Marhite Jesus​—Tarida Huaso ni Debata

 1. Boasa didok si Paulus ”hagogoon ni Debata . . . do Kristus i”?

BOI do taida mansai balga huaso ni Jahowa marhite angka parniulaon ni Jesus na palongang roha. Tingki di tano on dope Jesus, dibahen ibana godang tanda halongangan. Boi do tajaha angka tanda halongangan on di Bibel, jala boi do on patoguhon haporseaonta. (Mateus 9:35; Lukas 9:11) Tung balga do hagogoon na dilehon Jahowa tu Jesus, alani i ma didok apostel Paulus: ”Hagogoon ni Debata . . . do Kristus i.” (1 Korint 1:24) Alai aha do panghorhon ni tanda halongangan na binahen ni Jesus tu hita?

 2. Aha na boi taparsiajari sian angka tanda halongangan na binahen ni Jesus?

² Apostel Petrus paboahon molo Jesus mambahen angka ”halongangan.” (Ul. 2:22) Angka tanda halongangan on patuduhon tu hita na laho ulahonon ni Jesus di Pamarentaon Saribu Taon na naeng ro. Di tingki i, bahenon na ma tanda halongangan na umbalga na marlaba tu angka jolma di tano on. Tanda halongangan i pe, mangurupi hita mananda angka parange ni Jesus dohot Amana. Di parsiajaran on, taulas ma tolu tanda halongangan na binahen ni Jesus, jala songon dia tanda halongangan i manghorhon tu hita saonari dohot tu ari na naeng ro.

 3. (a) Aha do na masa umbahen diulahon Jesus tanda halongangan na parjolo? (b) Songon dia do Jesus patuduhon basa ni roha di huta Kana?

³ Tanda halongangan na parjolo na dibahen Jesus i ma di tingki adong pesta di huta Kana. Ndang taboto alani aha, alai ndang sae anggur tu angka na ro. Boi do maila na marulaon on molo ndang sae anggur i, alana ingkon rade do on dipatupa nasida. Ro do si Maria inong ni Jesus tu ulaon i. Dipangido ibana ma asa urupan ni Jesus nasida. Na porsea do si Maria margogo Jesus, umbahen dipangido ibana laho mangurupi nasida? Saleleng on, dirimangi si Maria surirang taringot anakna on, jala tangkas do diboto ibana na laho jouon do Jesus ”Anak ni Natumimbul i.” (Lukas 1:30-32; 2:52) Tangkas ma lomo do roha ni si Maria dohot Jesus mangurupi na marulaon i. Alani i marhite tanda halongangan dibahen Jesus ma 380 liter aek (100 gallon) gabe ”anggur na dumenggan.” (Jaha Johannes 2:3, 6-11.) Ingkon ulahonon ni Jesus do tanda halongangan on? Daong. Ala asi do rohana tu angka jolma di tingki i, umbahen diulahon ibana songon i, jala ibana pe maniru Amana na perdenggan basa.

4, 5. (a) Aha na boi taparsiajari sian tanda halongangan na parjolo na binahen ni Jesus? (b) Aha do na pinatudu ni tanda halongangan di Kana tu hita taringot ari na naeng ro?

⁴ Marhite tanda halongangan diparade Jesus anggur na dumenggan, na sae inumon ni sude angka na ro. Aha do na boi taparsiajari sian tanda halongangan on? Pardenggan basa situtu do Jahowa dohot Jesus; ndang holit nasida. Tanda halongangan on paposhon rohanta na disarihon Jahowa do panghilalaan ni angka jolma. On pe paposhon rohanta na laho pangkeon ni Jahowa do gogoNa laho paradehon godang sipanganon tu angka jolma di tano na imbaru, didia pe nasida maringanan.​—Jaha Jesaya 25:6.

⁵ Rimangi ma on! Paradeon ni Jahowa na ma sude na tahaporluhon. Rade ma jabu na denggan dohot sipanganon tu ganup halak. Las situtu ma rohanta jala tarapul panghilalaanta, molo tatatap sude angka na denggan na laho paradeon ni Jahowa tu hita di Paradeiso.

 6. Songon dia do Jesus mamangke gogona, jala songon dia boi tatiru ibana?

⁶ Ndang hea Jesus mamangke gogona holan alani na ringkot di ibana. Ingot ma aha na masa tingki dielaela Sibolis Jesus laho mambahen roti sian batu. Ditundalhon Jesus do elaela i. (Mateus 4:2-4) Alai, dipangke Jesus do gogona laho mangurupi angka jolma. Songon dia hita boi maniru parange ni Jesus na so manghaholongi dirina sandiri? Didok Jesus tu hita ingkon ”lehon hamu ma” pangurupion. (Lukas 6:38) Boi do taulahon on songon manamue angka dongan asa rap mangan di jabunta. Hita pe boi mamangke tingkinta dung sae parpunguan, manangihon dongan na laho pasahathon jamita latihan. Manang boi taurupi donganta tingki marbarita. Molo talehon rohanta mangurupi angka dongan nasa tolapta, na maniru basa ni roha ni Jesus ma hita disi.

 7. Sitaonon aha ma na sai tongtong adong di portibi na dirajai Sibolis?

⁷ Ndang holan di tingki on adong hapogoson. Hea do dipaboa Jahowa tu halak Israel ”ndang tagamon mansadi adong halak na pogos di tongatonga ni tano i.” (5 Musa 15:11) Marratus taon dungkon i, Jesus mandok: ”tongtong do adong na pogos di tongatonga muna.” (Mateus 26:11) Sai na tongtong do adong halak na pogos salelengna di tano on? Daong, na nidok ni Jesus disi, saleleng Sibolis dope na mangarajai tano on, sai adong do na pogos. Alai di tano na imbaru, imbar do hangoluanta disi ndang adong be halak na pogos. Rade ma sipanganon tu sude angka jolma jala sabas dihilala nasida!

8, 9. (a) Boasa dilehon Jesus marribu halak mangan? (b) Songon dia do panghilalaan muna mamboto tanda halongangan on?

⁸ Panurat Psalmen paboahon taringot Jahowa: ”Dibungka Ho do tanganmu pasombu lomo ni roha ni nasa na mangolu.” (Psalmen 145:16) Tingki di tano on dope Jesus, boi do tipak ditiru ibana Amana jala jotjot do disarihon ibana angka halak na manghaporluhon pangurupion. Ndang hea dibahen ibana tanda halongangan holan laho patuduhon gogona. Alai alani holongna do tu angka jolma. Taulas ma Mateus 14:14-21. (Jaha.) Sada tingki, ro ma torop jolma sian huta nasida mardalan pat mandapothon Jesus. (Mateus 14:13) Ndung bot ari, holsoan ma roha ni angka sisean ni Jesus mangida jolma na torop naung loja jala naung male. Jadi, didokhon sieanna ma tu Jesus asa disuru nasida manuhor sipanganon tu nasida sandiri. Aha na laho ulahonon ni Jesus?

⁹ Dilehon Jesus ma mangan 5.000 halak baoa dohot borua nang dakdanak sian lima roti dohot dua ikan. Boasa dibahen Jesus tanda halongangan on? Ala na asi do rohana tu angka jolma jala holong rohana tu nasida. Godang do diparade Jesus sipanganon, ”mangan ma nasida saluhutna jala bosur” asa boi nasida mardalan pat mulak muse tu hutana be. (Lukas 9:10-17) Dung mangan jala bosur sude halak, 12 ampang ma dipapungu sisean ni Jesus sipanganon na lobi!

10. Aha do na laho masa tu hapogoson di ari na naeng ro?

¹⁰ Marratus juta halak mangolu di bagasan hapogoson alani pamarentaon na mangahut jala na so tigor. Pigapiga angka donganta pe mangolu di bagasan hapogoson. Alai satongkin nari, angka halak na mangoloi Jahowa laho mangolu di portibi na so adong be hapogoson dohot pamarentaon na pangahut. Sihol do roha ni Jahowa Debata na sun hinagogo i, laho pasabashon lomo ni roha ni halak partigor. Dibagabagahon Ibana do laho pasohotonNa angka parungkilon satongkin nari!​—Jaha Psalmen 72:16.

11. Boasa pos rohanta na laho pangkeon ni Jesus do gogona mangurupi sude jolma di tano on, jala dung taboto i aha ma panghorhonna di hita?

¹¹ Tingki di tano on dope Jesus, holan di pigapiga luat jala holan tolu satonga taon do dibahen ibana tanda halongangan. (Mateus 15:24) Alai, urupanna ma nasa jolma saleleng mamarenta ibana di Pamarentaon Saribu Taon. (Psalmen 72:8) Angka tanda halongangan na dibahen Jesus paposhon rohanta, na sihol do roha ni Jesus mamangke gogona laho mangurupi angka jolma. Ndang adong gogonta mambahen tanda halongangan, alai aha do na boi taulahon? Tapangke ma tingkinta dohot gogonta laho paboahon bagabaga ni Debata tu ari na naeng ro na dumenggan tu angka halak. On ma na ingkon diulahon Sitindangi Ni Jahowa. (Rom 1:14, 15) Molo tarimangrimangi aha na laho ulahonon ni Jesus di ari na naeng ro, lam giot ma rohanta paboahon i tu angka halak.​—Psalmen 45:2; 49:4.

12. Boasa pos rohanta na tangkas do ditanda Jesus tano on?

¹² Tingki ditompa Debata tano on dohot nasa isina, Jesus do, ”uju i di lambungna pande.” (Poda 8:22, 30, 31; Kolosse 1:15-17) Alani i, tangkas do ditanda Jesus tano on. Diantusi ibana do songon dia mamangke jala mangatur tano on.

13, 14. Patorang ma songon dia Jesus boi pasohon mara.

¹³ Tingki di tano on dope Jesus, dipatudu ibana na marhuaso ibana sian Debata laho pasohon mara. (Jaha Markus 4:37-39.) Sahalak panulingkit Bibel patorangkon, hata Junani ”habahaba na gogo” na disurat di buku Markus lapatanna alogo habahaba na mansai gogo. Dos do i songon habahaba na mardongan longgur, halisungsung, dohot udan na doras hian. Molo nunga salpu habahaba sisongon i, gabe masursar ma sude. Didok si Mateus ma on ”habahaba na mansai gogo.”​—Mateus 8:24, Bibel Siganup Ari.

¹⁴ Pingkirhon ma situasi on: Hona galumbang ma parau, marmasukan ma aek. Nang pe molengoleng parau i alani galumbang na gogo, modom do Jesus ala naung loja ibana. Alai tung mabiar do angka sisean ni Jesus, jala disungguli ma Jesus huhut mandok: ”Nunga naeng mate hami!” (Mateus 8:25, Bibel Siganup Ari) Dung i dungo ma Jesus jala didok: ”Sip ma! So!” (Markus 4:39) So ma galumbang i, jala ”menak situtu ma.” Mansai longang roha di gogo ni Jesus pasohon mara!

15. Songon dia do Jahowa patuduhon na boi do Ibana pasohon mara?

¹⁵ Sian Jahowa do ro gogo ni Jesus i, alani i taboto ma Jahowa boi pasohon mara. Songon, andorang so masa aek na sumar, Jahowa mandok: ”Ai pitu ari nari paroonku ma udan tu tano on opatpulu ari opatpulu borngin lelengna.” (1 Musa 7:4) Jala molo tajaha di 2 Musa 14:21: ”Mabaor laut i dibahen Jahowa marhitehite alogo na pur.” Jala molo tajaha muse di Jona 1:4 (Bibel Siganup Ari): ”Dibahen Jahowa ma alogo na mansai gogo tu luat i, jala ro ma habahaba na mansai gogo situtu.” Dame ma panghilalaanta mamboto na laho pasohon ni Jahowa ma mara.

16. Boasa boi dame panghilalaanta dung taboto Jahowa dohot Jesus boi pasohon mara?

¹⁶ Dame panghilalaanta ala taboto na boi do Jahowa dohot Jesus pasohon angka mara na ro sian tano on. Saleleng Saribu Taon Pamarentaon ni Jesus, ganup halak na mangolu di tano on ndang mabiar be. Ndang adong be na hona mara manang na mate alani halisungsung, tsunami, angka dolok marapi na mapultak manang lalo. Ndang mabiar hita alana ”joro ni Debata” mian di tongatonga ni jolma! (Pangungkapon 21:3, 4) Boi pos rohanta na lehohon ni Jahowa do gogo tu Jesus, laho pasohon angka mara jala mangarajai tano on saleleng Saribu Taon Pamarentaonna.

17. Aha do na boi taulahon asa maniru Debata dohot Kristus saonari?

¹⁷ Toho ndang boi hita pasohon mara. Holan Jahowa dohot Jesus do na boi mangulahon i. Alai adong do na boi taulahon. Boi tarimangi hata na disurat di Poda 3:27. (Jaha.) Tingki hona mara angka donganta, boi talehon pangurupion tu nasida di pardagingon nang di partondion. (Poda 17:17) Songon, boi ma taurupi marhite silehonlehon tu na hona mara i. Sahalak na mabalu na sega jabuna alani halisungsung mandok: ”Mandok mauliate do ahu ala parsidohot di Organisasi ni Jahowa, ndang holan ala pangurupion di pardagingon alai dohot do di partondion.” Sahalak donganta borua mandele ala sega jabuna dibahen halisungsung. Dung diurupi angka donganta ibana paturehon jabuna, didok ibana: ”Ndang tarhatahon! Ndang boi hupatorang songon dia panghilalaanhu.” Didok ibana muse: ”Mauliate ma di Ho, Jahowa!” Tahamuliatehon do ala olo angka donganta manarihon jala mangurupi angka dongan na manghaporluhon pangurupion. Jala na rumingkot, mandok mauliate ma hita tu Jahowa dohot Jesus na sai manarihon hita.

18. Aha do na sangkan tu rohanta tingki dibahen Jesus tanda halongangan?

¹⁸ Saleleng di tano on Jesus, dipatudu ibana do ”hagogoon ni Debata.” Alai ndang hea dipangke ibana gogona laho pasangaphon dirina manang parohon laba tu dirina sandiri. Jesus mambahen tanda halongangan alana holong do ibana tu angka jolma. Taparsiajari ma gumodang hatorangan taringot i di parsiajaran na mangihut.