Naeng Gabe na Umsangap do Angka Apostel

Dung sahat Jesus dohot angka siseanna di selatan ni Perea na jonok tu Jerusalem, laho ma nasida tu bariba ni Sunge Jordan na jonok tu kota Jeriko. Dohot do na asing mardalan rap dohot nasida laho mangarayahon Paska taon 33 M.

Parjolo ma Jesus mardalan sian angka sisean, ai naeng tibu ibana sahat tu Jerusalem laho mangarayahon Paska. Alai mabiar do angka sisean. Ai tingki mate si Lasarus jala borhat Jesus sian Perea tu Judea, didok si Tomas do tu angka sisean na asing, “Beta ma hita laho, asa rap mate hita dohot ibana.” (Johannes 11:16, 47-53) On patuduhon, olo do godang paraloan tu nasida disi. On do ra na mambahen mabiar angka sisean i.

Laho paradehon roha ni angka apostel i, didok Jesus ma, “Borhat do hita tu Jerusalem jala pasahatonna ma Anak ni jolma i tu malim kepala dohot tu siboto surat. Bahenon ni nasida ma tu ibana uhuman mate. Jala pasahaton ni nasida ma ibana tu angka bangso asa direhei, dilinsingi, diuhum di sada hau, jala hehe ma ibana di ari patoluhon.”​—Mateus 20:18, 19.

Nunga tolu hali dipaboa Jesus tu angka siseanna taringot tu hamatean dohot haheheonna. (Mateus 16:21; 17:22, 23) Alai di tingki i, dipaboa Jesus ma na laho diuhum mate ibana di hau. Ndang diantusi angka sisean i na nidok ni Jesus. Ai dirimpu nasida do na laho padengganon ni Jesus harajaon ni Israel. Jala dirimpu nasida di tano on do nasida manjalo hamuliaon dohot hasangapon rap dohot Kristus.

Dohot do omak ni si Jakobus dohot si Johannes di pardalanan i, ra si Salome do goarna. Digoari Jesus do apostel na dua i, “anak ni ronggur” alani semangat ni nasida. (Markus 3:17; Lukas 9:54) Lomo hian do roha ni apostel na dua on mandapot hasangapon di harajaon ni Kristus. Diboto omak ni nasida do i. Alani i, didapothon ibana ma Jesus jala marsinggang ma ibana paboahon pangidoanna. Disungkun Jesus ma, “Aha do na pinangidom?” Didok ibana ma tu Jesus, “Bahen ma hundul anakku na dua on, sada di siamunmu jala sada di hambirangmu di Harajaonmi.”​—Mateus 20:20, 21.

Sasintongna pangidoan ni si Jakobus dohot si Johannes do i. Hape nunga dipaboa Jesus na laho direhei jala marsitaonon ibana. Didok Jesus ma tu nasida, “Ndang diboto hamu manang aha na pinangidomuna. Tarinum hamu ma siinumon sian mangkuk panginumanki?” Dialusi nasida ma ibana, “Tarinum hami.” (Mateus 20:22) Alai tong dope ndang diantusi nasida na nidok ni Jesus.

Alani i didok Jesus ma tu nasida, “Tutu do nian, inumonmuna do sian mangkuk panginumanki, alai ndang ahu na manontuhon ise na hundul di siamun manang di hambirangku. Damang i do na mangalehon i tu halak naung pinaradena.”​—Mateus 20:23.

Muruk ma sisean na sampulu i mambege pangidoan ni si Jakobus dohot si Johannes. Olo do ra nunga hea nasida marsoal taringot ise na umsangap sian nasida sude. (Lukas 9:46-48) Alai, ndang diihuthon nasida dope poda ni Jesus asa gabe na umgelleng. Lomo hian dope roha ni nasida naeng mandapot hasangapon.

Alani i, dijou Jesus ma siseanna na 12 i jala lambok ma dipodai nasida, asa unang marsoal be taringot ise na umsangap. Didok ma, “Diboto hamu do, angka halak na gabe parhuaso ni angka bangso mamarenta do tu rayatna. Jala, marhuaso do angka na sangap ni nasida tu rayatna. Alai unang ma songon i hamu, manang ise na naeng umsangap ingkon gabe parhobas ma tu hamu. Jala manang ise sian hamu na naeng parjolo, ingkon gabe hatoban ni saluhut ma ibana.”​—Markus 10:42-44.

Dung i didok Jesus ma asa ditiru nasida ibana. Didok ma, “Songon Anak ni jolma i, ndang na sihobasan ibana umbahen na ro, alai na laho marhobas do jala mangalehon ngoluna bahen tobus ni torop jolma.” (Mateus 20:28) Saleleng tolu taon, gabe parhobas do Jesus tu angka halak. Gariada satongkin nai mate nama ibana humongkop jolma. Ingkon songon i ma nian angka siseanna. Ingkon gabe parhobas, ndang gabe sihobasan. Jala gabe na umgelleng, ndang na gabe umsangap.