Nunga Saratus Taon Harajaon ni Debata Mamarenta!

 1. Sadia ringkot do ulaon marbarita di Jesus? Patorang ma.

LOMO do roha ni Jesus mamaritahon Harajaon ni Debata. Tingki di tano on Jesus, taringot Harajaon ni Debata ma na umjotjot dibaritahon ibana. Lobi sian 100 hali Jesus manaringoti Harajaon ni Debata tingki marbarita. On patuduhon, mansai ringkot do Harajaon ni Debata di Jesus.​—Jaha Mateus 12:34.

 2. Sadia godang do na manangihon Jesus tingki dilehon ibana parenta di Mateus 28:19, 20, jala boasa tadok songon i?

² Dung hehe Jesus sian hamatean, dipataridahon ma dirina tu lobi sian 500 sisean. (1 Kor. 15:6) Ra, laos di tingki on ma Jesus paboahon parenta laho marbarita na uli tu ”saluhut bangso”. Alai ndang mura mangulahon on.a Jesus mandok tongtong ma nasida marbarita na uli sahat tu ”ajal ni hasiangan on”. Alani i, tingki marbarita hita, parsidohot ma hita manggohi surirang on.​—Mat. 28:19, 20.

 3. Aha do tolu na mangurupi hita asa denggan marbarita na uli?

³ Dung dilehon Jesus parenta laho marbarita na uli, didok ma, ”Sai na dongananku do hamu.” (Mat. 28:20) Jadi, Jesus marjanji tu na mangihuthon ibana, na lehononna tudutudu jala urupanna nasida marbarita na uli di liat portibi on. Tongtong do Jahowa mangaramoti hita. Ibana mangalehon nasa na ”denggan” laho mangurupi hita marbarita na uli. (Heb. 13:20, 21) Di artikel on, taparrohahon ma tolu na mangurupi hita asa denggan marbarita: (1) dilehon do alat tu hita, (2) dilehon metode na laho tapangke, jala (3) diparade do singkola laho mangalatik hita marbarita. Na parjolo, taparrohahon ma angka alat na tapangke saleleng 100 taon on.

 4. Sadia godang do alat na mangurupi hita marbarita na uli?

⁴ Ulaon marbarita dipatudos Jesus songon manabur boni di inganan na marasingasing. (Mat. 13:18, 19) Laho paradehon inganan, sahalak pangula mamangke marragam alat. Songon i ma nang hita, dilehon Jesus do marragam alat na mangurupi hita marbarita na uli. Deba sian alat i ndang dipangke be sahat tu sadari on. Alai, sude alat on mangurupi hita lam denggan marbarita na uli.

 5. Aha do kartu kesaksian i, jala songon dia do mamangke kartu on?

⁵ Taon 1933, parbarita mamangke kartu kesaksian laho marbarita na uli. Gelleng do kartu on jala marisi barita na uli na jempek. Sipata, kartu na baru dicetak marisi barita na imbaru. Sahalak donganta baoa na margoar si Erlenmeyer mamangke kartu on marbarita tingki marumur sampulu taon dope ibana. Didok ma, ”Tingki pasarhon kartu on nidok ma, ’Olo do hamu manjaha barita na di kartu on?’ Dung dijaha parjabu, nilehon ma lektur dung i, laho ma iba.”

 6. Songon dia do kartu kesaksian mangurupi parbarita?

⁶ Kartu kesaksian on mangurupi angka parbarita. Umpamana, diurupi do angka parbarita na parila ala ndang diboto nasida aha na laho sipasahatonna nang pe lomo roha ni nasida laho marbarita. Parbarita na asing na barani diurupi asa marbisuk pasahathon barita na uli, asa unang magodangku na laho dipasahat. Jadi, kartu kesaksian on mangurupi sude parbarita asa lam denggan marbarita na uli.

 7. Aha do pigapiga na mangambati hita mamangke kartu kesaksian?

⁷ Sai adong do na mangambati tingki mamangke kartu kesaksian. Donganta borua si Grace Estep mandok, ”Sipata, olo do didok parjabu tu hami, ’Aha do huroa na didok ni kartu on? Boi do paboaonmu tu ahu?’” Pigapiga parjabu ndang boi manjaha aha na adong di kartu kesaksian. Na deba, holan dijalo kartu i, pintor ditutup pintuna. Na debana i, ndang lomo rohana tu barita i, gabe diribahi ma kartu i. Nang pe godang na mangambati, alai kartu kesaksian on, mangurupi parbarita pasahathon barita na uli jala ditanda ma nasida parbarita Harajaon.

 8. Songon dia do mamangke fonograf tingki marbarita? (Ida gombar di mula ni parsiajaran.)

⁸ Alat na asing na dipangke dung taon 1930, i ma fonograf. Jotjot do angka Sitindangi mandokkon on si Aron, ala marhite alat i, nasida boi marbarita na uli. (Jaha 2 Musa 4:14-16.) Molo olo parjabu manangihon, diputar parbarita ma jamita na jempek, dung i, dilehon ma pigapiga lektur. Olo do pungu sada keluarga laho manangihon jamita on! Taon 1934, Lembaga Menara Pengawal mambahen fonograf laho dipangke marbarita. Jala direkam ma 92 jamita na marasingasing.

 9. Sadia denggan do fonograf dipangke tingki marbarita?

⁹ Tingki si Hillary Goslin manangihon sada jamita, dipinjam ibana ma fonograf i saleleng saminggu, asa dipaboa ibana barita na uli i tu angka donganna. Adong ma pigapiga donganna na olo marsiajar hasintongan jala tardidi. Dua boru ni si Goslin pe parsidohot tu Singkola Gilead jala gabe missionaris. Songon kartu kesaksian, fonograf on mangurupi angka parbarita lam denggan pasahathon barita na uli. Dung i, dibahen ma muse Singkola Panghobasion Teokratis. Marhite singkola on, diurupi ma angka naposoNa asa denggan mangajari tingki marbarita.

10, 11. Songon dia do koran dohot radio dipangke marbarita na uli? Jala boasa denggan mamangke metode on?

¹⁰ Mahite tudutudu ni Jesus, naposo ni Debata mamangke marragam metode tingki marbarita. Ringkot do mamangke metode on tingki otik dope parbarita. (Jaha Mateus 9:37.) Umpamana, di tingki naung salpu tapangke do koran pasahathon barita na uli. Ganup minggu donganta si Russell manongos jamita tu na pabinsarhon koran. Dung i, nasida ma na manongos jamita on tu koran na adong di Amerika Serikat, Eropa dohot Kanada. Mulai sian taon 1913, jamita ni donganta si Russell nunga dipabinsar di bagasan 2.000 koran jala na manjaha hirahira 15.000.000 halak!

¹¹ Dipangke do radio laho pasahathon barita na uli. Tanggal 16 April 1922, donganta si Rutherford pasahathon jamita na parjolo di radio, jala na manangihon hirahira 50.000 halak. Ndang leleng dungkon i, nunga tapangke stasiun radio sandiri na digoari WBBR, jala program na parjolo dibahen tanggal 24 Februari 1924. Tanggal 1 Desember 1924, Watch Tower mandok, ”Ndang godang biaya marbarita marhite radio jala isara on denggan dipangke laho pasahathon barita na uli.” Songon koran, radio pe mangurupi hita pasahathon barita na uli tu godang halak nang pe di inganan na otik parbarita.

12. (a) Didia do hamu somal mamangke metode marbarita di inganan na ribur? (b) Aha do na mangurupi hamu asa barani tingki marbarita di inganan na ribur?

¹² Marbarita di inganan na ribur, i ma metode na denggan laho marbarita na uli saonari. Somal do dipangke metode on tingki marbarita di terminal bus, di stasiun kereta api, di parkiran dohot di pasar manang di mol. Maol do di hamu marbarita di inganan na ribur? Molo maol, martangiang ma mangido pangurupion. Parrohahon ma aha na didok ni donganta si Manera sahalak sintua kaliling, ”Molo tapangke alat dohot metode na baru laho marhobas tu Jahowa, on patuduhon hita marsitutu manomba Ibana. Tarida ma na marsihohot, jala lomo rohanta marhobas tu Jahowa songon na pinangidoNa.” Molo ndang mabiar hita jala tapangke metode na baru laho marbarita, lam togu ma haporseaonta tu Jahowa jala gabe parbarita na denggan ma hita.​—Jaha 2 Korint 12:9, 10.

13. Boasa denggan mamangke situs web tingki marbarita, jala aha do pengalamanmu tingki mamangke situs web on?

¹³ Tingki marbarita, godang do donganta marlas ni roha paboahon situs web jw.org. On boi mangurupi halak manjaha jala mandownload publikasi lobi sian 700 bahasa. Ganup ari, adong lobi sian 1,6 juta halak na mangida situs web on. Di tingki naung salpu, tapangke do radio laho pasahathon barita na uli tu inganan na diorai dohot na pinjil. Songon i ma nang saonari, tapangke do situs web laho marbarita di inganan sisongon on.

14. Aha do na dihaporluhon ni parbarita, jala aha do singkola na mangurupi nasida asa denggan marbarita?

¹⁴ Angka alat dohot metode naung taulas i, mansai denggan tapangke marbarita. Alai, porlu do dilatik angka parbarita asa lam denggan pasahathon barita na uli. Umpamana, sipata ndang olo parjabu manangihon barita na uli sian fonograf. Alai, na deba lomo do rohana marsiajar Bibel. Alani i, porlu ma parbarita mangantusi songon dia asa marbisuk jala denggan mangajari. Marhite tondi parbadia, donganta si Knorr mangida ringkot do angka parbarita diajari asa denggan marbarita. Alani i, sian taon 1943, dibahen ma Singkola Panghobasion Teokratis. Singkola on mangurupi asa lam denggan tingki marbarita.

15. (a) Paboa ma pigapiga pengalaman ni donganta tingki parjolo sahali pasahathon jamita di Singkola Panghobasion Teokratis. (b) Songon dia do janji ni Jahowa na disurat di Psalmen 32:8 masa di ngolumuna?

¹⁵ Godang angka donganta ndang somal mangkatai di jolo ni natorop. Donganta si Ramu mangingot songon dia ibana pasahathon jamitana na parjolo taon 1944. Jamita i, taringot si Doeg halak Edom. Ibana mandok, ”Masiantukan ma duguldugulhu ala humitir, tanganku dohot pamanganku pe sai hitirhitir.” Didok ibana muse, ”On ma parjolo sahali ahu mangkatai di jolo ni natorop, ndang boi denggan huulahon.” Nang pe maol, dohot do dakdanak mangalehon jamita di singkola on. Donganta si Manera mangingot aha na masa tingki sahalak baoa na poso mangalehon jamita na parjolo, ”Tingki dipungka ibana laho marjamita, taroktohon jala hosahosa ma ibana. Alai, ala tongtong marsitutu, boi do dipasahat ibana sude jamitana i.” Ra, olo do ndang parsidohot hamu mangalehon alus di parpunguan ala maila jala dihilala hamu ndang tolap mangulahon i. Molo i do na masa, pangido ma habaranion sian Jahowa. UrupanNa do hamu laho pasahathon bagianmu di Singkola Panghobasion Teokratis.​—Jaha Psalmen 32:8.

16. Aha do na tinuju ni singkola Gilead (a) najolo dohot (b) sian taon 2011?

¹⁶ Organisasi ni Debata paradehon Singkola Gilead. Sada sian na tinuju ni singkola on, i ma mangurupi angka parsiajar asa lam marhiras ni roha marbarita na uli. Singkola Gilead dibahen sian taon 1943, nunga 8.500 halak na dohot tu singkola on, jala ditongos tu 170 negara. Sian taon 2011, nunga dohot digokhon tu singkola Gilead angka perintis istimewa, sintua kaliling, anggota Betel dohot missionaris na so hea dope singkola Gilead.

17. Sadia denggan do pangkorhon ni singkola Gilead?

¹⁷ Adong do pangkorhon ni singkola Gilead on? Adong. Taparrohahon ma na masa di Jepang. Bulan Agustus 1949, hirahira sampulu halak do parbarita di negara on. Alai, di ujung ni taon i, ditongos ma 13 missionaris tusi. Saonari, nunga adong hirahira 216.000 parbarita di Jepang, jala lobi satonga sian nasida gabe perintis!

18. Aha do singkola na asing na diparade ni organisasi?

¹⁸ Godang do singkola na diparade tu hita, songon Singkola Panghobasion tu Harajaon, Singkola Dinas Perintis, Singkola tu Parbarita Harajaon, Singkola tu Sintua Kaliling dohot Tunggani Boruna, dohot Singkola Anggota Panitia Cabang dohot Tunggani Boruna. Angka singkola on mangalatik angka donganta baoa dohot borua. On patuduhon molo Jesus tongtong do mangalatik naposona.

19. Aha do didok donganta si Russell taringot ulaon marbarita, jala songon dia on masa saonari?

¹⁹ Harajaon ni Debata nunga mamarenta lobi sian 100 taon. Saleleng di tingki on, Rajanta Jesus Kristus mangalehon tudutudu taringot ulaon marbarita. Taingot ma di taon 1916, donganta si Russell porsea, molo barita na uli na pasahatonna do tu liat portibi on. Ibana mandok, ”Lam martambatamba do hamajuon jala tongtong dope martambatamba, ala nunga dipasahat barita Harajaon tu liat portibi on.” (Faith on the March, na disurat ni A. H. Macmillan, alaman 69) Sahat tu sadarion tongtong dope adong na marbarita na uli! Mandok mauliate do hita tu Jahowa, Debata ni hadameon na mangalehon nasa na tahaporluhon laho mangulahon lomo ni rohaNa!