Aha do na Boi Diulahon Tingki Ari Sabbat?

Di ari Sabbat na asing, laho ma Jesus tu sinagoga na jonok di Galilea. Jumpang ni Jesus ma disi sahalak baoa na mate sambariba tanganna. (Lukas 6:6) Naeng botoon ni halak Parise do na laho ulahonon ni Jesus. Ai disungkun nasida do Jesus, “Mangihuthon patik, boi do pamalumhon na marsahit di ari Sabbat?”​—Mateus 12:10.

Didok pamimpin ni halak Jahudi i, ingkon jolo naeng mate pe sasahalak na marsahit asa boi dipamalum tingki ari Sabbat. Umpamana, diorai do mangubati halak na ponggol holi-holina dohot mambalut luka di ari Sabbat. Ai ndang pola mate jolma alani i. Tangkas ma, ndang na asi roha ni siboto surat dohot halak Parise i tu na marsahit i umbahen na disungkun nasida Jesus. Alai, na laho mangalului sala ni Jesus do nasida.

Diboto Jesus do na di roha ni nasida. Diboto Jesus do naung dibahen nasida aturan na mangorai halak karejo di ari Sabbat. Alai, sasintongna ndang songon i didok na tarsurat i. (2 Musa 20:8-10) Nunga jotjot sogo roha ni nasida tu Jesus, ala sai dibahen Jesus do angka na denggan di ari Sabbat. Alai saonari, lam sogo ma roha ni nasida, ai didok Jesus do tu na marsahit i, “Hehe ma ho, ro ma tu tonga-tonga on.”​—Markus 3:3.

Dung i didok Jesus ma tu siboto surat dohot tu halak Parise i, “Molo adong biru-birumuna jala madabu tu lombang di ari Sabbat, ise sian hamu na so mambuat jala na so pakaluarhon biru-biru i sian i?” (Mateus 12:11) Arta na arga do di nasida biru-biru. Alani i, ndang pasombuon ni nasida di lombang sadari i biru-biru i. Ai boi do gabe mate jala gabe rugi nasida. Jala didok do di Surat na Badia, “Diparhamaol [manang, Diparrohahon] halak partigor i do hosa ni pinahanna.”​—Poda 12:10.

Dung i didok Jesus ma muse tu nasida, “Dao do ummarga jolma sian biru-biru! Alani i, boi do mangulahon na denggan di ari Sabbat.” (Mateus 12:12) Tangkas ma, tingki dipamalum Jesus na marsahit di ari Sabbat, ndang na mangalanggar patik ibana disi. Alani i, ndang boi disalahon nasida Jesus tingki i. Ai marasi roha do ibana jala dapot roha do hatana i. Gabe sai sip ma nasida.

Marsak jala lungun do roha ni Jesus mambege pandapot ni nasida i. Diida Jesus ma tu humaliangna, ninna ma tu baoa na marsahit i, “Patigor ma tanganmi.” (Mateus 12:13) Tingki dipatigor baoa i tanganna, malum ma ibana. Mansai las ma rohana. Alai songon dia do pangkilalaan ni angka halak na marsogo ni roha tu Jesus?

Pintor marsangkap ma nasida “dohot angka halak sian partai ni si Herodes laho mambunu [Jesus]”. (Markus 3:6) Ra adong do halak Saduse na dohot tu partai ni si Herodes. Sasintongna, ndang mardomu halak Saduse tu halak Parise. Alai ala laho mangalo Jesus nasida, gabe saroha ma nasida.