Alus ni Jesus tu Sahalak Baoa na Mora

Tingki lewat Jesus sian Perea laho tu Jerusalem, ro ma sahalak baoa na mora, marsinggang di jolona. “Sahalak parhuaso” do ibana, ra ketua ni sinagoga jala anggota ni Sanhedrin. Disungkun ibana ma, “Guru na burju, aha do na ingkon huulahon asa dapothu hangoluan na salelengna?”​—Lukas 8:41; 18:18; 24:20.

Dialusi Jesus ma, “Boasa didok ho ahu na burju? Ndang adong na burju asing ni Debata.” Didok baoa i pe songon i ala lomo do roha ni angka pamimpin agama didok guru na burju. Nang pe denggan Jesus mangajar, alai holan tu Debata do boi dohonon “Na Burju”.

Didok Jesus ma tu ibana, “Molo naeng dapotmu hangoluan, tongtong ma oloi angka parenta ni Debata.” Disungkun baoa i ma, “Parenta na dia ma i?” Didok Jesus ma lima Parenta sian Patik, i ma asa unang mambunu, mangalangkup, manangko, mandok hata na so tutu, jala pasangaphon natua-tua. Dung i dipaboa Jesus ma muse, “Haholongi ma donganmu jolma doshon dirim.”​—Mateus 19:17-19.

Dialusi baoa i ma, “Nunga huulahon sudena i, aha dope na hurang?” (Mateus 19:20) Ra didok roha ni baoa i, adong dope na ingkon ulahononna asa boi mandapot hangoluan na saleleng ni lelengna. Mangida i gabe holong ma roha ni Jesus tu baoa i. (Markus 10:21) Alai adong dope na mangambati baoa i mandapot i.

Mansai holong do roha ni baoa i tu artana. Alani i didok Jesus ma, “Sada do na hurang di ho. Laho ma ho, gadis ma sude artam, jala lehon ma tu angka na pogos asa adong artam di banua ginjang. Dung i, ihuthon ma ahu.” Sasintongna boi do lehonon ni baoa i angka artana tu na pogos na so boi paulakkon i. Dung i, gabe sisean ni Jesus ma ibana. Alai dung dibege ibana na didok Jesus, gabe lungun ma rohana jala laho. Ala mansai holong rohana tu artana na godang i, gabe ndang ringkot be di ibana arta na ummarga. (Markus 10:21, 22) Didok Jesus ma, “Maol do parhepeng masuk tu Harajaon ni Debata!”​—Lukas 18:24.

Didok Jesus ma muse, “Ummura do unta masuk tu lubang ni jarum unang apala sahalak na mora masuk tu Harajaon ni Debata.” Gabe sungkun-sungkun ma angka siseanna mambege i jala didok ma, “Ise ma na boi malua?” Didok Jesus ma, “Na so tarbahen ni jolma, tarbahen ni Debata do.”​—Lukas 18:25-27.

Dung i didok si Petrus ma ndang songon baoa na mora i nasida, ninna ma, “Nunga hutadingkon hami sude laho mangihuthon ho, antong aha ma jaloonnami?” Dipaboa Jesus ma pasu-pasu na laho jaloon ni nasida, “Paimbaruonna ma sude tingki hundul Anak ni jolma i di habangsana na marmulia. Jala hamu angka na mangihuthon ahu, dohot do hundul di 12 habangsa laho manguhumi 12 marga ni Israel.”​—Mateus 19:27, 28.

Hangoluan di ari na naeng ro do maksud ni Jesus, i ma tingki dibahen muse tano on gabe Paradeiso. Tingki i, mamarenta ma tu tano on si Petrus dohot sisean na asing raphon Jesus. Sada hasangapon do on, jala ndang marisuang sude na niulahon ni nasida laho mandapot on!

Didok Jesus, adong dope pasu-pasu na boi dapot ni nasida, “Manang ise na manadingkon jabuna, manang tunggane boruna, manang haha anggina, manang natua-tuana, manang ianakhonna alani Harajaon ni Debata, jaloonna do gumodang di tingki on dohot hangoluan saleleng ni lelengna di tingki na naeng ro.”​—Lukas 18:29, 30.

Tudia pe angka sisean i laho, boi do hilalaon ni nasida holong ni angka dongan sahaporseaon. Dao do on ummarga sian hubungan keluarga. Alai baoa na mora i ndang dapotna pasu-pasu i, jala ndang dohot ibana tu Harajaon banua ginjang.

Didok Jesus ma muse, “Torop do na parjolo gabe na parpudi jala na parpudi gabe na parjolo.” (Mateus 19:30) Aha do lapatan ni i?

Pamimpin ni halak Jahudi do baoa na mora i. Alani i, dohot do ibana gabe “na parjolo” songon na nidok ni Jesus. Diulahon ibana do parenta ni Debata, jadi boi do ibana gabe sisean ni Jesus. Alai ummarga do di ibana artana. Hape angka jolma na pogos, diulahon nasida do na niajarhon ni Jesus. Ai diboto nasida, i do hasintongan jala dalan laho mandapot hangoluan. “Na parpudi” hian do nasida alai gabe “na parjolo”. Ai gabe raja ma nasida di surgo jala mamarenta rap dohot Jesus tu tano on.