida ma Jesus. Ninna ma, “Marhite huaso ni pangulu ni suru-suruan na jahat do ibana palaohon suru-suruan na jahat i.”​—Mateus 9:33, 34.

Ndang sadia leleng, mulak ma Jesus rap dohot siseanna tu Nasaret. Hira-hira sataon andorang so i, hea do ibana mangajari di sinagoga di Nasaret. Mulana, longang do roha ni halak na disi mambege hata ni Jesus. Alai ujungna, naeng dibunu nasida do Jesus. Saonari, mulak do muse Jesus tusi mangurupi nasida.

Di tingki ari Sabbat, mangajari ma Jesus di sinagoga. Longang do roha ni godang jolma mambege i jala didok nasida ma sama nasida, “Sian dia do dapotna habisuhon dohot tanda halongangan sisongon i? Nda anak ni tukang hau ibana? Nda si Maria do inana, jala si Jakobus, si Josep, si Simon, dohot si Judas do angka anggina? Nda rap dohot hita do angka ibotona? Ai sian dia do dapotna sudena i?”​—Mateus 13:54-56.

Nang pe godang tanda halongangan dohot habisuhon ni Jesus, alai ndang olo halak Nasaret porsea tu ibana. Ai didok nasida do, “Huida hami do ibana magodang. Songon dia ma ibana boi gabe Messias?” Laos songon i do muse didok angka keluargana. Alani i, didok Jesus ma, “Sai dipasangap do panurirang, alai ndang sangap ibana di hutana dohot di jabuna sandiri.”​—Mateus 13:57.

Sasintongna, longang do roha ni Jesus ala na so porsea i nasida. Alani i, ndang adong be tanda halongangan dibahen ibana di Nasaret, “asing ni mangampehon tanganna tu manang piga halak na marsahit jala pamalumhon nasida”.​—Markus 6:5, 6.