Pingkiran ni Ise do na Ditiru Hamu?

1, 2. (a) Aha do alus ni Jesus tingki dijujui si Petrus ibana asa mamingkirhon dirina sandiri? (Ida gombar di mula ni parsiajaran.) (b) Boasa songon i alus ni Jesus?

DIRIMPU siseanna laho patureon ni Jesus muse harajaon ni Israel. Hape didok Jesus, naeng disiksa nama ibana jala mate. Songgot ma roha ni angka siseanna i mambege hata ni Jesus. Didok si Petrus ma, “Asi ma roham tu dirim Tuan. Ndang na laho masa i tu ho.” Didok Jesus ma tu ibana, “Laho ma ho tu pudingku Bolis! Batu partuktuhan do ho di ahu, ai ndang pingkiran ni Debata dipingkirhon ho, pingkiran ni jolma do.”​—Mat. 16:21-23; Ul. 1:6.

² Sian pangkataion ni nasida, tangkas do dipaboa Jesus mansai imbar do pingkiran ni Jahowa sian angka halak na di portibi on. (1 Joh. 5:19) Dijujui si Petrus do asa dipingkirhon Jesus dirina sandiri, dos songon angka halak di portibi on. Alai diboto Jesus do na ingkon rade ibana laho manaon hasusaan jala mate songon na dipangido Jahowa. Sian alus ni Jesus, tangkas ma tarida molo ibana maniru pingkiran ni Jahowa, ndang pingkiran ni portibi on.

 3. Boasa ndang mura maniru pingkiran ni Jahowa?

³ Pingkiran ni ise do na tatiru? Pingkiran ni Jahowa do manang pingkiran ni angka halak di portibi on? Sude halak Kristen, ingkon marsitutu do mangulahon lomo ni roha ni Debata. Marsitutu do hamu maniru pingkiran ni Jahowa? Sasintongna, ndang mura maniru pingkiran ni Jahowa. Alana, umgodang do halak di humaliangta na so maniru pingkiran ni Jahowa. (Eps. 2:2) Jala halak di portibi on pe holan mangkaringkothon dirina sandiri. Alani i, molo ndang manat hita boi do gabe taihuthon pingkiran ni nasida.

 4. (a) Aha do na masa molo tapaloas angka halak di portibi on manegai pingkiranta? (b) Aha do na laho taulas di parsiajaran on?

⁴ Molo tapaloas pingkiran ni angka halak di portibi on manegai pingkiranta, boi do hita gabe mamingkirhon dirinta sandiri. Ujungna, ndang taantusi be dia na denggan dohot na so denggan. (Mrk. 7:21, 22) Ringkot do taparsiajari “pingkiran ni Debata” ndang “pingkiran ni jolma”. Di parsiajaran on, taulas ma songon dia maniru pingkiran ni Jahowa. Jala boasa marlaba mangulahon i. Alana molo taulahon i, ndang mambahen hita gabe susa. Taparsiajari ma muse songon dia carana asa unang maniru pingkiran ni portibi on. Di parsiajaran na mangihut, taulas ma songon dia carana asa tongtong maniru pingkiran ni Jahowa.

 5. Boasa piga-piga halak ndang lomo rohana diatur halak na asing?

⁵ Piga-piga halak, ndang lomo rohana diatur halak na asing. Didok nasida, “Lomongku do di ahu.” Ala didok roha ni nasida, ingkon nasida sandiri do na mamillit dia lomo ni rohana. Ndang lomo rohana di atur halak na asing jala ndang olo ibana dipaksa asa sarupa songon nasida.a

 6. (a) Aha do na dilehon Jahowa tu hita? (b) Alai boi do gabe lomo-lomonta?

⁶ Nang pe tatiru pingkiran ni Jahowa, boi do bebas hita mamillit. Didok di 2 Korint 3:17, “Didia adong tondi parbadia ni Jahowa, disi do adong haluaon.” Dilehon Jahowa do tu hita kebebasan laho mamillit aha pe na dihalomohon rohanta. Sasintongna, songon i do hita ditompa. Alai nang pe songon i, adong do aturan dilehon Jahowa. (Jaha 1 Petrus 2:16.) Jadi tingki mambahen keputusan, lomo do roha ni Jahowa asa tapangke prinsip ni Bibel. Molo taihuthon i, gabe susa do hita? Manang, adong do labana tu hita?

7, 8. Gabe susa do hita molo maniru pingkiran ni Jahowa? Paboa ma sada tudosan.

⁷ Pingkirhon ma tudosan on. Angka natua-tua, sai diajarhon do na denggan tu ianakhonna. Asa boi denggan ngolu ni nasida, diajari do nasida asa jujur, ringgas jala parduli tu halak na asing. Tontu marlaba do on tu nasida. Ra dung magodang, ndang rap be nasida dohot natua-tuana. Alani i, boi do nasida mamillit aha pe na dihalomohon rohana. Molo diulahon nasida poda ni natua-tuana, boi ma nasida mambahen keputusan na denggan jala ndang gabe susa ngoluna.

⁸ Dipatudos do Jahowa songon natua-tua na burju. Lomo do rohana asa denggan ngolunta. (Jes. 48:17, 18) Diajarhon do tu hita angka prinsip ni Bibel asa denggan pangalahonta tingki maradophon na asing. Dijujui do hita asa maniru pingkiran ni Jahowa jala mangihuthon podana. On ndang mambahen hita susa. Gariada boi do mangurupi hita asa mambahen keputusan na denggan. (Ps. 92:6; Poda 2:1-5; Jes. 55:9) Gabe las ma rohanta tu keputusan na tabahen i. (Ps. 1:2, 3) Jadi godang do labana maniru pingkiran ni Jahowa!

9, 10. Aha do na patuduhon, dumenggan do pingkiran ni Jahowa sian pingkiran ni jolma?

⁹ Boasa olo hita maniru pingkiran ni Jahowa? Ala umbisuk do Jahowa sian sasudena. Angka halak di portibi on, godang do na mangalehon poda songon dia asa marpangalaho na denggan, asa martua keluarga, asa godang hepeng, dohot angka na asing. Alai, godangan sian poda ni nasida i, maralo do tu lomo ni roha ni Jahowa. Umpamana, dijujui do angka halak asa holan mamingkirhon dirina sandiri. Asing ni i, adong na mandok ndang sala mangulahon seks na so patut. Dijujui do angka na mardongan saripe asa marsirang molo ndang marlas ni roha be dohot dongan saripena. Maralo do on tu poda ni Bibel. Jadi, dumenggan do poda ni halak di portibi on sian poda ni Bibel?

¹⁰ Didok Jesus, “Tarida do bisuk sian parniulaonna.” (Mat. 11:19) Nang pe nunga lam jago teknologi, alai ndang boi i pasaehon hasusaanta, songon porang, paimbar-imbarhon suku, dohot hajahaton. Adong muse na mandok, ndang sala mangulahon seks na so patut. Hape boi do i gabe mambahen sursar keluarga, mambahen sahit, dohot hasusaan na asing. Molo songon i, marlaba do poda ni Jahowa? Halak Kristen na mangihuthon poda ni Jahowa, boi mangkilala keluargana lam martua, lam sehat, jala boi marale-ale dohot sude dongan sahaporseaon di liat portibi on. (Jes. 2:4; Ul. 10:34, 35; 1 Kor. 6:9-11) On patuduhon, dao do dumenggan pingkiran ni Jahowa sian pingkiran ni jolma.

11. Pingkiran ni ise do na ditiru si Musa, jala aha do hasilna?

¹¹ Angka naposo ni Jahowa najolo pe, diboto nasida do molo Jahowa umbisuk sian sasudena. Umpamana, nang pe diajarhon tu si Musa “sude habisuhon ni Mesir”, alai diboto ibana do molo habisuhon na sintong ro sian Jahowa. (Ul. 7:22; Ps. 90:12) I do alana didok si Musa, “Pabotohon ma tu ahu dalanmu.” (2 Mus. 33:13) Ala ditiru si Musa do pingkiran ni Jahowa, gabe dipangke Jahowa ma ibana laho pasauthon sangkapna. Gabe ditanda do si Musa sahalak na porsea.​—Heb. 11:24-27.

12. Tingki mambahen keputusan, pingkiran ni ise do na ditiru si Paulus?

¹² Halak na malo do si Paulus. Timbo do singkolana jala diboto ibana do bahasa Heber dohot bahasa Junani. (Ul. 5:34; 21:37, 39; 22:2, 3) Nang pe songon i, ndang diihuthon ibana habisuhon ni portibi on. Alai tingki mambahen keputusan, diihuthon ibana do Hata ni Debata. (Jaha Ulaon ni Apostel 17:2; 1 Korint 2:6, 7, 13.) Ujungna, gabe marhasil do ibana di ulaon marbarita. Jala pos do rohana sai na dapotna do pangkirimon i.​—2 Tim. 4:8.

13. Ise do na ingkon mamillit asa maniru pingkiran ni Jahowa?

¹³ Tangkas ma, pingkiran ni Jahowa do na umbisuk sian pingkiran ni angka halak di portibi on. Marlas ni roha jala marhasil ma hita molo taihuthon uhum ni Debata. Alai, ndang dipaksa Jahowa hita laho maniru pingkiranna. “Naposo haposan” dohot angka sintua pe, ndang olo mangatur pingkiranta. (Mat. 24:45; 2 Kor. 1:24) Alani i, hita sandiri do na ingkon mamillit laho maniru pingkiran ni Jahowa. Songon dia carana mangulahon i?

14, 15. (a) Aha do na ingkon taulahon asa boi maniru pingkiran ni Jahowa? (b) Boasa ndang olo hita maniru pingkiran ni halak di portibi on? Paboa ma tudosanna.

¹⁴ Rom 12:2 mandok, “Unang ma tiru hamu angka halak na di portibi on. Alai muba ma hamu marhite paubahon pingkiranmuna. Asa diboto hamu lomo ni roha ni Debata na denggan, na sintong, jala na palashon rohana.” Dipaboa di ayat on, songon dia pe caranta marpingkir andorang so marsiajar Bibel, boi do i muba hombar tu pingkiran ni Debata. Nang pe nunga somal hita mambahen keputusan mangihuthon cara marpingkir ni keluarga manang pengalamanta, boi do i muba hombar tu angka na jotjot tapingkirhon. Alani i, molo sai tarimangi pingkiran ni Jahowa, gabe pos ma rohanta na dumenggan do pingkiranna. Gabe taronjar ma rohanta maniru pingkiran ni Jahowa.

¹⁵ Asa boi tatiru pingkiran ni Jahowa, ‘unang ma tatiru angka halak na di portibi on’. Lapatanna, unang ma tatonton, tajaha, manang tabege angka na dihasogohon Debata. Rimangi ma tudosan on. Sasahalak na lomo rohana asa tongtong sehat, ingkon diallang do sipanganon na marvitamin. Tontu, ndang allangonna be angka sipanganon na so sehat manang na basi. Suang songon i ma hita, molo naeng maniru pingkiran ni Jahowa, unang ma tapamasuk angka na so denggan tu pingkiranta.

16. Pingkiran na songon dia do na ingkon tapasiding?

¹⁶ Ndang boi pintor tapasiding sude pingkiran ni angka halak na di portibi on. (1 Kor. 5:9, 10) Alana tingki marbarita hita, olo do tabege pandapot manang haporseaon na sala sian angka halak. Nang pe ndang boi pintor tapasiding sude pingkiran na sala i, unang ma tapamasuk tu rohanta jala unang sai tapingkiri i. Unang ma satolop hita dohot nasida. Songon Jesus, pintor tapasiding ma pingkiran ni Sibolis. Molo tapasiding angka pingkiran na so denggan sian angka halak di portibi on, na manjaga pingkiranta do hita disi.​—Jaha Poda 4:23.

17. Songon dia do hita pasidingkon angka na so denggan na sian portibi on?

¹⁷ Didok Bibel, molo marale-ale hita tu halak na so manomba Jahowa, boi do gabe tatiru pingkiran ni nasida. Alani i, ingkon manat ma hita mamillit ise na gabe donganta. (Poda 13:20; 1 Kor. 15:12, 32, 33) Jala manat ma hita tingki mamillit hiburan. Tapasiding ma angka hiburan na paboahon taringot evolusi, kekerasan dohot angka ulaon na rorang. Molo taulahon i, on patuduhon na so olo do hita pamasukkon angka ‘na maralo tu parbinotoan taringot Debata’ tu pingkiranta.​—2 Kor. 10:5.

18, 19. (a) Boasa ingkon manat hita mamillit hiburan? (b) Sungkun-sungkun aha do na boi tasungkun tu dirinta, jala boasa?

¹⁸ Godang do pingkiran ni halak di portibi on na sala na so pola tangkas tarida. Alani i ingkon tapasiding do i. Umpamana, adong do barita na mandok angka na denggan sian politik. Asing ni i, adong do muse barita taringot sasahalak naung marhasil jala diangkui angka halak di portibi on. Piga-piga film dohot buku mandok “ahu do na rumingkot” manang “keluargangku do na rumingkot”. Alani i, gabe godang do halak mangihuthon pandapot sisongon i. Alai maralo do i tu Bibel. Dipaboa do di Bibel, molo umholong rohanta tu Jahowa, gabe marlas ni roha do hita dohot keluarganta. (Mat. 22:36-39) Asing ni i, ra adong do buku cerita ni dakdanak dohot film kartun na patuduhon angka ulaon na rorang. Jala lam leleng gabe ditiru nasida do i.

¹⁹ Ndang sude hiburan sala. Alai andorang so taihuthon i, ingkon tasungkun do rohanta. ‘Boi do huboto na dia hiburan na sala? Hujaga do diringku dohot ianakhonku sian angka sitontonon dohot sijahaon na sala? Huurupi do ianakhonku asa unang tarihut-ihut tu pingkiran na sala marhite na diida dohot na dibege nasida?’ Molo taboto do imbar ni pingkiran ni Debata sian pingkiran ni angka halak di portibi on, gabe ndang tarihut-ihut be hita tu “angka halak na di portibi on”.

20. Aha do na manontuhon ise na taihuthon?

²⁰ Taingot ma, holan dua do haroroan ni informasi. Sada sian Jahowa jala sada nai sian Sibolis. Ise do na diihuthon hamu? Alusna, hamu do na mamillit informasi na dia do na diihuthon hamu. Molo diihuthon hamu do pingkiran ni angka halak di portibi on, gabe holan dirimuna ma na dipingkirhon hamu. Alani i, manat ma hita mamillit aha na tajaha, tatonton, tabege dohot na tapingkirhon.

21. Aha do na laho taulas di parsiajaran na mangihut?

²¹ Di parsiajaran on, nunga taparsiajari songon dia maniru pingkiran ni Jahowa. Jala taparsiajari do muse songon dia laho pasidingkon pingkiran ni portibi on. Ingkon tarimangi do sude na diajarhon Jahowa asa boi tatiru Ibana. Di parsiajaran na mangihut taulas ma songon dia laho mangulahon i.