Huaso ni Ise do Mambahen Tanda Halongangan I?

Dung sian jabu ni si Simon halak Parise i Jesus, borhat ma ibana marbarita tu Galilea. Di tingki i naeng dua taon nama Jesus marhobas tu Debata. Dohot do 12 apostelna rap dohot angka borua “naung pinaluana sian suru-suruan na jahat jala naung pinamalumna sian angka sahit”. (Lukas 8:2) Nasida, i ma si Maria Magdalena, si Susana dohot si Johanna tunggane boru ni na mangaradoti jabu ni Raja Herodes Antipas.

Lam godang do halak na manangihon Jesus. Alai, ndang sude nasida marlomo ni roha tu na niajarhonna i. Tarida ma i tingki dipamalum Jesus sahalak baoa na sinonggopan ni suru-suruan na jahat, na mapitung jala na bisu. Longang do roha ni godang jolma mangida i. Didok nasida ma, “On do nuaeng Anak ni si Daud i?”​—Mateus 12:23.

Marroan ma angka jolma tu jabu inganan ni Jesus mangajari. Alani godang ni jolma i, ndang sanga be Jesus mangan dohot angka siseanna. Alai, ndang sude jolma i na mamboto Jesus i “Anak ni si Daud”. Adong do angka siboto surat dohot halak Parise na ro sian Jerusalem tusi. Ndang na laho manangihon ajaran ni Jesus nasida, alai naeng mangalului hasalaanna do. Didok nasida do tu angka jolma na disi molo Jesus “na sinonggopan ni Beelsebul”, manang Sibolis jala “huaso ni pangulu ni suru-suruan na jahat” do dipangke ibana. (Markus 3:22) Tingki diboto keluarga ni Jesus na masa i, ro ma nasida laho mangalap Jesus. Boasa songon i?

Sahat tu tingki i, ndang porsea dope angka anggi ni Jesus molo ibana Anak ni Debata. (Johannes 7:5) Ndang porsea nasida molo Jesus na rap magodang dohot nasida di Nasaret i, mambahen gaor godang jolma. Alani i, didok nasida ma, “Nunga rintik be ibana.”​—Markus 3:21.

Tutu, boi do dipamalum Jesus sahalak baoa na sinonggopan ni suru-suruan na jahat i, na mapitung jala na bisu i. Ndang adong na boi mandok na so tutu na masa i. Alani i, didok angka siboto surat dohot halak Parise ma na so tutu taringot tu Jesus. Didok nasida ma, “Molo ndang alani Beelsebul pangulu ni suru-suruan na jahat, ndang na boi palaoonna suru-suruan na jahat i.”​—Mateus 12:24.

Diboto Jesus do na di roha ni angka siboto surat dohot halak Parise i. Didok Jesus ma, “Marumpak do ganup harajaon na tarbagi jala na marbadai. Dung i, ndang na laho hot ganup kota manang keluarga na tarbagi jala na marbadai. Songon i ma, molo Sibolis do na palaohon Sibolis, gabe tarbagi ma. Songon dia ma boi hot harajaonna?”​—Mateus 12:25, 26.

Sintong do hata ni Jesus i! Diboto halak Parise do adong halak Jahudi na boi mangusir suru-suruan na jahat. (Ulaon ni Apostel 19:13) Alani i, disungkun Jesus ma tu nasida, “Molo hupalao suru-suruan na jahat marhite Beelsebul, marhite ise ma siihuthon hamu palaohon i?” Sasintongna, paroa-roahon siihuthon nasida do hata ni halak Parise i. Didok Jesus ma muse, “Alai molo marhite tondi parbadia ahu palaohon suru-suruan na jahat, patuduhon naung ro do Harajaon ni Debata tu hamu.”​—Mateus 12:27, 28.

Hatorangan na nidok ni Jesus i patuduhon umbalga do huasona sian Sibolis. Didok Jesus ma, “Songon dia ma bahenon ni sasahalak masuk tu jabu ni sahalak baoa na gogo laho mambuat artana molo ndang jolo talionna baoa i? Dung i pe asa boi buatonna arta ni parjabu i. Manang ise na so rap dohot ahu, na mangalo ahu do i. Jala manang ise na so rap papunguhon dohot ahu, na paserakkon do i.” (Mateus 12:29, 30) Tangkas ma, dialo angka siboto surat dohot halak Parise do Jesus. Jala diambati nasida do halak asa ro tu Anak ni Debata, na mandapot huaso sian Jahowa. Alani i, na mangoloi Sibolis do nasida.

Dipasingot Jesus ma angka na mangalo i. Ninna ma, “Tarsesa do sude dosa ni jolma dohot sude insak-insak ni nasida. Alai, manang ise na mangaleai tondi parbadia, ndang tarsesa dosana saleleng ni lelengna.” (Markus 3:28, 29) Tangkas ma, marhite tondi parbadia do Jesus mambahen tanda halongangan i. Alani i, molo didok nasida do Jesus mambahen i marhite huaso ni Sibolis, dosa na balga do i!