“Ndang Sian Portibi on Harajaonku”

1, 2. (a) Boasa angka halak di portibi on gabe tarbagi? (b) Sungkun-sungkun aha do na laho taulas?

NINNA sahalak donganta borua di Eropa Selatan, “Ndang tigor pamarentaon di negarangku sian najolo. Alani i, gabe dohot ma ahu tu kelompok na mangalo pamarenta. Teroris muse do hallethu.” Sahalak donganta di Afrika bagian Selatan paboahon boasa ibana mangulahon na jahat. Didok ibana, “Molo di ahu, holan margaku do na umjago. Dohot do ahu tu partai politik. Diajari do hami mamangke hujur laho mambunu halak na so sian partainami, nang pe samargangku.” Sahalak donganta di Eropa tengah mandok, “Sogo do rohangku tu halak sian negara na asing manang agama na asing. Alana ahu pe dipaimbar-imbar do.”

² Saonari on, lam godang do halak na mangadopi situasi songon angka pengalaman i. Nunga somal angka halak marbadai alani partai politik. Di godang negara, lam jungkat do angka halak tu halak na ro sian negara na asing. Jadi songon na didok Bibel, godang halak saonari “ndang olo mardos ni roha”. (2 Tim. 3:1, 3) Alani i, songon dia do asa boi halak Kristen marsada di tingki saonari on? Taparsiajari ma sitiruon sian Jesus. Di tingki i, godang halak na tarbagi ala marpihak tu politikna be. Di parsiajaran on, taalusi ma tolu sungkun-sungkun na mangihut: Boasa ndang olo Jesus dohot tu partai politik? Songon dia Jesus patuduhon molo naposo ni Debata ndang dohot tu partai politik? Jala songon dia Jesus mangajari hita asa unang marbadai?

3, 4. (a) Aha do na dihirim angka halak Jahudi? (b) Aha do pangkorhonna tu angka sisean ni Jesus?

³ Godang do halak na dijumpangi Jesus mangkirim asa malua sian pamarentaon ni halak Rom. Sada partai politik Jahudi na fanatik, i ma halak Zealot, manjujui halak asa mangalo tu pamarenta Rom. Halak Zealot on mangihuthon si Judas na sian Galilea. Dibahen ibana do godang halak gabe lilu. Mangangku do ibana sahalak messias. Sahalak sejarawan Jahudi, i ma si Yosefus paboahon na dijujui si Judas do halak Jahudi asa mangalo halak Rom. Jala molo adong halak Jahudi na manggarar pajak, didok do ibana “parbiar”. Ujungna dipamate halak Rom do ibana. (Ul. 5:37) Alani i, gabe marbadai do halak Zealot asa saut lomo ni roha ni nasida.

⁴ Mangkirim do godangan halak Jahudi tu haroro ni Messias. Dirimpu nasida, Messias i do na paluahon nasida sian halak Rom. Jala bahenonna ma halak Israel gabe bangso na balga songon najolo. (Luk. 2:38; 3:15) Ra, dirimpu nasida Messias i laho pajongjongkon sada harajaon di Israel. Jadi, angka halak Jahudi na di luat na asing pe gabe naeng mulak muse tu Israel. Si Johannes pandidi pe, disungkun ibana do Jesus, “Ho do na laho ro i, manang paimaonnami dope na asing?” (Mat. 11:2, 3) Ra dirimpu si Johannes, adong halak na asing muse na ro laho paluahon halak Jahudi sian halak Rom. Dung dipahehe Jesus, mangkatai do ibana tu dua siseanna na naeng laho tu Emmaus. Mangkirim do nasida asa dipalua sian pamarentaon ni Rom. (Jaha Lukas 24:21.) Dung i, disungkun angka apostel ma Jesus, “Pajongjongonmu do muse saonari pamarentaon ni Debata di Israel?”​—Ul. 1:6.

 5. (a) Boasa lomo roha ni halak Galilea asa Jesus na gabe raja ni nasida? (b) Songon dia Jesus patorangkon na sasintongna tu nasida?

⁵ Mangkirim do halak Jahudi asa disalpuhon Jesus sude hasusaan ni nasida. I do alana, lomo roha ni halak Galilea asa Jesus gabe raja di nasida. Didok rohanasida, Jesus do na boi gabe pamimpin na denggan. Ra, ala diida nasida do Jesus malo marjamita, boi pamalumhon na marsahit, jala boi mangalehon mangan 5.000 halak. Diboto Jesus do na di roha ni nasida i. Didok di Bibel, “Diboto Jesus ma na naeng paksaon ni nasida ibana gabe raja, alani i laho ma ibana muse tu dolok sahalakna.” (Joh. 6:10-15) Marsogotna i tingki ndang gaor be angka halak, dipatorang Jesus ma, ibana ro tu tano on ndang na laho paradehon sipanganon ni nasida ganup ari. Alai naeng mangajarhon taringot Harajaon ni Debata do ibana. Didok do tu nasida, “Unang ma karejo hamu tu sipanganon na olo busuk. Alai karejo ma hamu tu sipanganon na so olo busuk na parohon hangoluan saleleng ni lelengna.”​—Joh. 6:25-27.

 6. Songon dia do Jesus patuduhon na so olo ibana dohot tu politik ni portibi on? (Ida gombar di mula ni parsiajaran.)

⁶ Andorang so mate Jesus, diboto ibana, porsea do piga-piga siseanna na laho gabe raja ibana di Jerusalem. Dibahen Jesus ma tudosan taringot hepeng, asa diantusi nasida ndang na laho gabe raja ibana di Jerusalem. Tudosan i paboahon taringot “sahalak anak ni raja” na laho tu luat na dao, jala manggombarhon dirina do i. (Luk. 19:11-13, 15) Asing ni i, tangkas do dipaboa Jesus tu Pontius Latus, ndang dohot ibana tu partai politik. Disungkun si Latus do tu ibana, “Raja ni halak Jahudi do ho?” (Joh. 18:33) Ra, na mabiar do si Latus molo dijujui Jesus halak Jahudi asa mangalo halak Rom. Alai, dialusi Jesus do, “Ndang sian portibi on Harajaonku.” (Joh. 18:36) Ndang olo Jesus dohot tu politik, alana di surgo do harajaonna. Jala didok ibana, laho ‘paboaon hasintongan i’ do ulaonna di tano on.​—Jaha Johannes 18:37.

 7. Boasa maol pasidingkon politik sian rohanta?

⁷ Tangkas do diboto Jesus aha ulaonna. Ingkon songon i ma hita. Unang ma taihuthon manang tahalomohon partai politik, nang pe di bagasan rohanta sambing. Ndang mura mangulahon i. Songon na didok sahalak pengawas wilayah, lam garang do angka halak di hutana. Dirimpu angka halak, umjago do negarana, jala dumenggan do molo halak sian hutana na mamarenta. Didok pengawas wilayah i muse, “Alai, boi do angka dongan tongtong rap marsada, ala diharingkothon nasida do mamaritahon Harajaon ni Debata. Mangasahon Debata do nasida laho manalpuhon angka hajahaton dohot hasusaan na taadopi.”

 8. Aha do na masa tu halak Jahudi di tingki ni Jesus?

⁸ Lam godang diida halak hajahaton, lam tubu ma di roha ni nasida asa dohot tu politik. Di tingki ni Jesus, molo adong halak na manggarar pajak, didok do ibana nunga mamillit pamarentaon ni Rom. Si Judas sian Galilea mangalo tu pamarenta Rom, alana dibahen do pajak na mansai timbo tu rayat. Umpamana pajak arta, pajak tano, dohot jabu. Asing ni i, korupsi do angka sijalo pajak di tingki i, gabe lam susa ma situasina. Sipata, dilehon nasida do hepeng tu pamarenta asa boi nasida mandapot jabatan. Dung i korupsi ma nasida sagodang-godangna. Si Sakeus, sahalak kepala ni pajak di Jeriko gabe mamora ala timbo do dibahen ibana pajak tu angka halak.​—Luk. 19:2, 8.

9, 10. (a) Songon dia do alo ni Jesus naeng mambahen ibana asa marpihak tu sada partai politik? (b) Aha do na taparsiajari sian alus ni Jesus? (Ida gombar di mula ni parsiajaran.)

⁹ Dipangke angka alo ni Jesus do parsoalan taringot pajak on laho mambahen ibana gabe marpihak tu partai politik. Disungkun nasida do tu ibana taringot manggarar pajak. Tingki i, ingkon digarar halak Jahudi do pajak na argana sadinar. (Jaha Mateus 22:16-18.) Ndang lomo roha ni halak Jahudi manggarar pajak i, alana hira na gabe hatoban ni halak Rom do nasida. “Angka naposo ni si Herodes” manang na mangihuthon si Herodes, martujuan laho mangalului hasalaan ni Jesus. Molo didok Jesus ndang pola manggarar pajak, gabe didok ma ibana musu ni pamarenta Rom. Alai molo didok ibana ingkon digarar i, gabe ndang adong be na mangihuthon ibana. Jadi aha ma na diulahon Jesus?

¹⁰ Marbisuk do Jesus di situasi sisongon i. Didok ibana do, “Lehon ma tu Kesar ampuna ni Kesar jala tu Debata ampuna ni Debata.” (Mat. 22:21) Diboto ibana do godang sijalo pajak na korupsi, alai ndang gabe i na sai diida ibana. Harajaon ni Debata i do na rumingkot di Jesus, alana holan i do na boi manalpuhon hasusaan ni jolma. Gabe sitiruon do Jesus di hita. Unang ma hita marpihak tu partai politik, nang pe taida hira na adong sada partai na denggan. Jadi halak Kristen tongtong ma mangingot holan Harajaon ni Debata do na sintong. Alani i, unang ma hita mangomentari manang paroa-roahon nasida.​—Mat. 6:33.

11. Aha do na boi taulahon laho mangurupi na asing asa unang di paimbar-imbar?

¹¹ Godang do donganta na hea marhasil di politik tingki ndang Sitindangi dope nasida. Umpamana, sahalak donganta borua di Inggris hea marsiajar ilmu sosiologi tingki kuliah, jala dijujui do angka halak asa mangihuthon pandapotna taringot politik. Didok ibana, “Marsitutu do ahu asa boi bebas halak kulit hitam, alana nunga susa hami saleleng on ala dipaimbar-imbar. Alai nang pe boi monang ahu tingki marsoal taringot i, tong do ujungna mandele ahu. Alai sasintongna, ingkon sian rohanta be do tapauba asa unang paimbar-imbarhon halak. Tingki mulai marsiajar Bibel, gabe huantusi ma na ingkon marhamubaon do ahu.” Donganta na kulit putih do na mangurupi ibana asa muba. Didok ibana do muse, “Saonari, gabe perintis biasa do ahu di huria bahasa isyarat, jala marsitutu do ahu asa boi mangurupi marragam halak.”

12. Aha do “ragi” na dipaboa Jesus asa dipasiding angka siseanna?

¹² Di jaman ni Jesus, dohot do angka pamimpin agama marpolitik. Didok di buku na marjudul Daily Life in Palestine at the Time of Christ, dos do angka kelompok agama na diihuthon halak Jahudi songon partai politik. Alani i ma, didok Jesus, “Manat ma hamu tu ragi ni halak Parise dohot tu ragi ni si Herodes.” (Mrk. 8:15) Tingki didok Jesus taringot si Herodes, ra na manaringoti partai ni si Herodes do ibana. Asing ni i, adong muse partai ni halak Parise, na mangkalomohon asa bebas halak Jahudi sian Pamarentaon Rom. Jala di buku Mateus pe, dipaingot Jesus do angka siseanna taringot halak Saduse. Lomo do roha ni halak Saduse on asa tongtong halak Rom na mamarenta, asa boi dapot ni nasida jabatan na denggan. Dipaingot Jesus do angka siseanna asa pasidingkon “ragi”, manang ajaran ni na tolu partai i. (Mat. 16:6, 12) Alai na porlu taingot, dipaboa Jesus do on ndang sadia leleng dungkon dipangido halak ibana gabe raja.

13, 14. (a) Songon dia do politik dohot agama boi parohon hajahaton? (b) Boasa ndang marhak hita mambalos hajahaton? (Ida gombar di mula ni parsiajaran.)

¹³ Molo dohot do angka agama marpolitik, boi do gabe tubu hajahaton. Alani i, diajarhon Jesus do tu angka siseanna asa unang dohot marpolitik. I do alana, sintua ni malim dohot halak Parise naeng mambunu Jesus. Alana, mabiar do nasida molo lam godang halak na mangihuthon Jesus. Gabe ndang adong be annon na mangihuthon nasida. Gabe ndang adong be agama dohot politik. Jadi didok nasida ma, “Molo tapasombu ibana songon i, sude ma halak porsea tu ibana, gabe ro ma halak Rom mangarampas bagas joronta on dohot bangsonta.” (Joh. 11:48) Jadi, diatur si Kayapas ma asa dibunu Jesus.​—Joh. 11:49-53; 18:14.

¹⁴ Dung borngin, disuru si Kayapas ma angka tentara laho manangkup Jesus. Diboto Jesus do na laho dibunu ibana. Jadi, tingki borngin na parpudi, disuru Jesus ma angka siseanna asa mambuat podang. Dipangke ibana ma i laho mangalehon parsiajaran na ringkot tu nasida. (Luk. 22:36-38) Dung i, ro ma piga-piga halak manangkup Jesus. Gabe muruk ma si Petrus jala disintak ibana ma podangna laho mangalo nasida. (Joh. 18:10) Alai didok Jesus do, “Pasarung ma podangmi, ai manang ise manintak podang, mate do bahenon ni podang.” (Mat. 26:52, 53) Aha do parsiajaran na ringkot na dipaboa Jesus disi? Ndang boi nasida gabe bagian ni portibi on. On do na ditangiangkon Jesus di bornginna i. (Jaha Johannes 17:16.) Holan Debata do na marhak manguhum angka na jahat.

15, 16. (a) Songon dia Hata ni Debata mangurupi halak Kristen asa unang marbadai? (b) Aha do na diida Jahowa di portibi on saonari?

¹⁵ Sahalak donganta borua di Eropa selatan na dipaboa nangkin mandapot parsiajaran na sarupa. Didok ibana, “Gabe huboto ma, ndang dapotta na denggan molo marbadai hita. Godang do halak na mate alani i. Adong na gabe marsak. Las hian do rohangku ala nunga huboto sian Bibel, Debata do na boi parohon hadameon tu tano on. Nunga 25 taon ahu paboahon barita na uli on tu na asing.” Jala donganta sian Afrika Selatan nangkin, gabe dipangke ibana do “podang na sian tondi parbadia”, i ma Hata ni Debata. (Eps. 6:17) Saonari, marbarita do ibana tu sude halak, ndang soal sian dia haroro ni nasida. Jala sahalak donganta borua na di Eropa tengah gabe Sitindangi Ni Jahowa do ujungna. Jala muli do ibana tu sahalak baoa sian suku na dihasogohon ibana hian. Boi do nasida muba ala Kristus do na ditiru nasida.

¹⁶ Ringkot do marhamubaon! Bibel mandok, jolma i dos songon parhasak ni laut na so hea dame. (Jes. 17:12; 57:20, 21; Pgk. 13:1) Holan mambahen gaor do politik on, jala gabe tubu do parbadaan alani i. Alai molo hita, tongtong do dame jala marsada. Nang pe diida Jahowa tarbagi angka halak saonari, alai las hian do rohaNa ala tongtong marsada angka naposoNa.​—Jaha Sepania 3:17.

17. (a) Aha do tolu cara asa boi hita tongtong marsada? (b) Aha do na laho taulas di parsiajaran na mangihut?

¹⁷ Nunga taparsiajari be tolu cara asa boi tongtong marsada: (1) Pos ma rohanta, holan Harajaon ni Debata do na boi parohon hadameon tu tano on, (2) ndang porlu hita dohot tu politik, jala (3) unang ma marbadai manang mangulahon hajahaton. Alai adong muse na boi mambahen hita gabe ndang marsada, i ma molo tapaimbar-imbar halak. Di parsiajaran na mangihut, taulas ma songon dia halak Kristen na parjolo marsitutu asa unang paimbar-imbarhon halak.