Jesus Mangalehon Roti dohot Sipasingot

Tingki i, di Dekapolis dope Jesus, di sabola timur Laut Galilea. Godang do ro mandapothon Jesus naeng manangihon ajaranna jala asa dipamalum. Diboan nasida do angka karanjang na balga na marisi sipanganon.

Dung i, dipaboa Jesus ma tu siseanna, “Asi do rohangku tu natorop on, ai nunga tolu ari nasida rap dohot ahu jala ndang adong sipanganon ni nasida. Molo husuru nasida mulak hape male nasida, olo ma pingsan annon nasida di dalan. Ai adong do sian nasida na ro sian na dao.” Didok siseanna i ma, “Sian dia ma dapot roti di inganan na lungun on asa butong natorop on?”​—Markus 8:2-4.

Didok Jesus ma, “Piga do roti na adong di hamu?” Didok siseanna i ma, “Pitu jala adong do manang na piga dengke na gelleng.” (Mateus 15:34) Disuru Jesus ma angka jolma i hundul. Dibuat ma roti dohot dengke i, ditangiangkon jala dilehon ma tu siseanna asa dibagihon. Mangan ma nasida sahat tu na butong! Adong do 4.000 halak baoa na mangan i, ndang dietong dope angka borua dohot dakdanak. Hape lobi dope pitu karanjang na balga sipanganon i.

Dung disuru Jesus mulak angka jolma i, marparau ma Jesus dohot angka siseanna i tu Magadan, na di sabola barat Laut Galilea. Disi, diuji halak Parise dohot halak Saduse do Jesus. Dipangido nasida do asa dibahen Jesus tanda halongangan na sian surgo.

Diboto Jesus do na di roha ni nasida i. Didok ma, “Molo dung botari, didok hamu do, ‘Denggan nama ari, ai nunga marrara langit,’ jala di manogot, didok hamu do, ‘Marrara do langit jala mangkolom, ngali ni ari nama jala ro nama udan.’ Diboto hamu do mangida ari holan mangida langit, alai ndang diboto hamu mangida tanda ni angka tingki on.” (Mateus 16:2, 3) Dipaboa Jesus ma tu nasida, na so adong be tanda halongangan bahenonna tu nasida asing ni tanda songon na masa tu Panurirang Jona.

Marparau ma muse Jesus dohot angka siseanna tu Betsaida di sabola timur laut ni Laut Galilea. Diboto angka sisean i ma holan sada nai nama roti ni nasida jala ndang sae i allangon ni nasida. Baru jumpang dope nasida tu halak Parise dohot tu halak Saduse, na dohot tu partai ni si Herodes. Alani i didok Jesus ma, “Manat ma hamu tu ragi ni halak Parise dohot tu ragi ni si Herodes.” Dirimpu angka sisean i do taringot tu ragi na nidok ni Jesus, ai lupa nasida mamboan roti allangon ni nasida. Gabe didok Jesus ma, “Boasa marsoal hamu taringot tu roti?”​—Markus 8:15-17.

Baru dope dilehon Jesus mangan marribu halak marhite tanda halongangan. Sasintongna, botoon ni sisean i do na so taringot tu roti na diarsakkon ni Jesus. Didok Jesus ma, “Na so diingot hamu do na hulehon i mangan 5.000 baoa marhite lima roti? Piga karanjang do lobi-lobina dipapungu hamu?” Didok nasida ma, “12 karanjang.” Didok Jesus ma muse, “Tingki hulehon mangan 4.000 baoa marhite pitu roti, piga karanjang na balga do lobi-lobina dipapungu hamu?” Didok nasida ma, “Pitu karanjang.”​—Markus 8:18-20.

Didok Jesus ma, “Boasa ndang diantusi hamu na so taringot tu roti na hudok?” Didok ibana ma muse, “Manat ma hamu tu ragi ni halak Parise dohot Saduse.”​—Mateus 16:11.

Gabe diantusi angka sisean i ma hata ni Jesus i. Dipangke Jesus do ragi laho manggombarhon hajahaton. Dos songon ragi na boi mambahen kambang sude adonan, “pangajarion” ni halak Parise dohot Saduse boi parohon jea. Alani i do dipasingot Jesus angka siseanna i.​—Mateus 16:12.